LUKAS 3
3
Watti'a wuassi Yohanes Mananaṛṛani
(Mat. 3:1-12; Mrk. 1:1-8; Yoh. 1:19-28)
1Su tonna apul᷊o limane su pamamarentan Kaisar Tiberius, i Pontius Pilatus naola'a gubernure su Yudea, wuṛṛu i Herodes uaparenta su Galilea, i Filipus, tuṛṛangngi Herodes namarenta su wageangngu Iturea wuṛṛu Trakhonitis, arawe i Lisanias namarenta su Abilene. 2Apan uaumbele manga imam bahewa eteudde i Hanas wuṛṛu i Kayafas. Su tonna udde Ruata nabbisara si Yohanes, ana'i Zakharia su wadda'a. 3Ne i Yohanes inaite mammal᷊intadu al᷊awo'u tampa su ahewallu wageangngu Sal᷊ukku Yordan wuṛṛu namasingkattu Watti'a wuassu Ruata. I Yohanes u'al᷊iata, “Awal᷊ute wuassu manga rosanu, wuṛṛu i yamiu ṛinone saṛṛanianna, tadea'u Ruata mangampungnga si yamiu.” 4Udde nassul᷊ungngu apa apan uawoṛṛetta sulal᷊ummu wuke Nabi Yesaya:
“Pia taumata u'al᷊iata su wadda'a,
‘Saddiaite lal᷊annu Mawu,
rataṛṛa'e lal᷊anni Tou.
5Al᷊awo'u liobongnge sarun soopanna,
al᷊awo'u wowone wuṛṛu wuidda iapaaratakka.
Lal᷊anna apan uawengkolla sarun tul᷊iṛṛanna,
wuṛṛu lal᷊anna apan ual᷊iobbo'a sarun iratakka.
6Manga taumata su ahewallu runia sarun ma'ellega
Ruata manal᷊amatta taumata!’ ”
7Manambo taumata nirumanta ringanni Yohanes maisaṛṛani. I Yohanes nabbisara si mangitou, “I yamiu taumata lal᷊eo! Isai nabbisara manungku i yamiu wotongnge mal᷊iu wuassu ṛuumannu Ruata apan sarun rumanta? 8Pasiloa'e ringannu pallal᷊agunu manungku i yamiu nawal᷊ute wuassu manga rosanu! Arie mabbisara manungku Abraham udde iupungngu al᷊amonanu. Naunge: Wuassu manga watu indi lai Ruata wotongnge ma'ola'a papapulunni Abraham! 9Wal᷊iungnga nasaddiate ipanuwangnga alu ma'oman sara ṛamunne. Al᷊awo'u alu apan tawe mabbua mapia sarun tuwanganna wuṛṛu iramme sulal᷊ummu putungnga.”
10“Nariaddi, apa ṛinone olaanni i yami?” aiwal᷊o manga taumata si Yohanes.
11I Yohanes sinumimbakka, “Taumata apan laungnge darua ṛinone mangonggolu samparassa su taumata tawe laubba, wuṛṛu taumata pia anna, ṛinone mattahia su taumata tawe anna.”
12Manga mallal᷊uṛṛu wose lai nirumanta ringanni Yohanes maisaṛṛani. I mangitou naiwal᷊o, “Iamangnga Huru, apa ṛinone olaanni yami?” 13I Yohanes sinumimbakka, “Arie padorongnga lumebbe wuassu apa apan suete tinantunna.”
14Pia lai tantara naiwal᷊o, “Ereapa i yami? Apa ṛinone olaanni yami?”
I Yohanes sinumimbakka, “Arie pamaṛṛangnga sisai-sai, wuṛṛu arie pangaṛṛo roitta ringannu aansilla awusu. Wotongngete i'o mabbiakku roitta lal᷊antakku ara'e haddinu!”
15Su tempo udde manga taumata mannatakke uaaiwal᷊o, tanne i Yohanes Ratu Punnu Sal᷊amatta apan raṛṛadoanni mangitou. 16Ana waugu udde i Yohanes nabbisara si mangitou sarangkanambone, “I ya'u mannaṛṛani si yamiu ringannu ua'e, arawe paṛṛaddote sarun rumanta sal᷊immurine lembon ahewal᷊anne wuassia'u. Mamu'a tal᷊in sapatune lai ya'u tawe suṛṛinone. I Tou sarun manaṛṛani si yamiu ringannu Ghaṛṛahon Ruata wuṛṛu putungnga. 17Su lima-Ne pia niṛṛu ipattappa ammene ma'oman sara mawaresi. Amme sarun iammulla su wal᷊ingkakka, arawe anambon wal᷊aane sarun tutunganna su putungnga apan tawe mapadumma!”
18Ete aroddi i Yohanes mannantiro taumata ringannu al᷊awo'u al᷊aṛṛa'a su tempo i tou mabatti'u Watti'u Al᷊al᷊uassa. 19Arawe i Herodes tembonanne su Galilea, wino'anni Yohanes su ola'u pa'a'awingnge ringanni Herodias, awingngu tuṛṛangnge, wuṛṛu su ola'u manga al᷊al᷊eo waine apan suete niolangnge. 20Arawe i Herodes niatambanna al᷊al᷊eone ringannu nantaṛṛon Yohanes sulal᷊ummu tuttupanna.
Mawu Yesus nissaṛṛani
(Mat. 3:13-17; Mrk. 1:9-11)
21Napawe manga taumata udde nissaṛṛanite, Mawu Yesus lai nissaṛṛani. Wuṛṛu tantal᷊anna i Tou u'al᷊iomanna, langitta nati'akka, 22wuṛṛu Ghaṛṛahon Ruata inumonto'a si Tou ere manu'a merpati. See inaringikka tingikku Ruata nabbisara, “Ete I'o Ana'a arangnguang-Ku. I'o ma'al᷊uassa naung-Ku.”
Manga arannu iupungngu al᷊amona Mawu Yesus
(Mat. 1:1-17)
23Su tempo udde Mawu Yesus nanattakken manara-Ne, uukke iraṛṛangngo tallum pul᷊o su tonnane. Tumuṛṛuttu addapattu taumata, i Tou ana'i Yusuf, ana'i Eli, 24ana'i Matat, ana'i Lewi, ana'i Malkhi, ana'i Yanai, ana'i Yusuf, 25ana'i Matica, ana'i Amos, ana'i Nahum, ana'i Hesli, ana'i Nagai, 26ana'i Maat, ana'i Matica, ana'i Simei, ana'i Yosekh, ana'i Yoda, 27ana'i Yohanan, ana'i Resa, ana'i Zerubabel, ana'i Sealtiel, ana'i Neri, 28ana'i Malkhi, ana'i Adi, ana'i Kosam, ana'i Elmadam, ana'i Er, 29ana'i Yesua, ana'i Eliezer, ana'i Yorim, ana'i Matat, ana'i Lewi, 30ana'i Simeon, ana'i Yehuda, ana'i Yusuf, ana'i Yonam, ana'i Elyakim, 31ana'i Melea, ana'i Mina, ana'i Matata, ana'i Natan, ana'i Daud, 32ana'i Isai, ana'i Obed, ana'i Boas, ana'i Salmon, ana'i Nahason, 33ana'i Aminadab, ana'i Admin, ana'i Arni, ana'i Hezron, ana'i Peres, ana'i Yehuda, 34ana'i Yakub, ana'i Ishak, ana'i Abraham, ana'i Terah, ana'i Nahor, 35ana'i Serug, ana'i Rehu, ana'i Peleg, ana'i Eber, ana'i Salmon, 36ana'i Kenan, ana'i Arpakhsad, ana'i Sem, ana'i Nuh, ana'i Lamekh, 37ana'i Metusalah, ana'i Henokh, ana'i Yared, ana'i Mahalaleel, ana'i Kenan, 38ana'i Enos, ana'i Set, ana'i Adam, ana'u Ruata.
Айни замон обунашуда:
LUKAS 3: LAITLD
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in