Bɔ̀werà 8
8
1Ɛ́ Sooli ɛ́ tɛ̀ hɔ̀pe lɛ ɛ́ ɓɛ́ ɓɔ́ á Etiɛnɛ bòo.
Ɓɛ̀ ńdɛsĩ̀riè ɲɛkɛ̃̀a vánlɔ́ bòo
Ɛ́ pehɔ̀ zɔn ɛ́ wo wɔ́ ɓɛ́ ńdɛsĩ̀riè ńkóoɓánlɔ̀n nìɛ lɛ wi hɔ Zerizalɛɛmu lóo hũn ɲɛkɛ̃̀a vánlɔ́ fìi ɓánlɔ́. Kɛ́ ɓɛ́ ɓen ɛ́ yí ɓɛ́ tɔnkɛriè, ɛ̀ ɓɛ̀ ńdɛsĩ̀riè lɛ kɛ́ ɓɛ́kùi ɛ́ zɔ̀ saakɛa ɛ́ van hɔ̀ Zudee àá hɔ́ Samari pɛ̃̀hɛ̃ hũn. 2Ɛ́ ɓɛ́ nìnbirìe dɔ̀ lɛ ɛ́ can ɓɛ́ kuò Dɔfĩn bòo hũn ɛ́ mɔ̀ à Etiɛnɛ nìheemu ɛ́ van wũ̀nɛ ɛ̀ ɓɛ̀ wiriè piè húmú bòo àá bɔ̀bín.
3Kɛ́ Sooli pe ɛ́ can mí kuò ɛ́ ɓɛ̀ ńdɛsĩriè ɲɛkɛ̃̀a ɛ̀ vɛ́. À hṹn bɔ̀ hɔ̀ zĩhĩ́ɛ ǹ ɛ́ ɓɛ̀ báa àá ɓɛ́ hã́a ɛ̀ ɓaakɛ ɛ̀ vɛ lé kóo lé kɛ̀sí hũn.
Filiipu ɛ́ lè Bentĩnu ɛ̀ buie hɔ samari hũn
4Ɛ́ ɓɛ́ ńdɛsĩ̀riè lɛ hàarí ɛ́ zɔ̀ saakɛa ɛ́ wo hàarí khie bɔ̀ hɔ̀ cɛ̃̀mɛ̀náa ǹ ɛ́ lè Bentĩnu ɛ̀ buie. 5Ɛ́ Filiipu ɛ́ van Samari lóo dɔ̀, ɛ́ van ɛ́ ɔ̀ Kirisa bòo bie ɛ̀ lɛ́ lépe lóo sɔ nìɛ ǹ. 6Ɛ́ hɔ́ lɛ ɛ́ ɓɛ́ nìzã̀amáa ɛ́ hɔ̀ bòo lɛ á Filiipu ɛ́ bie ɛ̀ ɲí ɛ̀ ɓɛ̀ lò loo hɔ yéréké bòo lɛ á wé, ɛ́ ɓɛ́pe ɓɛ́kùi ɛ́ tɛ́ ɓɛ́ ɲɛkɛ̃̀a ɛ́ piè bòo ɛ̀ ɲí. 7Ɓɛ̀ ńɲíkĩ́nìɛ ɛ́ den hṹn lé ɓɛ́ nìnbí-kuì kɛ́ ɓɛ́ ɛ́ wũamɛkɛ, ɛ̀ ɓɛ̀lɛ tɛkɛ̀a lɛ̀ bìkuì àá ɓɛ́ loohĩ́ bìkuì ɛ́ lò hṹn wɛ. 8Ɛ́ lé hɛ̀ wɔ́ tĩwiɛ̀ dɛ̀bɛhɔ́ lè lóo sɔ hũn.
9Ɛ́ nùún dɔ̀ lɛ yèrè ɛ́ ɓɛ́ nɛ Simɔn ɛ́ hṹn wi lepe lóo sɔ hũn. À hàarí ɛ́ wóo minikɛ hɔ bòo ɛ̀ hɔ̀ hɛ̀ yòokɛ ɓɛ Samari nìɛ ɓɛ́kùi lɔ̀n. À hàarí ɛ́ wɔ́ míte àá nìnbí-bɛhɔ́. 10Ɛ́ ɓɛ́pe ɓɛ́kùi, zĩncãahɛ̃ àá ɓɛ́ nìkĩ́ihɛ̃ ɛ́ hàarí ɛ́ ɔ̀ mɛ̀ndɛ̃ cɛ̃̀un. Ɛ̀ ɓɛ̀ wóò bie nɛ làa: «Àpe nùún sɔ lɛ ɛ́ hɛ̀ iè Dɔfĩn pànkɛ́, à iè ɔ̀pe lɛ ɛ́ ɓɛ́ wóò ve nɛ pànkɛ́ bɛhɔ́.» 11Ɛ́ ɓɛ́ hɛ̀ wo hṹn wóò ɲí piè bòo, iè hɔ̀ lɛ á hɛ̀ wóò yòokɛ ɓɛ lɔ̀n àá hɔ́ bòo lɛ á wóò miníkɛ hàarí. 12Kɛ́ hɔ́ lɛ ɛ́ ɓɛ́ ɲɛ́ lé Bentĩnu lɛ á Filiipu ɛ́ buie ɛ̀ lɛ́ ɓà ǹ, lɛ iè lè Dɔfĩn bɛ́záanú bòo àá Yiezu Kirisa yèrè, ɛ́ ɓɛ́ báa àá ɓɛ́ hã́a ɛ́ lɛ́ ɓɛ́te ɛ́ ɓɛ́ líiníkɛa hɔ̀ ɲumu hũn. 13Ɛ́ Simɔn kùusɔ ɛ́ dũmuasɛ̃̀ à lɛ́ míte ɓɛ́ líiniɛ hɔ̀ ɲumu hũn, à khie bɔ̀ à Filiipu máahṹ; ɛ́ hɔ́ yéréké bòo àá hɔ́ bɔ̀bɛ̃hɛ̃ lɛ ɛ́ wé á loo ɛ́ hɛ̀ yòokɛa piè lɔ̀n.
14Ɛ́ Yiezu tɔnkɛriè lɛ ɛ́ wi hɔ Zerizalɛɛmu lóo hũn ɛ́ ɲɛ ɛ̀ ɓɛ̀ nɛ Samari siè ɛ́ tɛ̀ lè Dɔfĩn bienù bòo ɛ́ ɓɛ́ tɔrɛ Piɛre àá Zãn nɛ ɓɛ vɛ peɓɛ̀ viì. 15Ɛ́ hɔ́ lɛ ɛ́ ɓɛ́ van dɛ̃un hɔ̀ Samari, ɛ́ ɓɛ́ hɛ̃nnɛ Dɔfĩn ɛ́ lɛ́ ɓɛ́ ńdɛsĩ̀riè ǹ bòo lɛ ɛ́ wé ɛ̀ ɓɛ̀ yí lé Mɛkɛ̃n-Sãanu. 16Iè hɔ̀ lɛ ɛ́ peɓɛ̀ tĩ́ihṹ ɛ́ Mɛkɛ̃n-Sãanu hṹn ɲɛùn yí síɛ ɔ́dɔ̀ lɔ̀n ɛ́ yí mi wɛ̀; kɛ́ hɔ́ bòo lɛ ɛ́ ɓɛ́ yú ɛ́ iè hɔ̀ ńlíiníɲumu mí dòonún Ɲunsɔ Yiezu yèrè lɔ̀n. 17Ɛ́ Piɛre àá Zãn ɛ́ wo bɔ̀ ɓɛ́ níhĩ́ peɓɛ̀ lɔ̀n ɛ́ ɓɛ́ wo yú lé Mɛkɛ̃n-Sãanu. 18Ɛ́ hɔ́ lɛ ɛ́ Simɔn ɛ́ mii húi ɛ̀ ɓɛ̀ ńdɛsĩ̀riè ɛ́ yú lé Mɛkɛ̃n-Sãanu iè hɔ̀ lɛ ɛ́ ɓɛ́ tɔnkɛriè ɛ́ bɔ̀ ɓɛ́ níhĩ́ peɓɛ̀ lɔ̀n, á van dàa màa ɛ́ mii ɓen lɛ́ Piɛre àá Zãn, 19à zɔn bie nɛ làa: «Mì ɓiɛ̀ lɛ́ hɔ́ pànkɛ́ sɔ mi ǹ bòo lɛ ɛ́ wé kɛ́ ń ɓiɛ̀ ɓen bɔ̀ niǹ níhĩ́ nìnbírɔ lɛ lɔ̀n, à ɓiɛ̀ wóo yí lé Mɛkɛ̃n-Sãanu.» 20Ɛ́ Piɛre ɛ́ zɔn bie lɛ́ à ǹ ɛ́ nɛ làa: «Nɛ kɔpe àá kɔ́ màa míkùi ɛ̀ páaní yaa, iè hɔ̀ lɛ ɛ́ kɔ́ tĩì ɛ̀ kɔ̀ nɛ kɔ́ dɛ̀ Dɔfĩn hɛ̃mù bòo ɛ́ yɛ̀ àá màa. 21Hɔ̀pe bòo sɔ lɛ ɛ́ kɔ́ ɲunù ɛ́ mí hũn, ɛ̀ kɔ̀ bòo dɔ̀ ɛ́ lò mí yán wɛ̀; iè hɔ̀ lɛ ɛ́ kɔ́ tĩì ɛ́ yá cã̀aní Dɔfĩn híɛhɔ́ wɛ̀. 22Ɛ́ kɔ́ zɛ̀ní kɔ́ tĩì àá kɔ́ bɔ̀lieníkɛà lɛ́ yí sãa, ɛ̀ kɔ̀ hɛ̃un Ɲunsɔ ǹ kɛ́ hɔ́ ɓen ɛ́ wé yínin, à dé sɛ́wɛ́rí lɛ́ kɔ ǹ kɔ̀ bɔ̀lieníkɛà sɔ bòo hũn. 23Iè hɔ̀ lɛ ɛ́ ń den loo kɛ́ kɔ́ hũn ɛ́ hɛ̀ lɔn, ɛ̀ kɔ̀ lò iè bɔ̀koohɔ́ wɔnù.» 24Ápe Simɔn ɛ́ zɔn bie lɛ́ Piɛre àá Zãn ɛ́ nɛ làa: «Mìpe mìte ǹ ɛ́ hɛ̃un ɔ̀ Ɲunsɔ ɛ̀ lɛ́ mi ǹ, bòo lɛ ɛ́ wé ɛ̀ hɔ̀ bòo lɛ ɛ́ mí bie, ɛ́ hɛ̀rí bòo dɔ̀ ɛ̀ bí yí mi wɛ̀.» 25Ɛ́ hɔ́ lɛ ɛ́ Piɛre àá Zãn ɛ́ bie ɔ̀ Ɲunsɔ bòo lɛ á wɔ́ vɔ́, ɛ̀ ɓɛ̀ lò ɛ́ buie piè Bentĩnu vɔ́, ɛ́ ɓɛ́ khie khũ̀a ɛ́ khã́a Zerizalɛɛmu. Ɛ́ hɔ́ lɛ ɛ́ ɓɛ́ lɔ́ wi le wṹn lɔ̀n, ɛ́ ɓɛ́ khie ɛ́ lè Bentĩnu ɛ̀ buie hɔ Samari lóoniɛ̀ bɔ̀kuì hũn.
Filiipu àá Etiopi nùún dɔ̀ bòo
26Ɛ́ Ɲunsɔ mɛlɛkɛ dɔ̀ ɛ́ bie ɛ́ lɛ́ á Filiipu ǹ ɛ́ nɛ làa: «Síɛ hĩ́ní vɛ le wurù hànlén ńdóonín, lè wṹn lɛ ɛ́ lɔ́ Zerizalɛɛmu ɛ́ síɛ van Kaaza, lè ńɲiherà hũn.» Ɛ́ Filiipu ɛ́ hĩ́nà cɔ́. 27Ɛ́ piè wṹn lɔ̀n, á lɔ́ yú nùún dɔ̀. À nùún sɔ ɛ́ iè Etiopi nì-bɛhɔ́ dɔ̀. Àpe ɛ́ hàarí ti-e pe Etiopi bɛ́hãá Kandaasi yírɛ míkùi bòo ɛ̀ húi. Á hàarí ɓɛrɛ Zerizalɛɛmu ɛ́ ɓɛrɛ ɓàaniɛ Dɔfĩn vɔ́, 28ɛ́ khũ̀a ɛ́ vaá-ɓɔ. Á zɔn ɛ́ kɛsí mí zaátaà wùtóró hũn, ɛ́ ɔ̀ Dɔfĩn bɔ̀háanírɔ Ezayi vɛ̃hṹ ɛ̀ kɛ̀rán. 29Ɛ́ lé Mɛkɛ̃n-Sãanu ɛ́ bie lɛ́ á Filiipu ǹ ɛ́ nɛ làa: «Vɛ lúwiní lé wùtóró ǹ.» 30Ɛ́ Filiipu ɛ́ síɛ ɛ́ zɔ̀ van ɛ́ lúwinɛ lè ǹ, á ɲɛ́ kɛ́ á Etiopi nùún sɔ ɛ́ ɔ̀ Dɔfĩn bɔ̀háanírɔ Ezayi vɛ̃hṹ ɛ̀ kɛ̀rán. Á zɔn ɛ́ ɔ̀ dìenin ɛ́ nɛ làa: «Hɔ̀pe bòo lɛ ɛ́ kɔ́ ɛ́ kɛ̀rán ɛ́ kɔ́ dũ ɲún?» 31Á nùún ɛ́ zɔn nɛ: «Ń wo wiɛ dàa dɛ̀ pehɔ̀ ɲún ɛ́ dũń kɛ́ nìnbírɔ ɛ́ yí munkɛ hɔ ɛ̀ lɛ́ mi ǹ?» À bie lɛ́ á Filiipu ǹ nɛ a ɓen yòó kansí mí sɛnù, ɛ́ Filiipu ɛ́ yòó van kɛsí. 32Hɔ̀ bòo lɛ á hṹn kɛ̀rán ɔ́ Ezayi vɛ̃hṹ hũn ɛ́ iè hɔ̀ lɛ:
«Ɓɛ̀ ɓaa ɔ̀ dàa cɔ́ kɛ̀a ie pirɔ lɛ ɛ́ ɓɛ́ dàa dàa vaá-vɛ mí ɓénlén,
Kɛ̀a ie pi-zuú lɛ ɛ́ yí wũamɛ alɛ ɛ́ piè dũuni ɛ̀ khè núnú hũn,
À dú mí ɲunù.
33 Ɓɛ̀ ɛ́ dɔ́ lùwiè ɔ̀ ǹ, ɛ̀ ɓɛ̀ yí lɛ́ bɔ̀berà ɔ̀ piè bɔ̀tĩɛ̀ hũn wɛ̀,
Ɛ́ nìnbírɔ dɔ̀ ɛ́ yí dɛ̀ piè hũn nìɛ bòo ɛ́ yá ɓén bie wɛ̀.
Iè hɔ̀ lɛ ɛ́ piè mɛkɛ̃nì ɛ́ ɓɛ́ víeniɛ lè sṹsùnù.»
34Á Etiopi nùún sɔ ɛ́ zɔn ɛ́ Filiipu dìenin ɛ́ nɛ làa: «Nín kɔ̀ hɛ̃nnin, à iè wieni bòo ápe Dɔfĩn bɔ̀háanírɔ ɛ́ bòo ɛ̀ bie kɛ̀amu? Hɔ̀ iè piè kùusɔ bòo á ɛ́ bie yée kɛ́ á iè nì-ɓuɛ̀ dɔ̀ bòo?» 35Ɛ́ Filiipu ɛ́ zɔn ɛ́ ɓɛ́ lé biènù fìi àá hɔ́pe bòo lɛ ápe nùún sɔ ɛ́ hṹn kɛ̀rán, ɛ́ dàa ɛ́ khɛ́ á Yiezu Bentĩnu ɛ́ lɛ́ à ǹ. 36Ɛ́ ɓɛ́ páaníɛ bɔ̀ lè wṹn ɛ́ van dɛ̃un lè viì dɔ̀ lɛ ɛ́ hɔ́ ɲumu ɛ́ wi hũn. Á Etiopi nùún ɛ́ zɔn bie nɛ làa: «Húi ɲumu wi hũ̀nún, ɛ́ hɔ́ iè ńɓùo ɛ́ temu dɛ̀ ɛ́ si ɛ́ ń dàa yá síɛ yí hɔ́ ńlíiníɲumu yán?» [37Ɛ́ Filiipu ɛ́ zɔn bie lɛ́ à ǹ nɛ làa: «Kɛ́ kɔ́ dũmuasɛ̃̀ àá kɔ́ tĩì míkùi, ɛ́ hɔ́ dɛ̀ ɛ́ wé.» Á nùún ɛ́ zɔn nɛ: «Ń dũmuasɛ̃̀ nɛ Yiezu Kirisa ɛ́ iè Dɔfĩn Zuú.»] 38À nɛ ɓɛ dĩ̀ní lé wùtóró. Ɛ́ Filiipu àá ɔ́pe nùún sɔ ɛ́ páaníɛ síɛ zɔn hɔ̀ ɲumu, ɛ́ Filiipu síɛ líiniɛ ɔ̀ hɔ ɲumu hũn. 39Ɛ́ hɔ́ lɛ ɛ́ ɓɛ́ yòó lɔ́ hɔ́ ɲumu hũn, ɛ́ lé Mɛkɛ̃n-Sãanu ɛ́ ɓɛrɛ mɔ̀ Filiipu ɛ́ dàa cɔ́. Ápe Etiopi nùún ɛ́ wo ɛ́ yí bĩní mi-ɛ wɛ̀. Á khie bɔ̀ mí wṹn ɛ́ cɔ́ kɛ́ á wɛ míte. 40Kɛ́ hɔ́ ɓen kɛ́ á Filiipu, ɛ̀ ɓɛ̀ van mɔn ɔ̀ Azɔɔte hũn, kɛ́ á bɔ̀ hɔ̀ lóoniɛ míkùi ɛ́ lè Bentĩnu ɛ̀ buie fúu ɛ́ van dɛ̃un hɔ̀ Sezaree.
Айни замон обунашуда:
Bɔ̀werà 8: bwj
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation