Matiye 27
27
Ɓɛ̀ dàa Yiezu ɛ́ dàa van ɔ̀ Kuvɛrɛnɛɛre Pilaate viì
Mar 15.1; Lik 23.1-2; Zãn 18.28-32
1Ɛ́ pehɔ̀ sí lɛ ɛ́ tĩ ɲɛǹbín dùdù, ɛ́ ɓɛ́ khɛ̃́ndàariè hándíe ɓɛ́kùi àá ɓɛ́ Zuifuɓɛ nìkĩ́ɛ ɛ́ lɔ̀ tɔ̀ ɛ̀ ɓɛ̀ nɛ Yiezu ɛ́ fɔ́ɓán à hí. 2Ɛ́ ɓɛ́ khie can ɔ̀ ɛ̀ ɓɛ̀ dàa ɔ̀ ɛ́ van lɛ́ á Pilaate ǹ lɛ iè ɔ̀ Rɔmu kuvɛrɛnɛɛre.
Zudaasi húmú bòo
Bɔw 1.18-19
3Á Zudaasi lɛ ɛ́ ti-e Yiezu ɛ́ dɔ́ ɓɛ́ nìnbirìe núnú hũn ɛ́ mii húi ɛ̀ ɓɛ̀ nɛ ape Yiezu ɛ́ fɔ́ɓán à hí, á den wo ɛ́ kɛ́bí kɛ́ á ɛ́ bie mí hũn ie kɛ́ mí hṹn dũ nɛ mì yí wé hɔ́ wɛ̀. Á hĩ́nà van ɓɛ̀ khɛ̃́ndàariè hándíe àá ɓɛ́ Zuifuɓɛ nìkĩ́ɛ viì àá hɔ́ màa ɓénlé àá pírú lɛ ɛ́ ɓɛ́ hṹn sàaniɛ lɛ́ à ǹ, 4à bie lɛ́ ɓà ǹ ɛ́ nɛ làa: «Ń wɔ́ khɔn, ń dɔ́ nìnbírɔ lɛ ɛ́ yí wé bɔ̀koohɔ́ ɓɛ̀ nìnbirìe núnú hũn ɛ́ ɓɛ́ wo ɓɛ ɛ̀ ɓé.» Ɛ́ ɓɛ́ zɔn kɔ̃́niɛ ɔ̀ nɛ: «Hɔ̀ yí cɛrɛkɛa kie wɛ̀, hɔ̀ iè kɔ̀pe ɛ́ hɔ́ nɛ̀ lò!» 5Ɛ́ Zudaasi ɛ́ síɛ koosí hɔ́ màa sɔ lè Dɔfĩn zũ-bɛhɔ́ hũn à khie lɔ́ cɔ́ ɛ́ van zɔn hurɔ́. 6Ɛ́ ɓɛ́ khɛ̃́ndàariè hándíe ɛ́ khie khuie hɔ̀ màa sɔ ɛ̀ ɓɛ̀ nɛ làa: «Kè làndɛ́ wṹn lɔ̀n ɛ́ ké yí sãawi ɛ̀ kè kóo hɔ́ lè Dɔfĩn zũ-bɛhɔ́ màa lɔ̀n wɛ̀; iè hɔ̀ lɛ ɛ́ hɔ́ iè cãani màa.» 7Ɛ́ ɓɛ́ khie lɔ̀ tɔ̀, ɛ̀ ɓɛ̀ van yɛ̀ à pɛ̃́nmí mún àá hɔ́pe màa sɔ, ɛ́ wɔ́ àá ɓɛ́ nɛ̀hãà wũ̀nlén. 8Ɛ́ sí iè hɔ̀pe ɛ́ ɓɛ́ dàa pɛ́wi wóò ve le mún sɔ nɛ cãani mún hɛ̀rí kɛ̀a zoòni. 9Ɛ́ Dɔfĩn bɔ̀háanírɔ Zeremi bòo lɛ á hàarí bie ɛ́ dàa ɲunù tú. À hàarí bie ɛ́ nɛ làa: «Ɛ́ ɓɛ́ khie mɔ̀ ɓɛ́ màa ɓénlé àá pírú, lɛ iè pe màa lɛ ɛ́ ɓɛ́ Yizarayɛɛle nìɛ ɛ́ ɲɛ́ ɓán lɔ̀n nɛ ɓɛ dàá yɛ̀ àá ɔ́, 10ɛ́ dàa van yɛ̀ à pɛ̃́nmí mún, kɛ̀a bòo lɛ ɛ́ Ɲunsɔ ɛ́ dàa hàarí bie hɔ̀ ɛ́ lɛ́ mi ǹ.»
Pilaate ɛ́ Yiezu ɛ̀ dìekɛnin
Mar 15.2-15; Lik 23.13-25; Zãn 18.33; 19.16
11Ɛ́ ɓɛ́ van dĩniɛ Yiezu à Rɔmu Kuvɛrɛnɛɛre híɛhɔ́, á Kuvɛrɛnɛɛre ɛ́ zɔn ɛ́ ɔ̀ dìenin ɛ́ nɛ làa: «Kɔ́ iè pe Zuifuɓɛ bɛ́zuú yée?» Ɛ́ Yiezu zɔn kɔ̃́niɛ ɔ̀ nɛ: «Kɔ́ bie hɔ̀.» 12Kɛ́ hɔ́ lɛ ɛ́ ɓɛ́ khɛ̃́ndàariè hándíe àá ɓɛ́ lóo nìkĩ́ɛ ɛ́ khie ɛ́ bie nɛ Yiezu ɛ́ wɔ́ khɔn bòo bɔ̀kuì hũn, ɛ́ Yiezu ɛ́ yí bĩní zɔ kɔ̃́ní bòo dɔ̀ wɛ̀. 13Ɛ́ Pilaate ɛ́ zɔn bie lɛ́ à ǹ nɛ làa: «Hɔ̀pe bòo sí ɛ́ ɓɛ́ ɛ́ bie míkùi nɛ wɔ́, ɛ́ kɔ́ yá hɔ̀ ɲi?» 14Ɛ́ Yiezu ɛ́ yí kɔ̃́ní-ɛ wɛ̀. Ɛ́ hɔ́ hɛ̀ yòokɛa ɔ̀ Kuvɛrɛnɛɛre lɔ̀n àá bɔ̀bín.
15Nyiewɛlɔn sɛ́rí ɛ́ hṹn ɓen dɛ̃un, à Kuvɛrɛnɛɛre ɛ́ wóò leń ɔ́ kɛsí nùún dɔ̀ ɛ̀ fùansínin. Kɛ́ á den wóò wi-e lɛ ɓɛ́ nìzã̀amáa ɛ́ nɛ á leń fùansínin. 16Ɛ́ pehɔ̀ yìi hũn, ɛ̀ kɛ̀sí nùún dɔ̀ lɛ yèrè hàarí lɔ́ cɛ̃̀un ɛ́ hàarí wi yán, piè yèrè ɛ́ ɓɛ́ hàarí nɛ Barabaasi. 17Ɛ́ Pilaate ɛ́ zɔn ɓɛ̀ nìzã̀amáa lɛ koo ɓánlɔ̀n ɛ̀ dìenin nɛ làa: «À iè ɔ̀ hɔ́sɔ ɛ́ mí wɛ nɛ n leń ɛ̀ fùansínin lɛ́ miɛ ǹ? À Barabaasi yée kɛ́ á Yiezu lɛ ɛ́ ɓɛ́ wóò ve nɛ Kirisa?» 18Pilaate den hṹn dũ kɛ́ lé iè yanlienú ɛ́ ɓɛ́ ɛ́ dí àá Yiezu ɛ́ ɓɛ́ dàa ɓɛrɛ dú-o piè núnú hũn. 19Ɛ́ hɔ́ lɛ ɛ́ Pilaate ɛ́ kɛsí ɛ́ hɔ̀ lìe ɛ̀ lè, ɛ́ ɓà hṹnu ɛ́ tɔrɛ nìnbírɔ dɔ̀ nɛ a vɛ bie lɛ́ à ǹ nɛ làa: «Bí dé kɔ́te àpe nìcã̀anírɔ sɔ lɛ bòo hũn wɛ̀. Ń ɲuhṹ sṹnúhṹn lɔ̀n bɔn cɛ̃̀un àá dɛ̀woò pie bòo hũn.» 20Ɛ́ ɓɛ́ khɛ̃́ndàariè hándíe àá ɓɛ́ nìkĩ́ɛ ɛ́ khie kɛ̃́niɛ ɓɛ̀ nìzã̀amáa nɛ ɓɛ bie nɛ a Barabaasi iè pe á Pilaate ɛ̀ leń fùansínin, à Yiezu á lɛ́ nɛ ɓɛ ɓé. 21Á Kuvɛrɛnɛɛre ɛ́ zɔn ɛ́ ɓɛ̀ dìenin nɛ làa: «À iè hɔ́sɔ ɛ́ mí nɛ n leń fùasínin ɛ̀ lɛ́ miɛ ǹ ɓɛ̀pe nìɛ ɓɛ̀ ɲu sɔ lɛ tĩ́ihṹ?» Ɛ́ ɓɛ́ zɔn nɛ a Barabaasi. 22Ɛ́ Pilaate zɔn ɛ́ ɓɛ̀ dìenin nɛ làa: «Ɛ́ hɔ́ iè ńɓùo ɛ́ mí nɛ n wé àá ɔ́ Yiezu lɛ ɛ́ ɓɛ́ wóò ve nɛ Kirisa?» Ɛ́ ɓɛ́pe ɓɛ́kùi ɛ́ zɔn nɛ: «Ɓáa ɔ́ lè ɓáalén dãanù lɔ̀n.» 23Á Kuvɛrɛnɛɛre ɛ́ zɔn ɛ́ ɓɛ̀ dìenin nɛ làa: «Kɛ́ hɔ́ den iè hɔ̀ bɔ̀koohɔ́ hɔ́sɔ á wɔ́?» Ɛ́ ɓɛ́pe ɓɛ́kùi ɛ́ bĩniɛ wookɛa zɔn bénkɛ cɛ̃̀un ɛ́ nɛ: «Ɓáa ɔ́ ɓáalén dãanù lɔ̀n!» 24Ɛ́ Pilaate mii húi à hɛ̀ yí dɛ̀ bòo dɔ̀ ɛ́ yá wé wɛ̀; ɛ̀ ɓɛ̀ nìnbirìe bénkɛà ɛ́ wookɛa ɛ́ yòó yòórɔ́. Á khie ɛ́ fɔ́ hɔ́ ɲumu ɛ́ tiɛ mí níhĩ́ ɓɛ̀ nìzã̀amáa híɛhɔ́ à zɔn bie ɛ́ nɛ làa: «Niǹ bòo ɛ́ mínɛ àpe nìcã̀anírɔ sɔ lɛ húmú bòo hũn wɛ̀. Mí te mí ɲúuhɛ̃ bòo.» 25Ɛ́ ɓɛ́ nìzã̀amáa ɓɛ́kùi ɛ́ zɔn nɛ: «Nɛ piè húmú ɲúuhɛ̃ bòo ɛ̀ síɛ képe àá ké nìɛ lɔ̀n.» 26Ɛ́ Pilaate wo lerɛ à Barabaasi ɛ́ fùɛrɛ̀sínin lɛ́ ɓà ǹ, à khie lɛ́ ɛ́ ɓɛ́ han Yiezu àá hɔ́ ńhùiehĩ́, à wo lɛ́ á ɓà ǹ nɛ ɓɛ vɛ ɓáa lé ɓáalén dãanù lɔ̀n.
Ɓɛ̀ sɛ̃̀nɛ̀dɔ́síɓɛ́ ɛ́ Yiezu ɛ̀ yáakɛ
Mar 15.16-20; Zãn 19.2-3
27Á Kuvɛrɛnɛɛre sɛ̃̀nɛ̀dɔ́síɓɛ́ ɛ́ khie dàa Yiezu ɛ́ dàa van zɔn piè dànkɔ̀ hũn, ɛ́ zɔn vɔn ɓá ńkɔhĩ́ sɛ̃̀nɛ̀dɔ́síɓɛ́ lɛ kɛ́ ɓɛ́kùi ɛ́ ɓɛ́ wo ɓɛrɛ kirie Yiezu ǹ. 28Ɛ́ ɓɛ́ khie duinkɛa piè tĩ̀ɛ ɛ̀ ɓɛ̀ zooniɛ ɔ̀ àá mùakú dɛ̀miì dɔ̀, 29ɛ̀ ɓɛ̀ khie tɛ̃́ bɛ́záanú múnséré àá hɔ́ ńɲinlɛ̀a ɛ́ yòó yìiniɛ àá ɔ́, ɛ̀ ɓɛ̀ khie mɔ̀ kã́anú ɛ́ dɔ́ piè ńdóonín núnú hũn, ɛ̀ ɓɛ̀ síɛ hùenkɛasí piè híɛhɔ́ ɛ̀ ɓɛ̀ ɛ́ ɔ̀ yáakɛ ɛ́ nɛ: «Zuifuɓɛ bɛ́zuú, ké kɔ̀ fòoní!» 30Ɛ̀ ɓɛ̀ khie ɛ́ khàaníkɛ ɛ̀ kóo piè lɔ̀n, ɛ̀ ɓɛ̀ mìí lé kã́anú ɛ̀ ɓɛ̀ yòó nii piè ɲún ǹ. 31Ɛ́ ɓɛ́ yaakɛa ɔ̀ vɔ́, ɛ̀ ɓɛ̀ duirɛ lè mùakú sɔ, ɛ̀ ɓɛ̀ khuie piè tĩ̀ɛ ɛ́ khie zooniɛ àá ɔ́, ɛ̀ ɓɛ̀ khie dàa ɔ̀ ɛ́ dàa cɔ́ ɛ́ ɓɛ vɛ ɓáa lé ɓáalén dãanù lɔ̀n.
Yiezu ɓáarɔ́ lè ɓáalén dãanù lɔ̀n bòo
Mar 15.21-32; Lik 23.26-43; Zãn 19.17-27
32Ɛ́ hɔ́ lɛ ɛ́ ɓɛ zɔn ɛ́ lé lé lóo hũn, ɛ́ ɓɛ́ lɔ́ sɛ̃́ Sirɛnɛ lóo nùún dɔ̀ híɛhɔ́, piè yèrè ɛ́ ɓɛ́ nɛ Simɔn. Ɛ́ ɓɛ́ khie mɛmɛ́kɛa ɔ̀ nɛ a tìé Yiezu ɓáalén dãanù. 33Ɛ́ ɓɛ́ van dɛ̃un viì dɔ̀ lɛ ɛ́ ɓɛ́ wóò ve nɛ Kɔlikota, iè bòo ɛ́ ɓɛ́ nɛ «ɲún ɓɔ̀ɓɔ́khiɛ̀ viì». 34Ɛ́ ɓɛ́ khie lɛ́ hɔ́ divɛ̃n lɛ ɛ́ ɓɛ́ kánkɛa àá hɔ́ bòo dɔ̀ lɛ hiɛ̀ Yiezu ǹ nɛ a ɲu; ɛ́ hɔ́ lɛ á díndíe hɔ̀, à pɛ̃́ ɛ́ yí ɲu hɔ wɛ̀. 35Ɛ́ ɓɛ́ khie ɓáa Yiezu lè ɓáalén dãanù lɔ̀n, ɛ̀ hɔ̀ lɛ ɛ́ ɓɛ ɛ̀ sankɛ piè tĩ̀ɛ lɛ á hṹn zɔn, ɛ́ ɓɛ́ khie lenkɛa hɔ̀ bòo ɛ́ dàa dũnɛ hɔ́rɔ dìɛ lɛ á sãawi à yí. 36Ɛ̀ ɓɛ̀ wo síɛ kɛsí ɛ́ ɔ̀ hìénin. 37Ɛ́ hɔ́ bòo lɛ á wɔ́ ɛ́ ɓɛ́ dàa nɛ a fɔ́ɓán à ɓé ɛ́ ɓɛ́ wɛ̃́ yòó ɓíɛniɛ pìe ɲún hũn lè ɓáalén dãanù lɔ̀n ɛ́ nɛ làa: «Àlɛ iè Yiezu, ɓɛ̀ Zuifuɓɛ bɛ́zuú.»
38Ɛ̀ kɛ̃̀múa bìɛ ɲu dɔ̀ ɛ́ ɓɛ́ ɓiɛ̀ khie ɓáa hɔ̀ ɓáalén dãahĩ́ lɔ̀n Yiezu sɛ̀nù. Àdɔ̀ ɛ́ wi àá piè ńdóonín à dɔ̀ ɛ́ wi àá piè ńmiinín. 39Ɛ́ ɓɛ́ wṹ-bèrie lɛ ɛ́ khíi ɛ́ ɓɛ́ ɲúuhɛ̃ ɛ̀ vĩ́ kɛ́ ɓɛ́ ɛ́ Yiezu ɛ̀ tòokɛ, 40ɛ̀ ɓɛ̀ ɛ́ bie ɛ́ nɛ làa: «Kɔ̀pe lɛ ɛ́ dɛ̀ lè Dɔfĩn zũ-bɛhɔ́ ɛ́ wúa ɛ̀ kɔ̀ ɛ́ bĩní khũ̀á te le sítĩnlɔ́ bɔ̀nbɔ̀ tĩ hũn, ɛ́ kɔ́ fuení kɔ́te kɔ̀te ǹ! Kɔ́ ɓen iè Dɔfĩn Zuú àá bɔ̀bín, ɛ̀ kɔ̀ yòó lé lé ɓáalén dãanù lɔ̀n khíi síɛ nɛ ke mi!» 41Ɛ́ ɓɛ́ khɛ̃́ndàariè hándíe àá ɓɛ́ làndɛ́ kɛ̀ránliè àá ɓɛ́ Zuifuɓɛ nìkĩ́ɛ ɛ́ lò ɓiɛ̀ ɛ́ ɔ̀ yáakɛ ɛ́ nɛ làa: 42«À fueniɛ ɓɛ̀ nìnbí-ɓuà ǹ, à den yí dɛ̀ míte ɛ́ yá fuenínin wɛ̀! À wo iè ɔ̀ Yizarayɛɛle bɛ́zuú lò! Á wo yòó lé lé ɓáalén dãanù khíi síɛ nɛ ke mi, ɛ́ ké wo ɛ́ dɛ ɛ́ sĩ̀-ɛ ǹ! 43À mɔ̀ míte ɛ́ dɔ́ Dɔfĩn núnú hũn, à bie nɛ mípe ɛ́ iè Dɔfĩn Zuú. Ɛ́ hɔ́pe Dɔfĩn ɛ́ ɓen wɛ-a àá bɔ̀bín ɛ̀ Hɔ̀ wo síɛ fuení-ɛ̀ ǹ hɔ̀pe lɛ lɔ̀n!» 44Ɛ́ ɓɛ́ kɛ̃̀múa lɛ ɛ́ ɓɛ́ ɓáa piè sɛhĩ́ɛ hɔ̀ ɓáalén dãahĩ́ lɔ̀n ɛ́ lò ɓiɛ̀ ɛ́ ɔ̀ tòokɛ kɛ̀amu.
Yiezu húmú bòo
Mar 15.33-41; Lik 23.44-49; Zãn 19.28-30
45Ɛ́ bòo lɛ ɛ́ lé wurù ɛ́ yòó dɛ̃un lè sí tĩ́ihṹ, lè wúsɔn-dáabíi hũn, ɛ́ hɔ́ síbínú yòó wɔ́ lé sṹsùnù míkùi lɔ̀n fúu ɛ́ van dɛ̃un lè wu-háaré. 46Ɛ́ lépe wu-háaré sɔ hũn, ɛ́ Yiezu ɛ́ zɔn bérɛ cɛ̃̀un ɛ́ nɛ: «Eli, Eli, lema sabakatani?» Iè bòo á nɛ: «Niǹ Dɔfĩn, niǹ Dɔfĩn, hɔ ńɓùo ɛ́ kɔ́ dàa fùɛrɛ̀sí mi ǹ?» 47Ɛ́ ɓɛ́ nìnbirìe lɛ hṹn dɛ̃̀ yán ɛ́ ɓɛ́dɔ̀ ɛ́ ɲɛ́ hɔ́ ɛ́ ɓɛ́ ɛ́ bie ɛ́ nɛ làa: «À ɛ́ Elii ɛ̀ ve!» 48Ɛ́ mí laà hũn, ɛ́ peɓɛ̀ tĩ́ihṹ, ádɔ̀ ɛ́ khie zɔ̀ van mɔ̀ lè pɔnkɔ̀-núnú dɔ̀ ɛ́ khie zìiniɛ hɔ̀ divɛ̃n lɛ ɲiì hũn ɛ́ yòó bɛ́rɛ́kɛa lè kã́anú ɲún ǹ ɛ́ van yòó bɔ̀ Yiezu ɲunù ǹ nɛ a ɲu. 49Kɛ́ ɓɛ́lɛ kɛ́ ɛ́ den zɔn bie ɛ́ nɛ làa: «Dĩ̀ń nɛ ke húi nɛ bòo ápe Elii ɛ́ ɓén síɛ fuení-ɛ̀ ǹ!»
50Ɛ́ Yiezu ɛ́ bĩniɛ zɔn ɛ́ wũamɛa cɛ̃̀un à wo húrun. 51Ɛ́ pehɔ̀ yìi hũn, ɛ́ lé fúrɛ́ dɛ̀bɛhɔ́ lɛ zɔn can dɛ̃̀ ɛ́ cérɛ lè Dɔfĩn zũnù tĩ́ihṹ ɛ́ zɔn khã̀a ɛ́ yòó lɔ́ hɔ́ hóohũn fúu ɛ́ ɓen síɛ tɛ́rɛ. Ɛ̀ lè sṹsùnù ɛ́ síɛ zɛ̀, ɛ̀ hɔ̀ lɛhĩ́ ɛ́ wánkɛa, 52ɛ́ hɔ́ búo ɛ́ hánkɛa, ɛ́ ɓɛ́ nìnbirìe lɛ ɛ́ húrunkɛ kɛ́ ɓɛ́ dũmuasɛ̃̀ Dɔfĩn bìkuì ɛ́ vìekɛa yòó lɔ́. 53Ɓɛ̀ lɔ́ hɔ́ búo hũn; ɛ́ hɔ́ lɛ ɛ́ Yiezu ɛ́ vìé vɔ́, ɛ́ ɓɛ́ van zɔn Zerizalɛɛmu lóo fɔ́nu hũn, lèpe lóo lɛ ɛ́ ɓɛ́ wóò ve nɛ lóo lɛ bòo ɛ́ sɛ̃̀ Dɔfĩn; ɛ́ nìnbirìe bìkuì ɛ́ mɔn ɓɛ̀.
54Á sɛ̃̀nɛ̀dɔ́síɓɛ́ ɲúnsɔ àá ɓɛ́pe sɛ̃̀nɛ̀dɔ́síɓɛ́ lɛ hṹn wi àá ɔ́ ɛ́ dàa ɛ́ Yiezu hìénin ɛ́ mɔn bòo lɛ ɛ́ lé sṹsùnù dàa zɛ̀ àá hɔ́pe bòo lɛ ɛ́ wɔ́, ɛ́ ɓɛ́ hɛ̀ zɛ́rɛ cɛ̃̀un ɛ̀ ɓɛ̀ ɛ́ bie ɛ́ nɛ làa: «Àpe nùún sɔ lɛ ɛ́ hɛ̀ hṹn iè ɔ̀pe Dɔfĩn Zuú àá bɔ̀bín.»
55Ɛ́ hã́a bìkuì dɔ̀ ɛ́ hàarí wi yán, kɛ́ ɓɛ́ van dɛ̃̀ viì ni ɛ́ hɔ̀ bòo lɛ́ wé ɛ̀ húi. Ɓɛ̀ iè ɓɛ̀pe hã́a lɛ ɛ́ háarí bɔ̀ Yiezu máahṹ ɛ́ dàa lɔ́ hɔ́ Kalile ɛ́ piè bòo ɛ̀ húi. 56Ɛ́ Maari lɛ ɛ́ lé hɔ́ Makedala lóo, àá Zaake àá Zozɛɛfu ɓà nín Maari, àá Zebede nìɛ ɓà nín ɛ́ hàarí wi ɓɛpe hã́a sɔ tĩ́ihṹ.
Yiezu wũ̀nlɔ́
Mar 15.42-47; Lik 23.50-56; Zãn 19.38-42
57Ɛ́ hɔ́ zĩ́ihṹ ɛ́ van dɛ̃un, ɛ́ nùún dɔ̀ lɛ iè bòo ɓàasɔ lɛ ɛ́ lé hɔ́ Arimatee lóo van ɓɛrɛ. Piè yèrè ɛ́ ɓɛ́ nɛ Zozɛɛfu; à hàarí iè Yiezu kɛ̀ránzuú dɔ̀. 58Á van Pilaate viì ɛ́ van hɛ̃nnɛ Yiezu nìheemu. Ɛ́ Pilaate ɛ́ nɛ ɓɛ lɛ́ á Yiezu nìheemu ɔ̀ ǹ. 59Ápe Zozɛɛfu ɛ́ wo van mɔ̀ Yiezu nìheemu ɛ́ bɛ́nin àá lé pɔnkɔ̀-fĩì, 60ɛ́ van dɔ́ mí kùrú búi dɛ̀fĩì lɛ cɛ̃́ lé lɛnù hũn, à khie bìríkɛa lè sɛ̃̀n-bɛhɔ́ dɔ̀ ɛ́ khie híɛ pelè ɲunù à khie cɔ́. 61Ɛ́ hɔ́pe sí ɛ́ wé kɛ́ a Maari lɛ ɛ́ lé hɔ́ Makedala lóo àá ɔ́ Maari sí kɛ́ ɛ́ kɛsí lé búi híɛhɔ́.
Yiezu búi hìeninlɔ́ bòo
62Ɛ́ pehɔ̀ sí lɛ ɛ́ tĩ, lɛ iè lè sí lɛ ɛ́ sɛ̃̀ lè wurù lɛ ɛ́ ɓɛ́ Zuifuɓɛ ɛ́ dàa wóò sɛ́sɛ́ ɓɛ́ ńvũùnín sí, ɛ́ ɓɛ́ khɛ̃́ndàariè hándíe àá ɓɛ́ Farizĩɛɓɛ ɛ́ páaníɛ bɔ̀ɓán van ɔ̀ Pilaate viì 63ɛ́ van bie lɛ́ à ǹ nɛ làa: «Ɲunsɔ, ké síɛ lieniɛ kɛ́ hɔ́ lɛ ápe nì-fĩiníkɛ sɔ ɛ́ hṹn yìe wi, à hṹn wóò bie nɛ làa: “Sítĩnlɔ́ bɔ̀nbɔ̀ tĩ ɛ́ ɓen khie, ɛ́ nín vìé.” 64Ɛ́ ké ɛ́ cɛ̀ nɛ kɔ bie nɛ ɓɛ vɛ hié lé búi ǹ fúu ɛ̀ hɔ̀ sítĩnlɔ́ bɔ̀nbɔ̀ tĩ sɔ ɲunù ɛ̀ vɛ tĩ́. Kɛ́ dàa bòo mí, ɛ́ piè kɛ̀ránzɛ̀ɓɛ̀ ɛ́ vɛ́ kɛ̃̀mɛ́ piè nìheemu, ɛ̀ ɓɛ̀ ɛ́ khíi bie ɛ́ lɛ́ ɓɛ́ nìnbirìe ǹ nɛ a vìé lɔ́ ɓɛ́ nìhiè tĩ́ihṹ. Ɛ́ hɔ́pe sí ɛ́ wookɛ ɛ́ fĩiní ɓɛ́ nìnbirìe ɛ́ pɔ́ní hɔ́pe hán bòo.» 65Ɛ́ Pilaate ɛ́ zɔn bie lɛ́ ɓà ǹ ɛ́ nɛ làa: «Ɓɛ̀ sɛ̃̀nɛ̀dɔ́síɓɛ́ sí, ɛ́ mí bie lɛ́ ɓà ǹ nɛ ɓɛ vɛ hìé lé búi ǹ kɛ̀a bòo lɛ ɛ́ mí ɛ́ wɛ.» 66Ɛ́ ɓɛ́ khie cɔ́, ɛ́ van sɛ́sɛ́a lè búi hìerɔ́ bòo, ɛ̀ ɓɛ̀ van bɔ̀ bòo dɔ̀ lè sɛ̃̀n-bɛhɔ́ lɛ híɛ le búi ɲunù, bòo lɛ ɛ́ wé kɛ́ nìnbírɔ ɛ́ ɓɛrɛ hɛ́rɛ lè ɛ̀ ɓɛ̀ dũń hɔ, ɛ̀ ɓɛ̀ khie bɔ̀sí ɓɛ́ sɛ̃̀nɛ̀dɔ́síɓɛ́ yán ɛ́ ɓɛ́ ɛ́ lè hìénin.
Айни замон обунашуда:
Matiye 27: bwj
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation