Yohanes 10
10
Yesus Pongombolo inyo boi'
(10:1-21)
1 Yesus ija' bopandir, “Pondinga'an bobondarcam, la'apo inyo Ku pandiran ni'in: Aman ado urakng inyo tamo ko dalapm kandakan domba, apo io kinyo molalu'i lawakng kandakan nantai, umpamonyo io mansu' monoi' doi'dindikng damo noi' doi' tompat bukai, urakng ubo nian urakng pongolit huatan porampok. 2Apo urakng inyo mansu' molalu'i lawakng kandakan, sobondarnyo io nianam pongombolo boko domba nantai. 3Ponjago kandakan mombuka' lawakng pakai' pongombolo nantai. Boko domba mondinga'an saro pongombolo nantai. Io moningkau boko dombanyo agatn damo sia' siku'-monyiku'. Io moirikan sia' ko luar. 4Lopas jadi pongombolo nantai mombaba' somuo domba umputnnyo ko luar doi' kandakan nantai, io bojalatn di pohadapan boko dombanyo. Boko domba nantai tuyut io obai boko dombanyo nantai mongonal saronyo. 5Boko dombanyo nantai co paca'an tuyut urakng bukai. Sia' paca'an rari doi' urakng nian obai sia' co mongonal saronyo.”
6Yesus mongisahan poumpamoan nantai ko boko urakng Farisi, apo sia' co mongoroti la'apo inyo dimasud-Nyo. 7Obai nantai Yesus bopandir agi', “Pondinga'an bobondarcam inyo Ku pandiran ni'in: Aku ninam samo agatn lawakng kandakan pakai' domba nantai. 8Somuo urakng inyo datakng sobolupm Aku, sia' nam pongolit ongko porampok. Apo boko domba co mondinga'an saro sia'. 9Aku ninam lawakngnyo. Sotiap urakng inyo mansu' molalu'i Aku, io paca'an solamant.#10:9: Yesus nam lawakng masudnyo ongkah urakng inyo pocayo agatn Yesus ulih mansu' Koraja'an Allah. Io paca'an koluar-mansu', monomuan padakng rumput. 10Pongolit datakng ongkah bayo honda' mongolitam, mombunuh, mombonasoannam. Apo Aku datakng pakai' moonji'i hidup, ia'an hidup inyo sonang-nyaman.
11Aku ninam pongombolo inyo boi'. Pongombolo inyo boi' monyorahan hidupnyo pakai' monyolamant'an boko dombanyo. 12Urakng upahan, io nian bukainyo urakng pongombolo. Io bukainyo umputn boko domba nantai. Aman io moniant payau datakng,#10:12: Payau monggambaran Rajo Sitatn DAMO boko pomimpitn agama inyo botujuan jahat. Urakng upahan monggambaran boko pomimpitn agama inyo bayo momporhatian posisi huatan pondapat sia' mo. Sia' co poduli agatn urakng bukai. io rari moninggalan boko dombanyo. Lalu payau nantai monorokam huatan boko domba nantai botomboburan. 13Urakng nantai rari obai io bayo urakng upahan. Io co poduli agatn boko domba nantai.
14-15Apo Aku ninam pongombolo inyo boi'. Samo agatn Allah Bopai mongonal Aku huatan Aku mongonal Bopai, ubo nian jam Aku mongonal boko domba-Ku huatan sia' mongonal Aku. Aku monyorahan hidup-Ku pakai' monyolamant'an sia'. 16Apo ado jam boko domba bukai inyo bukainyo doi' kabatn domba ni'in inyo umputn-Ku.#10:16: Boko domba inyo bukai bomasud boko urakng bukainyo urakng Yahudi inyo monjadi pocayo agatn Yesus. Aku gola' mombaba' sia' jam. Sia' paca'an mondinga'an saro-Ku. Somuo domba-Ku paca'an monjadi sokabatn agatn siku' pongombolo. 17Ninam sobabnyo Bopai mongasihi Aku: Obai Aku monyorahan hidup-Ku pakai' monorima'nyo agi'. 18Conyiant siku' urakng pan inyo ulih mombunuhKu. Apo Aku monyorahan hidup-Ku monurut kohonda'-Ku siku'. Aku ado kuaso pakai' moijitan urakng mombunuh-Ku. Aku pan ado kuaso pakai' hidup agi'. Nianam porintah inyo Aku torima' doi' Bopai-Ku.”
19Obai Yesus bopandir ubo nantai boko urakng Yahudi ado potikakan. 20Banya' doi' sia' inyo bopandir, “Sio nian gogilo obai korasu'an sitatn! Jangan kaitn mondinga'an Sio!” 21Apo inyo bukai bopandir, “Pomandiran nantai bukainyo doi' urakng inyo korasu'an sitatn! Co mungkitn sitatn ulih bulah urakng buto sampai ulih moniant!”
Banya' urakng Yahudi kinyo honda' monorima' Yesus
(10:22-39)
22Lopas nian, di Yerusalem ado Ari Rayo Pontabisan Rumah Allah. Watu nantai musipm dingin. 23Yesus tongahan bojalatn di polantaran Salomo di Rumah Allah. 24Ado boko urakng Yahudi datakng bokumpul di sokolilikng Yesus. Kato sia' ko Sio, “Boropo manah agi' Duatn mombiaran koi gangga'-gua'an! Aman Duatn memang Kristus, Rajo Inyo Dijanjian Allah, padahancam agatn torus torakng ko koi.”
25Timbas Yesus ko sia', “Aku udah momadahannyo ko kaitn, apo kaitn co pocayo. Aku molabuhan boko pokoroja'an dalapm damo Bopai-Ku. Boko pokoroja'an nantai mombutian mongona'i Aku. 26Apo kaitn co pocayo obai kaitn bukainyo boko domba-Ku. 27Boko domba-Ku mondinga'an saro-Ku. Aku mongonal sia' huatan sia' tuyut Aku. 28Aku moonji'i sia' hidup inyo somanah-manahnyo. Sia' cokalo bonaso sampai somanah-manahnyo. Conyiant ado siku' urakng pan inyo ulih morobut sia' doi' jari-Ku. 29Bopai-Ku inyo moonju' sia' ko aku. Sio lobih bokuaso daripado sopo pan. Jadi, conyiant siku' urakng pan inyo ulih morobut sia' doi' jari-Nyo. 30Aku huatan Bopai-Ku siku'mo.”
31 Pas boko urakng Yahudi mondinga' pandir Yesus bunyi nantai, sokali agi' boko urakng Yahudi ngopil boko batu pakai' monikapm Yesus. 32Apo Yesus bopandir ko sia', “Kaitn udah moniant Aku molabuhan banya' pokoroja'an boi' doi' Bopai-Ku. Doi' somuo pokoroja'an nantai, inyo buai mono bulah kaitn honda' monikapm Aku agatn batu?”
33Kato sia', “Koi honda' monikapm Duatn agatn batu bukainyo obai pokoroja'an boi' inyo Duatn labuhan, apo obai Duatn mohayam Allah. Duatn bayo monsio mo, apo Duatn monyamoan diri Duatn agatn Allah!”
34Timbas Yesus ko sia', “Dalapm Hukupm Torat kaitn ditulis obai Allah bopandir, ‘Kaitn nam allah’?#10:34-35: Doi' buku Mazmur 82:6. 35Kito tohu obai la'apo inyo totulis dalapm Buku Suci nantai culih dibalakan. Jadi, aman sia' inyo monorima' pomandiran Allah nantai disobut boko allah, 36hibo kaitn mongatoan Aku mohayam Allah aman Aku mongatoan Aku ninam Ana' Allah? Obai, Allah Bopai-Ku momilih Aku huatan moutus Aku ko dunia. 37Soandainyo Aku co molabuhan boko pokoroja'an Bopai-Ku, kaitn jangan pocayo ko aku. 38Apo memang Aku molabuhan boko pokoroja'an Bopai-Ku. Biar pan kaitn co pocayo agatn Aku, palikng cado honda'nyo kaitn pocayo agatn boko pokoroja'an nantai. Agatn ubo nian, kaitn paca'an tohu huatan mongoroti obai Bopai bosatu agatn Aku, huatan Aku bosatu agatn Bopai.”
39 Lopas jadi Yesus mongatoan nantai, sia' bousaha agi' monangkap Sio. Apo Sio lopas doi' jari sia'.
Boko urakng pocayo agatn Yesus di doerah Sungai Yordan
(10:40-42)
40Lopas nian Yesus bojalatn agi' ko soborakng sungai Yordan, tompat Yohanes komainyo mombaptis urakng. Sio diapm di siatn tai. 41Boko urakng datakng ko Sio. Kato sia', “Yohanes co bulah sobuti' pan mujisat. Apo, somuo inyo Yohanes pandiran mongona'i Urakng ni'in memang bondar.”#10:41: Yohanes momandiran mongona'i sopo Yesus sobondarnyo. Yesus nam Rajo Inyo Dijanjian Allah, Ana' Allah inyo mombaptis urakng agatn Roh Allah, huatan Ana' Domba inyo diutus Allah oca' dosa urakng di dunia ulih diamputi. Tiat Yohanes pasal 1. 42Boko urakng di santai pocayo agatn Yesus.
Айни замон обунашуда:
Yohanes 10: TBDS
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in