Лк 16
16
16 ГЛАВА
1-15 Ондалыше озанлык виктарыше нерген туштен каласымаш. 16-18 Закон да Юмын Кугыжаныш. 19-31 Поян ден Лазарь.
1Иисус тунемшыж-влаклан каласен: «Ик поянын озанлык виктарышыже лийын. Озан погым кучылт пытара манын, тудын ӱмбак вуйым шийыныт. 2Озаже тудым шкеж деке ӱжын да каласен: ”Тыйын нерген мый мом колам! Озанлыкым виктарымет нерген рашемден пу, ынде тыланет вуйлаташ ок лий”. 3Тунам озанлык виктарыше шоналтен: ”Мом мылам ышташ? Оза мыйым тиде паша гыч луктын колта. Кӱнчаш вием ок сите, йодышт кошташ вожылам. 4Палем, мом ышташ! Озанлык виктарыме паша гыч луктын колтымеке, мыйым пӧртышкышт налше еҥ-влакым кузе муаш палем”. 5Озажлан парымыш пурышо еҥ-влакым кажныжым посна ӱжын. Икымшыж деч йодын: ”Мыйын озамлан кунар пуышашет уло?” 6”Шӱдӧ виса ӱйым”, – вашештен тудыжо. Озанлык виктарыше каласен: ”Кӱсын кагазетым нал, шич да писын возо: витле”. 7Вара весе деч йодын: ”А тый кунар пуышаш улат?” ”Шӱдӧ виса шыдаҥым”, – тудыжо вашештен. Тудлан каласен: ”Кӱсын кагазетым нал да кандашле манын возо”. 8Йӧным мумыжлан ондалыше вуйлатышым озаже моктен. Тиде тӱнян икшывыж-влак шке кокласе пашаштышт волгыдын шочшыж деч ушанрак ыштат.
9Мый тыланда ойлем: чын огыл поянлык дене шкаланда йолташым ыштыза, тыге ыштеда гын, нужнаш кодмекыда, тендам курымашлык илыме верыш налыт.
10Кӧ изиште ӱшанле, тудо кугуштат ӱшанле. Кӧ изиште ӱшанле огыл, тудо кугуштат ӱшанле огыл. 11Тыгеже те чын огыл поянлык шотышто ӱшанле лийын огыдал гын, кӧ тыланда чын поянлыкым ӱшана? 12Еҥ поянлык шотышто ӱшанле лийын огыдал гын, кӧ тыланда шкенданым пуа? 13Нимогай тарзе кок озалан тарзыланен огеш керт: иктыжым ужмышудымо лиеш да весыжым йӧрата, але иктыжлан кумылын ышта, весыжым ок шотло. Те ик жапыштак Юмылан да поянлыклан служитлен огыда керт».
14Оксам йӧратыше фарисей-влакат чыла тидым колыныт да Иисусым воштылыныт. 15Но Тудо нунылан каласен: «Те еҥ ончылно чын ыштышыла кояш тӧчеда, но Юмо тендан шӱмдам пала. Мом еҥ-влак аклат, Юмын ончылно йырнык веле.
16Закон ден пророк-влак Иоанн марте лийыныт. Тудо жап гыч Юмын Кугыжаныш увертарен туныкталтеш да керек-кӧат уло вийын тыршен тушко пура. 17Но кава ден мланде пытат гынат, законышто ик удыралтышат ок йом. 18Кӧ, шке ватыжым ойырен колтен, весым марлан налеш – тудо яжарлана. Марийжын ойырен колтымым марлан налшат яжарлана.
19Ик еҥ поян улмаш, мотор шемалге-йошкар йытын вургемым чиен, кече еда ракатланен кочкын-йӱын. 20Тыгак Лазарь лӱман йорло еҥ лийын, тудо поянын капка ончылныжо йораҥше киен 21да поянын ӱстембачше луктын кудалтыме кинде пудыргым кочнеже улмаш. Пий-влак тудын йоражым нулаш толыныт.
22Вара Лазарь колен да Суксо-влак тудым Авраам воктеке наҥгаеныт. Поянат колен, тудым тоеныт. 23Тамыкыште орланымыж годым кӱшкӧ ончалын да тораште Авраамым, а воктенже Лазарьым ужын. 24Поян кычкыралын: ”Авраам, ачай! Мыйым чамане, Лазарьым мый декем колто, тек парнявуйжым вӱдеш нӧртен, йылмем юалтара. Мый тиде тулышто моткоч орланем”. 25Но Авраам вашештен: ”Эргым, шарналте, тый порылык ужашетым илымет годым налынат, а Лазарь – осал ужашым. Ынде тыште тудын ойгыжым кораҥдыме, а тый орланет. 26Тылеч посна мемнан ден тендан коклаш пеш кугу поргемым#16:26 Поргем – пропасть. ыштыме: тендан деке вончаш шонышо вончен ок керт. Тушечат мемнан деке нигӧ вончен ок керт”. 27Тунам поян каласен: ”Тугеже, ачай, тый дечет йодам: Лазарьым ачамын суртышкыжо колто. 28Мыйын вич иза-шольым уло. Нунат тиде орлык верыш ынышт логал манын, тек тудо шижтара”. 29Авраам вашештен: ”Нунын Моисей ден пророк-влакышт уло, тек нуным колыштыт”. 30Поян каласен: ”Уке, Авраам ачай! Теве иктаж-кӧ колышо нунын деке мия гын, тунам, языкыштым касарыктен, Юмо деке савырнат”. 31Но Авраам тудлан каласен: ”Моисей ден пророк-влакым огыт колышт гын, нуным колымаш гыч ылыж кынелшат ӱшандарен огеш керт”».
Айни замон обунашуда:
Лк 16: УС
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Библийым кусарыше институт, Хельсинки 2007