Лк 17
17
17 ГЛАВА
1-6 Алгаштарыме, титакым кудалтыме да ӱшаныме нерген. 7-10 Тарзе мом ыштышаш. 11-19 Таум ыштен моштыза. 20-37 Юмын Кугыжаныш толмо нерген.
1А шке тунемшыж-влаклан Иисус каласен: «Алгаштарымаш толде огеш керт, но кӧн гоч толеш, тудлан ойго! 2Айдеме ик тыгай изиракшым чын корно гыч кораҥда гын, тудлан пеш уда лиеш. Шӱйышкыжӧ вакшкӱм сакат да теҥызыш шуат гын, тудлан сайрак лиеш ыле. 3Тугеже шкендам шекланен шогыза! Тыйын лишылет тыйын ваштареш языкым ышта гын, тудым шылтале. Языкше деч кораҥеш гын, титакшым кудалте. 4Тыйын ваштареш кечылан шым гана титакыш пура да кечылан шым гана ”вуеш ит нал, языкем деч кораҥам” манеш гын, титакшым кудалте».
5Апостол-влак Господьлан ойленыт: «Мемнан ӱшанымашнам шукемде». 6Господь каласен: «Тендан ӱшанымашда кеч горчице нӧшмӧ кугыт лиеш да теве тиде смоква пушеҥгылан ”Вожге лек да теҥызыш кусно!” маныда ыле гын, тудо тендам колыштеш ыле.
7Тендан кокла гыч иктаж-кудыжын куралше але кӱтӱчӧ тарзыже уло гын, пасу гыч тарзе пӧртылмеке, оза тудлан ”Писынрак лишем, ӱстелтӧрыш тол!” манын ойла мо? 8Уке, тудо каласа: ”Мылам кас кочкышым ямдыле, ӱштым ӱштал да кочмем-йӱмем годым мылам ӱстембаке конден шого, тылеч вара шкеат кочкат да йӱат”. 9Кӱштымым шуктымылан тарзыжлан таум ышта мо? Тыге ом шоно. 10Теат тыгак. Чыла кӱштымым ыштымекыда ойлыза: ”Ме йӧрдымӧ тарзе веле улына, мом ыштышаш лийынна, тудым гына ыштенна”».
11Иерусалимыш кайымыж годым Иисус Самарий ден Галилей кокла гыч эртен. 12Ик ялыш пурымыж годым Тудым проказе черан лу пӧръеҥ вашлийын. Нуно ӧрдыжкырак шогалыныт 13да кычкыраш тӱҥалыныт: «Иисус, Туныктышо, мемнам серлаге!» 14Нуным ужмеке, Иисус каласен: «Кайыза да иерей-влаклан шкендам ончыктыза».
Кайымышт годым нуно проказе черышт деч эрненыт. 15Нунын кокла гыч иктыже, пареммыжым ужмеке, мӧҥгеш пӧртылын, уло йӱкын Юмым чапландарен. 16Иисусын йолжо ончылан тудо кумык возын да таум ыштен. Тиде еҥ Самарий гыч лийын. 17Иисус йодын: «Чыла лу еҥ огыл мо эрнен? Индешыже кушто улыт? 18Кузе тиде йот тукым еҥ деч молыжо иктыжат Юмым чапландараш ыш пӧртыл?» 19Вара тудлан каласен: «Кынел да кае, тыйым ӱшанымашет утарен».
20Юмын Кугыжаныш кунам толеш манын, фарисей-влак Иисус деч йодыныт. Иисус нунылан вашештен: «Юмын Кугыжанышыже палдырнен ок тол. 21”Теве тудо тыште”, але ”Теве тушто” манын, нигӧ ойлен огеш керт, вет Юмын Кугыжаныш – тендан кӧргыштӧ».#17:21 «Кӧргыштӧ» – тидым «коклаште» манын кусарашат лиеш.
22А тунемшыж-влаклан Иисус каласен: «Тугай жап толеш, кунам Айдеме Эргын кеч ик кечыжым моткоч ужмыда шуэш, но огыда уж. 23Тыланда ойлат: ”Теве Тудо тыште!” але ”Теве тушто!” Но те верешдак кодса, почешышт ида курж. 24Шке кечынже Айдеме Эрге уло пылпомышым ик тӱр гыч вес тӱрыш йолген волгалтарыше волгенче гай лиеш. 25Но тылеч ончыч Тудо шуко орланышаш, да тиде тукым Тудым шкеж деч кораҥда.
26Ной годым кузе лийын, Айдеме Эрге годымат тугак лиеш. 27Нойын ковчегыш шичме кечыже марте кочкыныт, йӱыныт, ӱдырым налыныт, марлан лектыныт. Тудо кечын вӱд ташлымаш тӱҥалын да чылам пытарен. 28Лот годымат кузе лийын, туге лиеш: кочкыныт, йӱыныт, налыныт, ужаленыт, кушкылым шынденыт, пӧртым чоҥеныт, 29но Содом гыч Лот лекме кечын пылпомыш гыч йӱлышӧ киш тул йӱр йӱрын да чылам пытарен. 30Айдеме Эрге толмо кечынат тыгак лиеш.
31Тиде кечын кӧ пӧрт леведыш ӱмбалне лиеш, а ӱзгарже пӧртыштӧ, тек тудым налаш ок воло. Кӧ пасушто лиеш, тек мӧҥгеш ок пӧртыл. 32Лотын ватыж нерген шарналтыза!#17:32 Ончо: Быт 19:15-26. 33Кӧ шке чонжым арален кодаш тӧча, тудо чонжым йомдара. А кӧ тудым йомдара, тудо чонжым утарен кода. 34Тыланда ойлем: тудо йӱдым кок еҥ ик вакшышыште кия, иктыже налалтеш, весыже кодеш. 35Кок ӱдырамаш пырля йоҥышта, иктыже налалтеш, весыже кодеш. 36Кок еҥ пасушто лиеш, иктыже налалтеш, весыже кодеш». 37Тунемшыж-влак тунам Тудын деч йодыныт: «Господь, кушто тиде лиеш?» Иисус вашештен: «Кушто колышо кап, тушко курныж-влакат погынат».
Айни замон обунашуда:
Лк 17: УС
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Библийым кусарыше институт, Хельсинки 2007