Bɔ̀werà 9
9
Sooli te lánlɔ́ Dɔfĩn
Bɔw 22.4-16; 26.12-18
1Ɛ́ pehɔ̀ yìi hũn, ɛ̀ Sooli ɛ́ pɛ́wi can mí kuò ɛ́ Ɲunsɔ ńdɛsĩ̀riè lɔ̀n ɛ̀ biení ɛ́ wɛ mii ɓé ɓɛ́. Á van yú-o khɛ̃́ndàarɔ wi-bɛhɔ́, 2à nɛ a lɛ́ vɛ̃hṹ mí ǹ ɛ̀ mí dàa wóo vɛ zɔ hɔ Damaasi Zuifuɓɛ ńkóoɓánlɔ̀n zĩhĩ́ɛ, bòo lɛ ɛ́ wé kɛ́ nìnbirìe dɔ̀ ɛ́ ɓen zɔn wi yán, hɛ̀rí kɛ́ ɓɛ́ iè báa tàá hã́a lɛ ɛ́ bɔ̀ à Ɲunsɔ wṹn, ɛ̀ mí ɓaakɛ ɓɛ ɛ̀ cɛ ɛ̀ dàá ɓen Zerizalɛɛmu. 3Ɛ́ hɔ́ lɛ á lɔ́ wi le wṹn lɔ̀n ɛ́ van ɛ́ hɔ̀pe Damaasi lóo ɛ̀ lúwìnínin, ɛ́ ńpiemu dɔ̀ ɛ́ pan pan ɛ̀ hɔ̀ yòó ɲiiniɛ lɔ́ hɔ́ hóohũn ɛ́ ɓen siɛ kíríkɛa ɔ̀ ǹ. 4Á kuerɛ siɛ sṹsùnù, á ɲɛ́ tɛmu dɔ̀ lɛ ɛ́ bie àá ɔ́ ɛ́ nɛ làa: «Sooli, Sooli, hɔ̀ iè ńɓùo ɛ́ kɔ́ dàa ɛ́ niǹ lɔ̀n biení?» 5Á zɔn dìe ɛ́ nɛ làa: «Ɲunsɔ, kɔ́ iè wieni?» Ɛ́ Ɲunsɔ ɛ́ zɔn bie ɛ́ nɛ làa: «Hɔ̀ iè ǹpe Yiezu lɛ ɛ́ kɔ́ lɔ̀n biení. 6Kɛ́ kɔ́ síɛ hĩ́ní ɛ̀ vɛ zɔ le lóo hũn, ɛ́ ɓɛ́ ɓén vɛ munkɛ hɔ bòo lɛ ɛ́ kɔ́ fɔ́ɓán ɛ̀ kɔ̀ wé ɛ́ lɛ́ kɔ̀ ǹ yán.» 7Ɛ́ ɓɛ́ nìnbirìe lɛ ɛ́ hàarí bɔ̀ɓán àá ɔ́pe Sooli ɛ́ hɛ̀ yòó dɛ̃̀ kɛ̀a bekiè iè bòo lɛ ɛ́ ɓɛ́ dàa hɛ̀ bɔ̀dũmunù vṹnun. Ɓɛ̀ hàarí ɛ́ lè tɛmu ɛ̀ ɲínin kɛ́ ɓɛ́ lò ɛ́ yí loo nìnbírɔ dɔ̀ wɛ̀. 8Ápe Sooli ɛ́ siɛ hĩ́nà yòó dɛ̃̀ à hɛ́rɛ mí yìe, kɛ́ á wo bĩniɛ ɛ́ yí loo bòo wɛ̀. Ɛ́ ɓɛ́ khie zɛ̃nkɛa piè núnú ǹ ɛ́ dàa ɔ̀ ɛ́ dàa van hɔ̀ Damaasi. 9Á wɔ́ wihĩ́ bɔ̀nbɔ̀ tĩ kɛ́ á yí loo bòo, à yí dí, à lò yí ɲu bòo dɔ̀ wɛ̀.
10Hɔ́rɔsí ɛ̀ Ɲunsɔ ńdɛsĩ̀rɔ dɔ̀ ɛ́ hàarí wi hɔpe Damaasi lóo hũn lɛ yèrè ɛ́ ɓɛ́ nɛ Ananiasi. Ɛ́ Ɲunsɔ ɛ́ bie lɛ́ à ǹ yìnmirà hũn ɛ́ nɛ làa: «Ananiasi!» Á zɔn tɛ̀ nɛ: «Ɲunsɔ, ń lɛ.» 11Ɛ́ Ɲunsɔ ɛ́ zɔn bie lɛ́ à ǹ ɛ́ nɛ làa: «Hĩ́ní vɛ le wṹn dɔ̀ lɛ ɛ́ ɓɛ́ wóò ve nɛ wṹn lɛ ɛ́ cã̀aní lɔ̀n, à Zudaasi zũnù hũn, ɛ̀ vɛ dìe ɔ nùún dɔ̀ lɛ ɛ́ lé Tarise bòo, piè yèrè ɛ́ ɓɛ́ nɛ Sooli. À ɛ́ Dɔfĩn ɛ̀ hɛ̃nnin. 12Ɛ́ piè hɛ̃nnɛ hũn, á mɔn nùún dɔ̀ lɛ yèrè ɛ́ ɓɛ́ nɛ Ananiasi kɛ́ á ɓɛrɛ zɔn ɛ́ mí níhĩ́ ɛ̀ bè piè lɔ̀n bòo lɛ ɛ́ wé ɛ̀ piè yìe ɛ̀ bĩní khũ̀á mi bòo.» 13Ápe Ananiasi ɛ́ zɔn bie nɛ làa: «Ɲunsɔ, nìnbí-kuì ɛ́ bie ɔ̀ nùún sɔ bòo, ɛ̀ ɓɛ̀ bie hɔ̀ bòo lɛ á wɔ́ àá kɔ́ nìɛ Zerizalɛɛmu lóo hũn. 14Á ɓɛrɛ hũ̀nún àá hɔ́ pànkɛ́ lɛ ɛ́ ɓɛ́ khɛ̃́ndàariè hándíe ɛ́ lɛ́ à ǹ nɛ a dàá ɓaakɛ ɓɛ nìnbirìe lɛ ɛ́ wóò ve kɔ yèrè ɓɛ́kùi.» 15Ɛ́ Ɲunsɔ ɛ́ zɔn bie lɛ́ à ǹ ɛ́ nɛ làa: «Hĩ́ní vɛ, iè hɔ̀ lɛ ɛ́ ń munɛ àpe nùún sɔ, ɛ̀ nin mìí ɔ́ ɛ̀ dàá zɛ̃́ní niǹ yèrè ɛ̀ lɛ́ ɓɛ́ dàa dɔ̀ nìɛ ǹ àá peɓɛ̀ bɛ́zɛ̀ɓɛ̀, àá ɓɛ́ Yizarayɛɛle nìɛ. 16Ǹpe niǹte ǹ ɛ́ nin zɛ̃́ní-ɛ àá lé lɔ̀nbiè lɛ á ɓén yí míkùi niǹ bòo hũn.» 17Ɛ́ Ananiasi ɛ́ hĩ́nà cɔ́ ɛ́ van zɔn lè zũnù sɔ, ɛ́ zɔn bɔ̀ mí níhĩ́ à Sooli lɔ̀n à bie lɛ́ à ǹ ɛ́ nɛ làa: «Kìe zuú Sooli, à Ɲunsɔ Yiezu lɛ ɛ́ zɛ̃́niɛ míte àá kɔ lè wṹn lɛ ɛ́ kɔ́ hṹn bɔ̀ ɛ́ dàá ɛ́ ɓen ɛ́ tɔrɛ mi, bòo lɛ ɛ́ wé ɛ̀ kɔ̀ yìe ɛ̀ bìní khũ̀á mi bòo, ɛ̀ kɔ̀ tí àá Mɛkɛ̃n-Sãanu.» 18Ɛ́ mí laà hũn, ɛ́ bòo dɔ̀ lɛ dɛ̃̀ kɛ̀a dɔnkuò ɛ́ yòó lɔ́ piè yìe hũn ɛ́ kùenkɛa khie siɛ, ɛ́ piè yìe wo yòó loo bòo. Á siɛ hĩ́nà ɛ́ khie lɛ́ míte ɛ́ ɓɛ́ líiniɛ hɔ̀ ɲumu hũn, 19à khie ɛ́ dú, á wo yòó yú pànkɛ́.
Sooli ɛ́ lè Bentĩnu ɛ̀ buie Damaasi hũn
Ɛ́ Sooli ɛ́ wɔ́ wihĩ́ bɔ̀nbɔ̀ yiɛní àá ɓɛ́ ńdnesĩ̀riè lɛ wi hɔ Damaasi lóo hũn. 20Ɛ́ mí laà hũn, á wo khie ɛ́ lè Bentĩnu ɛ̀ buie ɓɛ Zuifuɓɛ ńkóoɓánlɔ̀n zĩhĩ́ɛ hũn kɛ́ á ɛ́ bie ɛ́ nɛ Yiezu iè Dɔfĩn Zuú. 21Ɛ́ ɓɛ́pe nìnbirìe lɛ ɛ́ hɔ̀ ɲí ɓɛ́kùi ɛ́ hɔ́ hɛ̀ yòokɛa lɔ̀n ɛ́ ɓɛ́ dìekɛ ɛ́ nɛ làa: «À sũǹ yí-e pe nùún sɔ lɛ ɛ́ hṹn wóò ɓaakɛ ɓɛ nìnbirìe lɛ ɛ́ wóo ve Yiezu Kirisa yèrè ɛ̀ biení lɔ̀n hɔ̀ Zerizalɛɛmu hũn? Á hɛ̀ ɛ́ yí wìe ɛ́ ɓɛrɛ hũ̀nún pehɔ̀ bòo hũn ɛ́ mii ɓen ɓaakɛ ɓɛ ɛ̀ dàá vɛ yán ɛ̀ vɛ lɛ́ ɓɛ́ khɛ̃́ndàariè hándíe ǹ?» 22Kɛ́ Sooli ɛ́ pe wo hṹn ɛ́ vɛ àá híɛhɔ́ ɛ́ hɔ̀ pànkɛ́ ɛ̀ yí lé Bentĩnu buierɔ́ hũn. À hṹn wóò zɛ̃́ní kɛ́ ápe Yiezu ɛ́ temu iè ɔ̀pe Kirisa, ɛ́ pehɔ̀ bòo hũn ɛ́ ɓɛ́ Zuifuɓɛ lɛ wi hɔ Damaasi lóo hũn ɛ́ wo hṹn yí dũ bòo lɛ ɛ́ ɓɛ ɛ̀ zɔ kɔ̃́ní wɛ̀. 23Ɛ́ hɔ́ khie míɛ, ɛ́ ɓɛ́ Zuifuɓɛ ɛ́ ɲɛ́ ɓán ɛ̀ ɓɛ̀ nɛ ɓɛ ɓé Sooli. 24Kɛ́ Sooli ɛ́ den dũnɛ peɓɛ̀ bòo lɛ ɛ́ ɓɛ́ nɛ ɓɛ ɛ̀ wé àá ɔ́ hũn. Ɓɛ̀ hàarí ɛ́ lèpe lóo zĩínù ɲihĩ́ɛ ɛ̀ hìenin sṹnúhṹn àá mí wiɛhɔ́ míkùi, bòo lɛ ɛ́ wé ɛ̀ ɓɛ̀ dàa yí-è ǹ ɛ̀ ɓé. 25Kɛ́ sṹnúhṹn dɔ̀, ɛ́ hɔ́pe Damaasi lóo ńdɛsĩ̀riè ɛ́ khie dú-o pe Sooli lè sìkí dɛ̀bɛhɔ́ dɔ̀ hũn, ɛ́ hɔ́rɛ van siɛniɛ àá lé lóo dànkɔ̀ toohɔ́ á siɛ cɔ́.
Sooli ɛ́ wi Zerizalɛɛmu lóo hũn
26Ɛ́ hɔ́ lɛ ɛ́ Sooli ɛ́ van dɛ̃un Zerizalɛɛmu, á van kóo ɓánlɔ̀n àá ɓɛ́ ńdɛsĩ̀riè. Kɛ́ ɓɛ́ den hṹn ɔ̀ zán iè hɔ̀ lɛ ɛ́ ɓɛ́ hɛ̀ ɛ́ yí dɛsĩ̀ kɛ́ á wɔ́ Ɲunsɔ ńdɛsĩ̀rɔ àá bɔ̀bín wɛ̀. 27Ɛ́ Baranabaasi ɛ́ khie fɔ́-á ɛ́ dàa van ɔ̀ Yiezu tɔnkɛriè viì, ɛ́ van munkɛa bòo lɛ ápe Sooli ɛ́ dàa mɔn ɔ̀ Ɲunsɔ pɛ̃̀hṹ lɛ á dàa hṹn wi le wṹn lɔ̀n ɛ́ lɛ́ ɓà ǹ, à lò munkɛa ɔ̀pe Ɲunsɔ bòo lɛ á bie àá ɔ́pe Sooli. À lò bie hɔ̀ bòo lɛ ápe Sooli ɛ́ dàa buie ɔ̀ Yiezu Bentĩnu hɔ̀ Damaasi lóo hũn kɛ́ á fɔnù ɛ́ tɛ́rɛ. 28Á wo hṹn khie wi àá ɓɛ́. À hṹn wóò lé à khũ̀á ɓen hɔ̀ Zerizalɛɛmu hũn kɛ́ á ɛ́ Yiezu bòo ɛ̀ bie kɛ́ á fɔnù ɛ́ tɛ́rɛ. 29À lò hṹn wóò bie àá ɓɛ́ Zuifuɓɛ lɛ ɛ́ wóò bie hɔ Kɛrɛkiɓɛ níi, ɛ̀ wũ̀aní àá ɓɛ́. Kɛ́ ɓɛ́pe ɛ́ den hṹn cɛ̀ ɛ́ ɓɛ ɛ̀ ɓí-e. 30Ɛ́ hɔ́ lɛ ɛ́ ɓɛ́ ńdɛsĩ̀riè ɛ́ ɲɛ́ hɔ́, ɛ́ ɓɛ́ khie dàa Sooli ɛ́ dàa van Sezaree. Ɛ́ ɓɛ́ van dɛ̃un yán ɛ̀ ɓɛ̀ fùɛrɛ̀sí-è ǹ á cɔ́ van hɔ̀ Tarise#9.30 Sooli ɛ́ hàarí tɔn Tarise lóo hũn. Bĩní vɛ húi Bɔw 22.3.
31Ɛ́ pehɔ̀ yìi hũn ɛ̀ ɓɛ̀ ńdɛsĩ̀riè ɛ́ wi hũn-wiɛ̀ hũn hɔ̀ Zudee pɛ̃̀hɛ̃ hũn, àá hɔ́ Kalile pɛ̃̀hɛ̃ hũn, àá hɔ́ Samari pɛ̃̀hɛ̃ hũn. Ɓɛ̀ pànkɛ́ ɛ́ hàarí yòó ɛ́ wé, ɛ̀ ɓɛ̀ hàarí ɛ́ ɔ̀ Ɲunsɔ ɛ̀ mɛndɛ̃, ɛ̀ ɓɛ̀ hàarí ɛ́ buòní buònírɔ́ lè Mɛkɛ̃n-Sãanu lɛ ɛ́ ɓɛ̀ sĩiní bòo hũn.
À nùún dɔ̀ lɛ yèrè ɛ́ ɓɛ́ nɛ Enee wiɛnírɔ́ bòo
32Ɛ́ Piɛre ɛ́ hàarí hĩ́nà hɔ̀ vuò míkùi, ɛ́ zɔn dɔ̀ á van ɓɛ̀ ńdɛsĩ̀riè lɛ ɛ́ wi hɔ Lida lóo hũn viì. 33Ɛ́ yán á van yú nùún dɔ̀ lɛ yèrè Enee kɛ́ á tɛkɛ̀a lɛ̀ ɛ́ dũmua mí dɛmu dìɛ lɔ̀n lɛ ie pehɔ̀ lɔ́líe hùutĩ. 34Ɛ́ Piɛre ɛ́ zɔn bie lɛ́ à ǹ ɛ́ nɛ làa: «Enee, Yiezu Kirisa ɛ́ wiɛniɛ kɔ! Síɛ hĩ́ní hóoní kɔ́ dɛmu dìɛ ɛ̀ khíi bìsí.» Ɛ́ mí laà hũn, á síɛ hĩ́nà. 35Ɛ́ hɔ́pe Lida lóo nìɛ ɓɛ́kùi àá hɔ́ Sarɔn pɛ̃̀hɛ̃ nìɛ ɛ́ mɔn ɔ̀ ɛ́ ɓɛ́ lɛ́ ɓɛ́te Ɲunsɔ ǹ.
Tabita vìerɔ́ bòo
36Ɛ́ ńdɛsĩ̀rɔ hṹnu dɔ̀ ɛ́ hàarí wi hɔ Zopee lóo hũn lɛ yèrè Tabita. Àá Kɛrɛkeɓɛ níi, ɛ̀ lè yèrè sɔ ɛ́ iè «Dɔrɔkaasi» iè bòo ɛ́ ɓɛ́ nɛ «maa wenù». À hàarí can mí kuò ɛ́ hɔ̀ bòo lɛ sãa ɛ̀ wé fúu à lò ɛ́ ɓɛ̀ nìkherà ɛ̀ sĩiní. 37Ɛ́ pehɔ̀ yìi hũn, á dooniɛ ɛ́ khie húrun. Ɛ́ hɔ́ lɛ ɛ́ ɓɛ́ tóoniɛ piè nìheemu vɔ́, ɛ́ ɓɛ́ yòó van bɔ̀sí-e lè lɔ́nkɔ́#9.37 Lɔ́nkɔ́ ɛ́ ɓɛ́dɔ̀ ɛ́ wóò ve nɛ núnkɔ́. zu-bɔ́nú dɔ̀ hũn. 38Ɛ́ hɔ́ Zopee lóo ńdɛsĩ̀riè ɛ́ ɲɛ́ ɛ̀ ɓɛ̀ nɛ Piɛre ɛ́ wi hɔ Lida lóo hũn. Lida ɛ́ den yí ni àá Zopee wɛ̀. Ɛ́ ɓɛ́ khie tɔrɛ ɓɛ́ nìɛ ɓɛ̀ ɲu dɔ̀ nɛ ɓɛ vɛ bie lɛ́ á Piɛre ǹ nɛ làa: «Ké ɛ́ kɔ̀ hɛ̃nnin nɛ kɔ ɓen kè viì fùa fùa.» 39Ɛ́ Piɛre siɛ hĩ́nà ɛ́ bɔ̀ɓán àá ɓɛ́. Ɛ́ hɔ́ lɛ á van dɛ̃un, ɛ́ ɓɛ́ fɔ́ á ɛ́ dàa van yòó lé lɔ́nkɔ́ zũ-bɔ́nú hũn. Ɛ́ ɓɛ́ mɛ-hã́a ɓɛ́kùi ɛ́ ɓɛrɛ dɛ̃̀ piè sɛnù, ɛ̀ ɓɛ̀ ɛ́ wíríkɛ kɛ́ ɓɛ́ ɛ́ hɔ̀ pɔnkɔ̀nìɛ àá hɔ́ mùakúo lɛ ápe Tabita ɛ́ hṹn wóò tĩ́ ɛ̀ lɛ́ ɓà ǹ ɛ̀ zɛ̃níkɛ Piɛre ǹ. 40Ɛ́ Piɛre ɛ́ khie líeniɛ ɓɛ̀ nìnbirìe ɓɛ́kùi àá yíe, à siɛ hɔ̀sí mí nunkɛ́yìe lɔ̀n à hɛ̃nnɛ Dɔfĩn. À khie bĩniɛ mí híɛhɔ́ sɛ́sɛ́a ɔ̀ nìhen à zɔ bie ɛ́ nɛ làa: «Tabita, síɛ hĩ́ní!» Á hɛ́rɛ mí yìe, ɛ́ hɔ́ lɛ á mɔn ɔ̀ Piɛre, á hĩ́nà kɛsí. 41Ɛ́ Piɛre siɛ zɛnkɛa piè núnú ǹ à sĩiniɛ ɔ̀ ɛ́ hóoniɛ yòoniɛ. À khie vɔn ɓɛ̀ ńdɛsĩ̀riè àá ɓɛ́ mɛ-hã́a, à zɛ̃́niɛ ɔ̀ ɓà ǹ kɛ́ á yìe ɛ́ wi. 42Ɛ́ hɔ́ Zopee lóo nìɛ ɓɛ́kùi ɛ́ dũnɛ hɔ̀, ɛ́ peɓɛ̀ nìnbí-kuì ɛ́ dũmuasɛ̃̀ Ɲunsɔ ǹ. 43Ɛ́ Piɛre ɛ́ khie míɛ hɔ̀pe Zopee lóo hũn. À hàarí wi-e Simɔn lɛ hàarí wóò bĩ̀ hɔ̀ sɛ̃́hɛ̃ yíe.
Айни замон обунашуда:
Bɔ̀werà 9: bwj
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation