Matiye 26
26
Ɓɛ̀ Zuifuɓɛ hándíe ɛ́ Yiezu ɓaàrɔ́ wṹn ɛ̀ cɛ̀
Mar 14.1-2; Lik 22.1-2; Zãn 11.45-53
1Ɛ́ hɔ́ lɛ ɛ́ Yiezu ɛ́ khɛ́ hɔ́pe bòo sí míkùi vɔ́, á khie bie lɛ́ mí kɛ̀ránzɛ̀ɓɛ̀ ǹ ɛ́ nɛ làa: 2«Mí lò dũ kɛ́ hɔ́ kɛ́ sítĩnlɔ́ bɔ̀nbɔ̀ ɲu ɛ̀ lè Nyiewɛlɔn sɛ́rí ɛ́ dɛ̃̀; á nìnbírɔ Zuú ɛ́ ɓén dé ɓɛ́ nìnbirìe núnú hũn ɛ́ ɓɛ́ ɛ́ ɓáa lé ɓáalén dãanù lɔ̀n.»
3Ɛ́ ɓɛ́ khɛ̃́ndàariè hándíe àá ɓɛ́ Zuifuɓɛ nìkĩ́ɛ ɛ́ van koo ɓánlɔ̀n ɔ̀ khɛ̃́ndàarɔ wì-bɛhɔ́ lɛ yèrè Kayiifu yíe, 4ɛ̀ ɓɛ̀ páaníɛ lɔ̀ tɔ̀ ɛ́ nɛ ɓɛ́ vĩ Yiezu mí biehĩ́ hũn ɛ̀ dàá yí-è ǹ ɓaà ɛ̀ ɓé. 5Kɛ́ ɓɛ́ den ɛ́ bie ɛ́ nɛ làa: «Ké yí fɔ́ɓán ɛ̀ kè wé hɔ́ lè sɛ́rí zɔǹ wɛ̀; kɛ́ dàa bòo mí, ɛ́ ɓɛ́ nìbirìe ɛ́ hĩ́ní pĩ́ ɛ́ dìń.»
Hṹnu dɔ̀ ɛ́ yurɔ́ lɛ tũnù tĩ ɛ̀ kóo Yiezu lɔ̀n
Mar 14.3-9; Zãn 12.1-8
6Ɛ́ hɔ́ lɛ ɛ́ Yiezu ɛ́ hàarí van wi Betani lóo hũn, à simɔn lɛ iè ɔ̀ ɓèré zũnù hũn, 7ɛ́ hṹnu dɔ̀ ɛ́ van ɓɛrɛ ɓen lúwiniɛ ɔ̀ ǹ kɛ́ á dàa sɛ̃̀nlè ɓùe dɔ̀ kɛ́ lé tú àá yurɔ́ lɛ ɛ́ tũnù tĩ lɛ yàamu ɛ́ hie cɛ̃̀un. Ɛ́ bòo lɛ ɛ́ Yiezu ɛ́ kɛsí ɛ́ dí, á hṹnu sɔ ɛ́ yòó koo hɔ̀ yurɔ́ sɔ piè ɲún lɔ̀n. 8Ɛ́ hɔ́ lɛ ɛ́ piè kɛ̀ránzɛ̀ɓɛ̀ ɛ́ mɔn hɔ̀, ɛ́ ɓɛ́ tĩɛ̀ ɛ́ cɛ̃̀ àpe hṹnu sɔ ǹ, ɛ́ ɓɛ́ khie bie ɛ́ nɛ làa: «Hɔ̀ lɛ wo iè ńɓùo bɔ̀yàarè kɛ̀amu? 9Hɔ̀pe yurɔ́ sɔ ɛ́ hṹn dɛ̀ ɛ́ yìɛní ɛ́ yàamu ɛ́ hìení ɛ́ khíi lɛ́ màa ɓɛ̀ nìkherà ǹ.» 10Ɛ́ Yiezu ɛ́ dũnɛ hɔ̀ bòo lɛ ɛ́ ɓɛ́ ɛ́ bie, á zɔn bie lɛ́ ɓà ǹ ɛ́ nɛ làa: «Mí wiɛ dàa ɛ́ ɔ̀pe hṹnu sɔ lɛ ɛ̀ tiɛní kɛ̀amu? Hɔ̀ iè bòo lɛ sãa á wɔ́ àá mi. 11Ɓɛ̀ nìkherà ɛ́ wi yán àá miɛ fúu, ɛ̀ ǹpe ɛ́ yí nin kań yán fúu àá miɛ wɛ̀. 12À koo hɔ̀ yurɔ́ lɛ tũnù tĩ niǹ tɛkɛà lɔ̀n, ɛ́ sɛ́sɛ́a hɔ̀ dĩ̀niɛ niǹ wũ̀nlɔ́ bòo hũn. 13Ɛ́ nin bie hɔ lɛ́ miɛ ǹ àá bɔ̀bín nɛ viì yée viì lɛ ɛ́ lépe Bentĩnu sɔ lɛ ɛ́ wóo ɓén bie hũn lè dímíɲɛ́ míkùi hũn, ápe hṹnu sɔ lɛ bòo lɛ á wɔ́ ɛ́ ɓiɛ̀ wóo ɓén yí ɛ́ bie, ɛ́ dàá síɛ liení piè bòo.»
Zudaasi ɛ́ Yiezu máahṹ ɛ̀ bɛ́
Mar 14.10-11; Lik 22.3-6
14Ɛ́ Zudaasi Yisikariyɔɔte, lɛ iè pe Yiezu kɛ̀ránzɛ̀ɓɛ̀ pírú àá nìɛ ɓɛ̀ ɲu dɔ̀ ɛ́ van yú ɓɛ́ khɛ̃́ndàariè hándíe, 15à bie lɛ́ ɓà ǹ ɛ́ nɛ làa: «Kɛ́ ń dú-o pe Yiezu mì núnú hũn, ɛ́ mí ɛ́ lɛ́ ńɓùo mì ǹ?» Ɛ́ ɓɛ́ khie mɛ̀ ɓɛ́ màa ɓénlé àá pírú (30) ɛ́ khie lɛ́ à ǹ#26.15 Ɓɛ̀ wɔhĩ́ ɛ́ ɓɛ́ hàarí wóò yìɛní vɛn-zɛ̀ɓɛ̀ ɓénlé àá pírú pírú (30). 16Ɛ́ wo dàá mìí pehɔ̀ yìi ǹ, á Zudaasi ɛ́ wo hɔ̀ bòo lɛ á mii wé ɛ̀ dàá dé Yiezu peɓɛ̀ núnú hũn ɛ̀ cɛ̀.
Yiezu ɛ́ lè Nyiewɛlɔn sɛ́rí díe ɛ̀ dí àá mí kɛ̀ránzɛ̀ɓɛ̀
Mar 14.12-21; Lik 22.7-14; Lik 22.21-23; Zãn 13.21-30
17Ɛ́ hɔ́ búrú lɛ ɛ́ ɲɛfĩni mí hũn sɛ́rí hán wurù zɔn, ɛ́ Yiezu kɛ̀ránzɛ̀ɓɛ̀ ɛ́ ɓɛrɛ ɔ̀ dìenin ɛ́ nɛ làa: «Hɔ̀ iè yí ɛ́ kɔ́ wɛ nɛ ke vɛ sɛ́sɛ́ lé Nyiewɛlɔn sɛ́rí díe hũn ɛ̀ lɛ́ kɔ ǹ?» 18Ɛ́ Yiezu ɛ́ zɔn bie lɛ́ ɓà ǹ nɛ làa: «Mì lan vɛ zɔ le lóo hũn ɛ̀ vɛ bie lɛ́ á ńwieni lɛ ǹ nɛ làa: “À kɛ̀ránlɔ nɛ mí pɛ̃hṹ ɛ́ wo dɛ̃un; ie mípe àá mí kɛ̀ránzɛ̀ɓɛ̀ ɛ́ ɓɛ dí lé Nyiewɛlɔn sɛ́rí kɔ̀ yíe.”» 19Ɛ́ ɓɛ́ kɛ̀ránzɛ̀ɓɛ̀ ɛ́ wɔ́ hɔ́ bòo lɛ ɛ́ Yiezu ɛ́ bie lɛ́ ɓà ǹ, ɛ́ ɓɛ́ wo tɛ́ lé Nyiewɛlɔn sɛ́rí díe.
20Ɛ́ hɔ́ zĩ́ihṹ ɛ́ van dɛ̃un, ɛ́ Yiezu àá mí kɛ̀ránzɛ̀ɓɛ̀ pírú àá nìɛ ɓɛ̀ ɲu ɛ́ síɛ kɛ́sí ɓɛ́ díe dínlén. 21Ɛ́ hɔ́ lɛ ɛ́ ɓɛ́ ɛ́ dí, ɛ́ Yiezu ɛ́ zɔn bie ɛ́ nɛ làa: «Nín bie hɔ lɛ́ miɛ ǹ àá bɔ̀bín nɛ mi tĩ́ihṹ, ádɔ̀ ɛ́ ɓén dé mi ɓɛ̀ nìnbirìe núnú hũn.» 22Ɛ́ ɓɛ́ kɛ̀ránzɛ̀ɓɛ̀ ɛ́ hɛ̀ tĩɛ̀ yòó yaa míkùi ɛ́ ɓɛ́ wo ɛ́ ɔ̀ dìekɛnin ɓɛ̀pe àá ɓɛ́ nì-cóohɛ̃ ɛ́ nɛ làa: «Ɲunsɔ, ɛ́ bòo ɛ́ hɔ́ iè ǹpe yée?» 23Ɛ́ Yiezu ɛ́ zɔn kɔ̃́niɛ ɓɛ̀ ɛ́ nɛ làa: «Àlɛ ɛ́ páaníɛ zɔn dɔ́ mí núnú àá mi lè díe dìɛ hũn iè ɔ̀pe lɛ ɛ́ te nin mii dé ɓɛ́ nìnbirìe núnú hũn. 24À nìnbírɔ Zuú ɛ́ pe wo mii hí lan kɛ̀a bòo lɛ ɛ́ hɔ́ dàa wɛ̃́ lé Dɔfĩn bienù vɛ̃hṹ hũn piè bòo hũn. Kɛ́ á nìnbírɔ lɛ ɛ́ ti-e nìnbírɔ Zuú ɛ́ mii dé ɓɛ́ nìnbirìe núnú hũn ɛ́ pe yìi ɓén mi hɔ. Kɛ́ ɓàasɔ yɛ̀rɛ́ hṹn yí te, ɛ̀ hɔ̀ bòo ɛ́ hṹn tṹ.» 25Á Zudaasi lɛ ɛ́ ti-e mii dé ɓɛ́ nìnbirìe núnú hũn ɛ́ zɔn ɔ̀ dìenin nɛ: «Kɛ̀ránlɔ, ɛ́ bòo ɛ́ hɔ́ iè ǹpe yée?» Ɛ́ Yiezu zɔn kɔ̃́niɛ ɔ̀ nɛ: «Kɔ́ temu bie.»
Ɲunsɔ húmú àá piè vìerɔ́ bòo lienírɔ́ díe bòo
Mar 14.22-26; Lik 22.14-20; 1Ko 11.23-25
26Ɛ́ hɔ́ lɛ ɛ́ ɓɛ́ ɛ́ dí, ɛ́ Yiezu ɛ́ mɔ̀ hɔ̀ búrú, à dɔ́ Dɔfĩn bɛrikɛ à ɓùenkɛa hɔ̀ ɛ́ khie lɛ́ mí kɛ̀ránzɛ̀ɓɛ̀ ǹ, à bie lɛ́ ɓà ǹ nɛ làa: «Mì fé ɛ̀ mì lɛ̀, hɔ̀pe lɛ iè niǹ tɛkɛà.» 27À bĩniɛ khie mɔ̀ lè ɲuǹlán dìɛ lɛ ɛ́ hɔ́ divɛ̃n wi hũn, à dɔ́ Dɔfĩn bɛrikɛ à khie lɛ́ hɔ́ ɓà ǹ à nɛ làa: «Mìpe mìkùi ɛ̀ fé mì ɲu, 28iè hɔ̀ lɛ ɛ́ hɔ́pe lɛ ɛ́ iè niǹ cãani, hɔ̀pe cãani lɛ ɛ́ te le Dɔfĩn ɲɛbíi lɛ ɛ́ Hɔ́ dú àá ɓɛ́ nìnbirìe bòo ɛ̀ zɛ̃́ní. Hɔ̀ koosí ɓɛ́ nìnbí-kuì bòo hũn, peɓɛ̀ bɔ̀koohɛ̃ sɛ́wɛ́rí dénlɔ́ yènsénín. 29Ɛ́ nin bie hɔ lɛ́ miɛ ǹ nɛ ɛ̀ wo dàá mìí àá zoòni, ɛ́ ń yí nin bĩní ɲu hɔpe bɔ̀ɲuriè sɔ lɛ, fúu ɛ̀ vɛ dɛ̃ le wurù lɛ ɛ́ ń dàá nin ɲu pehɔ̀ bɔ̀fĩɛ̀ àá miɛ kìe Yàá bɛ́záanú hũn.» 30Ɛ́ ɓɛ́ khie bɔ́ lé sɛ́rí yánbéhĩ́ ɛ́ ɓàaniɛ Dɔfĩn, ɛ̀ ɓɛ̀ hĩ́nà kãa lè Olive vɛ̃̀hɛ̃ ɓúkìe.
Yiezu ɛ́ bie nɛ Piɛre ɛ́ ɓén pĩ́ ɛ́ bie nɛ mí yí dũ mí wɛ̀
Mar 14.27-31; Lik 22.31-34; Zãn 13.36-38
31Ɛ́ Yiezu ɛ́ zɔn bie lɛ́ mí kɛ̀ránzɛ̀ɓɛ̀ ǹ ɛ́ nɛ làa: «Hɔ̀pe zoòni sṹnúhṹn lɛ, ɛ́ mípe mìkùi ɛ́ ɓén zè ɛ̀ mì ɛ́ kɛ́ mi; iè hɔ̀ lɛ ɛ́ hɔ́ wɛ̃́ lé Dɔfĩn bienù vɛ̃hṹ hũn ɛ́ nɛ làa: “Nin lí é pisierɔ ǹ ɛ̀ ɓé, ɛ̀ ɓɛ̀ pirìe ɛ̀ zè saakɛ.”» 32Ɛ́ Yiezu ɛ́ zɔn bie sĩiniɛ ɛ́ nɛ làa: «Kɛ́ ń ɓen vìé vɔ́, ɛ́ nín ɛ́ dí mí híɛhɔ́ ɛ́ vɛ hɔ Kalile.» 33Ɛ́ Piɛre ɛ́ zɔn bie lɛ́ à ǹ nɛ làa: «Hɛ̀rí kɛ́ ɓɛ́pe ɓɛ́kùi ɛ́ ɓɛ zè ɛ̀ ɓɛ̀ kɛ́ kɔ, ɛ́ ńpe ɛ́ yá zè ɛ̀ nin kɛ́ kɔ ɛ́ yá mi wɛ̀.» 34Ɛ́ Yiezu zɔn bie lɛ́ à ǹ nɛ làa: «Nin bie hɔ lɛ́ kɔ ǹ àá bɔ̀bín nɛ hɔ pe zoòni sṹnúhṹn lɛ, á kɔ̀bíɛ ɛ́ ɓen mii wírí, hɔ́rɔsí ɛ̀ kɔ̀ pɛ̃́ yìehɛ̃̀ tĩ ɛ́ nɛ kɔ́ yí dũ mi wɛ̀.» 35Ɛ́ Piɛre ɛ́ zɔn bie lɛ́ à ǹ ɛ́ nɛ làa: «Hɛ̀rí kɛ́ ń fɔ́ɓán ɛ̀ ǹ páaní hí àá kɔ, ɛ́ ń pɛ́ yá pĩ́ ɛ́ bie nɛ ń yí dũ kɔ wɛ̀.» Ɛ́ ɓɛ́pe kɛ̀ránzɛ̀ɓɛ̀ lɛ kɛ́ ɓɛ́kùi ɛ́ ɓiɛ̀ zɔn bie kɛ̀amu.
Yiezu ɛ́ Dɔfĩn ɛ̀ hɛ̃nnin Zɛtisemanɛ hũn
Mar 14.32-42; Lik 22.39-46
36Ɛ́ Yiezu àá mí kɛ̀ránzɛ̀ɓɛ̀ ɛ́ khie van lè viì dɔ̀ lɛ ɛ́ ɓɛ́ wóò ve nɛ Zɛtisemanɛ. Á khie bie lɛ́ ɓà ǹ ɛ́ nɛ làa: «Mì síɛ kansí hũ̀nún nɛ npe khɛ̃̀ún vɛ híɛhɔ́ ɛ̀ vɛ hɛ̃un Dɔfĩn.» 37À khie fɔ́ Piɛre àá Zebede nìɛ bìɛ ɲu ɛ́ bɔ̀ɓán àá mí; ɛ́ hɔ́ hũn-yaarè àá hɔ́ hũn-yenkɛà ɛ́ wo hṹn yóò ɛ́ ɔ̀ ɓaà. 38Á khie bie ɛ́ lɛ́ ɓà ǹ nɛ làa: «Niǹ tĩì ɛ́ hɛ̀ yaa cɛ̃̀un, niǹ húmú ɛ́ dɛ̃un, ɛ́ mí síɛ kansí hũ̀nún ɛ̀ mì piɛ̀ní mí yiè àá mi.» 39À khie khɛ̃̀nɛ van híɛhɔ́, à kùerɛ síɛ ɓúrɛsí mí híɛhɔ́ lè sṹsùnù, à ɛ́ Dɔfĩn ɛ̀ hɛ̃nnin ɛ́ nɛ làa: «Kìe Yàá, kɛ́ hɔ́ ɓen dɛ̀ ɛ́ wé, ɛ̀ kɔ̀ lɛ́ nɛ lepe lɔ̀nbiè ɲuǹlán dìɛ sɔ lɛ ɛ̀ khɛ̃̀ún vɛ sɔ́n sɔ́n ɛ̀ lè kɛ́ mi. Kɛ́ hɔ́ míkùi hũn, ɛ́ kɔ́ nɛ hɔ́ wé kɛ̀a bòo lɛ ɛ́ kɔ́ wɛ, kɛ́ hɔ́ bí wé kɛ̀a bòo lɛ ɛ́ ńpe ɛ́ wɛ wɛ̀.» 40À khie khũ̀a ɓɛrɛ ɓɛ̀ kɛ̀ránzɛ̀ɓɛ̀ nìɛ ɓɛ̀ tĩ viì, ɛ́ ɓen yú ɓɛ́ kɛ́ ɓɛ́ dũmua ɛ́ fɛ̃̀ dɛmu. Á zɔn bie lɛ́ Piɛre ǹ làa: «Mí hɛ̀ yí dàń mí yìe ɛ́ yí piɛní líɛrɛ́ dɛ̀kùi hũn àá mi? 41Mì piɛní mí yìe ɛ̀ mì hɛ̃un Dɔfĩn bòo lɛ ɛ́ wé kɛ́ Situanɛ ɛ́ ɓen mii hàaní miɛ, à bí yí miɛ ǹ wɛ̀. À nìnbírɔ mɛkɛ̃nì ɛ́ pe wo wɛ ɛ́ mii wé hɔ́ bɔ̀tente, kɛ́ piè tɛkɛ̀a ɛ́ temu pànkɛ́ mí wɛ̀.» 42À sĩ̀n ɛ́ khɛ̃̀nɛ cɔ́ kɛ̀a yìehɛ̃̀ɲulán, ɛ́ van ɛ́ Dɔfĩn ɛ̀ hɛ̃nnin ɛ́ nɛ làa: «Kìe Yàá, kɛ́ lépe lɔ̀nbiè ɲuǹlán dìɛ sɔ lɛ ɛ́ ɓen yí dɛ̀ yá khɛ̃̀ún ɛ́ lé yán ɛ̀ lè ɛ́ kɛ́ mi kɛ́ yí ɲu àá lé, ɛ̀ nɛ kɔ tĩì bòo ɛ̀ wé!» 43À sĩ̀n khie khũ̀a ɓɛrɛ yú ɓɛ́ kɛ́ ɓɛ́ dũmua iè hɔ̀ lɛ ɛ́ hɔ́ dɛmu hɛ̀ hṹn pɔ ɓɛ. 44Á fùɛrɛ̀sí ɓà ǹ à sĩ̀n khũ̀a cɔ́ ɛ́ van hɛ̃nnɛ Dɔfĩn kɛ̀a yìehɛ̃̀tĩ́lán ɛ́ bie hɔ̀pe bɔ̀cóoní sɔ. 45À khie khũ̀a ɓɛrɛ mí kɛ̀ránzɛ̀ɓɛ̀ viì ɛ́ ɓɛrɛ bie lɛ́ ɓà ǹ ɛ́ nɛ làa: «Mí pɛ́wi dũmua ɛ́ vũùní? Ɛ́ mí húi lè pɛ̃̀hṹ ɛ́ wo ɓɛrɛ dɛ̃un, á nìnbírɔ Zuú ɛ́ ɓɛ ɛ̀ dé ɓɛ́ bɔ̀konwériè núnú hũn. 46Ɛ́ mí síɛ hĩ́ní nɛ ke lan, àpe lɛ ɛ́ mii dé mi peɓɛ̀ núnú hũn ɛ́ ɓɛrɛ dɛ̃un.»
Yiezu ɓaàrɔ́ bòo
Mar 14.43-50; Lik 22.47-53; Zãn 18.3-12
47Ɛ́ Yiezu ɲɛùn yí bie vé wɛ̀, à Zudaasi lɛ iè pe piè kɛ̀ránzɛ̀ɓɛ̀ pírú àá nìɛ ɓɛ̀ ɲu dɔ̀ ɛ́ ɓɛrɛ dɛ̃un àá ɓɛ́ nìzã̀amáa lɛ ɛ́ dàa hɔ khã́a àá hɔ́ lànlɛ̀a, lɛ ɛ́ ɓɛ́ khɛ̃́ndàariè hándíe àá ɓɛ́ lóo nìkĩ́ɛ ɛ́ te ɛ́ tɔrɛ. 48Ápe Zudaasi lɛ te Yiezu ɛ́ mii dé ɓɛ́ nìnbirìe núnú hũn ɛ́ den sɛ̃̀nɛ́hã̀ zɛ̃́niɛ hɔ̀ bòo lɛ á mii wé ɛ̀ ɓɛ̀ dàá dũń ɔ́ ɛ́ lɛ́ ɓà ǹ. À sɛ̃̀nɛ́hã̀ bie lɛ́ ɓà ǹ nɛ: «Àpe lɛ ɛ́ nin vɛ ɛ̀ fòoní ɛ̀ yòó fɔ̀nfɔ̀ní kekere ɛ́ iè ɔ̀pe; ɛ̀ mì wo ɓaà ɔ̀.» 49Ɛ́ mí laà hũn, ɛ́ Zudaasi ɛ́ van lúwiniɛ Yiezu ǹ à zɔn bie nɛ: «Kɛ̀ránlɔ, nín kɔ̀ fòoní!» À yòó fɔ̀fɔ̀niɛ piè kekere. 50Ɛ́ Yiezu zɔn bie lɛ́ à ǹ ɛ́ nɛ làa: «Kìe biɛ̀, hɔ̀ bòo lɛ ɛ́ kɔ́ ɓɛrɛ kɔ wé ɛ́ kɔ́ wé.» Ɛ́ ɓɛ́ nìnbirìe sí kɛ́ ɛ́ wo ɓɛrɛ lúwiniɛ Yiezu ǹ ɛ̀ ɓɛ̀ ɓaa ɔ̀. 51Ɛ́ ɓɛ́ nìnbirìe lɛ wi ɓánlɔ̀n àá Yiezu á dɔ̀ ɛ́ zɔn vua mí khɛ̃́n-tɔ́nú à yòó cɛ̃́nɛ à khɛ̃́ndàarɔ wì-bɛhɔ́ tɔntɛ́ ǹ ɛ́ tɛ́rɛ piè ɲɛkɛ̃hṹ khie síɛniɛ. 52Ɛ́ Yiezu ɛ́ khie bie lɛ́ à ǹ ɛ́ nɛ làa: «Yòó dé kɔ́ khɛ̃́n-tɔ́nú mí lóohɔ́; iè hɔ̀ lɛ ɛ́ ɓɛ́ nìnbirìe lɛ wóò khui hɔ khã́a ɛ̀ dàá fĩ ɛ́ hɔ́ khã́a ɛ́ ɓiɛ̀ te ɓén ɓé. 53Kɔ́ yí dũ kɛ́ ń hṹn dɛ̀ kìe Yàá ɛ́ ve nɛ a sĩiní mi, ɛ́ mí laà hṹn á hṹn ɓén tɔn mɛlɛkɛɓɛ hĩtɛ́riè ɲúuhɛ̃ pírú àá bɔ̀nbɔ̀ ɲu ɛ́ ɓɛ́ ɛ́ ɓen sĩiní mi? 54Kɛ́ ń den ɓen wɔ́ hɔ́pe sí, ɛ́ hɔ́ bòo lɛ ɛ́ wɛ̃́ lé Dɔfĩn bienù vɛ̃hṹ hũn ɛ́ ɲunù ɛ́ yí dɛ̀ yá tí lò. Hɔ̀ wɛ̃́ yán nɛ hɔpe lɛ ɛ́ wé ɛ́ fɔ́ɓán ɛ̀ hɔ̀ wé kɛ̀amu.»
55Ɛ́ Yiezu ɛ́ khie bie lɛ́ ɓɛ́ nìnbirìe ǹ ɛ́ nɛ làa: «Mí ɓɛrɛ àá hɔ́ khã́a, àá hɔ́ lànlɛ̀a ɛ́ mii ɓen ɓaà mi kɛ̀a bòo ɛ́ ń iè kɛ̃̀míi. Ń hṹn wóò kań lé Dɔfĩn zũ-bɛhɔ́ hũn sítĩnlɔ́ míkùi hũn ɛ̀ kɛ̀rán ɓɛ́ nìnbirìe àá Dɔfĩn bienù, ɛ́ mí yí ɓaà mi wɛ̀. 56Kɛ́ hɔ́pe lɛ míkùi ɛ́ wɔ́ kɛ̀amu, bòo lɛ ɛ́ wé ɛ̀ Dɔfĩn bɔ̀háaníriè bòo lɛ ɛ́ ɓɛ́ wɛ̃́ lé Dɔfĩn bienù vɛ̃hṹ hũn ɛ̀ dàá ɲunù tí míkùi.» Ɛ́ piè kɛ̀ránzɛ̀ɓɛ̀ ɓɛ́kùi ɛ́ wo fùɛrɛ̀sí-e ǹ ɛ̀ ɓɛ̀ zɔ̀ vṹnunkɛ.
Ɓɛ̀ dàa Yiezu ɛ́ dàa van ɓɛ̀ lìe lèriè viì
Mar 14.53-65; Lik 22.54-55; 22.63-71; Zãn 18.13-14; 18.19-24
57Ɛ́ ɓɛ́ nìnbirìe lɛ ɛ́ ɓaa ɔ̀ Yiezu ɛ́ dàa ɔ̀ ɛ́ dàa van ɔ̀ khɛ̃́ndàarɔ wì-bɛhɔ́ Kayiifu yíe; hɔ̀ iè yán ɛ́ ɓɛ́ làndɛ́ kɛ̀ránliè àá ɓɛ́ lóo nìkĩ́ɛ ɛ́ hṹn van koo ɓánlɔ̀n hũn. 58Ɛ́ Piɛre ɛ́ van bɔ̀ Yiezu máahṹ kɛ́ á viì ni ɛ́ van dɛ̃un ɔ̀ khɛ̃́ndàarɔ wì-bɛhɔ́ dànkɔ̀, à yòó zɔn ɛ́ zɔn kɛsí àá ɓɛ́ zũhìeriè, ɛ́ mii mi hɔpe sí bòo lɛ ɛ́ hɔ́ mii dàá wé ɛ̀ vɛ vé.
59Ɛ́ ɓɛ́ khɛ̃́ndàariè hándíe àá ɓɛ́pe lìe lèriè ɓɛ́kùi ɛ́ wo ɛ́ hɔ̀ bòo lɛ ɛ́ ɓɛ wé ɛ̀ dàa ɓúukɛ Yiezu ɲunù ɛ̀ dàa yí-e ɓé ɛ̀ cɛ̀. 60Ɛ́ ɓɛ́ cɛ̀ tan, hɛ̀rí àá bòo lɛ ɛ́ nìnbí-kui ɛ́ ɓɛrɛ ɓúukɛa pie ɲunù míkùi. Ɛ́ wɔ́ yú, ɛ̀ nìɛ ɓɛ̀ ɲu dɔ̀ ɛ́ ɓɛrɛ, 61ɛ̀ ɓɛ̀ zɔn bie ɛ́ nɛ làa: «Àpe sɔ nùún lɛ ɛ́ bie nɛ làa: “Ń dɛ̀ lè Dɔfĩn zũ-bɛhɔ́ ɛ́ wua ɛ̀ nin khíi te le sítĩnlɔ́ bɔ̀nbɔ̀ tĩ tĩ́ihṹ.”» 62Á khɛ̃́ndàarɔ wì-bɛhɔ́ ɛ́ síɛ hĩ́nà ɛ́ bie àá Yiezu ɛ́ nɛ: «Kɔ́ hĩɛ, kɔ́ yí dàa bòo dɔ̀ lɛ ɛ́ kɔ zɔ kɔ̃́ní ɓɛ́pe nìɛ sí bòo lɛ ɛ́ ɓɛ́ ɛ́ bie kɔ bòo hũn?» 63Ɛ́ Yiezu ɛ́ dú mí ɲunù. Á khɛ̃́ndàarɔ wì-bɛhɔ́ ɛ́ zɔn bie lɛ́ à ǹ ɛ́ nɛ làa: «Nin diè kɔ̀ ǹ lè mɛkɛ̃nì ɓàasɔ Dɔfĩn yèrè lɔ̀n nɛ kɔ́ ɓen iè ɔ̀pe Kirisa lɛ iè Dɔfĩn Zuú ɛ̀ kɔ̀ bie hɔ lɛ́ kiè ǹ.» 64Ɛ́ Yiezu ɛ́ zɔn bie lɛ́ à ǹ ɛ́ nɛ làa: «Kɔ́ bie hɔ̀. Kɛ́ nin bĩní bie lɛ́ miɛ ǹ nɛ mí ɓén mi-ɛ nìnbírɔ Zuú kɛ́ á kɛsí Dɔfĩn pànkɛ́ ɓàasɔ ńdóonín, ɛ̀ mì lò ɓén bĩní mi-ɛ kɛ́ á ɛ́ ɓen hɔ̀ hóohũn dùndùó lɔ̀n.» 65Á khɛ̃́ndàarɔ wì-bɛhɔ́ ɛ́ yòó khã̀a mí pɔnkɔ̀rɔ́ à zɔn bie nɛ: «À tòo Dɔfĩn. Ɛ́ hɔ́ iè ńɓùo ɛ́ ké bĩniɛ ɛ́ cɛ̀ nɛ nìnbírɔ dɔ̀ ɛ̀ ɓen bie lɛ́ kiè piè bòo hũn? Mí wo ɲɛ́ bòo lɛ á dàa tòo Dɔfĩn lò! 66Ɛ́ mí nɛ wɛrɛ?» Ɛ́ ɓɛ́ zɔn nɛ a fɔ́ɓán à hí. 67Ɛ́ pehɔ̀ lɔ̀n, ɛ́ ɓɛ́ khie khàaníkɛa ɛ́ koo piè híɛhɔ́ lɔ̀n kɛ́ ɓɛ́ ɛ́ ɔ̀ hɛ àá ɓɛ́ nínkunɓuò, ɛ̀ ɓɛ̀dɔ̀ ɛ́ piè kikiè ɛ̀ láakɛ 68kɛ́ ɓɛ́ ɛ́ biekɛ nɛ: «Kirisa, dũnkɛ dũnkɛ nɛ a iè wie ɛ́ te kɔ lú nin.»
Piɛre ɛ́ pɛ̃́ nɛ mí yí dũ Yiezu wɛ̀
Mar 14.66-72; Lik 22.56-62; Zãn 18.15-18; 18.25-27
69Kɛ́ Piɛre pe hṹn lɔ́ kɛsí lé dànkɔ̀ hũn. Ɛ́ tɔntɛ́ hṹnu dɔ̀ ɛ́ van lúwiniɛ ɔ̀ ǹ à zɔn bie lɛ́ à ǹ nɛ: «Kɔ̀pe lò ɓiɛ̀ hṹn wi ɓánlɔ̀n àá ɔ́pe Yiezu, àpe Kalile nùún.» 70Ɛ́ Piɛre ɛ́ zɔn pɛ̃́ ɓɛ́ nìnbirie ɓɛ́kùi yìe hũn ɛ́ nɛ: «Kɔ̀ bòo sí ɛ́ kɔ́ ɛ́ bie ɛ́ ń yí dũ wɛ̀.» 71À khie vaá-vɛ àá lé dànkɔ̀ zĩínù ɲunù viì, ɛ́ tɔntɛ́ hṹnu wìɓuiɛ̀ dɔ̀ ɛ́ mɔn ɔ̀ á khie ɛ́ bie àá ɓɛ́lɛ wi yán ɛ́ nɛ: «Àpe nùún sɔ lɛ ɛ́ hṹn wi ɓánlɔ̀n àá ɔ́pe Nazarɛɛte Yiezu.» 72Ɛ́ Piɛre ɛ́ sĩ̀n zɔn pɛ̃́ à wíɛ nɛ mípe ɛ́ yí dũ ape nùún sɔ wɛ̀. 73Ɛ́ pe hɔ̀ ńfĩ́i ɛ̀ ɓɛ̀ nìnbirìe lɛ ɛ́ wi yán ɛ́ van lúwiniɛ Piɛre ɛ̀ ɓɛ̀ zɔn bie lɛ́ à ǹ nɛ làa: «Àá bɔ̀bín, kɔ́ hɛ̀ iè ɓɛ̀pe nìɛ sɔ dɔ̀! Kɔ̀ bierɔ́ ɛ́ kɔ̀ lénlén ɛ̀ zɛ̃́ní.» 74Ɛ́ Piɛre ɛ́ zɔn ɛ́ bénkɛ kɛ́ á ɛ́ wĩ́ikɛ nɛ mí pe ɛ́ yí dũ ape nùún sɔ wɛ̀. Á kɔ̀bíɛ ɛ́ zɔn wũamɛa. 75Ɛ́ Piɛre ɛ́ síɛ lieniɛ Yiezu bòo lɛ á hṹn bie lɛ́ à ǹ nɛ: À kɔ̀bíɛ ɛ́ ɓen mii wírí, hɔ́rɔsí ɛ̀ kɔ̀ pɛ̃́ yìehɛ̃̀ tĩ nɛ kɔ́ yí dũ mi wɛ̀. Ɛ́ Piɛre wo khie van lɔ́ àá yíe, ɛ́ van lɔ́ wírie cɛ̃̀un.
Айни замон обунашуда:
Matiye 26: bwj
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation