Matayo 10
10
1Kavaanga vanalosho vamwi valya ikumi na vavili kavaniinga finya ya yumbuta mimuyo mikasha na ikiṛa saka toose na ngyutanyaṛi ta mikae yoose.
2Marina a vanalosho valya ikumi na vavili wwo iva: Wa mbele ni Simon eevaangwaa lingi Petiro na Anderea mwanamae wamwi, na Yakobo wa Sebedayo na Yohane mwanamae wamwi, 3na Filipo na Baritolomayo, na Toma na Matayo nsanyiṛya kyaalo na Yakobo wa Alufayo, na Lebayo eevaangwaa lingi Tadayo 4na Simon Nkananayo na Yuda Isikariote, nae ni ulya andendiinga.
5Iva ikumi na vavili Yesu ka varuma eevavavasaa eevaiaa: Manya mutaire shia ta veeni ndi ana nta ta miṛiń ya Vasamaria manya mutaire-fo ndi. 6Llyo ńwana muware shia mwende kwa maanri alya arekye a numba ya Isiraeli. 7Neeli mwiendaa, kwaniseń mwinumbuaa: Umangi lwa iṛuvewu lwansha kufui. 8Kiṛeń valole, shiiseń na valya vaworwa ni ivave, ṛuteń na vafu, umbuteń na mimuyo mikasha. Mwankiniingwa kya ruu, kiniingyeń kya ruu. 9Manya mutakurike saabu ana fesa ana nta senti ifo fitatiń fanu, 10ana kishawu kya shień ana miseto ivili ana faaru ana mbiiri. Fulya ndundi wa mashoṛa kyawara aniingwa wavi lwamwi. 11Na muṛi woose ana kyungu kyoose mwakaa ṛuyeń nnu, ni i akusurye Iṛuva ifo muṛiń ito. Kaań kwamwi kumande muukaa-fo. 12Neeli mwakaa numba iisaniń. 13Numba ilya ikamuwaria, unambwe lwanu luvafikye. Ana kwankooya kitaare imuwariaa, unambwe lwanu lumuuyie. 14Na kwakooya nndu atamuwariaa ana imwaranya firero fanu, ili musomukaa numba ilya ana muṛiń ulya, vaangatyeń funga ya marende anu. 15Nkue namuia: Llyo ńwana uruka lwa Sodomo na Gomora lulilyoo nkonu ulya wa uumisyo kita muṛi ulya.
16Lleń niń namuruma sha mburu tikee kari ka mafisi. Kyasia ṛangueń sha sui, muwolye sha mbelele titawore mitambwe. 17Kusembekeń vandu, fulya vamurwaa fikweniń fawo na imukabya ifo numba tawo ta iterevya. 18Neeni murawaa kwa vashili na kwa mamangi kiimba kyakwa mushirambue kwawo na kwa vandu vateeshi Iṛuva. 19Na kwakooya vamufingyaa mwaandu, mutaṛiikiswa mfilya mureraa ndi. Amu muniingwaa finya murere kyeeri kyo kyeni. 20Amu nta ni ini mureraa ndi, kake mMumuyo wa Nde yanu akee kari kanu nto areraa. 21Amu nndu aotoṛaa mwanawo awalwa, na nsuṛi aotoṛaa mwana wamwi awalwa. Na vana vakwimboyoo vasuṛi vawo na ivawaa. 22Neeni musulwaa vvandu woose kiimba kya irina lyakwa. Kake ulya asisiryaa kumande ifurumya, ito yye akifwaa. 23Kake ili vamuumbutaa muṛiń uu, rishyeń muṛiń ungi. Amu nkee imuia kya dede: Nta mumarisyaa miri ya Isiraeli kitaare Mwana wa nndu ansha ndi.
24Mwanalosho ańinyaa llosha wamwi ndi, ana iketi lińinyaa nndumi wamwi ndi. 25Kifilaa mwanalosho iińańana na llosha wamwi. Mfo kuro na iketi kifilaa iińańana na nndumi wamwi. Kwakooya vavaanga muni numba mumuyo nkasha, naare nkya mmwasi se valya vakee numba kwamwi? 26Kyasiań manya mutavaeṛee ndi! Amu kiifo kindo kifise kitalolikaa numa ndi. Ana nta kiifo kyama kifike kitamanyikaa numa ndi. 27Kilya namuvilya ifo llemiń andekireryeń ifo langeri. Na kilya mukee ikiitya kiṛisiń andeongoyeń mukee mmbewu. 28Manya mutaeṛee iwo vawore finya ya iwaa vvili da, vatamakii iwaa nrima. Kake eṛeeń ito awore finya ya ireta vvili na nrima na yeeṛa muroń utasiaa. 29A ngyuṛuu ivili tikumbwaa se na senti imwi? Nta lumwi luwee si, na Nde yanu atalwishi. 30Na akwaa mmafuli a mirwe yanu mmatale woose. 31Kwa ikyo manya mutaeṛee, amu mukilye ndee na tikaingifwa ki. 32Kyasiań ulya woose ashirambuaa mbele ya vandu, nań ninrambuaa mbele ya Vaava wakwa wa iṛuvewu. 33Na ulya woose ashikanaa mbele ya vandu, nań ninkanaa mbele ya Vaava wakwa wa iṛuvewu.
34Manya mutakusaṛe sheeli nansha innde unambwe isangeń. Wode! Nansha innde unambwe ndi, kake nshombo. 35Nansha isuyanisa nndu na ndee wamwi na mwana wa kika na mae wamwi, mfo kuro na nkwe na nkwe wamwi. 36Na valya va kyeń kwa nndu wwo veni vavaa kituva kyamwi. 37Ulya afurie ndee ana mae kita niń, ashiviaa ndi. Na ulya akundye mwana wamwi wa womi ana wa kika kita niń, ashiviaa ndi. 38Na lingi ulya atakurikaa nsalaba wamwi ashilatye numa yakwa, ashiviaa ndi. 39Ulya akundye muu wamwi kita niń, auretaa. Na ulya asuaa muu wamwi kiimba kyakwa aukiṛaa. 40Ulya akee imuwaria ini, anshiwaria niń. Na ulya akee ishiwaria niń, awwaria ulya anshiruma. 41Ulya akee iwaria nndu mwauya, fulya akee nndu mwauya, awariaa maṛe a nndu mwauya. Na ulya awariaa nndu nsumani, fulya akee nndu nsumani, awariaa maṛe a nndu nsumani. 42Na nndu ulya woose aniingaa umwi wa iwo vannya vakwa kyumbata kya usookwa lurelelaa, fulya akee mwanalesho, nkue namuia: Nta maṛe amwi arekaa kutu ndi.
Айни замон обунашуда:
Matayo 10: RWK72
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.