If you have would like a copy of this version please contact info@davarpartners.org

Mandeali Bible, CC-BY-SA-4.0, The Love Fellowship (Text). Mandeali New Testament Audio Bible, CC-BY-SA-4.0, Davar Partners International, 2021 (Audio)

Mandeali New Testament

This work is licensed under Creative Commons Attribution-ShareAlike 4.0 License.

तेबे तिन्हारी सारी सभा उठी किन्हें यीसू जो पिलातुस हाकमा वाले लई गयी। होर स्यों ये बोली किन्हें यीसू पर दोस लगांदे लगे कि, “आस्से एस जो लोका जो रोम देसा रे सरकारा रे बरखलाप अवाज उठाणे रे कठे बैह्कांदे देखीरा। होर महाराजे जो कर देणे ले नांह करदे, होर आपणे आपा जो मसीह राजा बोल्दे हुए सुणिरा आ।” पिलातुस हाकमे यीसू ले पूछेया, “क्या तू यहूदी लोका रा राजा आ?” यीसूए तेस जो जवाब दितेया कि, “तू आप्हुए बोल्या करहा।” तेबे पिलातुस हाकमे मुख्य याजके होर लोका किन्हें बोल्या, “हांऊँ एस माह्णुं मन्झ कुछ दोस नी पांदा।” पर स्यों होर भी जोर ल्गाई किन्हें बोल्दे लगे, ये गलील जिल्ले ले लई किन्हें एथी तक सारे यहूदिया ईलाके तक आपणे उपदेस देई-देई किन्हें लोका जो बैह्काहां। ये सुणी किन्हें पिलातुस हाकमे पूछेया, “क्या ये माह्णुं गलील जिल्ले रा आ?” होर ये जाणी किन्हें कि यीसू तेस ईलाके रा जेथी हेरोदेस राजा राज करहा, तिन्हें यीसू तेस वाले भेजी दितेया, क्यूंकि तिन्हा ध्याड़े हेरोदेस भी यरुस्लेम सैहरा मन्झ था।

हेरोदेस राजे यीसू जो देखी किन्हें बौह्त ही खुस हुएया, क्यूंकि से बौह्त ध्याड़े ले यीसू जो देखणा चाहां था: इधी कठे कि तिन्हें तेसरे बारे मन्झ सुणिरा था, होर तेस जो चमत्कार करदे हुए देखणे री आस रखिरी थी। तिन्हें यीसू ले बौह्त सुआल पूछे, पर तिन्हें तेस जो कोई जवाब नी दितेया। होर मुख्य याजके होर व्यवस्था स्खाणे वाल़े खड़ी किन्हें तेस पर कड़े दोस ल्गाया करहा ऐं थे। तेबे हेरोदेस राजा आपणे स्पाहीया साउगी तेसरी बेज्जती करी किन्हें तेसरा मजाक डुआया, होर तेस जो भड़कीला कपड़ा पनह्याई किन्हें तेस जो पिलातुस हाकमा वाले वापस भेजी दितेया। ऐबे तक पिलातुस हाकम होर हेरोदेस राजा दुहें दुसमण थे। पर एस ध्याड़े स्यों दोनो दोस्त बणी गये।

पिलातुस हाकमे मुख्य याजक होर मुखिये होर लोक सादे होर तिन्हा किन्हें बोल्या, “तुस्से ये माह्णुं लोका जो बैहकाणे वाल़ा बणाई किन्हें मेरे वाले ल्याईन्दीरा, होर देखा, मैं तुस्सा रे साम्हणें एस ले सुआल जबाब किते, पर जिन्हा गल्ला रा दोस तुस्से तेस पर ल्गाहें, तिन्हा गल्ला रे बारे मन्झ मैं यीसू मन्झ कुछ भी गलती नी पाई। ना ई हेरोदेस राजा तेस मन्झ कोई भी गलती नी पाई, इधी कठे तिन्हें एस जो आस्सा वाले वापस भेजी दितेया, होर देखा, तेस ले एह्ड़ा कुछ नी हुएया कि तेस जो मौता री सजा दिती जाए। इधी कठे हांऊँ तेस जो कोड़े ल्गाई किन्हें छाडी देंहा।” पिलातुस हाकमे फसहा रे साजे रे मौके पर हर साल यहूदी लोका रे कठे एक कैदी जो छाडा था। तेबे सभ मिली किन्हें हाला पांदे लगे कि, “एसरा काम तमाम करी देआ, होर आस्सा रे कठे बरअब्बा जो छाडी दे।” बरअब्बा जो सैहरा मन्झ दंगा फसाद होर हत्या करणे रे कठे जेल्हा मन्झ पाईरा था।
पर पिलातुस हाकमे यीसू जो छाडी देणा चाहां था, तिन्हें स्यों दबारा समझाये। पर तिन्हें चिंगी किन्हें बोल्या कि, “यीसू जो क्रूसा प्रयाल्हे चढ़ाऊआ, क्रूसा प्रयाल्हे!” पिलातुस हाकमे त्रीजी बारी तिन्हा किन्हें बोल्या कि, “तिन्हें क्या बुराई कितिरी? हांऊँ तेस मन्झ मौता री सजा रे लायक कोई गल नी पांदा! इधी कठे हांऊँ तेस जो कोड़े ल्गाई किन्हें छाडी देहां।” पर स्यों चिंगी किन्हें बोलदे लगे कि, यीसू जो क्रूसा प्रयाल्हे चढ़ाई देआ, होर तिन्हारा चिंगणा बौह्त बढ़ी गया। एता कठे पिलातुस हाकमे हुक्म दितेया कि, तिन्हारी बिनती रे मताबक कितेया जाए। पिलातुसे बरअब्बा जो तिन्हारे कठे छाडी दितेया, जो दंगा फसाद होर हत्या करणे रे कठे जेल्हा मन्झ पाईरा था, ये से ही था जेस जो छाडणे री स्यों मांग करेया करहा ऐं थे, होर यीसू जो तिन्हारे हाथा मन्झ देई दितेया कि स्यों तेस किन्हें जो चाहे से करहे।

जेबे स्पाही यीसू जो लई जाया करहा ऐं थे, ता तिन्हें कुरेनी सैहरा रे समौन नांऊँआं रा जो सैहरा वखा जो आई करहा था, तिन्हें पकड़ी किन्हें तेस पर क्रूस लादी दितेया कि से तेस क्रूसा जो यीसू रे पीछे-पीछे लई चले। होर लोका री बडी भीड़ तेसरे पीछे हुई गयी: होर बौह्त सारी ज्नाने भी, तेसरे कठे छाती पिटदी होर रोंदी लगी।
यीसूए तिन्हा वखा मुड़ी किन्हें बोल्या, “हे यरुस्लेम सैहरा री मह्ठीयो, मेरे कठे नी रोआ, पर आपणे होर आपणे बच्चेया रे कठे रोआ। क्यूंकि देखा, एह्ड़े मुसकल ध्याड़े आया करहा ऐं, जिन्हा मन्झ तिन्हा बोलणा, ‘धन्य ई स्यों ज्नाने जो बांझ ई, होर धन्य ऐं स्यों गर्भ जिन्हें कधी कोई नी जणेया होर जिन्हें कधी बच्चे जो दूध नी प्याया।’”
“तेस टैम लोका प्हाड़ा किन्हें बोलणा कि, आस्सा पर पई जा,
होर पाहड़िया किन्हें बोलणा कि आस्सा जो ढकी ले।”
क्यूंकि जेबे स्यों हरे डाला साहीं भोले लोका किन्हें एह्ड़ा करहा, ता तिन्हा सुके साहीं सजा पाणे लायक लोका किन्हें क्या कुछ नी हूंणा।
होर तेथी दो होर माह्णुं भी थे जो कुकर्मी थे, तिन्हा जो भी सजा देणे रे कठे यीसू साउगी मारणे रे कठे ले जाया करहा ऐं थे। जेबे स्यों तेस जगहा पुज्हे, जेस जो खोपड़ी बोल्हा ऐं, ता तिन्हें, तिन्हा दुंहीं डाकुआ साउगी से भी क्रूसा प्रयाल्हे चढ़ाया, एकी जो तेसरी ओरली वखो होर दूजे जो तेसरी परली वखो। तेबे यीसूए बोल्या, “हे बापू, इन्हा जो माफ करी दे, क्यूंकि ये नी जाणदे कि क्या करेया करहा ऐं?” होर तिन्हें चिठ्ठी पाई किन्हें तेसरे कपड़े आपु मन्झ बांडी लये। लोक खड़ी किन्हें देख्या करहा ऐं थे होर मुखिये भी मजाक डूआया करहा ऐं थे कि, “इन्हें होर बचाए, अगर ये परमेसरा रा मसीह आ, होर तेसरा चुणिरा आ, ता से आपणे आपा जो बचाई ले।” स्पाहिये भी तेस वाले आई किन्हें मजाक डूआया होर तेस जो पीणे रे कठे सिरका दितेया। “अगर तू यहूदी लोका रा राजा आ ता आपणे आपा जो बचाई ले!” होर तेसरे गास एक दोस पत्र भी लगाया, जेस पर लिखिरा था कि, “ये यहूदी लोका रा राजा आ।”

जो डाकू लटकाई रे थे, तिन्हा मन्झा ले एकिये यीसू रा मजाक डूआई किन्हें बोल्या, “क्या तू मसीह नी आ? ता फेरी आपणे आपा जो होर आस्सा जो बचा!” एता पर दूजे डाकुए तेस जो प्रुआची किन्हें बोल्या, “क्या तू परमेसरा ले भी नी डरदा? तू भी ता सेई सजा पाया करहा। होर आस्से ता न्याय रे मताबक सजा पाया करहा ऐं, क्यूंकि आस्से ता आपणे करमा रा ठीक-ठीक इनाम पाया करहा ऐं; पर यीसूए ता कोई भी गलत काम नी कितेया।” तेबे तिन्हें बोल्या, “हे यीसू, जेबे तू राज मन्झ राजा साहीं आये, ता मुंजो याद रख्या।” तिन्हें तेस किन्हें बोल्या, “हांऊँ तुध किन्हें सच्च -सच्च बोल्हा कि, आज ई तुध मेरे साउगी स्वर्गलोका मन्झ हूंणां।”

होर लगभग बारा बजे ले तीन बजे तक सारे देसा मन्झ न्हयारा हुई गया। होर सूरजा रा प्रयासा जांदा रैहया, होर मन्दरा रा पर्दा बीचा मन्झा ले फटी गया। होर यीसूए जोरा किन्हें चिंगी किन्हें बोल्या, “हे बापू, हांऊँ आपणी आत्मा तेरे हाथा मन्झ सौम्पेया करहा।” होर ये बोली किन्हें यीसूए प्राण छाडी दिते। सुबेदारे, जो कुछ हुएया था देखी किन्हें, परमेसरा री बड़ाई किती, होर बोल्या, “पक्का ये माह्णुं धर्मी था।” होर सारी भीड़ जो ये देखणे रे कठे कठी हुईरी थी, एस घटना जो देखी किन्हें छाती पिट्दी हुई वापस चली गयी। पर स्यों सभ जो तेस जो जाणहां ऐं थे, होर ज्नानिया जेह्ड़ी गलील जिल्ले ले तेसरे साउगी आईरी थी, दूर खड़ी किन्हें ये सभ कुछ देख्या करहा ई थी।

होर युसुफ नांऊँआं रा एक मंत्री जो सज्जन होर धर्मी माह्णुं था। होर से तिन्हारे फैसले होर तिन्हारे एस कामा ले खुस नी था, होर से यहूदिया ईलाके रे अरिमतियाह सैहरा रा रैहणे वाल़ा था, होर परमेसरा रे राजा रा इंतजार करणे वाल़ा था। तिन्हें पिलातुस हाकमे वाले जाई किन्हें यीसू री ल्हास मांगी लई। होर यूसुफे यीसू री ल्हास तुआरी किन्हें चादरा मन्झ लपेटी किन्हें एक डुआरा मन्झ रखी। जो चटाना रे बीचा मन्झ खणीरी थी, होर जेस मन्झ कधी केसी री ल्हास नी रखिरी थी। से त्यारी रा ध्याड़ा था, होर अरामा रा ध्याड़ा सुर्हू हूंणे वाल़ा था। होर तिन्हें जनानिये जो यीसू साउगी गलील जिल्ले ले आईरी थी, पीछे-पीछे जाई किन्हें से डुआरा जो देख्दी लगी, होर ये भी कि तेसरी ल्हास किहाँ रखिरी थी। होर स्यों आपणे घरा वापस आई होर खुस्बूदार चीजा त्यार किती। फेरी मूसा रे व्यवस्था रे मताबक अरामा रे ध्याड़े ता तिन्हें अराम कितेया।

Listen to लूका 23