Jon 4
4
Jesu I Seko Tabe Qole Samaritano
1Vano Parisio iri gata Jesu i toqo qira topu ria basoero, iri lulua ia, sivala ne qira kero ia Jon na bapitema, mana i bapitema qira go. 2Do tanuna Jesu iki vari va bapitema kaega, ria disipoloro ia so iri zazu go. 3Ṉalu Jesu i rove pepeu na pataro dena i doka qira vano Parisio, ia i kasi ne Judia mana i ule za Qalili, 4zuka iri goe go, igo za loborona pua na Samaria.
5I za dokae kaki komala vitoṉona Saeka, komala dena i garogaro so takoboro pua ia Jekop i kena ne go Josepo sale ia. 6Besi bolu i sola bana go Jekop i koe de go, iago Jesu i za kolokue rikisina tanego i tamadoke to zaza iri vaego, pasi nae ne i garogaro to kikinaka.
7-8Disipoloro ia iri zae komala lavata ne go tarina za volia patagege. Ko kameka qole Samaritano i lama mara kima besi igo, gonae Jesu i vane dena ia, “Avigo qo mazala teke nava era desuka besi ba?”
9Qole ne i vataule ne ia, “Aro qo valeke Jiu, era qa qole Samaritano, iago avigo tane qo pene ve go era besi?” Vano Jiu mana vano Samaritano gogo ne, i makuru tarina va zazua kameka ebata, ba kameka zaza go.
10Jesu i vataule ne ia igo, “Aro qoki rove kaega pata i soko teke nigo aro, mana qoki rove ava kaega era, qa pene besi, go ṉalu go to rove go ne, aro to pene besi ava era, besi igogo ne iki rove go kaega lupo.”
11Qole ne igo de, “Batu, aro i kaega nigo pata kimakima, mana besi bolu dena i sokasoka za go. Ade tepa tane tono pala ze go besi i teke nego too basoe ne? 12Avigo qo karaputa sivala ne vanovano bana remu Jekop ba? Jekop i teke ne qemu go remu besi bolu dena, tanuna, salero ia mana pata qaraqara ro ia go iri besi lupoe so dena.”
13Jesu i sine ne, qole ne, “Basoe i besia go besi dena, tina kaṉoso napu so.” 14Do ka basoe i besia go besi tuna soso nego era, tiniki ara kaṉoso kaega, tanego besi tuna soso nego era tina gere besi vuala i too taru mana i teke too gado kutona i kaega basoe ne.
15Qole ne igo, “Batu, teke nava era besi igogo ne, go tuniki ara kaṉoso napu go kaega, mana go tuniki ara lama kima besi napu kaega go.”
16Jesu i sine ia, “Za mana za lulu me valeke aro.”
17Qole ne i vataule, “Era i kaega ka valeke era.” Jesu igo, “I ogoto sivala qo sine go i kaega nigo valeke, 18do aro qo busi bana kalima valeke, mana ke qo ara ko tavise go ninidena iki valeke ogoto aro kaega, iago seko qo sine go i ogoto.”
19Qole ne igo, “Batu, ninidena qa mia rovi goto, aro qo kaki propeta bana. 20Vanovano bana remu vano Samaritano iri vazaka ze God kubolo dona, do ramu vano Jiu qamu go, Jerusalema to tatana za mana vazaka ze go God.”
21Jesu i vane dena ia, “Vaogoto ava era qole! Tina doka ṉalu, basoero ne tariniki vazaka ze kaega Tamaqita kubolo ba Jerusalema go. 22Ramu vano Samaritano qamuki rove velake kaega akena tane qamu vazaka go, ba remu vano Jiu qi rove akena qi vazaka go, tanego vari vakavele i reqe me de iri koego vano Jiu. 23Tina lama doka ṉalu, mana ṉalu dena i lama doka bana ne qita to, go basoero iri pene totoloṉo aqe go de ikoego Mamae, tarina pepene loborona karaputa ia Spirit tabo, mana i pata ogoto go. Basoero nae to, i soko go Mamae tarina vazaka ia. 24God i Spirit napu so, iago ria iri pepene aqe de ikoego ia, tarina pepene loborona karaputa ia Spirit tabo mana de goto i pata ogoto go.”
25Qole ne ivataule ne ia igo, “Era qa rove Mesia tina lama, mana ṉalu tina lama go, ia tina sine ne qita osina pata.”
26Gonae Jesu i sine ne ia, “Era to Mesia mana ga seko tabe go dena.”
27Torana to nae disipoloro ia Jesu iri ule me, mana iri poloso tanego iri mia Jesu i seko tabe go qole na Samaria. Patavolomo iri poloso go, do kaega so kakia ria i tana ne Jesu avana go soko, ba, avigo tane qo seko tabe go qole nae.
28Gonae qole ne i tarua kaboso ia mana i ule za komala lavata ne, i za sine ne qira basoero ne, 29“Lama go muna mia valeke i sine lupo nava go era, osina pataro qa zazu bana nego! Qa nanao kadigo valeke dena to bago i Mesia go!” 30Iago valekero ne iri kasi ne komala ria mana iri za mia Jesu.
31Torana i ule za go komala lavata qole ne, ria disipoloro ia, iri sine ne ia, “Valeke vari vatatana, ge kadia pata gege,” iri go.
32Do Jesu i vataule ne qira, “Era i ko nava pata gege, ramu qamuki rove kaega.”
33Ria disipoloro ia iri vari goe dena tanuqira, “Avigo kaki basoe i teke bana ne pata gege?”
34Jesu igo de, “Pata gege era ne, tuna vaogote zazu ituri navae go Mamae, mana tuna valupo zazu ia iteke nava na zazu ne go. 35Ramu qamu rove kaki seko igo de, ‘Kavasi inaqa i koto ia, vaeto pata gege na barue ne.’ Do ma sine ne qamu, muna mia velake barue ne, pata gege i velaka lupo to, mana i torato vae na! 36Basoe i vae go urena pata lebaleba ne tina pala voli, urena neto, basoero tarina pala too iki rove go kaega lupo. Iago basoe i leba go pata gege ne, mana basoe i vae go ure na go, tiruna mazala so kameka ko vari kulae go. 37Tanego seko igo, ‘Kameka basoe i leleba mana kene basoe i vae urena gogo ne, i lama ogoto to ninidena.’ 38Era qa turine qamu ramu muna za vae urena pata lebaleba na barui qamuki zazue kaega. Basoero kakavata iri zazue go barui nae, do zazu vokara ria to basoero nae i tavisi ne qamu go ramu.”
39Basoero na Samaria in koego komala lavata igogo ne, iri vaogote Jesu, tanego qole ne igo, “Valeke dena i sine lupo nava era pataro qa zazu bana nego.” 40Ṉalu vano Samaritano iri lamae de koe Jesu, iri pene ia na ko tavisi qira, iago Jesu i za kotavisi qira torana karua musaqara.
41Topu napu ria basoero iri vaogote Jesu, tanego iri gata seko ro ia. 42Basoero ne iri sine ne qole ne, “Pasi go lama sine ne qemu aro, qi vaogote. Do ninidena qi vaogote tanego tanuqemu qi gata seko ro ia. Ninidena remu qi rove to valeke dena, iato i vari vakavele na kolabana pua ne.”
Jesu Iva Tavoisi Sale Valeke Ia Kameka Valeke Batu
43Taramuzina karua musaqara Jesu i kasi ne Samaria mana i zae Qalili. 44Tanuna Jesu i sine bana igo, “Basoe propeta ne, vano na komala ia iriki soko kaega ia.” 45Ṉalu iri lama dokae to Qalili, basoero ne iri vadoka velake ia tanego ṉalu kelo na Pasova iri teṉoe go Jerusalema, basoero ne iri mia bana pataro izazu ne go Jesu.
46Gonae Jesu i ule za komala Kena tepa Qalili, de i itana va vino bana zego besi ne. Torana iara koe Jesu de go, kameka valeke batu na Kapanaum, i zazue qavuna, sale valeke ia i lete mokoso. 47Ṉalu valeke batu dena i gata soba go Jesu i kasi ne me Judia mana i lama dokae Qalili, ia i za mia Jesu. Mana i za pene go mara lulua mana zae Kapanaum go mara za vatavoisia sale valeke ia i lete mokoso go. 48Iago Jesu i vane dena ia, “Ramu basoero dena tamuna mia bana so zazu vari va poloso ia, tamuna ra vaogoto go.”
49Do valeke batu ne igo, “Ke! luluava to era aro, ṉalu qoki lama to kaega aro, sale valeke rera tina le to.”
50Jesu i vataule ne ia, “Ule za aro, sale valeke aro i tavoisi bana to.” 51Pasi valeke batu ne i zaza gado go, vano zazu ro ia, iri za soba ze ia zuka ne, mana iri sine ne ia, “Sale valeke aro i tavoisi bana.”
52Valeke batu ne itana ne qira, “Ade torana tane i tavoisi go sale ne,” iri vataule ne, “Torana kameka koloko zakone, i malia go poloqotoro ne.” 53Tamana sale ne i nanao ule zaqe, torana to nae Jesu i sine ne ia, “Sale valeke aro i tavoisi.” Gonae tanuma mana vano iri koego pade ia iri vaogote Jesu.
54Iadena to i varuana zazu vari vapoloso i zazu nego Jesu, taramuzina i gado ule me Judia i lama koego Qalili.
Айни замон обунашуда:
Jon 4: VRSNT
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
The New Testament in Varisi, Solomon Islands © Bible Society of the South Pacific, 1994, 2004.