Zãn 20
20
Yiezu vìerɔ́ bòo
Mat 28.1-8; Mar 16.1-8; Lik 24.1-12
1Ɛ́ lé hɛtii zɔn ɲɛǹbín dù dù, lɛ kɛ́ hɔ́ síbínú pɛ́wi wi, á Maari lɛ ɛ́ lé hɔ́ Makedala lóo ɛ́ hĩ́nà van lè búi lɔ̀n. Á van mɔn kɛ́ lé sɛ̃̀nlè lɛ hṹn hiɛ lè búi ɲunù ɛ́ bìríkɛa lɔ́ yán. 2Á khie zɔ̀ van yú Simɔn Piɛre àá ɔ́ Yiezu kɛ̀ránzuú lɛ ápe Yiezu hṹn wɛ, à bie lɛ́ ɓà ǹ nɛ làa: «Ɓɛ̀ lerɛ à Ɲunsɔ piè búi hũn, ɛ́ ké wo yí dũ viì lɛ́ ɛ́ ɓɛ́ van bɔ̀ à hũn wɛ̀.» 3Ɛ́ Piɛre àá ɔ́ kɛ̀ránzuú sɔ ɛ́ zɔn lɔ́ kã́a lè búi. 4Ɛ́ ɓɛ́pe ɓɛ́ ɲuunáa ɛ́ paaniɛ ɛ́ lɔ́ zè. Kɛ́ á kɛ̀ránzuú sí kɛ́ ɛ́ zɔ̀ pɛ̃́nɛ à Piɛre ɛ́ van dɛ̃un lè búi hɔ̀ híɛhɔ́. 5Á síɛ lúnlúosí ɛ́ huie van zooniɛ lè búi hũn, á mɔn hɔ̀ pɔnkɔ̀-níhĩ́ kɛ́ hɔ́ bɔ̀sí, kɛ́ á yí yòó zɔ wɛ̀. 6Ɛ́ Simɔn Piɛre lɛ hṹn bɔ̀ piè máahṹ ɛ́ ɓiɛ̀ ɓɛrɛ dɛ̃un, à yòó zɔn lè búi hũn, ɛ́ zɔn mɔn hɔ̀ pɔnkɔ̀-níhĩ́ kɛ́ hɔ́ bɔ̀sí, 7ɛ̀ lè fúrɛ́ lɛ ɛ́ ɓɛ́ dàa hṹn hiɛ Yiezu ɲún ǹ ɛ́ mí ɓánlɔ̀n àá hɔ́ pɔnkɔ̀-níhĩ́ wɛ̀; kɛ́ lé bun ɛ́ khie bɔ̀sí àá vi-ɓuɛ̀. 8Ápe kɛ̀ránzuú sí kɛ́, lɛ ɓɛrɛ dɛ̃un hɔ̀ híɛhɔ́ ɛ́ ɓiɛ̀ yòó zɔn. Á zɔn mɔn hɔ̀, á dũmuasɛ̃̀. 9Hɔ́rɔsí ɛ̀ ɓɛ̀ kɛ̀ránzɛ̀ɓɛ̀ ɛ́ ɲɛùn yí dũ hɔ bòo lɛ wɛ̃́ lé Dɔfĩn bienù vɛ̃hṹ hũn ɲún wɛ̀. Hɔ̀ den wɛ̃́ yán ɛ́ nɛ Yiezu fɔ́ɓán à vìé lé hɔ́ húmú hũn. 10Ɛ́ ɓɛ́ kɛ̀ranzɛ̀ɓɛ̀ nìɛ ɓɛ̀ ɲu sɔ ɛ́ khie khũ̀a ɓɔn.
Yiezu ɛ́ míte ɛ̀ zɛ̃́ní Makedala Maari ǹ
Mat 28.9-10; Mar 16.9-11
11Àpe Maari ɛ́ hṹn dɛ̃̀ hɔ̀ yíe lè búi sɛnù ɛ́ wírí. Á síɛ lúnlúosí ɛ́ mii húi vɛ zooní lé búi hũn, 12á mɔn mɛlɛkɛɓɛ bìɛ ɲu dɔ̀ kɛ́ ɓɛ́ zɔn tĩ̀-poò ɛ́ kɛsí lé viì lɛ ɛ́ ɓɛ́ hṹn daaniɛ Yiezu nin lè búi hṹn, àdɔ̀ ɛ́ kɛsí àá piè ɲún viì, àdɔ̀ ɛ́ kɛsí àá piè zehĩ́ viì. 13Ɛ́ ɓɛ́ mɛlɛkɛɓɛ ɛ́ ɔ̀ dìenin nɛ làa: «Hṹnu, hɔ ńɓùo ɛ́ kɔ́ dàa ɛ́ wírí?» Á zɔn nɛ làa: «Ɓɛ̀ lerɛ kè Ɲunsɔ, ɛ́ ń wo yí dũ viì lɛ ɛ́ ɓɛ́ van bɔ̀ à hũn wɛ̀.» 14Á bie kɛ̀amu, à khie mii húi àá mí máahṹ, á mɔn Yiezu kɛ́ á dɛ̃̀, kɛ́ á yí dũń kɛ́ á iè Yiezu wɛ̀. 15Ɛ́ Yiezu ɛ́ ɔ̀ dìenin nɛ làa: «Hṹnu, hɔ ńɓùo ɛ́ kɔ́ dàa wírí kɛ̀amu? À iè wie ɛ́ kɔ́ ɛ́ cɛ̀?» Á tĩì à nɛ a iè ɔ̀ nùún lɛ ɛ́ te hɔ́ kɔnlɔ́ ɛ́ hìenin, á zɔn bie lɛ́ à ǹ nɛ: «Hɔ̀ ɓen iè kɔ̀pe ɛ́ ti-e mɔ̀ ɛ̀ kɔ̀ zɛ̃́ní lé viì lɛ ɛ́ kɔ́ bɔ̀ à hũn, ɛ̀ ǹ vɛ mìí ɔ́.» 16Ɛ́ Yiezu zɔn bie lɛ́ à ǹ nɛ: «Maari!» Á bĩniɛ míte ɛ́ khie bie lɛ́ à ǹ àá Hebereɓɛ níi ɛ́ nɛ: «Arabuni» iè bòo á nɛ «Kɛ̀ránlɔ.» 17Ɛ́ Yiezu zɔn bie lɛ́ à ǹ nɛ: «Bí ɓaà mi dĩ̀ní wɛ̀, iè hɔ̀ lɛ ɛ́ ń ɲɛùn yí yòó vɛ kìe Yàá viì wɛ̀. Kɛ́ kɔ́ vɛ kìe zɛ̀ɓɛ̀ viì, ɛ̀ vɛ bie lɛ́ ɓà ǹ nɛ nin yòó vɛ kìe Yàá viì, lɛ lò ɓiɛ̀ iè mi ǹ Yàá, niǹ Dɔfĩn viì, lɛ lò ɓiɛ̀ iè mì Dɔfĩn.» 18Á Makedala Maari ɛ́ khie cɔ́ van bie lɛ ɓɛ́ kɛ̀ránzɛ̀ɓɛ̀ ǹ nɛ mí mɔn ɔ̀ Ɲunsɔ, à bie hɔ̀ bòo lɛ á Ɲunsɔ ɛ́ khɛ́ lɛ́ à ǹ ɛ́ lɛ́ ɓà ǹ.
Yiezu ɛ́ míte ɛ̀ zɛ̃́ní mí kɛ̀ránzɛ̀ɓɛ̀ ǹ
Mat 28.16-20; Mar 16.14-18; Lik 24.36-49
19Ɛ́ lépe hɛtii sɔ zɔn zĩ́ihṹ, ɛ̀ ɓɛ̀ kɛ̀ránzɛ̀ɓɛ̀ ɛ́ koo ɓánlɔ̀n lè zũnù dɔ̀ hũn. Ɓɛ̀ hàarí pɔn hɔ̀ zĩínù ɲihĩ́ɛ iè hɔ̀ lɛ ɛ́ ɓɛ́ hàarí ɛ́ ɓɛ̀ Zuifuɓɛ hándíe ɛ̀ zán. Ɛ́ Yiezu ɛ́ ɓɛrɛ zɔn dɛ̃̀ peɓɛ̀ tĩ́ihṹ à bie lɛ́ ɓà ǹ nɛ làa: «Nɛ hũn-wiɛ̀ ɛ̀ kań àá miɛ!» 20Á bie kɛ̀amu vɔ́, à zɛ̃́niɛ mí níhĩ́ àá mí dũ̀kɛ̃́nlé ɓà ǹ. Ɛ́ hɔ́ lɛ ɛ́ ɓɛ́ kɛ̀ránzɛ̀ɓɛ̀ ɛ́ mɔn ɔ Ɲunsɔ, ɛ́ ɓɛ́ hɛ̀ wɛniɛ ɓɛ́te cɛ̃̀un. 21Ɛ́ Yiezu bĩniɛ zɔn bie lɛ́ ɓà ǹ nɛ làa: «Nɛ hũn-wiɛ̀ ɛ̀ kan àá miɛ! Kɛ̀a bòo lɛ á Yàá ɛ́ dàa tɔrɛ mi, ɛ́ ńpe ɓiɛ tɔrɛ miɛ.» 22Á bie hɔ̀pe sí vɔ́, à pìɛ mí ɲunù sɔmu ɛ́ koo peɓɛ̀ lɔ̀n à nɛ: «Mì fé lé Mɛkɛ̃n-Sãanu! 23Ɓɛ̀ nìnbirìe lɛ ɛ́ mí wóò ɓén dé sɛ́wɛ́rí ɛ́ lɛ́ nin peɓɛ̀ bɔ̀koohɛ̃ bòo hũn, ɛ́ Dɔfĩn ɓiɛ̀ ɓén dé sɛ́wɛ́rí ɛ́ lɛ́ nin. Ɛ̀ ɓɛ̀lɛ ɛ́ mí yí dé sɛ́wɛ́rí lɛ́ nin, ɛ́ Dɔfĩn ɛ́ ɓiɛ̀ yá dé sɛ́wɛ́rí ɛ́ lɛ́ nin wɛ̀.»
24Pɛ̃̀hṹ lɛ ɛ́ Yiezu ɛ́ dàa ɓɛrɛ zɛ̃́niɛ míte mí kɛ̀ránzɛ̀ɓɛ̀ ǹ, hɔ́rɔsí ɛ̀ Toma lɛ ɛ́ ɓɛ́ wóò nɛ Lɛ́yɛnù, lɛ iè pe Yiezu kɛ̀ránzɛ̀ɓɛ̀ pírú àá nìɛ ɓɛ̀ ɲu dɔ̀ ɛ́ mí yán àá ɓɛ́lɛ kɛ́ wɛ̀. 25Ɛ́ ɓɛ́ kɛ̀ránzɛ̀ɓɛ̀ lɛ kɛ́ ɛ́ bie lɛ́ à ǹ nɛ ɓɛ́ mɔn ɔ̀ Ɲunsɔ. Ɛ́ Toma zɔn bie lɛ́ ɓà ǹ nɛ làa: «Kɛ́ ń yí mi hɔ hĩɛ̀ ɓáalén dáahĩ́ piè níhĩ́ hũn, kɛ́ ń yí dé niǹ nínkɛ́zuú hɔ̀ hĩɛ̀ ɓáalén dáahĩ́ sɔ hũn, ɛ̀ ǹ lò yí dé niǹ núnú piè dùkɛ̃́nlé hũn, ɛ́ ń yá dɛsĩ̀ wɛ̀.» 26Ɛ́ pehɔ̀ wihĩ́ hùuɲu khíirɔ́ máahṹ, ɛ̀ Yiezu kɛ̀ránzɛ̀ɓɛ̀ ɛ́ sĩ̀n zɔn koo ɓánlɔ̀n lè zũnù hũn, àpe Toma ɛ́ wi yán àá ɓɛ́. Ɛ̀ hɔ̀ zĩínù ɲihĩ́ɛ ɛ́ pɔnkɛ. Kɛ́ Yiezu ɛ́ den van zɔn dɛ̃̀ peɓɛ̀ tĩ́ihṹ à zɔn bie nɛ làa: «Nɛ hũn-wiɛ̀ ɛ̀ kán àá miɛ!» 27À khie bie lɛ́ á Toma ǹ nɛ làa: «Ɓen dé kɔ́ nínkɛ́zuú hũ̀nún ɛ̀ kɔ̀ húi niǹ níhĩ́, ɛ̀ kɔ̀ khɛ̃̀ún kɔ́ núnú ɓen zooní ɛ̀ zɔ dé niǹ dùkɛ̃́nlé hũn, ɛ̀ kɔ̀ bí titikɛ wɛ̀, kɛ́ kɔ́ dɛsĩ̀!» 28Ɛ́ Toma ɛ́ zɔn bie lɛ́ à ǹ nɛ: «Niǹ Ɲunsɔ àá niǹ Dɔfĩn!» 29Ɛ́ Yiezu zɔn bie lɛ́ à ǹ nɛ: «Hɔ̀ iè hɔ̀ lɛ ɛ́ kɔ́ mɔn mi ɛ́ kɔ́ dàa dũmuasɛ̃̀! Ɓɛ̀lɛ wóò dɛsĩ̀ kɛ́ ɓɛ́ yìi ɛ́ yí mi ɛ́ ɲúuhɛ̃ ɛ́ tĩ.»
Lè vɛ̃hṹ sɔ lɛ wĩ́nlɔ́ ɲún
30Yiezu ɛ́ bĩniɛ wɔ́ yéréké bòo bɔ̀kùi dɔ̀ mí kɛ̀ranzɛ̀ɓɛ̀ yìe hũn, kɛ́ hɔ́ yí wĩ́ lépe vɛ̃hṹ sɔ lɛ hũn wɛ̀. 31Kɛ́ hɔ́pe lɛ ɛ́ wɛ̃́ wi le hũn ɛ́ wɛ̃́, bòo lɛ ɛ́ wé ɛ̀ mì dɛsĩ̀ kɛ́ Yiezu iè Masiya, hɔ̀pe Dɔfĩn Zuú. Kɛ́ mí dũmuasɛ̃̀ à ǹ, à lɛ́ ɛ́ mí ɛ́ yí lé mɛkɛ̃nì.
Айни замон обунашуда:
Zãn 20: bwj
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation