Evvan 4
4
Isõs da Samaria neezzan
1Ko ååʹn Šurr vuäǯǯai tieʹtted farisõõzzid kuullâm, što Isõs raaji mättʼtõspäärnžen da riisti jeäʹnbõõzzid ko Evvan 2— håʹt-i Isõs ij jiõčč risttâm pâi suu mättʼtõspäärna — 3son kuõʹđi Juudea da mõõni eʹpet Galilea. 4Leša son õõlǥi jååʹtted Samaria pääiʹǩ.
5Nuʹt son pueʹđi Sykar-nõmmsaž Samaria gåårda, kååʹtt lij ââlda tõn mäddkuuʹsǩ, koon Jääkk leäi ouddam pärnnses Jooʹsfa. 6Da tåʹben leäi Jakku käivv. Ko ååʹn Isõs leäi määʹtǩest levvjam, iišti son käivvriddu. Da leäi nuʹt kõskkpeiʹvvpodd.
7Pueʹđi måtam Samaria neezzan čääʹʒʒ viǯǯâd. Isõs cieʹlǩi suʹnne: «Uuʹd mon juuǥǥam.» 8Mättʼtõspäärna leʹjje vuâlggam gåårda porrmõõžž vuäʹstted. 9Näʹde Samaria neezzan cieʹlǩi suʹnne: «Mäʹhtt ton, kååʹtt leäk juudlažneǩ, raaukak juukkâd čääʹʒʒ muʹst, Samaria neezznest?» Ko juudlažneeʹǩǩ jiâ juuǥǥ seämma leeʹttest samarianiiʹǩǩivuiʹm.
10Isõs vaʹsttii da cieʹlǩi suʹnne: «Ko ton teâđčiǩ Vuâsppååʹd sǩiâŋk da ǩii tõt lij, kååʹtt tuʹnne ceälkk: ’Uuʹd mon juuǥǥam’, ton leʹččiǩ jiõčč raukkâm suʹst, da son leʹčči ouddam tuʹnne jieʹlli čääʹʒʒ.» 11Neezzan cieʹlǩi suʹnne: «Šurr, ij-ba tuʹst leäkku kuäivvamleʹtt, da käivv lij čiŋŋâl; koʹst tuʹst tâʹl lij tõt jieʹlli čääʹcc? 12Jiõk tâma ton leäkku šoorab ko mij eččam Jääkk, kååʹtt uuʹdi miʹjjid tän kääiv da juuǥǥi tõʹst, son jiõčč, suu päärna da žeeʹvet?» 13Isõs vaʹsttii da cieʹlǩi suʹnne: «Jueʹǩǩkaž, kååʹtt jookk tän čääʹʒʒ, juǥstââvv oʹđđest, 14leša kååʹtt jookk tõn čääʹʒʒ, koon mon suʹnne ooudam, tõt ij ni kuäʹss juǥstõõv. Pâi tõt čääʹcc, koon mon suʹnne ooudam, šâdd suʹst tõn čääʹʒʒ läddan, kååʹtt kålgg âʹǩǩpâjjsaž jieʹllma.»
15Neezzan cieʹlǩi suʹnne: «Šurr, uuʹd muʹnne tõn čääʹʒʒ, što ij muu juǥstââttče ij-ǥa muu taarbšeʹčče jååʹtted tääiʹben kuäivvmen.» 16Isõs cieʹlǩi suʹnne: «Mõõn, kååčč åummad da puäʹđ tiiʹǩ.» 17Neezzan vaʹsttii da cieʹlǩi: «Ij muʹst leäkku ååum.» Isõs cieʹlǩi suʹnne: «Vuõiʹǧǧest ton cieʹlǩǩiǩ: ’Ij muʹst leäkku ååum.’ 18Tâʹl vitt åumma tuʹst liâ leämma, da tõt, kååʹtt tuʹst ååʹn lij, iʹlleäkku tuu ååum. Tõʹst cieʹlǩǩiǩ tuõđ.» 19Neezzan cieʹlǩi suʹnne: «Šurr, mon vuäinam, što leäk profeʹtt. 20Mij eʹččem liâ kåʹmrdeeʹl moʹlidvâsttam tän vääʹrest; da tij juudlažneeʹǩǩ ceäʹlǩǩveʹted, što pâi Jerusaaʹlmest lij päiʹǩǩ, koʹst âlgg kåʹmrdeeʹl moʹlidvâʹstted.»
21Isõs cieʹlǩi suʹnne: «Kaav, ååsk muu. Šâdd veâl äiʹǧǧ, kuäʹss jeäʹped moʹlidvââʹst Ečča tän vääʹrest jeäʹped-ǥa Jerusaaʹlmest. 22Tij kåʹmrdeʹped tõn, mõõn jeäʹped toobd, leša mij kåʹmrdep tõn, mõõn mij tobddâp. Tâʹl kaʹjjõs lij juudlažniiʹǩǩin. 23Leša puätt äiʹǧǧ — da lij juʹn puättam — kuäʹss tuõđâš moʹlidvõõʹsti reʹstte čõõʹlmeez Eeʹjj Jiõggâst da tuõđšvuõđâst: tõnnallšem moʹlidvõõʹstjid Eʹčč še tätt. 24Vuâsppåʹd lij Jiõgg, da suʹnne âlgg moʹlidvâʹstted tuõđšvuõđ Jiõggâst.»
25Neezzan cieʹlǩi: «Kâʹl mon teâđam, što Messias puätt — tõt koon cieʹlǩet Kristõssân — da son iʹlmmat miʹjjid puk.» 26Isõs cieʹlǩi suʹnne: «Tõt leäm mon. Son maainast tuin.» 27Tâʹl suʹst mättʼtõspäärna puõʹtte da sij õõmtõʹšše tõn, što son mainsti neezznin. Leša ij ni ǩii ceälkkam: «Mâiʹd raaukak?» leʹbe: «Mâiʹd mainstak suin?» 28Da neezzan kuõʹđi čääʹccleeʹttes da mõõni gåårda da cieʹlǩi oummid: 29«Pueʹtted ǩiččâd åumma, kååʹtt lij särnnam muʹnne puk, mâiʹd mon leäm tuejjääm. Ij tâma tõt leäkku Kristõs?»
30Oummu vuõʹlǧǧe gåårdest da mõʹnne suu årra. 31Tän kõõskâst mättʼtõspäärna rauʹǩǩe suu cieʹlǩeeʹl: «Rabbi, poor!» 32Leša son cieʹlǩi siʹjjid: «Muʹst lij poorrâmnalla porrmõš, mâʹst tij jeäʹped tieʹđ.» 33De mättʼtõspäärna cieʹlǩǩe kõskkneez: «Leežž-ǥo ǩii-ne pohttam suʹnne porrmõõžž?» 34Isõs cieʹlǩi siʹjjid: «Muu porrmõššam lij tõt, što mon tuejjääm, mâiʹd vuõltteejam tätt, da teâudam tõn tuâj, koon son lij alttääm. 35Jeäʹped-ǥo cieʹlǩ: ’Veâl lie nellj mannu da jeällpeäld čuõppâmäiʹǧǧ puätt’? Ǩiõčč, mon ceälkam tiʹjjid: Kaggâd čõõʹlmeed da ǩiččâd peäldaid, mäʹhtt tõk liâ šõddâm čuõppâmnalla. 36Juʹn ååʹn vuäǯǯ čuõppi pääʹlǩ da nåårr šââddaid âʹkkpâjjsaž jieʹllma, što kõʹlvvi da čuõppi vuäǯǯče õõutsââʹjest rämmšed. 37Tät sääʹnn lij tuõtt: nuʹbb kâlvv leša nuʹbb čuâpp. 38Mon leäm vuõlttääm tiʹjjid nåkam šââdd koʹrjjeed, mõõn diõtt jeäʹped leäkku vääiv vuäinnam; jeärraz liâ vääiv vuäinnam, da tij leäʹped vuäǯǯam sij vääivai šââddaid.»
39Da määŋgas samarianeeʹǩǩ tõn gåårdest oskku suʹnne neezzan saaǥǥi diõtt, ko tät tuõđšti: «Son lij särnnam muʹnne puk, mâiʹd mon leäm tuejjääm.» 40Ko ååʹn samarianeeʹǩǩ puõʹtte suu årra, rauʹǩǩe sij suu pääʹcced sij årra; da son paaʹʒʒi tõk kueiʹt peeivas. 41Veâl määŋgas oskku Isõõzz suu jiijjâs saaǥǥi diõtt. 42Da sij cieʹlǩǩe neezzna: «Jeäʹp teäʹnab ååsk tuu saaǥǥi diõtt, ko mij jiijj leäʹp kuullâm da tieʹttep, što son tuõđi lij maaiʹlm kaʹjjeeja.»
Isõs pueʹrad veʹrǧǧåumma pääʹrn
43Leša tõn kueiʹt peeiʹv ǩeeʹjjest son vuõʹlji tåʹben Galilea. 44Tâʹl Isõs jiõčč tuõđšti, što jeät profeeʹtt ciʹsttjuku jiijjâs šâddgåårdest. 45Ko son âʹtte pueʹđi Galilea, vaʹldde galileaneeʹǩǩ suu vuâstta ciʹsttjeeʹl. Sij jiijj še leʹjje leämmaž Jerusaaʹlmest eʹjjpeeiʹv prääʹznǩi ääiʹj da leʹjje vuäinnam puk, mâiʹd Isõs tåʹben tuejjii.
46Isõs pueʹđi eʹpet Galilea Kaanaǥa, koʹst son leäi mottam čääʹʒʒ viin smakkân. Kapernaaumâst leäi halltõõzz veʹrǧǧååum, koon päʹrnn leäi puõccmen. 47Ko son kuuli, što Isõs leäi puättam Juudeast Galilea, son vuõʹlji ǩirrsest tän årra da kååččai pueʹtted Kapernauʹmme pueʹreed suʹst pääʹrn, kååʹtt leäi jääʹmmʼmen. 48Isõs cieʹlǩi suʹnne: «Tij ko jeäʹped vueiʹn tuõđštõstuâjaid da õmmsid, tij jeäʹped ååsk.» 49Veʹrǧǧååum cieʹlǩi: «Šurr, puäʹđ sõõrǥab, ouʹddelgo pärnnam jäämm.» 50Isõs cieʹlǩi: «Mõõn, pärnnad jeäll.» Da ååum ååskai, mâiʹd Isõs cieʹlǩi da vuõʹlji. 51Son ko leäi jååʹttmen, suu kääzzaǩ puõʹtte suu vuâstta da sarnnu, što päʹrnn lij jieʹllmen. 52Ååum kõõjji, koon poodd päʹrnn puârrneškueʹđi. «Žaar luõʹšti jåhtta õõut ääiʹj jeäʹǩǩespeeiʹv, sij vaʹsttee.» 53Eʹčč muuʹšti, što sami tõn poodd Isõs leäi särnnam, što päʹrnn jeäll. Son da puk suu piâr oskku Isõʹsse.
54Tät leäi Isõõzz nuʹbb tuõđštõstuâjj, da son tuejjii tõn tâʹl, ko leäi puättam Juudeast Galilea.
Айни замон обунашуда:
Evvan 4: SKOLT
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© Lää´dd Pipliaseä´rvv; Suomen Pipliaseura; Finnish Bible Society 1988