Zãn 19
19
1Ɛ́ Pilaate ɛ́ lɛ́ lé ɲunù nɛ ɓɛ dàá Yiezu dàá lan ɛ̀ vɛ hɛ àá hɔ́ ńhùehĩ́. 2Ɛ́ ɓɛ́ sɛ̃̀nɛ̀dɔ́síɓɛ́ ɛ́ khie tɛ̃́ bɛ́záanú múnséré dɔ̀ àá hɔ́ ńɲinlɛ̀a ɛ́ khie yìiniɛ Yiezu ɲún ǹ, ɛ̀ ɓɛ̀ lò khie zooniɛ ɔ̀ àá mùakú dɛ̀miì dɔ̀ kɛ̀a bɛ́zuú bòo sí. 3Ɛ̀ ɓɛ̀ wóò vɛ lúwiní ɛ ǹ, ɛ̀ ɓɛ̀ bie lɛ́ à ǹ nɛ làa: «Zuifuɓɛ bɛ́zuú, ké kɔ̀ fòoní lòo!» Kɛ́ ɓɛ́ ɛ́ piè kikiè ɛ̀ láakɛ. 4Ɛ́ Pilaate sĩ̀n hĩ́nà ɛ́ ɓen lɔ́ bie lɛ́ ɓɛ́ Zuifuɓɛ ǹ nɛ làa: «Mì húi, nin dàá ɔ́ ɛ̀ ɓen lé lɛ́ miɛ ǹ hɔ̀ yíe, ɛ̀ mì dàá dũń kɛ́ ńpe ɛ́ yí mi bɔ̀koohɔ́ ɔ̀ ǹ.» 5Ɛ́ ɓɛ́ wo dàa Yiezu ɛ́ dàa ɓen lɔ́ kɛ́ á yìe lè ńɲinlɛ̀a bɛ́záanú múnséré à lò zɔn lè mùakú dɛ̀miì. Ɛ́ Pilaate ɛ́ zɔn bie lɛ́ ɓà ǹ nɛ làa: «À nìnbírɔ sɔ lɛ!» 6Ɛ́ bòo lɛ ɛ́ ɓɛ́ khɛ̃́ndàariè hándíe àá ɓɛ́ Dɔfĩn zũhìeriè ɛ́ mɔn ɔ̀, ɛ́ ɓɛ́ ɛ́ wũamɛkɛ kɛ́ ɓɛ́ ɛ́ bie ɛ́ nɛ: «Ɓáa ɔ́ lè ɓáalén dãanù lɔ̀n! Ɓáa ɔ́ lè ɓáalén dãanù lɔ̀n!» Ɛ́ Pilaate ɛ́ zɔn bie lɛ́ ɓà ǹ nɛ làa: «Ɛ́ mí fí-e ɛ̀ vɛ ɓáa mìte ǹ lè ɓáalén dãanù lɔ̀n, iè hɔ̀ lɛ ɛ́ ńpe ɛ́ yí mi bɔ̀koohɔ́ ɔ̀ ǹ wɛ̀.» 7Ɛ́ ɓɛ́ Zuifuɓɛ zɔn bie lɛ́ à ǹ nɛ: «Ké dàa làndɛ́, ɛ́ hɔ́pe làndɛ́ sɔ wṹn lɔ̀n, á sãawi à hí, iè hɔ̀ lɛ á nɛ mípe iè Dɔfĩn Zuú.» 8Ɛ́ bòo lɛ ɛ́ Pilaate ɛ́ ɲɛ́ hɔ́pe biehĩ́ sɔ, á hɛ̀ wookɛa zɛ́rɛ cɛ̃̀un.
9Á sĩ̀n van zɔn lè dànkɔ̀ hũn, ɛ́ sĩ̀n zɔn ɛ́ Yiezu ɛ̀ dìenin nɛ làa: «Kɔ́ lɔ́ yí?» Kɛ́ Yiezu ɛ́ dú mí ɲunù ɛ́ à kɛ́ á. 10Ɛ́ Pilaate zɔn bie lɛ́ à ǹ nɛ: «Kɔ́ pɛ̃́ ɛ́ yí kɔ kɔ̃́ní mi? Kɔ́ yí dũ kɛ́ ń dàa ɲunù lɛ ɛ́ fùansí kɔ ǹ ɛ́ kɔ́ lan, ɛ̀ ǹ lò dàa ɲunù lɛ ɛ́ bie nɛ ɓɛ ɓáa kɔ lè ɓáalén dãanù lɔ̀n?» 11Ɛ́ Yiezu zɔn khɛ́ lɛ́ à ǹ nɛ làa: «Kɔ́ yí dàa pànkɛ́ dɔ̀ niǹ lɔ̀n kɛ́ hɔ́ ɓen yí hɔ́lɛ ɛ́ Dɔfĩn ɛ́ lɛ́ kɔ̀ ǹ. Ɛ́ sí iè pe temu lɛ́ á lɛ ɛ́ te nin ɛ́ dɔ́ kɔ́ núnú hũn, ɛ́ dàa te mu bɔ̀koohɔ́ bɔ̀bɛhɔ́ ɛ́ wɔ́ ɛ́ pɔ kɔpe.» 12Ɛ́ hɔ́pe sí lɔ̀n, ɛ́ Pilaate ɛ́ wo hṹn cɛ̀ mi fùansí Yiezu ǹ. Kɛ́ ɓɛ́ Zuifuɓɛ ɛ́ sĩ̀n zɔn wũamɛkɛ ɛ́ nɛ: «Kɛ́ kɔ́ fùɛrɛ̀sí-e pe nùún sɔ lɛ ǹ ɛ̀ kɔ̀ yí Rɔmu bɛ́zu-bɛhɔ́ Sezaare ɓɛ̀ pàá wɛ̀! Nìnbírɔ yée nìnbírɔ lɛ wóò líi míte àá bɛ́zuú, à iè ɔ̀ Rɔmu bɛ́zu-bɛhɔ́ ɓà ńbíyanle!»
13Ɛ́ bòo lɛ ɛ́ Pilaate ɛ́ ɲɛ́ hɔ́pe biehĩ́ sɔ sí, á nɛ ɓɛ dàá Yiezu dàá ɓen lé àá yíe. À síɛ kɛsí hɔ́ lìe lènlén wànlè lɔ̀n, lè viì lɛ ɛ́ ɓɛ́ wóò ve Hebereɓɛ níi hũn nɛ «Kabata» iè bòo ɛ́ ɓɛ́ nɛ «sɛ̃̀nlɛ̀a lɛ ɛ́ bɛ́rɛsí viì». 14Hɔ̀ wɔ́ ɓɛ́ Zuifuɓɛ Nyiewɛlɔn sɛ́rí hĩ́nílán zɔn, lɛ ɛ́ ɓɛ́ wóò sɛ́sɛ́ ɓɛ́te hũn. Ɛ́ lé wúsɔnu hũn,#19.14 Kɛrɛkiɓɛ vɛ̃hṹ hũn ɛ́ hɔ́ wɛ̃́ nɛ líɛrɛ́ɓɛ́ húezĩ́lán ɛ́ Pilaate ɛ́ bie lɛ́ ɓɛ́ Zuifuɓɛ ǹ nɛ làa: «Mì bɛ́zuú sí!» 15Ɛ́ ɓɛ́ sĩ̀n zɔn wũamɛkɛ nɛ: «Piè húmú iè hɔ̀pe, piè húmú iè hɔ̀pe! Ɓáa ɔ́ lè ɓáalén dãanù lɔ̀n!» Ɛ́ Pilaate zɔn bie lɛ́ ɓà ǹ nɛ làa: «Mí ɛ́ cɛ̀ nɛ n ɓáa mí bɛ́zuú lè ɓáalén dãanù lɔ̀n?» Ɛ́ ɓɛ́ khɛ̃́ndàariè hándíe ɛ́ zɔn nɛ: «Ké yí bĩniɛ dàa bɛ́zuú dɔ̀ kɛ́ á Rɔmu bɛ́zu-bɛhɔ́ Sezaare ɛ́ ɓen bòo mí.» 16Ɛ́ Pilaate wo tɛ̀ peɓɛ̀ tĩɛ̀ bòo à wo lɛ́ lé ɲunù nɛ ɓɛ sɛ̃̀nɛ̀dɔ́síɓɛ́ ɛ̀ vɛ ɓáa ɔ́ Yiezu lè ɓáalén dãanù lɔ̀n.
Ɓɛ̀ ɓáa Yiezu lè ɓáalén dãanù lɔ̀n
Mat 27.32-44; Mar 15.21-32; Lik 23.26-43
Ɛ́ ɓɛ́ sɛ̃̀nɛ̀dɔ́síɓɛ́ ɛ́ wo khie fɔ́ Yiezu ɛ́ dàa cɔ́. 17Ɛ́ ɓɛ́ lɛ́ á tìe mí ɓáalén dãanù ɛ́ dàa zɔn lɔ́ lé lóo hũn, ɛ́ lɔ́ kãa le viì lɛ ɛ́ ɓɛ́ wóò nɛ «Ɲún ńɓɔ̀ɓɔ́khiɛ̀ viì». Ɓɛ̀ wóò ve le viì sɔ àá Hebereɓɛ níi hũn nɛ «Kɔlikota». 18Sí iè viì lɛ ɛ́ ɓɛ́ ɓáa ɔ̀ nin, ɛ̀ ɓɛ̀ bĩniɛ ɓáa nìɛ ɓɛ̀ ɲu dɔ̀ hɔ̀ ɓáalén dãahĩ́ lɔ̀n, ɛ́ fɛ́síkɛa dĩ̀niɛ Yiezu sɛhĩ́ɛ, àpe ɛ́ zɔn wi peɓɛ̀ tĩ́ihṹ. 19Ɛ́ Pilaate ɛ́ lɛ́ lé ɲunù ɛ́ ɓɛ́ van wɛ̃́ bòo dɔ̀ lè dìɛ dɔ̀ lɔ̀n ɛ́ ɓɛrɛ ɓáa Yiezu ɲún hũn, piè ɓáalén dãanù lɔ̀n. Hɔ̀ hṹn wɛ̃́ lé dìɛ sɔ lɔ̀n nɛ: «Nazarɛti Yiezu, ɓɛ̀ Zuifuɓɛ bɛ́zuú.» 20Ɛ́ ɓɛ́ Zuifuɓɛ bìkuì ɛ́ kɛ̀rɛa hɔ̀pe bòo lɛ ɛ́ wɛ̃́ lé dìɛ sɔ lɔ̀n iè hɔ̀ lɛ ɛ́ lé viì lɛ ɛ́ ɓɛ́ ɓáa Yiezu nin, ɛ́ hṹn lúwí àá lé fɔ́nú ɛ̀ hɔ̀pe bòo lɛ wɛ̃́ ɛ́ lò hàarí wɛ̃́ àá Hebereɓɛ níi àá Latɛ̃ níi àá Kɛrɛkiɓɛ níi#19.20 Hebere ɛ́ hàarí iè Zuifuɓɛ níi, ɛ̀ Latɛ̃ ɛ́ hàarí iè Rɔmu siè nín, ɛ̀ Kɛrɛkiɓɛ níi ɛ́ hàarí iè hɔ̀ níi lɛ ɛ́ bie hɔ cɛ̃̀mɛ̀náa bɔ̀kuì hũn.. 21Ɛ́ ɓɛ́ Zuifuɓɛ khɛ̃́ndàariè hándíe ɛ́ bie lɛ́ á Pilaate ǹ nɛ làa: «Kɔ́ yí fɔ́ɓán ɛ̀ kɔ̀ wĩ́ bie nɛ “Zuifuɓɛ bɛ́zuú” wɛ̀, kɛ́ kɔ́ sãawi ɛ̀ kɔ̀ wĩ́ bie nɛ: “Àpe nùún sɔ lɛ ɛ́ nɛ mípe iè Zuifuɓɛ bɛ́zuú”.» 22Ɛ́ Pilaate ɛ́ zɔn kɔ̃́niɛ ɓɛ̀ nɛ làa: «Hɔ̀pe lɛ ɛ́ ń wɛ̃́ ɛ́ wɛ̃́ vɔ́.» 23Ɛ́ hɔ́ lɛ ɛ́ ɓɛ́ sɛ̃̀nɛ̀dɔ́síɓɛ́ ɛ́ ɓáa Yiezu vɔ́, ɛ́ ɓɛ́ khie khuie piè tĩ̀ɛ ɛ́ sankɛa ɲúuhɛ̃ nɛ́, hɔ́rɔ sɛ̃̀nɛ̀dɔ́sí ɛ́ wóò teń ɲún-cóoní. Ɛ̀ ɓɛ̀ bĩniɛ khie mɔ piè mùakú, lɛ ɛ́ bɛ̃̀nɓiì ɛ́ mí nin, kɛ́ lé tɛ̃́ tɛ̃́nlɔ́ ɛ́ van síɛ líe míkùi. 24Ɛ́ ɓɛ́ sɛ̃̀nɛ̀dɔ́síɓɛ́ ɛ́ khie ɛ́ bie ɓán hũn nɛ: «Mì bí lɛ́ nɛ ke khã̀akɛ le mùakú sɔ, kɛ́ mí lɛ́ nɛ ke lenkɛ́ hɔ bòo, ɛ̀ dàá mi-ɛ lɛ te le mii yí.» Hɔ̀ wɔ́ kɛ̀amu ɛ́ dàa tíiniɛ lè Dɔfĩn bienù bòo lɛ ɛ́ lé khɛ́ ɲunù. Lè Dɔfĩn bienù hũn, ɛ́ hɔ́ den wɛ̃́ ɛ́ nɛ làa: «Ɓɛ̀ sankɛa niǹ tĩ̀ɛ, ɛ̀ ɓɛ̀ khie taa màa ɛ́ dàa dũnɛ àlɛ ɛ́ te niǹ mùakú ɛ́ yú.» Ɛ́ sí iè hɔ̀pe bòo lɛ ɛ́ ɓɛ́ sɛ̃̀nɛ̀dɔ́síɓɛ́ ɛ́ ɓiɛ̀ wɔ́. 25Yiezu ɓà nín àá ɓá hãá àá Kolopaasi ɓà hṹnu Maari àá Maari lɛ ɛ́ lé Makedala lóo, ɛ́ hṹn dɛ̃̀ Yiezu ɓáalén dãanù sɛnù. 26Ɛ́ Yiezu mɔn ɓá nín kɛ́ á dɛ̃̀, ɛ̀ piè kɛ̀ránzuú lɛ á wɛ ɛ́ lò ɓiɛ̀ dɛ̃̀ piè sɛnù. Á zɔn bie lɛ́ ɓá nín ǹ nɛ làa: «Hṹnu, kɔ̀ Zuú sí.» 27À bĩniɛ khie bie lɛ́ ɔ́pe mí kɛ̀ránzuú sɔ ǹ nɛ: «Mì nín sí.» Ɛ́ wo dàá mìí pehɔ̀ zɔn ǹ, á kɛ̀ránzuú sɔ ɛ́ khie fɔ́ Yiezu ɓà nín ɛ́ dàa van mí yíe.
Yiezu húmú bòo
Mat 27.45-56; Mar 15.33-41; Lik 23.44-49
28Ɛ́ hɔ́pe sí máahṹ, ɛ́ Yiezu ɛ́ dũ kɛ́ hɔ́ bòo míkùi ɛ́ wo wɔ́ vɔ́. Á zɔn bie nɛ làa: «Ɲɛ-hĩni ɛ́ nìn ɓé.» À bie kɛ̀amu bòo lɛ ɛ́ wé ɛ̀ hɔ̀ bòo lɛ ɛ́ bie lè Dɔfĩn bienù vɛ̃hṹ hũn ɛ̀ dàá ɲunù tí. 29Ɛ̀ lè ɓòonù dɔ̀ ɛ́ hṹn bɔ̀sí wi yán ɛ́ tú àá hɔ́ divɛ̃n lɛ ɲiì. Ɛ́ ɓɛ́ sɛ̃̀nɛ̀dɔ́síɓɛ́ ɛ́ khie mɔ̀ lè pɔnkɔ̀-núnú dɔ̀ ɛ́ khie van zìiniɛ hɔ̀ divɛ̃n lɛ ɲiì sɔ hũn ɛ́ yòó can lè Yizɔɔpe lànlè dɔ̀ ɲún ɛ́ yòó van bɔ̀ Yiezu ɲunù ǹ. 30Ɛ́ Bòo lɛ ɛ́ Yiezu díndíe hɔ̀ divɛ̃n lɛ ɲiì vɔ́, á zɔn nɛ làa: «Bòo míkùi ɛ́ wo ɲunù tú!» À síɛniɛ mí ɲún à wo húrun.
31Hɔ̀ ɛ́ wɔ́ ɓɛ́ Zuifuɓɛ ńvũùnín sí hĩ́nílán zɔn, lɛ ɛ́ ɓɛ́ wóò dàá sɛ́sɛ́ lépe ńvũùnín sí sɔ. Ɛ́ ɓɛ́ wo yí wɛ nɛ ɓɛ nìhiè ɛ̀ kén hɔ́ ɓáalén dãahĩ́ lɔ́n wɛ̀. Ɛ̀ bĩní páa yán, lèpe ńvũùnín sí sɔ lɛ ɛ́ den wi mí dòonún. Ɛ́ ɓɛ́ van hɛ̃nnɛ à Pilaate ǹ nɛ a lɛ́ nɛ ɓɛ háakɛ ɓɛpe lɛ ɛ́ ɓɛ́ ɓáa zehĩ́, ɛ̀ ɓɛ̀ lenkɛ ɓɛ síɛní, ɛ̀ lé hɔ́ ɓáalén dãahĩ́ lɔ̀n. 32Ɛ́ ɓɛ́pe nìɛ lɛ ɛ́ ɓɛ́ hṹn ɓáa àá Yiezu, ɛ́ ɓɛ́ sɛ̃̀nɛ̀dɔ́síɓɛ́ ɛ́ ɓɛrɛ háakɛa ɔ̀ hán nùún zehĩ́, ɛ̀ ɓɛ̀ bĩniɛ khíe háakɛa à sí kɛ́ zehĩ́. 33Ɛ́ ɓɛ́ van dɛ̃un Yiezu, ɛ́ ɓɛ́ loo ɔ kɛ́ á húrun vɔ́, ɛ́ ɓɛ́ yí háakɛa piè zehĩ́ wɛ̀. 34Kɛ́ a sɛ̃̀nɛ̀dɔ́sí dɔ̀ ɛ́ den yòó cú piè dùkɛ̃́nlé ǹ àá mí cɔ̀nɓɛ́, ɛ́ cãani àá ɲumu ɛ́ yòó lɔ́ mí laà hũn. 35Ápe nìnbírɔ lɛ ɛ́ hɔ̀pe bòo lɛ ɛ̀ bie, ɛ́ mɔn hɔ̀ àá mí yìe. Ɛ́ piè bòo lɛ á ɛ́ bie ɛ́ iè bɔ̀bín. À dũ kɛ́ hɔ́ iè bɔ̀berà á ɛ́ bie. Á ɛ́ hɔ̀ bie bòo lɛ ɛ́ wé ɛ̀ mìpe ɓiɛ̀ dɛsĩ̀. 36Hɔ̀ ɛ́ wɔ́ kɛ̀amu, ɛ̀ lè Dɔfĩn bienù bòo lɛ ɛ́ lé bie ɛ̀ dàá ɲunù tí. Iè hɔ̀ lɛ ɛ́ hɔ́ wɛ̃́ lé Dɔfĩn bienù vɛ̃hṹ hũn ɛ́ nɛ làa: «Hɛ̀rí piè hũì dìcóoní ɛ́ ɓɛ́ yá ɓén ɓùén wɛ̀.» 37Ɛ̀ hɔ̀ lò bĩniɛ wɛ̃́ vi-ɓùɛ dɔ̀ hũn lè Dɔfĩn bienù vɛ̃hṹ hũn ɛ́ nɛ: «Ɓɛ̀ ɓén húi àá ɔ́pe lɛ ɛ́ ɓɛ́ cú dùkɛ̃́nlé ǹ viì.»
Yiezu wũ̀nlɔ́
Mat 27.57-61; Mar 15.42-47; Lik 23.50-56
38Ɛ́ pehɔ̀ máahṹ, à Zozɛɛfu lɛ ɛ́ lé hɔ́ Arimatee lóo, ɛ́ van hɛ̃nnɛ à Pilaate ǹ nɛ a lɛ́ nɛ mí mìí Yiezu nìhemu. Àpe Zozɛɛfu sɔ ɛ́ den hàarí iè Yiezu kɛ̀ránzuú dɔ̀, kɛ́ á den hàarí tànkɔ̀niɛ hɔ̀, iè hɔ̀ lɛ á hàarí ɛ́ ɓɛ̀ Zuifuɓɛ hándíe ɛ̀ zán. Ɛ́ Pilaate nɛ a vɛ mìí. Ɛ́ Zozɛɛfu ɛ́ khie cɔ́ ɛ́ mii vɛ mìí ɔ́ Yiezu nìhemu. 39Ɛ́ Nikodɛɛmu, ɔ̀pe nùún lɛ hàarí van Yiezu viì hɔ̀ sṹnúhṹn, ɛ́ ɓiɛ̀ van dàa hɔ̀ yurɔ́ dɔ̀ lɛ tũnù tĩ lɛ iè miire àá alowɛɛsi lɛ ɛ́ kánkɛa ɓán, kɛ́ pehɔ̀ lìirɔ́ ɛ́ yí kílɔ́nɓɛ̀ ɓénlé àá pírú ɛ́ dàa ɓɛrɛ. 40Ɛ́ ɓɛ́pe ɓɛ́ ɲuunáà ɛ́ ɓɛrɛ mɔ̀ Yiezu nìhemu, ɛ̀ ɓɛ̀ koo hɔ̀ yurɔ́ lɛ tũnù tĩ hɔ̀ ǹ, ɛ̀ ɓɛ̀ bɛ́ hɔ̀ ǹ àá hɔ́ pɔnkɔ̀-níhĩ́, kɛ̀a bòo lɛ ɛ́ ɓɛ́ Zuifuɓɛ dàa wóò wé ɛ̀ dàa wṹn ɓɛ́ nìhiè. 41Lè viì lɛ ɛ́ ɓɛ́ hṹn ɓáa Yiezu nin, ɛ́ kɔnlɔ́ dɔ̀ ɛ́ hṹn wi hũn. Ɛ́ hɔ́ kɔnlɔ́ sɔ hũn ɛ́ búi dɛ̀fĩì dɔ̀ lɛ ɛ́ nìnbírɔ ɛ́ ɲɛùn yí dé hũn yí mi ɛ́ hṹn wi hũn. 42Ɛ́ sí iè yán ɛ́ ɓɛ́ van wũnɛ Yiezu nin, iè hɔ̀ lɛ ɛ́ lé viì sɔ ɛ́ hṹn lúwi, ɛ̀ lè wurù ɛ́ lò ɓen síɛ lú ɛ̀ lè ńvũùnín sí ɛ́ wo fìi ɛ́ ɓɛ́, ɛ́ ɓɛ́ Zuifuɓɛ wo hṹn ɓɛ́te ɛ̀ sɛ́sɛ́kɛ.
Айни замон обунашуда:
Zãn 19: bwj
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation