LUKAS 4
4
Mawu Yesus niwono'annu Setanna
(Mat. 4:1-11; Mrk. 1:12-13)
1Mawu Yesus niintaṛṛoannu Ghaṛṛahon Ruata su tempo i Tou nanantangken Sal᷊ukku Yordan. Ghaṛṛahon Ruata nangehetta si Tou watukku wadda'a mal᷊alangnga. 2Isudde i Tou niwono'annu Setanna appattu pul᷊o allo al᷊annune. Su al᷊o'engngu allo udde, i Tou tawe inumanna manga apa. Nariaddi panginsueanne i Tou naapendamma mal᷊unussa.
3Setanna nabbisara si Tou, “Amungkangngu I'o Ana'u Ruata, ola'e watu indi maola'a roti.”
4Mawu Yesus sinumimbakka, “Sulal᷊ummu Wuke Susi uawoṛṛetta, ‘Taumata tawe tumba'u ma'awiakku roti sassane.’ ”
5See Setanna nangapiddu Mawu Yesus su tampa apan matanggakka wuṛṛu tumba'u sangkaṛṛondapa Setanna namasilo si Tou anambon araratuanna su runia. 6“Anambon taṛṛino wuṛṛu pa'a'ala indi sarun ta'u itantilla Si'o,” unnu Setanna su Mawu Yesus, “ana waugu sarangkanambone udde suete nionggolla si ya'u wuṛṛu i ya'u wotongnge mangonggolla sisai-sai apan ipaapulu'u pangonggol᷊anne. 7Sarangkanambone indi sarun maola'a darotong-Ngu, amungkangngu I'o umal᷊intudda massubba si Ya'u.”
8Mawu Yesus sinumimbakka, “Sulal᷊ummu Wuke Susi uawoṛṛetta, ‘Passubbate Mawu Ruatanu wuṛṛu tumba'u pangimbe si Tou sassane.’ ”
9See Setanna nangapidde Mawu Yesus watukku Yerusalem wuṛṛu nangadon Tou su sal᷊awom Bal᷊e Mawu wuṛṛu nabbisara si Tou, “Amungkangngu I'o Ana'u Ruata, tumpate I'o wua isindi. 10Ana waugu sulal᷊ummu Wuke Susi uawoṛṛetta, ‘Ruata sarun mandolokku manga mala'ekan-Ne mandiaga Si'o mapia-pia.’ 11Wuṛṛu lai, ‘Manga mala'ekatta sarun manengkamma Si'o ringannu limane, tadea'u leddanu tawe mattu'a su watu.’ ”
12Mawu Yesus sinumimbakka, “Sulal᷊ummu Wuke Susi uawoṛṛetta, ‘Arie pamono'a Mawu, Ruatanu.’ ”
13Napawe Setanna suete namono'a Mawu Yesus ringannu al᷊awo'u hatin bawono'a, i tou nanantangke Mawu Yesus wuṛṛu nallaṛṛadote tempone apan mapia.
Mawu Yesus nanattakku manara-Ne su Galilea
(Mat. 4:12-17; Mrk. 1:14-15)
14Wua'udde Mawu Yesus nabelengke watukku Galilea; wuṛṛu i Tou niintaṛṛoannu Ghaṛṛahon Ruata. Watti'a su ola'u watangan-Ne naddingikka su ahewallu wanua udde. 15I Tou mangngaṛṛa'a su manga wal᷊em pattataṛṛamawuanna, wuṛṛu anambon taumata maddalo si Tou.
Mawu Yesus tinol᷊a'a su Nazaret
(Mat. 13:53-58; Mrk. 6:1-6)
16Mawu Yesus inaite lai watukku Nazaret, su wanua inahewal᷊anni Tou. Su allon Sabatta, ere su wiasane i Tou inai su wal᷊em pattataṛṛamawuanna. I Tou dirumarisikka mabbasan Wuke Susi, 17wuṛṛu nionggol᷊annu wuke Nabi Yesaya. I Tou namu'ate wuke lalul᷊unanna udde, see inasombanganna wageangnge indi,
18“Ghaṛṛaho Mawu sidutu ringang-Ku,
ana waugu i Tou suete namile si Ya'u iapapasingkattu
Watti'u Al᷊al᷊uassa su taumata asiangnga.
I Tou nandolo-U iapawatti'u
pamamallossa su taumatan ṛuumanna
wuṛṛu aaul᷊e su taumata wuta;
wuṛṛu ipamallossu taumata allangnga
19wuṛṛu mamasingkattu orassu daranta Mawu
manal᷊amatta pabbawala-Ge.”
20Mawu Yesus nallul᷊unna apia wuke udde, niwelengke su mamamanarane, see inuma'ianna. Anambon taumata sulal᷊ummu wal᷊em pattataṛṛamawuanna udde na'ellega si Tou. 21Wuṛṛu Mawu Yesus nanattakke nabbisara si mangitou ereindi, “Manga wageangngu lal᷊oṛṛon Wuke Susi su allo indi natipusse su tempo i yamiu naaringikka watti'a udde.”
22Manga wisara apan niwisara-Ne mapia atonna, na'oman sara i mangitou naherangnga wuṛṛu lapiddu nanamba'a si Tou. I mangitou nabbisara, “Wal᷊inewe i Tou indi ana'i Yusuf?”
23Ne Mawu Yesus nabbisara si mangitou, “Atonna i yamiu sarun mappaattu sasumandingnga indi si Ya'u, ‘Doktere, paapia'a ririnu sassane. Al᷊aṛṛindu'a apan niaṛṛingiṛṛanni yami niolang-Ngu su Kapernaum, ola'a lai su ampungngu sassane.’ ” 24Mawu Yesus nanassukku wisara-Ne, “Paanaunge, tawe nabi apan a'addatanna su ampungnge sassane. 25Arawe daringiṛṛe: su tempon Elia, su tempo tawe manguranna tallu tonna anummu wul᷊anna al᷊annune, nariaddi al᷊aṛṛutumma apan bahewa su al᷊awo'u wanua. Su tempo udde manambo wawine wal᷊u su Israel. 26Salaiwe aroddi, Ruata tawe nandolokki Elia su wallattu sangkatou wawine wal᷊u isudde, ewe'e tumba'u su sangkatou wawine wal᷊u su Sarfat su leta'u Sidon. 27Aroddi lai su tempo i Nabi Elisa manambo taumata su Israel pia radangnge paro ma'ata'utta, arawe tawe sangkatou wuassi mangitou niapaapia, tumba'u i Naaman taumatan Siria udde.”
28Anambon taumata su wal᷊em pattataṛṛamawuanna udde mangke nasa'u naaringikka watti'a udde. 29I mangitou dirumarisikka see nallimbuakka Mawu Yesus watukku liuddu soa, wuṛṛu niapidda su wowon rampissa, su tampa udde soa mangitou niapaarisikka. I mangitou pia pandumma manuṛṛudu Mawu Yesus su rampissa. 30Arawe Mawu Yesus nilumusi'a su tangngan taumata nambo udde wuṛṛu napul᷊e.
Taumata apan niasuttannu ghaṛṛaho lal᷊eo
(Mrk. 1:21-28)
31Wua'udde Mawu Yesus inaite su soa Kapernaum su Galilea. Poiaroddi i Tou mangngaṛṛa'a manga taumata su allon Sabatta. 32I mangitou naherangnga naasilo olangnge i Tou mangngaṛṛa'a, ana waugu i Tou mabbisara pia saṛṛaungnge. 33Isudde su wal᷊em pattataṛṛamawuanna pia sangkatou niasutannu ghaṛṛaho lal᷊eo. Taumata udde mangke ma'uare, 34“Ei Mawu Yesus, taumata Nazaret, apa olaannu si yami? I'o rumanta mamate si yami? I ya'u masingkatta isai I'o: I'o ralol᷊oṛṛannu Ruata apan susi!”
35“Paal᷊annaba!” Mawu Yesus nandona ghaṛṛaho lal᷊eo udde, “Sabbangke wuassu taumata indi!” See ghaṛṛaho lal᷊eo udde namantingngu taumata udde su saruanni mangitou sarangkanambone wuṛṛu wua'udde sinumabangnga wuassu taumata udde ringannu tate napaaradange.
36Awada'alla naherangnga, wuṛṛu uahahattote sangkatou ringannu sangkatou, “Wal᷊ine hampa al᷊awo'u wisara-Ne. Ringannu saṛṛaungnga wuṛṛu taṛṛino, i Tou namarenta manga ghaṛṛaho lal᷊eo niapaasabangnga wuṛṛu i mangitou sinumabangke lai!” 37Ne watti'a su ola'u Mawu Yesus tinumelengke su ahewallu wanua su wageangnge udde.
Mawu Yesus napaapian taumata manambo
(Mat. 8:14-17; Mrk. 1:29-34)
38Mawu Yesus nanantangkem wal᷊em pattataṛṛamawuanna udde, see inaite su wal᷊en Simon. La'iananni Simon marada'a sal᷊ihamma, wuṛṛu manga taumata nabbati'u olangnge udde su Mawu Yesus. 39Mawu Yesus inaite nattudan lallowanganne, see nallimbuakka sal᷊ihamma udde. Sal᷊ihamma udde nawul᷊i, wuṛṛu la'iananni Simon lapiddu nabangunna wuṛṛu nangimbe si mangitou.
40Napawe matannallo mattuppe, manambo taumata nangapiddu manga tuṛṛangngi mangitou apan uatataṛṛangnga al᷊awo'u hatin rada'a ringannu Mawu Yesus. Mawu Yesus namita si mangitou sangkatou-sangkatou wuṛṛu napaapia mangitou. 41Manga ghaṛṛaho lal᷊eo udde sinumabangke wuassu taumata nambo udde lapiddu mangngintul᷊i, “Ete I'o Ana'u Ruata!”
Arawe Mawu Yesus namul᷊o si mangitou wuṛṛu naningaddi mangitou mabbisara, ana waugu i mangitou masingkatta manungku ete i Tou Ratum Punnu Sal᷊amatta.
Mawu Yesus nannase sulal᷊ummu manga wal᷊em Pattataṛṛamawuanna
(Mrk. 1:35-39)
42Su tempo matannallo susssabangke, Mawu Yesus nanantangken soa udde see inaite su sambau tampa apan mal᷊annaba. Manga taumata maddea'a si Tou, wuṛṛu napawe i mangitou nassomba Mawu Yesus, i mangitou mangke mappandumma tadea'u i Tou tawe manantangngi mangitou. 43Arawe Mawu Yesus nabbisara, “Watti'u Al᷊al᷊uassa su ola'u ereapa Ruata mamarenta sarun Ta'u iwatti'a lai su manga soa waine, ana waugu Ruata nandolo-U su runia.”
44Ana waugu udde Mawu Yesus nannase sulal᷊ummu wal᷊em pattataṛṛamawuanna su ahewallu leta'u Yudea.
Айни замон обунашуда:
LUKAS 4: LAITLD
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in