Evvan 3
3
Isõs da Nikodeemus
1Nikodeemus, kååʹtt leäi farisõs da õhtt juudlažniiʹǩǩi vueiʹvvoummin, 2pueʹđi måtam iinn Isõõzz årra da cieʹlǩi: «Rabbi, mij tieʹttep, što Vuâsppåʹd lij tuejjääm tuu uʹčteeʹlen. Ij ni ǩii pââʹst tuejjeed nåkam õõmâstuâjaid mâʹte ton, iʹlleʹžže Vuâsppåʹd suin õõutsââʹjest.»
3Isõs vaʹsttii da cieʹlǩi suʹnne: «Tuõđi, tuõđi mon ceälkam tuʹnne: kååʹtt ij šõõdd oʹđđest, tõt ij vueiʹt vueiʹnned Vuâsppååʹd väʹlddkååʹdd.» 4Nikodeemus kõõjji: «Mäʹhtt vuäitt vuäʹmm ooumaž oʹđđest šõddâd? Ij son vueiʹt mõõnnâd jieʹnnes vuõʹbdde da nuuʹbb vuâra šõddâd.» 5Isõs vaʹsttii: «Tuõđi, tuõđi mon ceälkam tuʹnne: kååʹtt ij šõõdd čääʹʒʒest da Jiõggâst, ij son vueiʹt piâssâd Vuâsppååʹd väʹlddkådda. 6Oummust šõddâm lij määddoolâž, leša mii Jiõggâst lij šõddâm, lij jiõglvaž.
7Jeäʹl õõmtõõžž tõn, što säärnam tuʹnne: tij õlggveʹted šõddâd oʹđđest. 8Piõgg pååss koʹst tätt; ton kuulak pâi tõn šuuvvâm, leša jiõk tieʹđ, koʹst tõt puätt da koozz tõt mâânn. Nåkam liâ še Jiõggâst šõddâm.» 9Nikodeemus vaʹsttii da kõõjji suʹst: «Mäʹhtt tõt vuäitt leeʹd nuʹt?» 10Isõs vaʹsttii da cieʹlǩi suʹnne: «Ton leäk Israel uʹčteeʹl jiõk-ga tõn tieʹđ. 11Tuõđi, tuõđi mon ceälkam tuʹnne: mij mainstep tõn, mõõn tieʹttep, da tuõđštep tõn, mõõn leäʹp vuäinnam, leša tij jeäʹped priim mij tuõđštõõzzeen. 12Tij jeäʹped ååsk, ko mon mainstam tiʹjjid tänâlmmsaž aaʹššid. Mäʹhtt tâʹl vuäitčid åskkad, ko mainstam tunâlmmsaž aaʹššid?
13Ij ni ǩii leäkku pâjjnam pââjas âlmma; pâi son, kååʹtt lij tåʹben puättam, Oummu Päʹrnn. 14Nuʹt mäʹhtt Moʹssai ââʹlii kuuʹd poostaijânnmest, nuʹt âlgg še Oummu Päʹrnn ââʹleed, 15što juâkksast, kååʹtt åskk suu, leʹčči suʹst âʹǩǩpâjjsaž jieʹllem.
16Nuʹt lij Vuâsppåʹd maaiʹlm räʹǩstam, što uuʹdi oʹdinakai Pääʹrnes, što ij ni õhtt, kååʹtt åskk suu, jäämče, pâi vuäǯǯči jieʹlled âʹǩǩpââjas. 17Ij Vuâsppåʹd vuõlttääm Pääʹrnes maaiʹlm suudâm diõtt, pâi tõn vääras, što maaiʹlm suu pääiʹǩ peälštõõvči.
18Tõn, kååʹtt åskk suu, jeät suudu; kååʹtt ij ååsk, lij juʹn suudum, son iʹlla åskkam Vuâsppååʹd oʹdinakai Pääʹrn nõʹmme. 19Čuõvv pueʹđi maaiʹlme, leša oummu jiâ räʹǩstam čuõv pâi seuʹnnjõõzz, tâʹl sij tuejjee ǩeähn. Tâʹl siʹjjid pueʹđi suudâs. 20Jueʹǩǩkaž, kååʹtt tuejjad ǩeähn, vâjjad čuõv tõnt, što suu tuâj jiâ kuâsttjeʹčče. 21Leša kååʹtt jeäll vuõiʹǧǧest, puätt čuõʹvve, da čuõvâst kuâsttai, što son lij jeällam nuʹt, mäʹhtt Vuâsppåʹd tätt.»
Isõs da Evvan Ristti
22Mâŋŋa tõʹst Isõs mõõni mättʼtõspäärneesvuiʹm Juudea, jeälsti tåʹben siʹjjivuiʹm da riisti oummid. 23Leša Evvan še riisti Ainonest ââlda Saliim, ko tåʹben leäi jiânnai čääʹcc; oummu puõʹtte da uʹvdde risttâd jiijjâz. 24Evvan iʹlleämma veâl pijjum tormma.
25Nuʹt Evvan mättʼtõspäärna aʹlǧǧe räʹjjtõõllâd måtam juudlažniiʹǩǩin puʹtstõõttâmnääʹl diõtt. 26Sij mõʹnne Evvan årra da cieʹlǩǩe suʹnne: «Uʹčteeʹl, mooštak-a åumma, kååʹtt leäi tuiʹn nuuʹbb peäʹlnn Jorddan da ǩeäʹst ton tuõđštiǩ? Ååʹn son še restt, di puk oummu mâʹnne suu årra.» 27Evvan vaʹsttii da cieʹlǩi: «Ooumaž ij vueiʹt väʹldded ni mâiʹd, mii ij leäkku uvddum suʹnne ââʹlmest. 28Tij leäʹped muu tuõđšteei, što mon cieʹlǩǩem: jiõm mon leäkku Kristõs, muu liâ vuõlttääm pâi suu ooudbeäʹlnn jooʹttjen. 29Ǩeäʹst lij kaavsõs, tõt lij vuõddâm; vuõddâm naʹzvaan čueǯǯ da kulddal suu da rämmaš čuuʹt vuõddâm jiõnâst. Nuʹt muu räämmast še iʹlla ǩieʹčč. 30Son âlgg šõddâd šoorben da mon suu uuʹccben.»
Son, kååʹtt puätt ââʹlmest
31Son, kååʹtt puätt pâʹjjen, lij šoorab puki jeärrsi. Tät, kååʹtt lij šõddâm määddast, lij tänâlmmsaž di maainast tänâlmmsaid. Son, kååʹtt puätt ââʹlmest, lij šoorab puki. 32Son tuõđašt tõʹst, mâiʹd lij vuäinnam da kuullâm, leša ij ni ǩii vääʹld vuâstta suu tuõđštõõzzâs. 33Tõt, kååʹtt väldd suu tuõđštõõzzâs vuâstta, raavad, što Vuâsppååʹd mainnsin lij tuõtt. 34Son, koon Vuâsppåʹd lij vuõlttääm, särnn Vuâsppååʹd saaʹnid, ij-ǥa Vuâsppåʹd käʹccmõõđ uʹvdded Jiõggâs. 35Eʹčč rääʹǩǩast Pääʹrn da lij ouddam puk suu välddses. 36Kååʹtt åskk Pääʹrn, vuäǯǯ âʹǩǩpâjjsaž jieʹllem, leša kååʹtt ij jäkktõõl Pääʹrn, tõʹst ij leäkku jieʹllem, leša son pâi pââšš Vuâsppååʹd vâjjõõzz vueʹlnn.
Айни замон обунашуда:
Evvan 3: SKOLT
Лаҳзаҳои махсус
Паҳн кунед
Нусха
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Ftg.png&w=128&q=75)
Want to have your highlights saved across all your devices? Sign up or sign in
© Lää´dd Pipliaseä´rvv; Suomen Pipliaseura; Finnish Bible Society 1988