Lúkɑ́shi 9
9
Yɛ́su túu pʉɔ pɛ́ ntsɔ̌ppɑ́ nɛ́ nɛɡɛ́m
(Mɑtʉ̈ɔ 14.13-21; Mɑ́lɛ́kúshi 6.30-44; Jɑ̂ŋ 6.1-15)
1Yɛ́su ɡɛ ńcúꞋlɛ pʉɔ pɛ́ ntsɔ̌ppɑ́ nɛ́ nɛɡɛ́m, ŋ́ɡɑ́ mɛtʉʉ mbɔ̌ pɔ́p, pɔ́p kuꞋ nɛlɔk lík-Sɛ́ ńzuŋmɛzẅikŋɛ kɛpɔŋ tsʉʉ mi ɛ́ mbʉʉ pʉɔ, mbɑ nɛɡɛ mɛɡɔɔ fíitɛ. 2Ŋ́kɛ́ ŋ́ɡɔ́ɔ ńtúu wɔ́p ŋɡɔ pɔ́p ɡʉ sẅíi pɑꞋ nu-nɛfɔɔ-Sɛ́ pɔ́nɛ, ḿbɛn ŋ́ɡɛ ɡɑŋɡɔɔ fíitɛ, 3ḿbɛn ńcú mbɔ̌ pɔ́p ŋɡɔ: «Kɔɔ pʉʉ ɡɔ ŋ́ɡʉ ŋ́ɡẅɛɛ yúu. Kɔɔ ŋu tẅɛꞋ ntẅí, kɔɔ ŋu pɛ́ɛ pɑɑ, kɔɔ ŋu sɑ́ŋ yúu pɛjʉ́, kɔɔ ŋu pɛ́ɛ ŋkɑ́p, kɔɔ ŋu mɑꞋ mɛndẅí mɛ́mbɑ́. 4Pʉʉ ɡʉ tɛ ŋ́kúu zʉꞋ, pɛ́ lɑɑ ńcú ŋɡɔ pʉʉ lɛ́ tsɛt yɛ́t ndɑ́ lɑ́, pʉʉ kɛ́ ńtswɛ́ pɔ ndɑ́ ɛ̂yɑ́ tɛ ńdɑ́Ꞌ ŋ́ɡʉ. 5Mbɑ ɡʉ̈ɔ́ lɑ́ yi pʉʉ ŋ́kúu zúꞋu pɛ́ lʉꞋ nɛcẅɛ́ɛ wʉ́ʉ, pʉʉ fú zúꞋu, ŋ́ɡɔ ŋ́ɡʉ, ŋ́kwɛt pɛ́pɛ́p-mɛku pʉʉ nɛlɔk ɛ́sẅíi wɔ́p ŋɡɔ ɛ́ tsʉꞋ ńdíŋɛ pɔ wɔ́p.» 6Yɛ́su cú pɔ́Ꞌɔ pɔ́p ɡɔ́ɔ ŋ́kɛ́ ŋ́ɡʉ, ŋ́kɑ́t mɛlɑ́Ꞌ mɛlɑ́Ꞌ, ńnɛn ɛ́sɑ́Ꞌ Ŋkʉʉ sʉ́Ꞌnɛ ẅi ɛ́ fúnɛ mbɔ̌ Sɛ́, ḿbɛn ḿbɔ́ ŋ́ɡɛ ɡɑŋɡɔɔ fíitɛ.
Fɔɔ Ɛlɔ̂dɛ zúꞋ pɛ́ kẅíi lík-Yɛ́su, lɛ́m yɛ́ sɑ́ɑnɛ
7Fɔɔ Ɛlɔ̂dɛ ẅi ɑ ḿbɔ́ ɛ́sɑ́Ꞌ pɑk-ŋɡɔŋ-ŋɡɑlíliyɑ zúꞋ pɛ́ kẅíi nu nǔu mɛfɑꞋ mi pɛ́ sɛ́ ɛ́fɑꞋ nǔu lík-Yɛ́su, ɛ́ ɡɑ́ɑnɛ wɛ́ tɛꞋ, ńzɛɛ ŋ́ɡɔ ḿbɔ́, pʉɔ pɔ́ ńcú ŋɡɔ Yɛ́su ɛ̂wɑ́, ɑ Jɑ̂ŋ ẅi ɑ kɑ zẅíimɛnɛ. 8Pɛcɔ́ pʉɔ pɔ́ ŋ́ɡɔ ɑ Ɛlîi ẅi ɑ pɛnnɛ ńcẅɛt, pɛcɔ́ cú yɔ́p ŋɡɔ ɑ wɛcɔ́ ŋɡɛ́mndʉ̈ɔ́Ꞌ-Sɛ́ wɛ ŋkɑ́ mbi ẅí ɑ pɛnnɛ ŋ́kɔ́Ꞌ. 9Ɛlɔ̂dɛ pɔ́ ńcú yɛ́ ŋɡɔ: «Ɛ́ ɡʉ nǔu Jɑ̂ŋ, mbɔ kwɑꞌ mɔ kɑ cúnɛ pɛ́ zɑ́Ꞌ tú yɛ́. Wɔ ŋu pɛn ḿbɔ́ pɔ wɔ̌ ẅi n zúꞋnɛ pɛ́ cú mɛnu nǔu wɛ́ pɔ ndɛn wɔ?» Ḿbɔ́ ńdɔ́ɔ nɛjʉ́ɔ Yɛ́su lɑ ńjí.
Yɛ́su zẅík pʉɔ ntsɑ́Ꞌ yɛtɑɑ
10Gɑŋntúu-Yɛ́su ɡɛ ḿbɛn nzʉʉ, ḿbɛ́ɛtɛ pɑꞋ pɔ́p fɑꞋnɛ pɔ́Ꞌɔ, ɛ́sẅíi wɛ́. Yɛ́su zúꞋ, ḿbɛn ɛ́fɑk wɔ́p, pɔ́p pɛpɔ́p tɛ́ɛ nɔɔ, ŋ́ɡʉ nɛ́ shʉ́ tʉ́sɔŋ-Mbɛtsɑyídɑ. 11Lɑ́Ꞌ jí, ńcʉ́ɔ nzʉʉ yɛ. A mɛɛ ḿbɛ́m, ńnɛn ɛ́sẅíi wɔ́p nɛ́ nu nǔu nɛfɔɔ-Sɛ́, ḿbɛn ŋ́ɡɛ pʉɔ pɛ́tsʉʉ pinɛ pɔ́p kɑ pɔ́ ńtsɑ́ɑ nɛfíitɛ fíitɛ.
12TúꞋ ɡɛ ḿbɔ́ sʉ́ʉ, ɡɑŋku-Yɛ́su ntsɔ̌ppɑ́ nɛ́ nɛɡɛ́m tɔ́ ńcú mbɔ̌ wɛ́ ŋɡɔ: «Pɛkŋɛ zɑ́Ꞌnɛ pɑꞋɑ kɔ̂ŋtɛt, cú pʉɔ, Gʉ tsɛt mɛnjɛ́Ꞌ kɛmbɑ tsɛt mɛlɑ́Ꞌ kɛmbɑ tsɛt mɛtʉ́sɔŋ mi ɛ́ zɑꞋnɛ ńdɔ́ɔ yúu ŋ́kwɛ́t, ḿbɛn ńdɔ́ɔ zʉꞋ nɛlɛ́!» 13Yɛ́su tsɔ́Ꞌ mbɔ̌ pɔ́p ŋɡɔ: «Pʉʉ ɡʉnɛ ŋ́ɡɑ́ yúu pɔ́p kwɛ́t.» Pɔ́p cú ŋɡɔ: «Pɛk ɡẅɛɛ mbɛlɛ̂ɛt zɑ́Ꞌnɛ ndɑꞋ ntɑ́Ꞌ yɛ́tɑɑ, ŋ́ɡɛ shú mbɑŋ yɛ́pɑ́, kɛ ɔ lɔɔ ŋɡɔ pɛk ɡʉ ńzúu yúu ŋ́ɡɑ́ mbɔ̌ pɔ́p?» 14Ɛ́ ḿbɔ́ pɔ́Ꞌɔ, ŋumɛsɔŋ pɔ́ sɛ́ tɛꞋ, tɛ mbɛ́ɛnɛ ndɑꞋ ḿbɔ́ yúu ntsɑ́Ꞌ yɛtɑɑ. Pɔ́Ꞌɔ, Yɛ́su cú mbɔ̌ ɡɑŋku pɛ́ ŋɡɔ: «Pʉʉ ɡɛ pɔ́p nɑ́ŋ sɛ́ mɛɡɛ́mɛ́ntɑɑ, mɛɡɛ́mɛ́ntɑɑ.» 15Pɔ́p ɡɛ pɔ́p nɑ́ŋ sɛ́. 16Yɛ́su pɛ́ɛ mbɛlɛ̂ɛt yîyɑ́ ntɑ́Ꞌ yɛ́tɑɑ nɛ́ mɛshú mîmɑ́ mbɑŋ yɛ́pɑ́, ḿbʉꞋ tú yɛ́ ńdíŋɛ tʉ́, ŋ́ɡɑ́ pɑ́Ꞌlɑ́ mbɔ̌ Sɛ́; ḿbʉ̈ɔ́Ꞌtɛ ŋ́ɡɑ́ mbɔ̌ ɡɑŋku pɛ́, nɛpɔ́ yi pɔ́p ŋ́ɡɑp mbɔ̌ lɑ́Ꞌ. 17Lɑ́Ꞌ kwɛ́t, ńzwɛ́t. Pɛ́ lɑktɛ pfuꞋ, ɛ́ lúu pɛtúŋ ntsɔ̌ppɑ́ nɛ́ nɛɡɛ́m.
Pyɛ̂ cú ŋɡɔ Yɛ́su Nzɑ́Ꞌŋkʉ
(Mɑtʉ̈ɔ 16.13-21; Mɑ́lɛ́kúshi 8.27-31)
18Yɛ́su pɔ́ yɛcɔ́ lɛ́Ꞌ, pɔ́p ɡɑŋku pɛ́ fyɑkŋɛ ŋ́ɡʉ zʉꞋ yi ŋu kɑ́ pɔ́ zúꞋu pɔ́, pɑꞋ ɑ ɡɛ ńcɛꞋlɛ Sɛ́. A píkŋɛ wɔ́p ŋɡɔ: «Lɑ́Ꞌ pɑꞋɑ ḿbɔ́ ńcú ŋɡɔ mɔ pɔ wɔ̌?» 19Pɔ́p pʉ̈ɔt ŋɡɔ: «Pɛcɔ́ pʉɔ sɛ́ ńcú ŋɡɔ ɔ Jɑ̂ŋ Mbɑptíshi, pɛcɔ́ pɔ́ ŋɡɔ ɔ Ɛlîi, pɛcɔ́ pɔ́ ńcú ŋɡɔ ɔ wɛcɔ́ tɑ́Ꞌ ŋu nǔu pɛŋɡɛ́mndʉ̈ɔ́Ꞌ-Sɛ́ pɛ́ ŋkɑ́ mbi, wi ɑ zẅíinɛ.» 20Yɛ́su píkŋɛ wɔ́p ŋɡɔ: «KwɑꞋ pʉʉ yʉ́ʉ cú ŋɡɔ mɔ wɔ̌?» Pyɛ̂ tsɔ́Ꞌ ŋɡɔ: «Ɔ Nzɑ́Ꞌŋkʉ ẅi ɑ fúnɛ mbɔ̌ Sɛ́.» 21Yɛ́su tɔꞋ wɔ́p tɛꞋ, ŋɡɔ kɔɔ pɔ́p cú tɛ ŋu ndɛꞋ zúꞋ, 22ḿbɛn ńcú mbɔ̌ pɔ́p ŋɡɔ: «Ɛ́ píknɛ ŋɡɔ mɔ́ɔ-ŋu ɡɛ ńjʉ́ɔ ŋɡʉ̈ɔ́Ꞌ tɛꞋ, ŋɡɔ Pɛkɛ́m-lɑ́Ꞌ-Pɑyúdɑ pɔ́p pɛtɑ́tndɑ́-pɑnɔŋpɔꞋ mbɑ pɑkyɛ́Ꞌtɛ nɛpʉ́ʉ-Mɔ̌sɛ̂ɛ ɡɛ ńdʉꞋ wɛ́, ŋ́ɡɛ pɛ́ jẅí wɛ́, lɑ́ mbɑ́ɑtɛ lɛ́Ꞌ pɛ́tɑ́t ɑ zẅíimɛ nǔu nɛvú.»
Nɛcʉ́ɔ nzʉʉ Yɛ́su
(Mɑtʉ̈ɔ 16.24-28; Mɑ́lɛ́kúshi 8.34–9.1)
23Yɛ́su ɡɛ ńcú mbɔ̌ pʉɔ pɛ́tsʉʉ ŋɡɔ: «Ŋu lɑɑ ńtsɑ́ɑ nɛpɔ́ wɑɑ ŋu, ɑ mɛꞋ túmbʉʉ yɛ́, ńtíi yɛ́ tʉ́ mɛkʉ́Ꞌ ńdɔk ḿbɛ́m nɛpfú, lɑ́ ńcʉ́ɔ nzʉʉ mɔ. 24Pʉɔ jí ŋɡɔ, ŋu ẅi ɑ ɡɛ ńzɛɛ ńdɔ́ɔ nɛpɑ́ɑ wɛ nɛpɔ́, pɔ́nɛ ŋu ẅi ɑ ɡɛ ḿbɛ́ wɛ nɛpɔ́ ɛ̂wɑ́, lɑ́ ŋu ẅi ɑ pɛ́nɛ wɛ nɛpɔ́ mɛlɑ́Ꞌ wɑ́ɑ, mbɔ wîwɑ́ ŋu ɡɛ ńdɑ́Ꞌ ńduk. 25Pɛ́ lɑɑ ńzɛɛ ŋ́ɡɔ́ɔ ńtíi ŋɡɔŋ yɔ tsʉʉ ŋ́ɡɑ́ mbɔ̌ ŋu, tɛ mbɑ pɔ́Ꞌɔ ɑ pɔɔ pɔ́ ŋ́ɡʉ ḿbɛ́ wɛ nɛpɔ́ pɛ́nɛ pɔ́, mbɔ ɛ́ ɡɛ ńcẅɛ́lɛ́ wɛ́ nǔu kʉ̈ɔ́? NdɑꞋ nɛɡɛ, ɑ kúu pɛ́. 26Ŋu lɑɑ ŋ́kɔ́ sʉ́ʉ nɛpɔ́ wɑ́ɑ ŋu, mbɑ nɛsẅíi nu yɑ́ɑ, mbɔ mɔ́ɔ-ŋu ɡɛ ńdɑ́Ꞌ ŋ́kɔ́ sʉ́ʉ nɛlɔk wɛ́ ŋ́ɡɛ wɛ ŋu ŋkɑ́ yi ɑ ɡɛ ńdɑ́Ꞌ ḿbɛn nzʉʉ nɛ́ nɛɡúꞋ wɛ ẅí ɛ́ wɛ Sɛ́ lɑ́, mbɑ pɛcʉ̈ɔ́Ꞌ pɛ́. 27Pʉʉ tsúŋ ńjí ŋɡɔ, pɛcɔ́ pʉɔ pinɛ pɔ́p zɑ́Ꞌnɛ ŋkɔ̂ɔnɛ kɛ́ ɡɛ ḿpfú kɛ́ pɔ́ yi pɔ́p lɔk mík ńjʉ́ɔ nɛfɔɔ-Sɛ́ pɔ́.»
Yɛ́su nyɛt nɛŋwɑ́ŋɛ wɛ mbɔ̌ pɛcɔ́ ɡɑŋku pɛ́
(Mɑtʉ̈ɔ 17.1-8; Mɑ́lɛ́kúshi 9.2-8)
28Yɛ́su cú yɔ nu, ɛ́ ɡɛ ḿbɔ́ lɛ́Ꞌ pɛ́nɛ́fɔ́m, ɑ fɑk Pyɛ̂ ŋ́ɡɛ Jɑ̂ŋ pɔ́p Jɑ̂k, pɔ́p pɛpɔ́p kɔ́Ꞌ ndǔ nɛcɔ́ nɛŋkɔ́Ꞌ pɑꞋ ɑ ɡɛ ńcɛꞋlɛ Sɛ́; 29ŋ́kúu zúꞋu, ɑ pɔ́ ńcɛꞋlɛ Sɛ́, lii-shʉ́ wɛ́ kɛ́ ŋ́ɡɔ́ɔ ŋ́kúpmɛ, mɛndẅí mɛ́ ɡɔ́ɔ ɛ́fúk tɛ ŋ́ŋwɑŋɛ. 30Pɛ́ jʉ́ɔ pʉɔ pɛ́pɑ́ cẅɛt, pɔ́p pɛ́ Yɛ́su pɔ́ sẅiŋɛ. A pɔ́ Mɔ̌sɛ̂ɛ pɔ́p Ɛlîi, 31Mbɔ pɔ́p lɔk nɛŋwɑ́ŋɛ-Sɛ́ ńtɔ́, pɔ́p Yɛ́su pɔ́ ɛ́sẅíŋɛ nu nǔu ndúŋ Yɛlúsɑlɛm, pɑꞋ ɑ ɡɛ ńtɔ́ zúꞋu ḿpfú. 32Ɛ́ ɡɔ ḿbɔ́, mbɔ Pyɛ̂ pɔ́p pɛcɔ́ pʉɔ lɛ́ mɔ́ tɛꞋ, pɔ́p ɡɔ ḿvukŋɛ, ńjʉ́ɔ nɛŋwɑ́ŋɛ-Yɛ́su pɔ́ ŋ́kyɛꞋ zʉꞋ, Yɛ́su pɔ́p pʉɔ pɑ́ pɛ́pɑ́ tʉ́ʉ zúꞋu. 33Pɔ́p pɛ́pɔ́p kɑ tsʉꞋ ḿbɔ́ ŋ́ɡʉ pɔ ɛ́fyɑkŋɛ, Pyɛ̂ ɡwɛt ɡwɛtnɛ tɛ ńcú mbɔ̌ Yɛ́su ŋɡɔ: «Tɑ̌ɑ wɛk, pɛkŋɛ lɑɑ ńtsʉ́Ꞌ ńnɑ́ŋ pɔ zɑ́Ꞌnɛ, ɛ́ pɔ́ sʉ́Ꞌnɛ. Pɛ́m pɛk kút mɛntɑp mɛ́ntɑ́t, tɑ́Ꞌ pɔ́ yú, yɛcɔ́ pɔ́ yɛ́ Mɔ̌sɛ̂ɛ, yɛcɔ́ pɔ́ yɛ́ Ɛlîi.» Pyɛ̂ cú yɛ́ pɔ́Ꞌɔ, ḿbɔɔ ńjí yúu mi ɑ cúnɛ pɔ́.
34Ḿbɛ́t ńcú cúnɛ, yɛcɔ́ lɑ́ɑ cúŋ ŋ́kẅíipɛ wɔ́p. Gɑŋku-Yɛ́su jʉ́ɔ pɑꞋ lɑ́ɑ kẅíibɛ́nɛ wɔ́p, ŋ́ɡɔ́ɔ ḿbɔ́k. 35Ŋɡi-ŋu fú tsɛt lɑ́ɑ ɛ̂yɑ́, ńcú ŋɡɔ: «Yɔ mɔ́ɔ wɑ́ɑ ẅi ŋ kɑŋnɛ, pʉʉ zúꞋ ntsu wɛ́.» 36Ŋɡi yîyɑ́ sẅiŋɛ tɛ ńnɑꞋ cí, pɔ́p tsʉ́Ꞌ ńjʉ́ɔ Yɛ́su tʉ́ʉ zúꞋu pɔ zɛnɛ́jʉ́. Gɑŋku-Yɛ́su kɑ jʉ́ɔ mɔ mɛnu pɑꞋɑ, ɛ́fú zúꞋu, ḿbɔɔ ɡɔ́ɔ ɛ́sẅíi ŋu ndɛꞋ ŋkɑ́ ɛ̂yɑ́ pɔ́.
Yɛ́su zɔŋ wɛcɔ́ mɔ́ɔ ẅi mɛzẅikŋɛ kɛpɔŋ kɑ pɔ́ ḿbɑ́klɛ wɛ́
(Mɑtʉ̈ɔ 17.14-18; Mɑ́lɛ́kúshi 9.14-27)
37Njí ɡɛ ŋ́kiɛ, Yɛ́su pɔ́p ɡɑŋku pɛ́ pɛtɑ́t ɡɔ ɛ́fú ndǔ nɛŋkɔ́Ꞌ ɛ̂nɑ́ ńcúŋ, mbɔ lɑ́Ꞌ cẅɛt mɔ́ tɛ ńzɑ́ɑ, ńtɔ́ nɛzɑ́Ꞌ wɛ́. 38Ŋu fú tsɛt nɔɔ-lɑ́Ꞌ ḿbúꞋ mbɔ́ mbɔ̌ wɛ́ nɛ́ ŋɡi tɛnnɛ ŋɡɔ: «Ndɛ, sɛ́sẅíi, líŋɛ mɔ́ɔ wɑɑ wɔ ńjʉ́ɔ, ɑ mɔ́ɔ mbɛ́ɛnɛ, ḿbɔ́ ndɑꞋ jʉ́ mbɔ̌ mɔ. 39Yɛcɔ́ zẅikŋɛ kɛpɔŋ lɔ ńnɑ́ŋ tɛ ŋ́ɡẅɛɛ wɛ́, ɑ kíi, ŋ́ɡwɛt, ńtsʉꞋnɛ wɛ́, ɑ ŋ́kwɛ́t ntsu wɛ́, ɛ́fuꞋ mɛtẅɛ. Ɛ́ ɡẅɛɛ wɛ́, ńdɑ́Ꞌ ŋ́ɡɔ ńnɑ́ wɛ́, mbɔ ɑ pʉ̈ɔ́Ꞌtɛ mɔ́ wɛ́ tɛꞋ. 40M búꞋ mbɔ́ mbɔ̌ ɡɑŋku pú ŋɡɔ pɔ́p zuŋ zẅikŋɛ kɛpɔŋ ɛ̂yɑ́, lɑ́ pɔ́p pɔɔ nǔu kuꞋ.»
41Yɛ́su zúꞋ pɔ́Ꞌɔ, ńcú ŋɡɔ: «Yɔ! Pʉɔ ŋɡuꞋ yɔ, pʉʉ kɑ́ zɑ́p tʉ́m nǔu Sɛ́ pɔ́, ŋ́ɡɛ pɔ nu kɛpɔŋ. Ɛ́ pɑꞋɑ pɛkŋɛ ńdɑ́Ꞌ ńnɑ́ŋ tɛ ŋ́kúu pɔ shʉ́nɛ, ɛ sʉk nǔu mɛnu mʉ́ʉ? Lɔk mɔ́ɔ nu ɛ̂wɑ́ ńtɔ́ nɛ́ zɑ́Ꞌnɛ.» 42Tɑ́-mɔ́ɔ pɔ́ ńdɔk wɛ́ ńtɔ́, zẅikŋɛ kɛpɔŋ ɛ̂yɑ́ pɛn ŋ́ɡẅɛɛ wɛ́ ńtɛ́m sɛ́, ɛ́ tsʉ́Ꞌnɛ wɛ́ nɛ́ tʉʉ. Yɛ́su cɔ́k zẅikŋɛ kɛpɔŋ ɛ̂yɑ́, ɑ nɑ́ mɔ́ɔ ɑ fíitɛ. Yɛ́su ɡẅɛɛ pɔ́ yɛ́, ŋ́ɡɑ́ wɛ́ mbɔ̌ tɑ́t-wɛ. 43Lɑ́Ꞌ yi ɛ́ ḿbɔ́nɛ zúꞋu, jʉ́ɔ yɔ nu, mɑɑ pɑꞋ mɛtʉʉ Sɛ́ lɔknɛ ŋ́ɡúꞋ pɔ́Ꞌɔ.
Yɛ́su pɛn ńcú ntɛ́ nɛvú yi ɑ ɡɛ ḿpfú yɛ́tɛ́
(Mɑtʉ̈ɔ 17.22-23; Mɑ́lɛ́kúshi 9.30-32)
Lɑ́Ꞌ pɔ́ ŋ́ɡʉ̈ɔꞋtɛ mɛnu mi Yɛ́su ɡɛnɛ tsʉʉ. A ɡɛ ńcú mbɔ̌ ɡɑŋku pɛ́ ŋɡɔ: 44«Pʉʉ tsúŋ ńzúꞋ nu yi ŋ ɡɛ ńcú lɑɑ sʉ́Ꞌnɛ, ḿbɛn ŋ́kẅíitɛ. Pɛ́ sɛ́ ŋ́ɡʉ nɛfɛn mɔ́ɔ-ŋu mbɔ̌ pʉɔmɛ́sɔŋ.» 45Lɑ́ ɡɑŋku pɛ́ pɔɔ tsúŋ ńzúꞋ yɔ nu sʉ́Ꞌnɛ pɔ́, mbɔ yɛcɔ́ yúu jʉ́ɔꞋ jínu yɔ́p nɛpɔ́ yi pɔ́p kɛ́ zúꞋ pɔ́. Wɛcɔ́ ŋu wɔp kɛ́ ḿbɔɔ sʉk tɛ ḿbíkŋɛ wɛ́ ŋɡɔ ɔ lɔɔ nɛcú ŋɡɔ kʉ̈ɔ́ pɔ́, mbíꞋŋɡɔ pɔ́p kɑ tsʉꞋ ḿbɔ́k pɔ́knɛ.
Wɔ̌ pɛꞋnɛ ḿbɔ́ kwɑꞋ mɑ́ŋu?
(Mɑtʉ̈ɔ 18.1-5; Mɑ́lɛ́kúshi 9.33-37)
46Yɛcɔ́ fɛꞋ nɑ́ŋ tɛ ɛ́sɑ́Ꞌ tsɛtsɛt ɡɑŋku-Yɛ́su, pɔ́p pɔ́ ńdɔ́ɔ ŋu ẅi ɑ tsɛtsɛt pɔ́p ḿbɔ́ mɑ́ŋu. 47Yɛ́su jí kwɑŋɛ yí ɛ́ tʉ́m pɔ́p, ɛ́fúŋ mɔ́yúu mɔ́ɔ, ńtík wɛ́ nɛjɔ́ŋ yɛ́, 48ńcú mbɔ̌ ɡɑŋku pɛ́ ŋɡɔ: «Ŋu lɑɑ ńdɔk lík yɑ́ɑ, ńdɔk ńcẅɛ́ɛ mɔ́yúu mɔ́ɔ wɔ, mbɔ ŋɡɑŋ cẅɛ́ɛ pɔ wɑ́ɑ. Ŋu pɛn ńcẅɛ́ɛ wɑ́ɑ, mbɔ ɑ kɑ́ cẅɛ́ɛ pɔ wɑ́ɑ ndɑꞋ pɔ́, ɑ cẅɛ́ɛ pɔ ŋu ẅi ɑ kɑ túunɛ wɑ́ɑ.» Pʉʉ jí sʉ́Ꞌnɛ ŋɡɔ ŋu ẅi ɑ tsɛtsɛt pʉʉ ḿbɔɔ nyɛt mbʉʉ yɛ pɔ́ pɔ́nɛ kwɑꞋ mɑ́ŋu.
Ŋu lɑɑ ḿbɔɔ nu-Yɛ́su tɑ́k, mbɔ ŋɡɑŋ cẅɛ́lɛ́ wɛ́ cẅɛ́lɛ́nɛ
(Mɑ́lɛ́kúshi 9.38-40)
49Jɑ̂ŋ ɡɔ́ɔ ŋ́kɛ́ ńcú mbɔ̌ Yɛ́su ŋɡɔ: «Tɑ̌ɑ wɛk, pɛk lɑ́Ꞌ ńjʉ́ɔ wɛcɔ́ ŋu pɔ́ ńdɔk lík yú ńzuŋ mɛzẅikŋɛ kɛpɔŋ nǔu pʉɔ, pɛk lɔ́ɔ nɛtɔꞋ wɛ́, mbíꞋŋɡɔ ɑ kɑ́ pɔ́ yɛ́ nzʉʉ wu pɑꞋ pɛk pɔ́.» 50Yɛ́su tsɔ́Ꞌ ŋɡɔ: «Kɔɔ pʉʉ tɔꞋ wɛ́ nɛɡɛ pɔ́Ꞌɔ. Ŋu ẅi ɑ kɑ́ tɑ́k nu yɛkŋɛ pɔ́ ɑ wɛkŋɛ ŋu.»
Pɛcɔ́ pɑsɑmɑlîi lʉꞋ Yɛ́su lɑ́Ꞌ pɔ́p
51Ŋkɑ́ yi Sɛ́ ɡɛ ńtíi Yɛ́su ńdɔk ḿbɛn nɛ́ tʉ́nɛ́pú ɡɛ ŋ́kuꞋ, Yɛ́su jʉ́ɔ ŋɡɔ ɛ́ zɑ́pmɛ pɑꞋ ɑ ɡɛ ŋ́ɡʉ Yɛlúsɑlɛm, ŋ́ɡɔ́ɔ ŋ́kɛ́ ńdɔ sɛ́ ńcʉ́ɔ sɛ̂ndúŋ kɛ́ pɔ́k, 52ŋ́ɡɔ ŋ́ɡʉ, ḿbiitɛ ńtúu pʉɔ, pɔ́p ɡʉ tɛ ŋ́kúu tsɛt yɛcɔ́ lɑ́Ꞌ-Sɑmɑlîi, ńdɔ́ɔ zʉꞋ lɑ́ ɑ tɔ́. 53Pʉɔ-lɑ́Ꞌ ɛ̂pɑ́ zúꞋ ŋɡɔ Yɛ́su ńdɛɛ ŋ́ɡʉ nɛ́ Yɛlúsɑlɛm, ńdʉꞋ nɛɡɑ́ zʉꞋ mbɔ̌ wɛ́. 54Pɛcɔ́ ɡɑŋku pɛ́ pɛ́pɑ́, Jɑ̂k pɔ́p Jɑ̂ŋ jʉ́ɔ yɔ, ńcú mbɔ̌ Yɛ́su ŋɡɔ: «Tsɑpʉɔ wɛk, ɔ pɛ́m ŋɡɔ pɛk píkŋɛ múk, ɛ́fú tʉ́nɛ́pú ńcúŋ, ńtɔ́ ḿbík pʉɔ pɔnɛ?» 55Yɛ́su shɔtnɛ ńdíŋɛ wɔ́p, ńcʉ̈ɔ́k wɔ́p. [Pʉʉ jí ŋɡɔ mɔ́ɔ-ŋu ŋ́kɑɑ kɛ́ ńtɔ́ nɛɡɛ pʉɔmɛsɔŋ kúu pɛ́ pɔ́, ɑ kɑ tɔ́ pɔ nɛɡɛ pɔ́p luk.]#9.55 [Ŋɡɔ pʉʉ kɑ́ jí kwɑŋɛ yí ɛ́ tsʉ́ʉnɛ́nɛ wʉ́ʉ pɔ́. Pʉʉ jí ŋɡɔ mɔ́ɔ-ŋu ŋkɑɑ kɛ́ ńtɔ́ nɛɡɛ pʉɔmɛsɔŋ kúu pɛ́ pɔ́, ɑ kɑ tɔ́ pɔ nɛɡɛ pɔ́p luk.] Yúu mi pɛ́ ŋwɑꞋnɛ́nɛ nǔu cú-Ŋɡɔmbɑ̌ɑ lɑ́ɑnɛ kɑ́ pɔ́ tsɛt pɛluŋmbi mɛlwɛn ŋwɑꞋnɛ pɔ́. 56Ŋ́ɡɛ pɔ́Ꞌɔ pɔ́p pɛ́pɔ́p tsʉꞋ ńdɔk pɔ wɛcɔ́ ndúŋ-lɑ́Ꞌ wɛ ndɛꞋ ńdɔk ŋ́ɡʉ.
Ŋu ɡɔ́ ńcʉ́ɔ nzʉʉ Yɛ́su ḿmɛꞋ mbɑ kʉ̈ɔ́ lɑ́
(Mɑtʉ̈ɔ 8.19-22)
57Pɔ́p pɔ́ sɛ̂ndúŋ ḿbɔ́ ŋ́ɡʉ, wɛcɔ́ ŋu tɔ́, ńcú mbɔ̌ Yɛ́su ŋɡɔ: «Ɔ ɡɛ ŋ́ɡʉ ɡʉ́ɔ lɑ́, ŋ kɛ ḿbɔ́ pɔ nzʉʉ ɡu.» 58Yɛ́su tsɔ́Ꞌ mbɔ̌ wɛ́ ŋɡɔ: «Pɛndǔm ɡẅɛɛ mɛmbʉ́ nɛlɛ́ zúꞋu, pɛshʉ́ŋ pɛn ŋ́ɡẅɛɛ mɛŋkɑɑ mɔ́p, lɑ́ mɔ́ɔ-ŋu kɑ́ ɡẅɛɛ zʉꞋ yi ḿbɔ́ ɑ zẅiitɛ zúꞋu pɔ́.»
59Yɛ́su cú mbɔ̌ wɛcɔ́ ŋu ŋɡɔ: «Cʉ́ɔ nzʉʉ mɔ, puu tsʉ́Ꞌnɛ ńnɛn.» Ŋɡɑŋ cú ŋɡɔ: «Tɑ̌ɑ wɛk, piitɛ ńnɑ́ wɑ́ɑ ŋ ɡʉ nɛtẅíi tɑ̌ɑ mɔ.» 60Yɛ́su tsɔ́Ꞌ mbɔ̌ wɛ́ ŋɡɔ: «Ńnɑ́ pɛpfú pɔ́p tẅíi pɛpfú pɔ́p. Ŋ́ɡʉ nǔu ɡu, ɔ ɡẅɛɛ pɔ nɛɡʉ ɛ́sẅíi pɑꞋ nu-nɛfɔɔ-Sɛ́ pɔ́nɛ.»
61Wɛcɔ́ ŋu pɛn ńcú mbɔ̌ Yɛ́su ŋɡɔ: «Tɑ̌ɑ wɛk, ŋ ɡɛ ńcʉ́ɔ nzʉʉ ɡu. Lɑ́, tsʉ́Ꞌ n zɛɛ ŋ́ɡʉ ńdɛɛmɛ pʉɔ tsɛ́nndɑ́ yɛk lɑ́ ńtɔ́.» 62Yɛ́su cú mbɔ̌ wɛ́ ŋɡɔ: «Ŋu lɑɑ ńzɛ nɛzʉ́Ꞌ nɑŋ, ḿbɛn ḿbɔ́ ńdíŋɛ nzʉʉ, mbɔ ɑ kɑ́ pɔ́ ŋu ẅi ɑ kuꞋ nɛfɑꞋ nǔu nu-nɛfɔɔ-Sɛ́ pɔ́.»
Айни замон обунашуда:
Lúkɑ́shi 9: JGO
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
CABTAL, 2017