Jon 5
5
Jesu I Vatavoese Valeke I Le Kale Tokamana
1I doka kaki teṉo ria vano Jiu tepa Jerusalema, gonae Jesu i za. 2Tepa Jerusalema igogone, kameka besi bolu iri vitoṉo ze sipi, besi bolu igogo ne, seko ria vano Iburu iri vitoṉo ze Betsata, liqutuna besi ne i koe kalima de koko basoe na. 3Topu ria basoero i pala qira soso mokoso ro iri za kekele go dego, kaki ria iri kodo, iri taveqo, mana kakiaro i le kale tokama qira go, iri piri ne besi ne tina visu, 4tanego aqelo ia God tina lamae besi bolu ne mana lama vizua go. Mana basoe mokoso tina za kenaqe go loka ne tina tavoisi go. 5Kameka basoe i kekele go de gogo ne, i mokoso bana so torana pisaṉaulu kazalu ave. 6Iago ṉalu Jesu i miasoba go valeke ne, ia i rove i lete mokoso vaumata bana, iago i tana ne ia, “Avigo qo soko mo velaka?”
7Valeke mokoso ne ivataule igo, “Batu, i kaega ka basoe tina sua vazao ve besi ne torana ṉalu besi ne i vizu go. Osina to ṉalu qa pada ne za kenaqa na era do, kakiaro basoero iri za kenaqa bana to.”
8Iago Jesu i sine ne ia, “Degere, pala tobi aro, mana zaza go.” 9Igoso nae ia, valeke ne i tavosi to, i pala tobi ia mana i zaza go. Ṉalu nae ne i musaqara Sabat, 10Iago vano batubatu ria vano Jiu iri sine ne valeke i tavoisi go, “Nini i musaqara Sabat, iago i tabo e Tamana ita tono pala zazao ne tobi aro go.”
11Valeke ne i vataule ne qira igo, “Do valeke ni vatavoisi ava go i sine nava ono pala tobi aro mana zaza go.”
12Iri tana ne ia, “Akena tane valeke i sine nigo aro, go qo zazu ne ia dena?”
13Do valeke ne, iki rove kaega akena bana tane i vatavoise go, tanego topu sasakata basoero iri koego de go, maria Jesu i zaza bana go.
14Taramuzina Jesu, iza soba ze ia Pade Lotu ne, mana i sine ne ia, “Ono gata pata tuna sine nigo era, ninidena aro qo velaka to, iago oniki ara zazu napu ne kaki pata sakata, ṉalu tono vasakata pata napu, makuru lavata tina doka go.”
15Goto nae valeke ne i zaza mana i za sine ne qira vano batubatu ria vano Jiu igo, “Jesu bana so tane i vatavoisi ava go era.” 16Iago iri tupia to vasasakata ne na Jesu, tanego i vatavoisia go valeke ne musaqara Sabat. 17Do Jesu i vataule ne qira igo, “Mamae ne, osina ṉalu i zazu, iago era do, tuna go napu so.”
18Pasi iri gata go seko dena, batubatu ria vano Jiu iri nanao to vae vale na Jesu, iki sauna so kaega i vae go tamana na musaqara Sabat, do ia igo God tane i Tamana go tanuna. Iadena i vasadake Jesu i gere napua so God.
Karaputa Ia Tuna God
19Iago Jesu i vataule ne qira, “Ma sine ne qamu pata ogoto. Tuna God i makuru tina zazu ne pata i soko go tanuna, do tina zazu neso pata i mia ze Tamana i zazu nego. Pataro izazu nego Tamana, Tuna, tina zazu napu neso go. 20Tanego Tamana i lete mamaligara ne Tuna, mana i vasadaka lupo ne ia osina pataro i zazu nego. Tina vasadaka napu ne ia kakiaro zazu i lete sivala ne kero izazu bana nego, go tamuna lete poloso ṉalu tamuna mia go. 21Ivari pada na napu so, Mamae i vatoo ule basoe le mana i teke ne qira too, gerena napu so era, Sale ia, tuna teke ne qira too ria qa soko qirae go. 22Mamae tiniki zazu ne kaega vivine de koe basoe. Do osina to karaputa ia sauna vivine na too ia basoe, i teke lupo ne Tuna. 23I zazu ne iadena, go basoero ne tarina va batua Tuna la, gere so dego iri vabatua go Mamae. Ka basoe iki va batua go kaega Tuna, iki vabatu napua so kaega Tamana i turi ne mego ia ne.
24Ma sine ne qamu pata ogoto, ṉalu ka basoe i gata seko ro era, mana i vaogote Mamae ni turi nava mego, basoe nae tina pala too iki rove go kaega lupo. Too ia tiniki koe kaega varitanae, tanego i gere, basoe i le bana mana i too ule napu mego. 25Ma sine ne qamu pata ogoto, tinara lama doka ṉalu, mana ṉalu nae i lama doka bana to, ṉalu vano le tarina gata ovaṉa na Tuna God, mana ria iri gata go tarina too ule napu me tepa le. 26De ikoego Mamae i reqe mego too ogoto, gerena napu so Tuna i reqe me too ogoto. 27Mana i tekene karaputa Tuna go tina zazu ne varitanae de iri koego basoero ne, tanego iato i Tuna go Basoe ne. 28Iago muniki poloso ne seko ro qa sine go era, tanego tina lama doka ṉalu vano le tarina gata ovaṉa na ia, 29mana tarina siporo kasi ne me kukubo ro ria. Ria iri zazu bana nego pataro i totoloṉo go, tarina too sivala, do ria iri zazu bana nego pataro iki totoloṉo go kaega, tarina kimata taru so.”
Ria Iri Seseko Ne Velaka Ro Ia Jesu
30Jesu igo napu de, “I makuru tuna zazu ne kaki pata, ṉalu qa lulua go so nanao era tanuqu, era qa zazu ne varitanae de iri koego basoero ne, qa lulua so pataro i sine nava go God, iago de igogo varitanae era de iri koego basoero ne, i totoloṉo so, tanego qaki pada ne kaega lulu na soko era tanuqu, do qa zazu neso pata i soko go ia i turi nava go.
31Ṉalu go tanuqu so qa sine vasadake go osina ro pata sauqu tanuqu, ramu tamuniki vaogote kaega, pataro qa sine go era i pata ogoto. 32Do i ko kaki basoe i sine vasadaka ne qamu pataro i rove ze go sauqu era, mana qa rove, pataro i sine go ia ne, i pata ogoto go. 33Qamu turine qira basoero ramu, iri za mia mana vapepeua Jon na bapitema. Mana osina pata i sine ne qira go Jon sauqu era ne, i pata ogoto lupo so. 34Go na ko bana so basoe go tina seseko nava, qaki go kaega, do qa sine go ia dena, go ramu tamuna za kavele. 35Jon i gere pazi, i kamu taru mana i tatavata go, do desuka so ṉalu ramu qamu kula ne go seko ro ia. 36Do era i ko nava kaki pata, i vasadaka velake go, Mamae tane i turi nava go. Pata dena i karaputa sivala ne pataro i sine vasadake go Jon, ia igogo ne, iato zazu i sine nava go Mamae tuna zazu nego. 37Mana Mamae ni turi nava mego, tanuna i sine vasadaka lupo bana osina pata sauqu era! Do ramu qamu ara kaebo gata na ia, mana mia na tarakenaqana iago, 38mana qamuki soti vanadu ze kaega puṉu qamu seko ro ia, tanego qamuki vaogoto ava kaega era, ni turi nava mego Mamae. 39Ramu qamu toere mana nanao lupase karo tabo ne, tanego qamu nanao ianae tane tamuna soba ze go too iki rove go kaega lupo. Do osina karo tabo ro nae, i pepeu lupo so sauqu era. 40Patavolomo nae, ramu qamuki soko kaega lama va era, go era tuna teke ne qamu too igogo ne.
41I patavolomo eso deqa koego era, ṉalu basoero ne iriki soko go kaega vazaka va era. 42Tanego era qa lete rove velaka qamu, mana loborona puṉuqamu, ramu qamuki mamaligara ne kaega God. 43Era qa lama palua karaputa ia Mamae, do ramu qamuki toqe ne kaega gata na seko ro era, do ṉalu kaki basoe tara lama palua karaputa ia tanuna, ramu tamuna toqe bana neso gata na seko ro ia. 44Ramu qamu soko basoero ne tarina vazakazaka qamu, ba de i koego God, ramu qamuki nanao kaega zazu ne na kaki pata, go God mara mia vazakazaka qamu, igo nae iago, ramu i makuru bana so tamuna vaogoto ava go era. 45Muniki nanao ramu era tuna degere tarakenaqana Mamae mana sine, ramu qamu kebu. Do Mosese valeke qamu vaogote go tina tavisi ne qamu go, iato tina sine go ramu qamu kebu go. 46Ṉalu ramu qamu vaogote go pataro i sine go Mosese, ramu tamu vaogoto napu ava so era, tanego pataro i karo go Mosese, i sauqu so era. 47Do tanego qamuki vaogote kaega pataro i karo go Mosese sauqu era, iago i makuru bana qamu so tamuna vaogoto ava era go.”
Айни замон обунашуда:
Jon 5: VRSNT
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
The New Testament in Varisi, Solomon Islands © Bible Society of the South Pacific, 1994, 2004.