लूका 23
23
पिलातुसा हाकमा रे साम्हणें यीसू
1तेबे तिन्हारी सारी सभा उठी किन्हें यीसू जो पिलातुस हाकमा वाले लई गयी। 2होर स्यों ये बोली किन्हें यीसू पर दोस लगांदे लगे कि, “आस्से एस जो लोका जो रोम देसा रे सरकारा रे बरखलाप अवाज उठाणे रे कठे बैह्कांदे देखीरा। होर महाराजे जो कर देणे ले नांह करदे, होर आपणे आपा जो मसीह राजा बोल्दे हुए सुणिरा आ।” 3पिलातुस हाकमे यीसू ले पूछेया, “क्या तू यहूदी लोका रा राजा आ?” यीसूए तेस जो जवाब दितेया कि, “तू आप्हुए बोल्या करहा।” 4तेबे पिलातुस हाकमे मुख्य याजके होर लोका किन्हें बोल्या, “हांऊँ एस माह्णुं मन्झ कुछ दोस नी पांदा।” 5पर स्यों होर भी जोर ल्गाई किन्हें बोल्दे लगे, ये गलील जिल्ले ले लई किन्हें एथी तक सारे यहूदिया ईलाके तक आपणे उपदेस देई-देई किन्हें लोका जो बैह्काहां। 6ये सुणी किन्हें पिलातुस हाकमे पूछेया, “क्या ये माह्णुं गलील जिल्ले रा आ?” 7होर ये जाणी किन्हें कि यीसू तेस ईलाके रा जेथी हेरोदेस राजा राज करहा, तिन्हें यीसू तेस वाले भेजी दितेया, क्यूंकि तिन्हा ध्याड़े हेरोदेस भी यरुस्लेम सैहरा मन्झ था।
हेरोदेसा रे साम्हणें यीसू
8हेरोदेस राजे यीसू जो देखी किन्हें बौह्त ही खुस हुएया, क्यूंकि से बौह्त ध्याड़े ले यीसू जो देखणा चाहां था: इधी कठे कि तिन्हें तेसरे बारे मन्झ सुणिरा था, होर तेस जो चमत्कार करदे हुए देखणे री आस रखिरी थी। 9तिन्हें यीसू ले बौह्त सुआल पूछे, पर तिन्हें तेस जो कोई जवाब नी दितेया। 10होर मुख्य याजके होर व्यवस्था स्खाणे वाल़े खड़ी किन्हें तेस पर कड़े दोस ल्गाया करहा ऐं थे। 11तेबे हेरोदेस राजा आपणे स्पाहीया साउगी तेसरी बेज्जती करी किन्हें तेसरा मजाक डुआया, होर तेस जो भड़कीला कपड़ा पनह्याई किन्हें तेस जो पिलातुस हाकमा वाले वापस भेजी दितेया। 12ऐबे तक पिलातुस हाकम होर हेरोदेस राजा दुहें दुसमण थे। पर एस ध्याड़े स्यों दोनो दोस्त बणी गये।
पिलातुसा रे ज्रीए यीसू जो मौता री सजा
13पिलातुस हाकमे मुख्य याजक होर मुखिये होर लोक सादे होर तिन्हा किन्हें बोल्या, 14“तुस्से ये माह्णुं लोका जो बैहकाणे वाल़ा बणाई किन्हें मेरे वाले ल्याईन्दीरा, होर देखा, मैं तुस्सा रे साम्हणें एस ले सुआल जबाब किते, पर जिन्हा गल्ला रा दोस तुस्से तेस पर ल्गाहें, तिन्हा गल्ला रे बारे मन्झ मैं यीसू मन्झ कुछ भी गलती नी पाई। 15ना ई हेरोदेस राजा तेस मन्झ कोई भी गलती नी पाई, इधी कठे तिन्हें एस जो आस्सा वाले वापस भेजी दितेया, होर देखा, तेस ले एह्ड़ा कुछ नी हुएया कि तेस जो मौता री सजा दिती जाए। 16इधी कठे हांऊँ तेस जो कोड़े ल्गाई किन्हें छाडी देंहा।” 17पिलातुस हाकमे फसहा रे साजे रे मौके पर हर साल यहूदी लोका रे कठे एक कैदी जो छाडा था। 18तेबे सभ मिली किन्हें हाला पांदे लगे कि, “एसरा काम तमाम करी देआ, होर आस्सा रे कठे बरअब्बा जो छाडी दे।” 19बरअब्बा जो सैहरा मन्झ दंगा फसाद होर हत्या करणे रे कठे जेल्हा मन्झ पाईरा था।
20पर पिलातुस हाकमे यीसू जो छाडी देणा चाहां था, तिन्हें स्यों दबारा समझाये। 21पर तिन्हें चिंगी किन्हें बोल्या कि, “यीसू जो क्रूसा प्रयाल्हे चढ़ाऊआ, क्रूसा प्रयाल्हे!” 22पिलातुस हाकमे त्रीजी बारी तिन्हा किन्हें बोल्या कि, “तिन्हें क्या बुराई कितिरी? हांऊँ तेस मन्झ मौता री सजा रे लायक कोई गल नी पांदा! इधी कठे हांऊँ तेस जो कोड़े ल्गाई किन्हें छाडी देहां।” 23पर स्यों चिंगी किन्हें बोलदे लगे कि, यीसू जो क्रूसा प्रयाल्हे चढ़ाई देआ, होर तिन्हारा चिंगणा बौह्त बढ़ी गया। 24एता कठे पिलातुस हाकमे हुक्म दितेया कि, तिन्हारी बिनती रे मताबक कितेया जाए। 25पिलातुसे बरअब्बा जो तिन्हारे कठे छाडी दितेया, जो दंगा फसाद होर हत्या करणे रे कठे जेल्हा मन्झ पाईरा था, ये से ही था जेस जो छाडणे री स्यों मांग करेया करहा ऐं थे, होर यीसू जो तिन्हारे हाथा मन्झ देई दितेया कि स्यों तेस किन्हें जो चाहे से करहे।
यीसू रा क्रूसा प्रयाल्हे चढ़ाया जाणा
26जेबे स्पाही यीसू जो लई जाया करहा ऐं थे, ता तिन्हें कुरेनी सैहरा रे समौन नांऊँआं रा जो सैहरा वखा जो आई करहा था, तिन्हें पकड़ी किन्हें तेस पर क्रूस लादी दितेया कि से तेस क्रूसा जो यीसू रे पीछे-पीछे लई चले। 27होर लोका री बडी भीड़ तेसरे पीछे हुई गयी: होर बौह्त सारी ज्नाने भी, तेसरे कठे छाती पिटदी होर रोंदी लगी।
28यीसूए तिन्हा वखा मुड़ी किन्हें बोल्या, “हे यरुस्लेम सैहरा री मह्ठीयो, मेरे कठे नी रोआ, पर आपणे होर आपणे बच्चेया रे कठे रोआ। 29क्यूंकि देखा, एह्ड़े मुसकल ध्याड़े आया करहा ऐं, जिन्हा मन्झ तिन्हा बोलणा, ‘धन्य ई स्यों ज्नाने जो बांझ ई, होर धन्य ऐं स्यों गर्भ जिन्हें कधी कोई नी जणेया होर जिन्हें कधी बच्चे जो दूध नी प्याया।’”
30“तेस टैम लोका प्हाड़ा किन्हें बोलणा कि, आस्सा पर पई जा,
होर पाहड़िया किन्हें बोलणा कि आस्सा जो ढकी ले।”
31क्यूंकि जेबे स्यों हरे डाला साहीं भोले लोका किन्हें एह्ड़ा करहा, ता तिन्हा सुके साहीं सजा पाणे लायक लोका किन्हें क्या कुछ नी हूंणा।
32होर तेथी दो होर माह्णुं भी थे जो कुकर्मी थे, तिन्हा जो भी सजा देणे रे कठे यीसू साउगी मारणे रे कठे ले जाया करहा ऐं थे। 33जेबे स्यों तेस जगहा पुज्हे, जेस जो खोपड़ी बोल्हा ऐं, ता तिन्हें, तिन्हा दुंहीं डाकुआ साउगी से भी क्रूसा प्रयाल्हे चढ़ाया, एकी जो तेसरी ओरली वखो होर दूजे जो तेसरी परली वखो। 34तेबे यीसूए बोल्या, “हे बापू, इन्हा जो माफ करी दे, क्यूंकि ये नी जाणदे कि क्या करेया करहा ऐं?”#23:34 1 पत. 3:9, प्रका. 7:60, यसा. 53:12, भज. 22:18 होर तिन्हें चिठ्ठी पाई किन्हें तेसरे कपड़े आपु मन्झ बांडी लये। 35लोक खड़ी किन्हें देख्या करहा ऐं थे होर मुखिये भी मजाक डूआया करहा ऐं थे कि, “इन्हें होर बचाए, अगर ये परमेसरा रा मसीह आ, होर तेसरा चुणिरा आ, ता से आपणे आपा जो बचाई ले।” 36स्पाहिये भी तेस वाले आई किन्हें मजाक डूआया होर तेस जो पीणे रे कठे सिरका दितेया। 37“अगर तू यहूदी लोका रा राजा आ ता आपणे आपा जो बचाई ले!” 38होर तेसरे गास एक दोस पत्र भी लगाया, जेस पर लिखिरा था कि, “ये यहूदी लोका रा राजा आ।”
क्रूसा पर डाकू रा पछताणा
39जो डाकू लटकाई रे थे, तिन्हा मन्झा ले एकिये यीसू रा मजाक डूआई किन्हें बोल्या, “क्या तू मसीह नी आ? ता फेरी आपणे आपा जो होर आस्सा जो बचा!” 40एता पर दूजे डाकुए तेस जो प्रुआची किन्हें बोल्या, “क्या तू परमेसरा ले भी नी डरदा? तू भी ता सेई सजा पाया करहा। 41होर आस्से ता न्याय रे मताबक सजा पाया करहा ऐं, क्यूंकि आस्से ता आपणे करमा रा ठीक-ठीक इनाम पाया करहा ऐं; पर यीसूए ता कोई भी गलत काम नी कितेया।” 42तेबे तिन्हें बोल्या, “हे यीसू, जेबे तू राज मन्झ राजा साहीं आये, ता मुंजो याद रख्या।” 43तिन्हें तेस किन्हें बोल्या, “हांऊँ तुध किन्हें सच्च -सच्च बोल्हा कि, आज ई तुध मेरे साउगी स्वर्गलोका मन्झ हूंणां।”
यीसू रा मरणा
44होर लगभग बारा बजे ले तीन बजे तक सारे देसा मन्झ न्हयारा हुई गया। 45होर सूरजा रा प्रयासा जांदा रैहया, होर मन्दरा रा पर्दा बीचा मन्झा ले फटी गया। 46होर यीसूए जोरा किन्हें चिंगी किन्हें बोल्या, “हे बापू, हांऊँ आपणी आत्मा तेरे हाथा मन्झ सौम्पेया करहा।” होर ये बोली किन्हें यीसूए प्राण छाडी दिते। 47सुबेदारे, जो कुछ हुएया था देखी किन्हें, परमेसरा री बड़ाई किती, होर बोल्या, “पक्का ये माह्णुं धर्मी था।” 48होर सारी भीड़ जो ये देखणे रे कठे कठी हुईरी थी, एस घटना जो देखी किन्हें छाती पिट्दी हुई वापस चली गयी। 49पर स्यों सभ जो तेस जो जाणहां ऐं थे, होर ज्नानिया जेह्ड़ी गलील जिल्ले ले तेसरे साउगी आईरी थी, दूर खड़ी किन्हें ये सभ कुछ देख्या करहा ई थी।
यीसू रा दफनाया जाणा
50होर युसुफ नांऊँआं रा एक मंत्री जो सज्जन होर धर्मी माह्णुं था। 51होर से तिन्हारे फैसले होर तिन्हारे एस कामा ले खुस नी था, होर से यहूदिया ईलाके रे अरिमतियाह सैहरा रा रैहणे वाल़ा था, होर परमेसरा रे राजा रा इंतजार करणे वाल़ा था। 52तिन्हें पिलातुस हाकमे वाले जाई किन्हें यीसू री ल्हास मांगी लई। 53होर यूसुफे यीसू री ल्हास तुआरी किन्हें चादरा मन्झ लपेटी किन्हें एक डुआरा मन्झ रखी। जो चटाना रे बीचा मन्झ खणीरी थी, होर जेस मन्झ कधी केसी री ल्हास नी रखिरी थी। 54से त्यारी रा ध्याड़ा था, होर अरामा रा ध्याड़ा सुर्हू हूंणे वाल़ा था। 55होर तिन्हें जनानिये जो यीसू साउगी गलील जिल्ले ले आईरी थी, पीछे-पीछे जाई किन्हें से डुआरा जो देख्दी लगी, होर ये भी कि तेसरी ल्हास किहाँ रखिरी थी। 56होर स्यों आपणे घरा वापस आई होर खुस्बूदार चीजा त्यार किती। फेरी मूसा रे व्यवस्था रे मताबक अरामा रे ध्याड़े ता तिन्हें अराम कितेया।
Айни замон обунашуда:
लूका 23: MJLNT
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.