Matayo 11
11
1Kyasia ili Yesu andemaa ivavasa vanalosho vamwi valya ikumi na vavili, kakwimboo ifo kaenda indelosha na ikwanisa ifo miṛiń yawo.
2Ili Yohane andeita akee kifingyoń mboni ta filya Yesu eekee itana, kanrumya vanalosho vamwi vavili vandemwuṛa: 3Ni iwe ulya ashaa ana tikavera ungi? 4Yesu kaaṛua kavaia: Uyeń mundeongoya Yohane mboni ta filya mwaita na ilolya, nato nto iti: 5Midoń ikee ilolya na vandu vakee manketenkete a meengo vakee imakii yenda. Na valya vaworwa ni ivave vakee iva vesha na vafu marwi vakee iita. Na vafu vakee iṛuka na valya vakiva vakee ikwaniswa mboni shinuru ta ivakiṛa. 6Na wwa ngoma ulya atashituṛukyaa. 7Ili vanalosho valya vandemaa yenda, Yesu kabooka iia vandu mboni ta Yohane kavauṛa: Oo nkiki mweenda indella kulya bateń? Nsuṛumuta ikee iseniswaseniswa mmburaato yyo mwandella? 8A nkiki kyamusomuta mukandella? Ni nndu aṛee miseto mirenderi? Lleń valya vaṛaa miseto mirenderi vakee numbeń ta mamangi. 9Ana nkiki kyamusomuta mukandella? Mmwauya fisuku yye mwifuriee indemulla? Ee da, nań namuia: Ni nnini kita mwauya fisuku. 10Fulya ito yye eentisiṛyoo kuro: ”A to nrumi wakwa nammuruma akwirie mbele, andekusumanisya shia yafo“. 11Nkue namuia: Kunu kari ka iwo vandeiriwa vvaka nta andekwimboo-fo nndu akilye Yohane mbatisa ndi. Kake ulya akee munnya ifo umangiń lwa iṛuvewu ni nnini kita ye. 12Kuuka kyeeri kya Yohane mbatisa umangi lwa Iṛuva lweende na finya kumande nnu, na vafinya vakawwaria na finya. 13Amu vaauya fisuku woose andu emwi na uvavaso veemaauyaa kumande Yohane alolikaa. 14Na mukankunda iirikya, ye yye Elia ulya eenringisyoo sheeli akaa ashe. 15Ulya woose awore marwi a yaranya aaranye. 16A kishuku ki kya alli nakivakanisa na kiki? Kivakani na fivana fikee soṛeń fiivaangaa vaaroe vawo veenumbuaa: 17Tammukabya mbembe, nta itavana? Lingi tammukumbya ngoṛu, nta iiya? 18Amu Yohane ashe nta ilya ana nta inwa vakanumbua: Aworwa mmumuyo nkasha. 19Ili Mwana wa nndu andesha kalya na inwa vakanumbua: Lleń nndu uu akee mulya na munwa mfinyo, mmukunda vasanyiṛya kyaalo na varekwa! Kake Iṛuva amanyisaa uṛango lwamwi kwa mitanie yamwi.
20Kyeeri kilya llyo Yesu abooka inaya miṛi ilya alya andetanya myorusye ilya yamwi ya iṛiikisa miingi, na vandu nta yaṛuka mirimiń yawo. 21Kanumbua: Ushi iwe Korasini! Ushi iwe Betisaida! Kikooye myorusye ii yatanika kulya muṛiń wa Tiro na Sidon sheeli yatanika kwanu, veekurraa kutu kyeeri kilya. 22Kake namuia: Miṛi ilya ya Tiro na Sidon ililyoo nkonu ulya wa uumisyo kita ini. 23Nawe Kaperinaumu kweemiiraa nsendo kumande iṛuvewu, kwolotwaa kumande muṛoń utasiaa. Kifo myorusye yakwa yatanika kulya muṛiń wa Sodomu sheeli indetanika kwafo, wisalalaa kumande nnu. 24Kake namuia: Uruka lwa Sodomu lulilyoo nkonu ulya wa uumisyo kita iwe.
25Kyeeri kilya Yesu kanumbua: Nakwitikisa Nde kukee mangi ya iṛuvewu na isanga, fulya kwafisa vandu vakee ikuvaanga va-ṛango na vaaṛia mboni ti, kwatirambuya vaani. 26Ee Nde, nkuro kyakusenya. 27Nanrambikyo findo foose nNde yakwa. Nta eefo nndu eeshi Mwana kitaare nNde ndi. Ana nta eefo nndu eeshi Nde kitaare mMwana na ulya Mwana afurie inrambuya ndi. 28Oṛeshoń kwakwa ini mu woose muṛiikisyo mmikae yanu ya kivandu, nań mmuwiiṛyaa muu! 29Kurikeń mwanda wakwa na ikulosha na mikae yakwa, fulya niń nkee wwoo na ikunyiisa nkee ikunyiisa shi muni na utele lwakwa, llyo mwimuruswaa mirima yanu. 30Manyiń mwanda wakwa usisiṛaa ndi na iṛio lyakwa lilemikaa ndi.
Айни замон обунашуда:
Matayo 11: RWK72
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.