Лк 24
24
24 ГЛАВА
1-12 Ылыж кынелмаш. 13-35 Еммаусыш кайыме корнышто. 36-49 Ылыжше Иисусын тунемшыж-влаклан кончымыжо. 50-53 Иисусын пылпомышко нӧлталтмыже.
1Шуматкече эрлашыжым, эрдене эрак, ӱдырамаш-влак, ямдылыме ӱйыштым налын, шӱгар деке толыныт. Нунын дене пырля икмыняр вес еҥ лийын. 2Нуно ужыныт: шӱгар аҥым петырыше кӱм кораҥдыме. 3А кӧргышкӧ пурымеке, Господь Иисусын капшым муын огытыл. 4Кунам ӱдырамаш-влак мом ужмыштлан ӧрыныт, кенета ончылнышт йылгыжше вургеман кок пӧръеҥ лектын шогалын. 5Лӱдмышт дене ӱдырамаш-влак вуйыштым кумык сакеныт, да пӧръеҥ-влак нунылан ойленыт: «Молан те илышым колышо-влак коклаште кычалыда? 6Тудо тыште уке, а ылыж кынелын. Эше Галилейыште улмыж годым мом тыланда ойлен, шарналтыза: 7”Айдеме Эрге языкан еҥ-влакын кидыш пуалтшаш, пудален сакыме лийшаш да кумшо кечын ылыж кынелшаш”». 8Нуно Тудын мутшым шарналтеныт.
9Шӱгар деч пӧртылмеке, чыла тидым латик тунемшыжлан да чыла молылан каласкаленыт. 10Ӱдырамаш-влак Мария Магдалина, Иоанна, Иаковын Мария аваже да молат лийыныт. Нуно Апостол-влаклан тидым каласкаленыт, 11но нунылан мутышт так ойлыштмыла чучын, ӱдырамаш-влаклан ӱшанен огытыл. 12Туге гынат Петр тунамак шӱгар деке куржын. Ончалаш пӱгырнымеке, вӱдылмӧ вынер кийымым веле ужын да, мо лиймылан ӧрын, мӧҥгеш пӧртылын.
13Тиде кечынак Иерусалим гыч Еммаус манме ялыш – тиде корным йолын кок шагатыште эрташ лиеш улмаш#24:13 Кок шагат кайыме корно – грекла: кудло стадий. Ик стадийын кутышыжо 185 метр наре. – кок тунемшыже каен 14да, мо лийын, чылаж нергенат шке коклаштышт мутланеныт. 15Мутланымышт да шонкалымышт годым Иисус Шкежат нунын деке лишемын да пырля ошкылын. 16Но нунын шинчашт сокыр гай лийын, нуно Тудым пален огытыл. 17Иисус нунылан каласен: «Кайышыла те мо нерген мутланеда? Молан те шӱлыкан улыда?» 18Иктыже, Клеопа лӱманже, Иисуслан каласен: «Тиде кечылаште тушто мо лийме нерген палыдымыже Иерусалимыш толшо-влак коклаште Тый веле улат докан». 19Иисус йодын: «Мо нерген?» Нуно каласеныт: «Назарет Иисус дене мо лийме нерген. Тудо пророк лийын, Юмо да уло калык ончылно паша денат, шомак денат виян, 20но мемнан архиерейна да вуйлатышына-влак Тудым кучен пуэныт да пушташ пунчалым луктыктеныт, Тудым ыресеш пудален сакеныт. 21А ме ӱшанен улына: кӧ Израильым эрыкыш лукшаш, тиде – Тудо. Но але тиде чыла огыл: Иисус дене тыге лиймылан таче кумшо кече, 22а теве мемнан ӱдырамаш кокла гыч икмынярже мемнам ӧрыктарыш. Нуно эрдене эрак шӱгар деке каеныт, 23Тудын капшым муын огытылат, пӧртылыныт да ойленыт: мыланна Суксо-влакат конченыт да Иисус ила маныныт. 24Мемнан дене пырля лийше кокла гыч икмынярышт шӱгар деке каеныт да ӱдырамаш-влак каласкалыме гайымак ужыныт, но Тудым Шкенжым ужын огытыл».
25Иисус каласен: «Могай те шонен моштыдымо айдеме улыда! Мом пророк-влак ойленыт, тудлан ӱшанаш тендан шӱмда могай юватылше! 26Христос тиде орланымаш гоч эртышаш да вара чапышкыже шушаш огыл ыле мо?» 27Вара Моисей деч да чыла пророк деч тӱҥалын, Шкеж нерген уло Возымаште мом каласыме, нунылан умылтарен.
28Кудо ялыш каеныт, тушко лишеммеке, Иисус умбакыжат каяш шонышыла койын. 29Но Клеопа да вес тунемшыже Тудым чареныт: «Мемнан дене пырля код, кече кас велке тайнен». Нунын дене кодаш манын, Иисус пӧртыш пурен. 30Нунын дене ӱстелтӧрыштӧ лиймыж годым Иисус киндым налын, благословитлен, тодылын да нунылан пуэн. 31Тунам шинчашт почылтын да нуно Тудым паленыт, но Иисус нунылан койдымо лийын. 32Тунемшыж-влак икте-весылан ойленыт: «Мыланна корнышто ойлымыжо, Возымашым умылтарымыже годым шӱмна ыш йӱлӧ мо?»
33Нуно кынелыныт да тунамак Иерусалимыш пӧртылыныт. Тушто пырля погынышо латик Апостол да моло тунемшыж деке миеныт. 34Погынышо-влак каласеныт: «Господь чынжымак ылыж кынелын да Симонлан кончен». 35А Клеопа ден йолташыже корнышто мо лийме да киндым тодылмыж годым кузе Иисусым палымышт нерген каласкаленыт.
36Нунын каласкалымышт годымак Иисус Шкежак коклаштышт шоген да ойлен: «Тыныслык лийже тыланда!» 37Нуно, чот ӧрын да лӱдын, шӱлышым ужына, шоненыт. 38Иисус нунын деч йодын: «Молан те тыге ӧрыда? Молан тендан шӱмыштыда кокыте шонымаш шочеш? 39Мыйын кидем да йолем ончалза – тиде Мый Шке улам. Мыйым тӱкалтыза да ончалза. Шӱлышын капшат, лужат уке, а Мыйын, шкеат ужыда, уло». 40Тыге ойлышыла, нунылан кидше ден йолжым ончыктен. 41Нуно куанымышт да ӧрмышт дене эше ӱшанен огытылат, Иисус йодын: «Тендан иктаж-могай кочкышда тыште уло?» 42Нуно кӱэштме кол ужашым да карашан мӱйым пуэныт. 43Иисус налын да ончылныштак кочкын.
44Вара каласен: «Эше тендан дене пырля улмем годым тидын нергенак ойленам: Мыйын нерген Моисейын законыштыжо, пророк-влакын книгаштышт да Псаломлаште возымо чылажат шукталтшаш». 45Возымашым умылен кертышт манын, вара ушыштым почын. 46Иисус каласен: «Тыге возымо: Христос орланышаш да кумшо кечын колымаш гыч ылыж кынелшаш улмаш. 47Иерусалим гыч тӱҥалын, уло калык-влаклан Тудын лӱм дене язык деч кораҥме да языкым касарыме нерген увертараш кӱлеш. 48Те тидлан таныклыше улыда. 49А Ачам мом сӧрен, Мый тыланда тудым колтем. Кӱшыч волышо куат тендам вӱдылмешке, Иерусалим олашак кодса».
50Иисус тунемшыж-влакым ола гыч Вифаний марте луктын, тушто Тудо кидшым нӧлталын да нуным благословитлен. 51Тыгерак лийын: благословитлымыж годымак Иисус нунын деч торлен да пылпомышко нӧлталтын. 52Нуно Тудлан, сукен, вуйым савеныт. Вара Иерусалимыш чот куанен пӧртылыныт 53да эре храмыште лийыныт, Юмым чапландареныт да моктеныт. Аминь.
Айни замон обунашуда:
Лк 24: УС
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Библийым кусарыше институт, Хельсинки 2007