မဿဲ 27
27
ယုဒ မိမိကိုယ်ကိုယ်အဆုံးစီရင်ခြင်း
1နံနက်စောစောအချိန်တွင် ယဇ်ပုရောဟိတ်ခေါင်းဆောင်များနှင့် လူထုအကြီးအကဲများသည် တစ်ဖန်တွေ့ဆုံ၍ ယေရှုကို သေဒဏ်ချမှတ်နိုင်ရန် တိုင်ပင်ဆွေးနွေးကြ၏။ 2ထိုသို့ ဆွေးနွေးပြီးသောအခါ ယေရှုကို ချည်နှောင်ကာ ရောမဘုရင်ခံ ပိလတ်မင်းထံသို့ ပို့ဆောင်၍ အပ်လိုက်ကြ၏။
3ထိုအခါ ကိုယ်တော်ကို သစ္စာဖောက်အပ်နှံခဲ့သော ယုဒသည် ယေရှု သေဒဏ်ချမှတ်ခံရသည်ကို ကြားသိသောအခါ နောင်တရလေ၏။ ထို့ကြောင့် ငွေဒင်္ဂါးပြားသုံးဆယ်ကို ယဇ်ပုရောဟိတ်ခေါင်းဆောင်များနှင့် လူထုအကြီးအကဲများထံသို့ ပြန်ယူလာခဲ့ပြီးလျှင် 4“ကျွန်ုပ်သည် အပြစ်ကင်းသောသူကို သစ္စာဖောက်၍ အပြစ်ကျူးလွန်မိပါပြီ” ဟု ဆို၏။
သို့သော် ထိုသူတို့က “ဤကိစ္စသည် ငါတို့နှင့် မည်သို့ဆိုင်သနည်း။ သင့်ကိစ္စကို သင်ကိုယ်တိုင် ဖြေရှင်းလော့” ဟု ဆိုကြ၏။
5ထိုအခါ ယုဒသည် ထိုငွေဒင်္ဂါးပြားသုံးဆယ်ကို ဗိမာန်တော်၌ ပစ်ချ၍ ထွက်သွား၏။ ထို့နောက် အခြားတစ်နေရာသို့ သွားပြီးလျှင် မိမိကိုယ်ကိုယ် ဆွဲကြိုးချ၍ အဆုံးစီရင်လေ၏။
6ယဇ်ပုရောဟိတ်ခေါင်းဆောင်များကလည်း ထိုငွေများကို ယူ၍ “ဤငွေသည် လူသတ်ရန် ပေးထားသော ငွေဖြစ်သောကြောင့် ဗိမာန်တော် အလှူသေတ္တာထဲသို့ မသွင်းသင့်” ဟု ဆိုကြ၏။ 7ထိုသို့ ဆွေးနွေးတိုင်ပင်ကြပြီးလျှင် သူတို့သည် နောက်ဆုံး၌ ထိုငွေဖြင့် အိုးထိန်းသမား၏ လယ်ကွက်ကို လူမျိုးခြားဧည့်သည်များအတွက် သင်္ချိုင်းအဖြစ် အသုံးပြုရန် ဝယ်ယူကြ၏။ 8ထို့ကြောင့် ထိုလယ်ကွက်ကို ယနေ့တိုင်အောင် “သွေးမြေ” ဟု ခေါ်တွင်လေ၏။ 9ဤအရာသည် ပရောဖက်ယေရမိ၏ ဟောပြောချက်အတိုင်း ဖြစ်လာစေခြင်းဖြစ်၏။ ထိုဟောပြောချက်မှာ
“သူတို့သည် ငွေဒင်္ဂါးပြားသုံးဆယ်ကို ယူကြ၏။
ထိုငွေသည် အစ္စရေးလူမျိုးတို့က သူ့အား တန်ဖိုးဖြတ်သောငွေ ဖြစ်၏။
10ထို့နောက် ထာဝရဘုရား မှာကြားတော်မူသည့်အတိုင်း ထိုငွေဖြင့်
အိုးထိန်းသမား၏ လယ်ကွက်ကို ဝယ်ယူကြသည်”
ဟူ၍ ဖြစ်၏။
ပိလတ်မင်းရှေ့တွင် စစ်ဆေးခံတော်မူခြင်း
11ယေရှုသည် ရောမဘုရင်ခံ ပိလတ်မင်းရှေ့၌ ရပ်တော်မူရာ ပိလတ်မင်းက “သင်သည် ဂျူးတို့၏ ရှင်ဘုရင်ဖြစ်သလော” ဟု မေးလေ၏။
ယေရှုကလည်း “မင်းကြီးဆိုသည့်အတိုင်း မှန်ပါသည်” ဟု ဖြေတော်မူ၏။
12သို့သော် ယဇ်ပုရောဟိတ်ခေါင်းဆောင်များနှင့် လူထုအကြီးအကဲများ၏ စွပ်စွဲချက်များကို ယေရှုသည် တစ်ခွန်းမျှ တုံ့ပြန်တော်မမူပေ။ 13ထိုအခါ ပိလတ်မင်းက ယေရှုအား “သူတို့သည် သင့်အား စွပ်စွဲသည့်အချက်များကို သင်သည် မကြားသလော” ဟု ဆို၏။ 14သို့ရာတွင် ယေရှုသည် စကားတစ်ခွန်းမျှ ပြန်၍ မိန့်တော်မမူဘဲနေသဖြင့် ဘုရင်ခံသည် အလွန်အံ့သြလေ၏။
15ပသခါပွဲတော် ကျင်းပချိန်တွင် ရောမဘုရင်ခံသည် လူထုအလိုရှိသော အကျဉ်းသားတစ်ဦးကို နှစ်စဉ် လွတ်ငြိမ်းချမ်းသာခွင့် ပေးလေ့ရှိ၏။ 16ထိုနှစ်တွင် နာမည်ဆိုးဖြင့် ကျော်ကြားသော ဗာရဗ္ဗ#27:16 အချို့လက်ရေးမူကျမ်းများတွင် “ယေရှုဗာရဗ္ဗ” ဟု ဖော်ပြထားသည်။ဟု ခေါ်သည့် အကျဉ်းသားတစ်ဦးရှိ၏။ 17သို့ဖြစ်၍ လူထုတို့သည် ပိလတ်မင်းအိမ်ရှေ့တွင် စုဝေးရောက်ရှိသောအခါ ပိလတ်မင်းက “သင်တို့သည် မည်သူ့ကို လွှတ်ပေးစေလိုသနည်း။ ဗာရဗ္ဗလော၊ သို့မဟုတ် ခရစ်တော်#27:17 ဂရိဘာသာအားဖြင့် “ခရစ်တော်၊” ဟေဗြဲဘာသာအားဖြင့် “မေရှိယ” ဖြစ်ပြီး ထိုနှစ်ခုလုံး၏ အဓိပ္ပာယ်မှာ “ဘိသိက်ခံရသူ၊” သို့မဟုတ် “ရွေးကောက်ခံရသူ” ဖြစ်သည်။ဟု ခေါ်သော ယေရှုလော” ဟု သူတို့အား မေးလေ၏။ 18ထိုသို့မေးရခြင်းမှာ ဂျူးဘာသာရေးခေါင်းဆောင်များက ယေရှုကို မနာလို၍ ဖမ်းဆီးကြောင်း ပိလတ်မင်း သိသောကြောင့် ဖြစ်၏။
19ထိုအချိန်၌ ပိလတ်မင်းသည် တရားခွင်တွင် ထိုင်နေစဉ် သူ၏ ဇနီးက “ထိုအပြစ်ကင်းသောသူအား မည်သည့်အရာကိုမျှ မပြုနှင့်။ အဘယ်ကြောင့်ဆိုသော် ငါသည် မနေ့ညက အိပ်မက်တွင် ထိုသူနှင့်ပတ်သက်၍ အလွန်စိတ်ဒုက္ခရောက်ရပါ၏” ဟု ပိလတ်မင်းထံသို့ သတင်းပို့လေ၏။
20ထိုအချိန်တွင် ဗာရဗ္ဗကို လွှတ်ပေး၍ ယေရှုကို သေဒဏ်ချမှတ်စေမည့်အကြောင်း တောင်းဆိုရန် ယဇ်ပုရောဟိတ်ခေါင်းဆောင်များနှင့် အကြီးအကဲများသည် လူထုအား တိုက်တွန်းသွေးဆောင်ကြ၏။ 21ထို့ကြောင့် ပိလတ်မင်းက ထပ်မံ၍ “ဤသူနှစ်ဦးအနက် မည်သူ့ကို လွှတ်စေလိုသနည်း” ဟု ပြန်လည် မေးသောအခါ လူထုက “ဗာရဗ္ဗ” ဟု အော်ပြောကြ၏။
22ထိုအခါ ပိလတ်မင်းက ထပ်မံ၍ “ခရစ်တော်ဟု ခေါ်သော ယေရှုကို မည်သို့ပြုရမည်နည်း” ဟု မေးလေ၏။
လူထုကလည်း “လက်ဝါးကပ်တိုင်တွင် သတ်ပါ” ဟု အော်ဟစ်ပြောဆိုကြ၏။
23ပိလတ်မင်းက တစ်ဖန် “အဘယ်ကြောင့်နည်း။ သူသည် မည်သည့်ပြစ်မူကို ကျူးလွန်ခဲ့သနည်း” ဟု ဆက်၍ မေးပြန်သော် လူထုက “လက်ဝါးကပ်တိုင်တွင် သတ်ပါ” ဟု ပို၍ အော်ဟစ်ကြ၏။
24ပိလတ်မင်းသည် မိမိဆက်လက်ပြောဆိုရန် မည်သို့မျှမဖြစ်နိုင်ကြောင်းနှင့် လူထု ရုန်းရင်းဆန်ခတ်ဖြစ်လာမည့်အခြေအနေကို မြင်လေ၏။ ထို့ကြောင့် လူထုရှေ့တွင် ရေဇလုံ၌ သူ၏ လက်ကို ဆေးကာ “ဤသူသေရခြင်းမှာ ငါ၏ တာဝန်မဟုတ်။ သင်တို့၏ တာဝန်သာဖြစ်သည်” ဟု ဆိုလေ၏။
25လူထုကလည်း “ဤသူသေရခြင်းအတွက် အကျွန်ုပ်တို့နှင့် အကျွန်ုပ်တို့သားသမီးများ၏ တာဝန်သာဖြစ်ပါစေ” ဟု ပြန်လည် အော်ဟစ်ပြောဆိုကြ၏။
26ထိုအခါ ပိလတ်မင်းသည် ဗာရဗ္ဗကို လွှတ်ပေးလေ၏။ ယေရှုကိုမူ ကျာပွတ်ဖြင့် ရိုက်နှက်စေပြီး လက်ဝါးကပ်တိုင်ပေါ်တွင် သတ်ရန် ရောမစစ်သားများထံသို့ အပ်လိုက်၏။
ယေရှုကို စစ်သားများက ပြက်ရယ်ပြုကြခြင်း
27စစ်သားတချို့သည် ယေရှုကို ရောမဘုရင်ခံပိလတ်မင်း၏ ရုံးတော်သို့ ခေါ်ဆောင်သွားကြ၏။ ထို့နောက် စစ်တပ်တစ်တပ်လုံးသည် ယေရှု၏ အနားသို့ စုရုံးလာကြ၏။ 28သူတို့သည် ကိုယ်တော်၏ အဝတ်တော်ကို ချွတ်၍ ဝတ်ရုံနီကို ခြုံပေးကြ၏။ 29ထို့နောက် သူတို့သည် ဆူးခက်ဖြင့် ရက်ထားသောသရဖူတစ်ခုကို ကိုယ်တော်၏ ဦးခေါင်းတော်၌ ဆောင်းပေးကြ၏။ ကျူရိုးတစ်ချောင်းကို ရာဇလှံတံအဖြစ် လက်ယာလက်တော်တွင် ကိုင်စေကြ၏။ ထို့နောက် ကိုယ်တော်၏ ရှေ့တော်တွင် ဒူးထောက်လျက် “ဂျူးတို့၏ရှင်ဘုရင် ဘုန်းကြီးပါစေ” ဟု ပြက်ရယ်ပြုကြ၏။ 30သူတို့သည် ကိုယ်တော်ကို တံတွေးဖြင့် ထွေးပြီးလျှင် လက်တော်တွင် ကိုင်ထားသော ကျူရိုးကို ယူ၍ ခေါင်းတော်ကို ရိုက်နှက်ကြ၏။ 31ထိုသို့ ပြက်ရယ်ပြုကြပြီးနောက် ဝတ်ရုံကို ချွတ်၍ အဝတ်တော်ကို ပြန်ဝတ်ပေးကြ၏။ ထို့နောက် လက်ဝါးကပ်တိုင်ပေါ်တွင် သတ်ရန် ခေါ်ဆောင်သွားကြ၏။
လက်ဝါးကပ်တိုင်တွင် သတ်ခြင်း
32သူတို့ထွက်သွားကြစဉ် လမ်းတွင် ရှိမုန်ဟု ခေါ်သော ကုရေနေမြို့သား#27:32 “ကုရေနေ” သည် မြောက်အာဖရိကတွင်းမှ မြို့တစ်မြို့ဖြစ်သည်။တစ်ဦးကို တွေ့သဖြင့် သူ့အား ယေရှု၏ လက်ဝါးကပ်တိုင်ကို အတင်းအကျပ်ထမ်းစေကြ၏။ 33ထိုမှတစ်ဆင့် ဦးခေါင်းခွံအရပ်ဟု အဓိပ္ပာယ်ရသော ဂေါလဂေါသအမည်တွင်သည့်အရပ်သို့ သွားကြ၏။ 34ထိုနေရာ၌ စစ်သားများက ဆေးခါးနှင့် ရောစပ်ထားသောစပျစ်ဝိုင်ကို ကိုယ်တော်အား တိုက်ကြ၏။ ကိုယ်တော်သည် မြည်းစမ်းကြည့်တော်မူပြီးလျှင် မသောက်ဘဲနေတော်မူ၏။
35ထို့နောက် သူတို့သည် ကိုယ်တော်ကို လက်ဝါးကပ်တိုင်ပေါ်တွင် ရိုက်ထားပြီးလျှင် အဝတ်တော်တို့ကို မဲနှိုက်၍ ခွဲဝေကြ၏။ 36ထို့နောက် ထိုနေရာ၌ ထိုင်၍ ကိုယ်တော်ကို စောင့်ကြည့်ကြ၏။ 37ကိုယ်တော်အား စွဲချက်တင်သည့် အပြစ်ကို ဖော်ပြသောစာမှာ “ဂျူးတို့၏ ရှင်ဘုရင် ယေရှုဖြစ်၏” ဟူ၍ ကမ္ပည်းရေးထိုးပြီး ဦးခေါင်းတော်အထက်တွင် ထားကြ၏။ 38ထို့နောက် ဓားပြနှစ်ဦးကိုလည်း ကိုယ်တော်နှင့်အတူ လက်ယာတော်ဘက်တွင် တစ်ဦး၊ လက်ဝဲတော်ဘက်တွင် တစ်ဦး လက်ဝါးကပ်တိုင်တွင် ရိုက်ထားကြ၏။
39ဖြတ်သန်းသွားလာသူတို့သည် ခေါင်းခါလျက် 40“ဗိမာန်တော်ကို ဖြိုဖျက်၍ သုံးရက်အတွင်း ပြန်တည်ဆောက်မည့်သူ… သင့်ကိုယ်သင်ကယ်လော့။ သင်သည် ဘုရားသခင်၏သားတော် မှန်လျှင် လက်ဝါးကပ်တိုင်မှ ဆင်းလော့” ဟု ကိုယ်တော်အား ပြက်ရယ်ပြုကြ၏။
41ယဇ်ပုရောဟိတ်ခေါင်းဆောင်များ၊ ကျမ်းတတ်ဆရာများနှင့် အကြီးအကဲများကလည်း 42“သူသည် တစ်ပါးသူတို့ကို ကယ်တင်၏။ မိမိကိုယ်ကိုယ်မူ မကယ်တင်နိုင်ပေ။ သူသည် အစ္စရေးတို့၏ရှင်ဘုရင် မဟုတ်သလော။ လက်ဝါးကပ်တိုင်မှ ဆင်းလာပါစေ။ ဆင်းလာလျှင် ငါတို့ သူ့ကို ယုံမည်။ 43သူသည် ဘုရားကို ယုံကြည်ကိုးစား၏။ ဘုရားသခင်သည် အလိုတော်ရှိတော်မူလျှင် ယခုပင် သူ့ကို ကယ်တင်တော်မူပါစေ။ သူက ‘ငါသည် ဘုရားသခင်၏ သားတော် ဖြစ်၏’ ဟု ပြောလေပြီ” ဟု ဆိုကာ ပြက်ရယ်ပြုကြ၏။ 44ကိုယ်တော်နှင့်အတူ လက်ဝါးကပ်တိုင်ပေါ်တွင် ရိုက်ထားခြင်းခံရသောဓားပြများကလည်း ထိုနည်းတူ ကိုယ်တော်ကို ပြက်ရယ်ပြုကြ၏။
အသက်ချုပ်တော်မူခြင်း
45မွန်းတည့်ချိန်#27:45 မူရင်းဂရိကျမ်းမှ တိုက်ရိုက်ပြန်ဆိုလျှင် “ဆဋ္ဌမနာရီ” ဖြစ်သည်။ ဂျူးလူမျိုးများသည် အချိန်နာရီကို နံနက်ခြောက်နာရီမှ စတင်၍ ရေတွက်သောကြောင့် “ဆဋ္ဌမနာရီ” ဟု ဆိုရာတွင် မွန်းတည့် ဆယ့်နှစ်နာရီကို ဆိုလိုခြင်းဖြစ်သည်။မှစ၍ မွန်းလွဲသုံးနာရီ#27:45 မူရင်းဂရိကျမ်းမှ တိုက်ရိုက်ပြန်ဆိုလျှင် “နဝမနာရီ” ဖြစ်သည်။ ဂျူးလူမျိုးများသည် အချိန်နာရီကို နံနက်ခြောက်နာရီမှ စတင်၍ ရေတွက်သောကြောင့် “နဝမနာရီ” ဟု ဆိုရာတွင် မွန်းလွဲသုံးနာရီကို ဆိုလိုခြင်းဖြစ်သည်။တိုင်အောင် မြေပြင်တစ်ခွင်လုံးတွင် အမှောင်ဖုံးလေ၏။ 46မွန်းလွဲသုံးနာရီအချိန်ခန့်တွင် ယေရှုက “ဧလိ… ဧလိ… လာမရှာဗခသာနိ” ဟု ကျယ်လောင်စွာ အော်ဟစ်တော်မူ၏။ ထိုစကား၏အဓိပ္ပာယ်မှာ “အကျွန်ုပ်ဘုရား… အကျွန်ုပ်ဘုရား… အကျွန်ုပ်ကို အဘယ်ကြောင့် စွန့်ပစ်တော်မူပါသနည်း”#27:46 ဆာ ၂၂:၁။ ဟူ၍ ဖြစ်၏။
47အနီးတွင် ရပ်နေသောလူတချို့က ထိုစကားကို ကြားလျှင် ယေရှုသည် ပရောဖက်ဧလိယကို ခေါ်သည်ဟု ထင်မှတ်ကြ၏။ 48ထိုသူတို့ထဲမှ လူတစ်ဦးသည် ချက်ချင်းပြေး၍ အချဉ်ဖောက်ထားသောစပျစ်ဝိုင်၌ ရေမြှုပ်ကို နှစ်ပြီးလျှင် ကျူရိုးဖျား၌ ချည်လျက် ကိုယ်တော့်ကို သောက်ရန် ပေးလေ၏။ 49သို့သော် အခြားသူတို့က “ရှိပါလေစေ။ ဧလိယသည် သူ့ကို ကယ်ရန် လာမည်၊ မလာမည်ကို ကြည့်ကြစို့”#27:49 အချို့လက်ရေးမူကျမ်းများတွင် “အခြားသောသူတစ်ယောက်က လှံကိုယူ၍ နံဘေးတော်သို့ ထိုးသွင်းရာ ရေနှင့် သွေးများ စီးကျလာသည်” ဟု ဖော်ပြထားသည်။ ဟု ပြောဆိုကြ၏။
50ထို့နောက် ယေရှုသည် ထပ်မံ၍ ကျယ်လောင်စွာ အော်ဟစ်တော်မူပြီးလျှင် အသက်တော်ချုပ်တော်မူ၏။ 51ထိုအခါ ဗိမာန်တော်ကန့်လန့်ကာသည် အထက်စွန်းမှ အောက်စွန်းတိုင်အောင် နှစ်ခြမ်းကွဲလေ၏။ မြေငလျင် လှုပ်၍ ကျောက်တုံးများလည်း အက်ကွဲကြ၏။ 52သင်္ချိုင်းဂူများ ပွင့်၍ သေလွန်ပြီးသောယုံကြည်သောသူ#27:52 “ယုံကြည်သောသူ” မူရင်းဂရိကျမ်းတွင် “သန့်ရှင်းသူများ” ဟု ပါရှိသည်။များစွာတို့၏ ကိုယ်ခန္ဓာသည် ရှင်ပြန်ထမြောက်ကြ၏။ 53ယေရှုရှင်ပြန်ထမြောက်တော်မူပြီးနောက် ထိုသူတို့သည် သင်္ချိုင်းဂူတို့ကို စွန့်ခွာ၍ သန့်ရှင်းသောဂျေရုဆလင်မြို့ထဲသို့ ဝင်ပြီးလျှင် လူများစွာအား ကိုယ်ထင်ပြကြ၏။
54ရောမတပ်မှူး#27:54 “စစ်သားတစ်ရာကို အုပ်ချုပ်ရသော တပ်မှူး” ကို ဆိုလိုသည်။နှင့်အတူ ယေရှုကို စောင့်ကြည့်နေကြသော အခြားစစ်သားတို့သည် မြေငလျင်လှုပ်၍ ဖြစ်ပျက်သမျှကို တွေ့မြင်ကြသောအခါ အလွန်ကြောက်လန့်ကြ၏။ သူတို့က “ဤသူသည် ဧကန်အမှန်ပင် ဘုရားသခင်၏ သားတော် ဖြစ်သည်” ဟု ဆိုကြ၏။
55ယေရှုကို အလုပ်အကျွေးပြုရန် ဂါလိလဲပြည်မှ အတူပါလာကြသည့် အမျိုးသမီးများစွာတို့သည်လည်း အဝေးက ရပ်လျက် စောင့်ကြည့်နေကြ၏။ 56ထိုသူတို့အထဲတွင် မာဂဒလမာရိ၊ ယာကုပ်နှင့် ယောသပ်၏ မိခင်မာရိ၊ ဇေဗေဒဲ၏ သားများ၏ မိခင်တို့ ပါကြ၏။
ယေရှုကို သင်္ဂြိုဟ်ခြင်း
57ညနေစောင်းသောအခါ အရိမဿဲမြို့မှ သူဌေးတစ်ဦးဖြစ်ပြီး ယေရှု၏ တပည့်တော်လည်းဖြစ်သော ယောသပ်သည် 58ပိလတ်မင်းထံသို့ သွား၍ ယေရှု၏ အလောင်းတော်ကို တောင်းလေ၏။ ပိလတ်မင်းကလည်း အလောင်းတော်ကို ယောသပ်အား ပေးရန် အမိန့်ပေး၏။ 59ယောသပ်သည် အလောင်းတော်ကို ယူ၍ စင်ကြယ်သော ပိတ်ချောဖြင့် ရစ်ပတ်လေ၏။ 60အလောင်းတော်အား မိမိကိုယ်ပိုင်ဖြစ်သော ကျောက်ဆောင်ကို ထွင်းထားသည့် သင်္ချိုင်းဂူသစ်တွင် သင်္ဂြိုဟ်လေ၏။ ထို့နောက် သူသည် ကျောက်တုံးကြီးကို ဂူဝသို့ လှိမ့်၍ ပိတ်ထားပြီးမှ ပြန်လေ၏။ 61မာဂဒလမာရိနှင့် အခြားမာရိတို့သည် သင်္ချိုင်းဂူနှင့် မျက်နှာချင်းဆိုင်တွင် ထိုင်၍ စောင့်ကြည့်နေကြ၏။
သင်္ချိုင်းဂူ၌ အစောင့်ထားခြင်း
62ပြင်ဆင်ရာနေ့ဟူသောအဖိတ်နေ့ကုန်လွန်၍ ဥပုသ်နေ့ရောက်သော် ယဇ်ပုရောဟိတ်ခေါင်းဆောင်များနှင့် ဖာရိရှဲများသည် ပိလတ်မင်းထံသို့ သွား၍ 63“အရှင်မင်းကြီး… ထိုလှည့်ဖြားသူအသက်ရှင်စဉ်အခါက ‘ငါသည် သုံးရက်ကြာပြီးနောက် သေခြင်းမှ ထမြောက်မည်’ ဟု ပြောဆိုခဲ့သည်ကို အကျွန်ုပ်တို့ မှတ်မိပါ၏။ 64ထို့ကြောင့် သင်္ချိုင်းဂူဝကို သုံးရက်မြောက်နေ့တိုင်အောင် တံဆိပ်ခတ်၍ စောင့်ကြပ်စေရန် အမိန့်ပေးပါ။ သို့မှသာလျှင် သူ၏ တပည့်တော်တို့သည် အလောင်းတော်ကို ခိုးယူ၍ လူတိုင်းအား ‘ကိုယ်တော်သည် သေခြင်းမှ ထမြောက်တော်မူပြီ’ ဟု ကြေညာမည်ကို တားဆီးနိုင်ပါမည်။ ထိုသို့ကြေညာလာပါက နောက်လှည့်ဖြားမှုသည် ယခင်လှည့်ဖြားမှုထက် ပို၍ ဆိုးပါလိမ့်မည်” ဟု ဆိုကြ၏။
65ပိလတ်မင်းကလည်း “အစောင့်တပ်သားများကို ခေါ်၍ သင်္ချိုင်းဂူကို သင်တို့တတ်နိုင်သမျှ လုံခြုံအောင် စောင့်ကြပ်ထားကြလော့” ဟု ဆိုလေ၏။ 66ထို့ကြောင့် သူတို့သည် သင်္ချိုင်းဂူကို တံဆိပ်ခတ်နှိပ်ကြပြီးလျှင် စောင့်ကြပ်ရန် အစောင့်တပ်သားများကို ချထားကြ၏။
Айни замон обунашуда:
မဿဲ 27: BCB
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.