Лк 23
23
23 ГЛАВА
1-5 Иисус Пилат ончылно. 6-12 Иисус Ирод ончылно. 13-25 Пушташ пунчалмаш. 26-43 Ыресеш пудален сакымаш. 44-49 Иисусын колымыжо. 50-56 Иисусым тойымаш.
1Тунам нуно чылан кынелыныт да Иисусым Пилат деке наҥгаеныт. 2Иисусым титаклаш тӱҥалыныт: «Ме ужынна: тиде Еҥ мемнан калыкым пудырата, кесарьлан йозакым тӱлаш чара, Шкенжым Христос-Кугыжа улам манеш». 3Иисус деч Пилат йодын: «Тый иудей-влакын Кугыжашт улат?» Иисус вашештен: «Тый тидым каласышыч». 4Архиерей-влаклан да калыклан Пилат ойлен: «Тиде Айдемым нимо шотыштат титаканым ом уж». 5Но нуно ӱшандарен ойленыт: «Тудо калыкым пудыратылеш, уло Иудей мучко туныкта. Тӱҥалынже Галилей гыч, а ынде тышке толын».
6Галилей нерген колмеке, Пилат йодын: «Тудо Галилей гыч мо?» 7Иисус Иродын кучымо кундем гыч улмым пален налмеке, Тудым Ирод деке колтен. Тиде жапыште Ирод шкежат Иерусалимыште лийын.
8Ирод шукертак Иисусым ужнеже улмаш, сандене, Тудым ужмеке, чот куанен. Иисус нерген ончычак шуко колын улмаш, да ынде иктаж-могай палдарыше палым ончыктыжо, шонен. 9Иисуслан шуко йодышым пуэден, но Иисус нимом вашештен огыл. 10Архиерей ден закон туныктышо-влак туштак шогеныт да Тудым чот титакленыт. 11Иродат шке сарзыж-влак дене пырля Тудым намыслен да воштылын, а вара чапле вургемым чиктен да Пилат деке мӧҥгеш колтен. 12Тиде кечын Ирод ден Пилат йолташыш савырненыт, ондакше икте-весе дене тушман лийыныт.
13Архиерей да вуйлатыше-влакым, тыгак калыкым поген, 14Пилат нунылан ойлен: «Калыкым пудыратылше семын те тиде Айдемым мый декем конденда. Теве мый тендан ончылно Тудым шымлен лектым, но тендан титаклыме дене келшыше ик титакшымат шым му. 15Иродат муын огыл, Тиде Еҥым тудын деке колтенам. Пушташ йӧрышым Тудо нимом ыштен огыл. 16Мый Тудым сола дене кыраш кӱштем, а вара колтем». 17А Пилатлан кучен петырыме-влак кокла гыч иктыжым нунылан пайрем годым эрыкыш колташ кӱлын.
18Но уло калык кычкыраш тӱҥалын: «Тудлан колымаш! А мыланна Вараввам луктын колто!» 19Олаште ала-могай пуламырым нӧлтымылан да еҥым пуштмылан Вараввам петырен шындыме улмаш. 20Иисусым эрыкыш лукташ шонен, Пилат угыч нунылан ойлен. 21А нуно кычкыреныт: «Пудален саке! Ыресеш пудален саке!» 22Кумшо гана Пилат каласен: «Могай осалым Тудо ыштен? Тудым пушташ мый нимогай амалым ом уж. Тудым сола дене кыраш кӱштем, вара колтем». 23Иисусым ыресеш пудален сакаш манын нуно, чот кычкырен, пеҥгыдын шогеныт. Мучашлан, архиерей-влак дене пырля кычкырен сеҥеныт. 24Пилат нунын йодмыштым шукташ шонен пыштен. 25Пуламырым нӧлтымылан да еҥым пуштмылан казаматыш шындымым нунын йодмышт почеш эрыкыш луктын, а Иисусым шонымышт семын пушташ пуэн.
26Кунам Иисусым наҥгаеныт, Кириней гыч Симоным руалтен кученыт. Тудо пасу гыч пӧртылеш улмаш. Ӱмбакыже ыресым пыштеныт да Иисус почеш нумал наҥгайыктеныт. 27Иисус почеш моткоч шуко еҥ каен, Тудын верч ойгырен шортшо ӱдырамаш-влакат лийыныт. 28Иисус нунын велке савырнен да каласен: «Иерусалимын ӱдыржӧ-влак, Мыйын верч ида шорт. Шкендан верч да йочада верч шортса. 29Тугай жап толеш, кунам ойлаш тӱҥалыт: ”Йочам ыштен кертдыме, азам ыштыдыме да чызым пукшыдымо-влак пиалан улыт”. 30Тунам курык-влаклан ”Мемнан ӱмбаке камвочса!”, чоҥга-влаклан ”Мемнам леведса!” манын ойлаш тӱҥалыт.#23:30 Ос 10:8. 31Ужар пушеҥге дене тыге ыштат гын, кукшыж дене мо лиеш?»
32Иисус дене пырля пушташ осалым ыштыше кок еҥымат наҥгаеныт. 33А кунам Саҥга манме верыш толыныт, тушто Иисусым да осалым ыштыше-влакым ыресеш пудаленыт – иктыжым пурла могыреш, весыжым шола могыреш. 34Иисус ойлен: «Ачай, титакыштым кудалте, нуно мом ыштат, огыт умыло». Шывагам кучен, Тудын вургемжым шеледеныт.
35Калык ончен шоген. Вуйлатыше-влакат нунын дене пырля игылт воштылыныт да ойленыт: «Тиде Айдеме молым утарен. Тудо Христос, Юмын Ойырен налмыже гын, тек ынде Шкенжым утара!» 36Сарзе-влакат Тудым игылтыныт. Лишемыныт, уксусым темленыт 37да ойленыт: «Тый иудей-влакын Кугыжашт улат гын, Шкендым утаре!» 38Тудын вуйжо ӱмбалне грек, рим да еврей буква дене возымо лийын: «Тиде – иудей-влакын Кугыжашт».
39Пудален сакыме осал еҥ кокла гыч иктыже Тудым мыскылен ойлен: «Тый Христос улат гын, Шкендым Шке да мемнамат утаре!» 40А весыже тудым шылтален ойлен: «Тый Юмо деч от лӱд мо? Шкендымат тыгак мутым кучыктат! 41Мемнам чын судитленыт, ме пашаланна келшышын налынна, а Тудо нимом удам ыштен огыл». 42Вара Иисуслан каласен: «Господь, шке Кугыжанышкет мийымекет, мыйым шарналте!» 43Иисус тудлан вашештен: «Тыланет чынак ойлем: тачак Мый денем пырля райыште лият».
44-45Кудымшо шагат наре лийын.#23:44-45 Кудымшо шагат – мемнан жап дене тура кечывалым. Кече пычкемышалтын, пӱтынь мланде ӱмбалне индешымше шагат марте пычкемыш лийын. Храмысе пӱрдыш тунам покшеч кушкедлен. 46Иисус уло йӱкын кычкыралын: «Ачай, Тыйын кидышкет чонем пуэм!»#23:46 Пс 30:6. Тидым ойлымеке, чонжо лектын.
47Шӱдывуй, мо лиймым ужмеке, Юмым чапландарен да ойлен: «Тиде Айдеме чынжымак чын ыштыше улмаш». 48Пудален сакымым ончаш погынышо-влак, мо лиймым ужмеке, шкеныштым оҥ гыч кырен, мӧҥгышкышт шаланен каеныт. 49Иисусын чыла палымыже, тыгак Галилей гыч Тудын почеш толшо ӱдырамаш-влак, ӧрдыжтӧ шогеныт да тидым онченыт.
50Теве Иосиф лӱман еҥ толын. Тудо Синедрионын еҥже лийын, поро, чын ыштыше айдеме. 51Тудо Синедрионын пунчалже да пашаже дене келшен огыл. Иосиф иудей-влакын Аримафей олашт гыч лийын да Юмын Кугыжанышым вучен. 52Тудо Пилат деке толын да Иисусын капшым йодын. 53Иосиф капшым волтен, йытын вынереш вӱдылын да кӱ курык саҥгаш кӱнчымӧ шӱгар рожыш пыштен. Тиде шӱгареш иктымат эше пыштен огытыл. 54Тунам кугарня лийын, шуматкече тӱҥалшаш улмаш.
55Иисус дене пырля Галилей гыч толшо ӱдырамаш-влакат Иосиф почеш коштыныт да шӱгарым, Иисусын капшым тушко кузе пыштымым онченыт. 56Олашке пӧртылмеке, тӱрлӧ тамлын ӱпшышым да миром ямдыленыт. Законын кӱштымым шуктен, нуно шуматкечын каненыт.
Айни замон обунашуда:
Лк 23: УС
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Библийым кусарыше институт, Хельсинки 2007