Лк 22
22
22 ГЛАВА
1-6 Иисус ваштареш шолып мутланен келшымаш. 7-13 Кугечылан ямдылалтмаш. 14-23 Святой кас кочкыш. 24-30 Кӧжӧ кугурак. 31-34 Петрын кораҥмыжым ончык ужын ойлымаш. 35-38 Окса калта, сумка да керде. 39-46 Елеон курыкышто Иисусын кумалмыже. 47-53 Иисусым кучен наҥгайымаш. 54-62 Петрын кораҥмыже. 63-65 Сарзе-влакын игылт воштылмышт да орландарымышт. 66-71 Синедрион ончылно.
1Кугече манын лӱмдымӧ Шергинде пайрем лишемын. 2Архиерей ден закон туныктышо-влак Иисусым пытараш йӧным кычалыныт, но калык деч лӱдыныт.
3А латкок тунемшыж гыч иктын, Искариот манме Иудан кӧргыш, сатана пурен. 4Иудаже архиерей да оролышо-влакын вуйлатышышт деке каен, Иисусым нунылан кузе ужален кучыктымо нерген мутланен. 5Нуныжо куаненыт да тудлан оксам пуаш сӧреныт. 6Иуда келшен да Иисусым калык уке годым ужалаш йӧнан жапым кычалаш тӱҥалын.
7Шергинде кече толын шуын, тунам кугече пачам шӱшкылман улмаш. 8Петр ден Иоаннлан Иисус каласен колтен: «Кайыза да мыланна кугече кочкышым ямдылыза». 9Нунышт йодыныт: «Кушан Тый ямдылыктынет?» 10Иисус вашештен: «Кунам олаш пуреда, кувшин дене вӱдым нумал кайыше еҥым вашлийыда. Почешыже кайыза. Кудо пӧртыш пура, тушко пурыза. 11Сурт озалан каласыза: ”Туныктышына тый дечет йодеш: ’Мылам тунемшем-влак дене кугече кочкышым кочкаш пӧлемет кушто?’” 12Тудо тыланда йоҥгыдо да ӱштын шындыме кӱшыл пӧлемым ончыкта, тушан ямдылыза». 13Нуно каеныт. Кузе Иисус ойлен, чылажат тугак лийын, да кугече кочкышым ямдыленыт.
14Жап шумеке, Иисус ӱстелтӧреш верланен, а Тудын дене пырля – латкок Апостол. 15Нунылан Иисус каласен: «Орлыкым чытымем деч ончыч Мый тендан дене тиде кугече кочкышым моткоч кочнем ыле! 16Тыланда ойлем: Юмын Кугыжаныште тудо шукталтмешке, тылеч вара Мый тудым ом коч». 17Иисус чашым налын, тауштен да ойлен: «Тидым налза да шке коклаштыда пайлыза. 18Тыланда ойлем: Юмын Кугыжаныш толмешке, виноград саска гыч ыштымым ом йӱ».
19Вара киндым налын, тауштен да тодылын, тунемшыж-влаклан пуэн да каласен: «Тиде тендан верч пуымо Капем. Мыйым шарнен, тыге ыштыза». 20Кас кочкыш деч вара Иисус чашым тыгак налын да ойлен: «Тиде чаше – тендан верч йоктарыме Мыйын Вӱрем гоч пуымо у сугынь. 21А теве Мыйым ужалышын кидше Мыйын кидем дене пырля ӱстембалне. 22Чын, Айдеме Эрге ончылгоч палемдыме корным эртышаш. Но кӧ Тудым ужала, тудо айдемылан – ойго!» 23Тидым кӧ ышта манын, нуно икте-весе деч йодышташ тӱҥалыныт.
24Тунемшыж-влак, шке коклаштышт кӧжӧ кугураклан шотлалтшаш манын, ӱчашаш тӱҥалыныт. 25Но Иисус нунылан каласен: «Калык-влакын кугыжашт нунын дене озаланат, да власть улшан-влакым ”порым ыштыше” маныт. 26А тендан тыге ынже лий. Тек тендан коклаште кугуракше изирак гай лиеш, а вуйлатышыже – тарзе гай. 27Кӧжӧ кугурак: ӱстелтӧрыштӧ улшо але тудым ончышо? Ӱстелтӧрысӧ огыл мо? Но теве Мый тендан коклаште тарзе гай улам.
28А тергымаш-влакым чытымем годым те Мый денем пырля кодында. 29Сандене Ачам Мылам пуымо семынак Мыят тыланда Кугыжанышым пуэм, 30да те Мыйын Кугыжаныште ӱстелтӧрыштем кочкыда-йӱыда, престолышто шинчаш да Израильын латкок йыжыҥ тукымжым судитлаш тӱҥалыда».
31А Господь ойлен: «Симон, Симон, сатана тендам шыдаҥ семын шоктын ойыраш йодын. 32Но ӱшанымашет ынже пыте манын, Мый тыйын верч кумалынам. Пӧртылмекет, иза-шольо-влакетын ӱшанымашыштым пеҥгыдемде». 33Петр каласен: «Господь, мый Тый денет казаматышкат, колашат каяш ямде улам!» 34Иисус вашештен: «Петр, тылат ойлем, таче агытан муралтымешке, Мыйын нерген тый кум гана ”Тудым ом пале” манат».
35Иисус нунын деч йодын: «Кунам Мый тендам окса калта, сумка да йолчием деч посна колтенам, тыланда иктаж-мо ситен огыл мо?» Нуно вашештеныт: «Чыла ситен». 36Иисус каласен: «Но ынде, кӧн окса калтаже уло, тудым налже, сумкамат налже, а кӧн кердыже уке, тек шке вургемжым ужала да налеш. 37Возымо: ”Законым пудыртышылан шотленыт”#22:37 Ис 53:12.. Тыланда ойлем: тиде шомак Мыйын илышыштем шукталтшаш. Мыйын шотышто чылажат мучашыш шуэш». 38Нуно каласеныт: «Господь, теве тыште кок керде!» Иисус вашештен: «Сита!»
39Иисус лектын да молгунамсе семынак Елеон курыкыш каен. Почешыже тунемшыж-влак миеныт. 40Верышке миен шумеке, Тудо нунылан каласен: «Алгаштаралташ огыл манын, сӧрвален кумалза». 41А Шкеже нунын деч кӱм шуымо наре торлен да, сукен шинчын, кумалын: 42«Ачай! Тиде чашым Мый дечем кораҥден наҥгаяш шонет ыле гын! Но тек Мыйын шонымо семын огыл, а Тыйын эрыкет#22:42 Эрык – воля, желание. семын лиеш». 43Пылпомыш гыч Суксо кончен да Тудлан вийым пуэн. 44Йӧсланымыж дене Иисус эшеат чот кумалын, Тудын пӱжвӱдшӧ мландышке йогышо вӱр чӱчалтыш гай лийын. 45Кумалмеке, Тудо кынелын, тунемшыж-влак деке пӧртылын да ужын: нуно ойгырымышт дене мален колтеныт. 46Тудо нунылан каласен: «Те молан маледа? Кынелза да, алгаштаралташ огыл манын, сӧрвален кумалза».
47Тудо але ойленат пытарен огыл, калык тӱшка толын лектын, а ончылно латкокыт гыч иктыже, Иуда лӱманже, ошкылын. Тудо, шупшалаш манын, Иисус деке лишемын. Иисусым тыге палдараш лийын улмаш: «Кӧм мый шупшалам, Тудо – Иисус». 48Иисус тудлан каласен: «Иуда, Айдеме Эргым шупшалмет дене ужалет мо?»
49Иисус йыр шогышо тунемшыж-влак, мо лийшашым ужмеке, каласеныт: «Господь, керде дене руалаш гын веле?» 50Нунын кокла гыч иктыже архиерейын тарзыжын пурла пылышыжым руал ойырен. 51«Сита, чарныза!» – Иисус каласен, тарзын пылышыжым тӱкалтен да паремден.
52А Шкенжын ӱмбаке погынен толшо архиерей, храм орол вуйлатыше да калык кугурак-влаклан каласен: «Аген коштшо ӱмбаке лекмыла, кердым, шугыньым налын толында. 53Мый кече еда храмыште тендан коклаште лийынам, но те Мыйын ӱмбакем кидым нӧлталын огыдал. А кызыт тендан жапда да пычкемышын властьше».
54Нуно Иисусым кученыт да архиерейын пӧртышкыжӧ наҥгаеныт. Петр ӧрдыжтырак почешышт ошкылын. 55Кудывече покшелне тулым олтеныт, еҥ-влак тул йыр шинчыныт, Петрат коклашкышт шинчын. 56Тудым тул воктене шинчышым ужмеке да тӱткын ончалмеке, ик тарзе ӱдыр каласен: «Тиде еҥат Тудын дене пырля лийын». 57Но Петр шӧрен ойлен: «Ӱдырамаш, мый Тудым ом пале!» 58Изиш варарак вес еҥ тудым ужын да каласен: «Тыят нунын кокла гыч улат». Петр вашештен: «Айдеме, мый нунын кокла гыч омыл!» 59Шагат наре эртен, эше икте ӱшандарен ойлен: «Чынжымак, тиде еҥат Тудын дене лийын, вет тудо Галилей гычак». 60Петр вашештен: «Мо нерген тый ойлет, ом пале».
Тунамак, тидым ойлымыж годым, агытан муралтен. 61Господь, савырналын, Петр ӱмбаке ончалын. Петр Господьын кузе ойлымыжым шарналтен: «Агытан муралтымешке, Мыйым ом пале манын, тый кум гана каласет». 62Петр тушечын лектын да чон йӧсын шортын.
63Иисусым оролен кучышо-влак Тудым игылт воштылыныт да кыреныт. 64Тудын шинчажым петыреныт, шӱргӧ гыч совкаленыт да йодыныт: «Пророк улат гын, кӧ Тыйым совыш – каласе!» 65Тудым шуко тӱрлӧ вес шомак денат мыскыленыт.
66Кече лекмеке, калыкын кугуракше, архиерей да закон туныктышо-влак погыненыт, Иисусым Синедрионышт ончыко наҥгаеныт. 67Нуно йодыныт: «Тый Христос улат гын, мыланна каласе». Иисус вашештен: «Тыланда каласем гын, те огыда ӱшане. 68А Шке тендан деч йодам гын, огыда вашеште да Мыйым огыда колто. 69Но тылеч вара Айдеме Эрге куатан Юмын пурла могырыштыжо шинчаш тӱҥалеш».#22:69 Пс 109:1. 70Чылан йодыныт: «Тугеже тый Юмын Эрге улат?» Иисус вашештен: «Тиде Мый улам манын, те ойледа». 71Тунам нуно каласеныт: «Молан мыланна эше таныклыме кӱлеш? Ме тидым Шкеж дечак колна!»
Айни замон обунашуда:
Лк 22: УС
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Библийым кусарыше институт, Хельсинки 2007