Lúkɑ́shi 10
10
Yɛ́su túu ɡɑŋku pɛ́ ntsɔ̌ppɑ́ mɛɡɛ́m sɑɑmbɑ́
(Mɑtʉ̈ɔ 10.5-14, 40; Mɑ́lɛ́kúshi 9.37; Lúkɑ́shi 9.48; Jɑ̂ŋ 13.20)
1Yɔ nu lɛɛ, Yɛ́su tsɔ́Ꞌ pɛcɔ́ ɡɑŋku pɛ́ ntsɔ̌ppɑ́ mɛɡɛ́m sɑɑmbɑ́, ńtúu wɔ́p pɛ́pɑ́ pɛ́pɑ́ ŋɡɔ pɔ́p piitɛ ḿbɔ́ mbi ńnɛn tsɛt mɛtʉ́sɔŋ pɔ́p mɛzʉꞋ mi ɑ ŋ́ɡɛ ńdɛɛ zúꞋu. 2Pɔ́p ɡɔ́ ŋ́ɡʉ, ɑ cú mbɔ̌ pɔ́p ŋɡɔ: «Yúu mi pɛ́ ɡɛ ńdɑk tsɛt ŋkɑ́Ꞌ zɑ́ɑ tɛꞋ, ndɛn ɡɑŋfɑꞋ pɛn ŋ́kʉ̈ɔ́k.» Ɛ́ pɔ́ŋ ŋɡɔ pʉʉ púꞋ mbɔ́ mbɔ̌ ŋɡɑŋkɑ́Ꞌ ɑ kẅiꞋ ɡɑŋfɑꞋ pinɛ pɔ́p ɡɛnɛ ńdɑk yúu pɛ́. 3Pʉʉ wɔ, n túu wʉ́ʉ pɔ pɑꞋ ḿbɔ́ pɛ́ túu pɔ́ɔ-mbí tsɛtsɛt mɛnɑɑŋɡwɛ. 4Kɔɔ pʉʉ ɡɔ ŋ́ɡʉ ḿbɛ́ɛ ŋkɑ́p, kɔɔ pʉʉ pɛ́ɛ pɑɑ, kɔɔ pʉʉ pɛ́ɛ mɛtɑp nɛlɔk ŋ́kúpmɛ mɛcɔ́. Pʉʉ lɑɑ ḿbɔ́ ŋ́ɡʉ, kɔɔ pʉʉ júk sɛ̂ndúŋ ńtʉ́ʉ ńcɛꞋlɛ pʉɔ. 5Pʉʉ lɑɑ ŋ́ɡʉ tɛ ŋ́kúu ndɑ́ ŋu, pʉʉ piitɛ ńcú ŋɡɔ: «Sɛ́ níꞋ mbɔ́tnɛ tsɛt yɔ ndɑ́. 6Pʉʉ cú pɔ́Ꞌɔ, ŋu ẅi ɑ kɔŋ ŋɡɔ mbɔ́tnɛ pɔ́ ndɑ́ yɛ, mbɔ mbɔ́tnɛ ɡɛ ŋ́kúu nǔu yɛ́. Lɑ́ ɛ́ pɔɔ pɔ́Ꞌɔ pɔ́, mbɔ ɛ́ ɡɛ ḿbɛn ŋ́kúu nǔu pʉʉ. 7Pʉʉ lɑɑ ḿbiitɛ tɛ ŋ́kúu tsɛt ndɑ́, pʉʉ nɑ́ŋ pɔ tsɛt ndɑ́ ɛ̂yɑ́, pʉʉ pɑ́ɑ nɛpɛn ŋ́ɡʉ yɛcɔ́ zʉꞋ ndɛꞋ, pɛ́ ɡɑ́ mbɑ kʉ̈ɔ́ lɑ́ zúꞋu pʉʉ kwɛ́t, ḿbɛn ńnɔ́, kɛ́ kɔ́ sʉ́ʉ, mbíꞋŋɡɔ ŋu lɑɑ ɛ́fɑꞋ fɑꞋ, mbɔ ɑ ɡɛ ńjʉ́ pii-fɑꞋ.» 8Pʉʉ lɑɑ ŋ́kúu tsɛt yɛ́t tʉ́sɔŋ lɑ́, tɛ pʉɔ cẅɛ́ɛ wʉ́ʉ, pɔ́p ɡɑ́ pɔ kʉ̈ɔ́ lɑ́, pʉʉ jʉ́. 9Gɑŋɡɔɔ pɔ́ zúꞋu pʉʉ ɡɛ pɔ́p fíitɛ, ńcú mbɔ̌ lɑ́Ꞌ ŋɡɔ: «Ŋkɑ́ yi Sɛ́ ɡɛ ńzɛ nɛnyɛt nɛfɔɔ nɛ́ pɑ́ɑtɛ tɛ ḿbɔ́ nɛjɔ́ŋ pʉʉ.» 10Lɑ́, pʉʉ lɑɑ ŋ́kɛ́ ŋ́kúu tsɛt yɛcɔ́ tʉ́sɔŋ, pʉɔ-zúꞋu lʉꞋ nɛcẅɛ́ɛ wʉ́ʉ, pʉʉ fú zúꞋu ŋ́ɡʉ tɛ ŋ́kúu ndǔ zɑ́n, ńcú mbɔ̌ lɑ́Ꞌ ŋɡɔ: 11«Pɛk púꞋ pɛ́pɛ́p yʉ́ʉ nǔu mɛku mɛk ŋɡɔ ɛ́ pɛn nzʉʉ ŋ́kúu tú pʉʉ, lɑ́ pʉʉ kɛ ńjí ŋɡɔ ŋkɑ́ yi Sɛ́ ɡɛ ńnyɛt nɛfɔɔ nɛ́ pɑ́ɑtɛ tɛ ḿbɔ́ nɛjɔ́ŋ pʉʉ.»
12«Ɔ́ɔŋ, ɛ sẅíi wʉ́ʉ, ɛ́ ɡɛ ńdɑ́Ꞌ ḿbɔ́ lɛ́Ꞌ yi Sɛ́ ŋ́ŋɑk pʉɔmɛsɔŋ, tsɑ́ŋ pîpɑ́ pʉɔ zɑ́ɑ ńdɛɛ yɛ pʉɔ-Sɔdɔ́m.»
13Yɛ́su pɛn ŋɡɔ: «Ndɔ́ɔ tú pʉʉ pʉɔ-Kɔlɑzîŋ, mbɑ tú pʉʉ pʉɔ-Mbɑtsɑyídɑ. Mɛnu mɑɑmɑɑnɛ mi pɛ́ kɑ ɡɛnɛ lɑ́Ꞌ pʉʉ, ɛ́ kɑ pɔ́ pɛꞋnɛ ḿbɔ́ pɔ tsɛt tʉ́sɔŋ Tíi pɔ́p Sídɔŋ, mbɔ pɔ́p kɑ lɑ́Ꞌ mɔ́ ŋ́kúpmɛ mɑt, ḿmʉk, ɛ́sɑ mɛpɑɑ ḿmɑꞋ, ńzɔ́Ꞌ pfú, ńdɔk ńtsuŋ ḿmʉk. 14Pʉʉ jí sʉ́Ꞌnɛ ŋɡɔ: Ɛ́ ɡɛ ńdɑ́Ꞌ ḿbɔ́ lɛ́Ꞌ yi Sɛ́ ŋɑk pʉɔmɛsɔŋ, yʉ́ʉ tsɑ́ŋ lɛɛ yi pʉɔ Tíi pɔ́p pʉɔ Sidɔŋ, 15ŋ́ɡʉ nǔu pʉʉ pʉɔ-Kɑpɛɛnɑwûm, pʉʉ kwɑŋɛ ŋɡɔ Sɛ́ ɡɛ ŋ́kɑꞋ wʉ́ʉ tɛ pʉʉ kúu nɛpú pɔ? Ɛ sẅíi wʉ́ʉ ŋɡɔ ŋɡɑ́ŋ! A ɡɛ ŋ́kɔk wʉ́ʉ kɔknɛ, pʉʉ ɡʉ tɛ ŋ́kúu lɑ́Ꞌ pɛpfú sɛ́.»
16Yɛ́su pɛn ńcú mbɔ̌ ɡɑŋku pɛ́ ŋɡɔ: «Ŋu lɑɑ ḿbɛ́m sẅiŋɛ yʉ́ʉ, mbɔ ɑ pɛ́m pɔ sẅiŋɛ yɑ́ɑ. Ŋu lɑɑ ńdʉꞋ wʉ́ʉ, mbɔ ɑ lʉꞋ pɔ wɑ́ɑ, ńdɔk pɔ́Ꞌɔ, ńdʉꞋ ŋu ẅí ɑ kɑ ńtúunɛ wɑ́ɑ.»
Pʉɔ ntsɔ̌ppɑ́ mɛɡɛ́m sɑɑmbɑ́ pɛn nzʉʉ
17Pʉɔ ntsɔ̌ppɑ́ mɛɡɛ́m sɑɑmbɑ́ pinɛ Yɛ́su kɑ túunɛ lɑ́, ɡʉ, ŋ́ɡɔ ḿbɛn nzʉʉ ńnɛn ńtsɑ́ɑtɛ tɛꞋ, ńcú mbɔ̌ Yɛ́su ŋɡɔ: «Tsɑpʉɔ, fɑꞋ ńnɛn tɛꞋ tɛ pɛk lɔk lík yú, ńcú nu mbɔ̌ mɛzẅikŋɛ kɛpɔŋ, pɔ́p zúꞋ ntsu wɛk.» 18Yɛ́su tsɔ́Ꞌ mbɔ̌ pɔ́p ŋɡɔ: «Pʉʉ sẅíi nu, n dɑ́Ꞌ ḿbɔ́ ńdíŋɛ, ńjʉ́ɔ pɑꞋ Sɑ́ttɑ ŋwɑŋɛ́nɛ pɑꞋ mɛnɛ́ɛ-mbʉŋ lɑ́, ɛ́fú tʉ́nɛ́pú ńtsɔ́Ꞌnɛ ḿvu sɛ́. 19Pʉʉ zúꞋ, ŋ kɑ ɡɔ́ ńtúu wʉ́ʉ pɑ́Ꞌɑ, ŋ́ɡɑ́ wʉ́ʉ nɛ́ mɛtʉʉ nɛlɔk ńnʉŋtɛ mɛnɔ́ pɔ́p pɛmɑ́ŋɡɑ́ɑsɛ́, ḿbɛn ŋ́ɡɑ́ wʉ́ʉ nɛ́ mɛtʉʉ nɛlɔk ńtsɑ sɑ́ttɑ ŋɡɑŋmbuu, mbɑ yɛcɔ́ yúu pɔɔ wʉ́ʉ ɡɛ. 20Mbɑ pɔ́Ꞌɔ, kɔɔ pʉʉ tsɑ́ɑtɛ pɔ pɑꞋ mɛzẅikŋɛ kɛpɔŋ zúꞋnɛ ntsu wʉ́ʉ, pʉʉ tsɑ́ɑtɛ pɔ pɑꞋ Sɛ́ ŋwɑꞋnɛnɛ mɛlík mʉ́ʉ tsɛt ŋwɑꞋnɛ tʉ́nɛ́pú.»
21Yɛ́su ḿbɔ́ ńcú yɔ nu, zẅikŋɛ Lɛ́ɛnɛ́nɛ ɡɛ tʉ́m yɛ́ ńtsɑ́ɑtɛ tɛꞋ, ɑ cú ŋɡɔ: «Tɑ̌ɑ mɔ, Tsɑpʉɔ, ɡu ẅi ɔ sɑ́Ꞌnɛ tʉ́nɛ́pú mbɑ tsɛ́tsɑ́Ꞌ. Ŋ ɡɑ́ pɑ́Ꞌlɑ́ mbɔ̌ ɡu pɑꞋ ɔ nyɛtnɛ mɔ mɛnu mbɔ̌ pɛɡɛɡʉʉ, ńdʉɔ mbɔ̌ ɡɑŋjínu pɔ́p pʉɔ pinɛ pɔ́p kɑ zíꞋnɛ ŋwɑꞋnɛ tɛꞋ lɑ́. Ɔ́ɔŋ mbɑ Tɑ̌ɑ mɔ, ɔ kɑ jʉ́ɔ ŋɡɔ ɔ ɡɛ ŋ́ɡɛ yɔ nu pɔ́ pɔ́Ꞌɔ.» 22Yɛ́su pɛn ńcú ŋɡɔ: «Tɑ̌ɑ mɔ nɑ́ mbɑ kʉ̈ɔ́ lɑ́ nǔu mbɔ́ mɑ́ɑ. Mbɔ wɛcɔ́ ŋu pɔɔ jí mɔ́ɔ pɔ́, ńdíꞋ ńdɑ́Ꞌ tɑ́t jínɛ wɛ́. Ŋu kɛ́ ḿbɔɔ Tɑ́t jí, ńdíꞋ ńdɑ́Ꞌ mɔ́ɔ nɛjí wɛ́, ḿbɛn ŋ́ɡɛ ŋu ẅi mɔ́ɔ kɔŋnɛ nɛnyɛt Tɑ́t wɛ mbɔ̌ wɛ́.»
23Yɛ́su pɛn ɛ́shɔtnɛ, ńcú ndɑꞋ mbɔ̌ ɡɑŋku pɛ́ ŋɡɔ: «Pʉʉ pɛpɔ́ttú tɛꞋ pɑꞋ pʉʉ sɛ́ ńjʉ́ɔ yúu mi pʉʉ jʉ́ɔnɛ lɑɑ. 24Lɑ́ ŋ kɛ ɛ́sẅíi wʉ́ʉ, nɛzɑ́ɑ pɛŋɡɛ́mndʉ̈ɔꞋ-Sɛ́, mbɑ pɛfɔɔ kɑ ńtsɑ́ɑ nɛjʉ́ɔ mɛnu mi pʉʉ jʉ́ɔnɛ lɑɑ tɛꞋ, lɑ́ ḿbɔɔ jʉ́ɔ, ńtsɑ́ɑ nɛzúꞋ mɛnu mi pʉʉ sɛ́ ńzúꞋ lɑɑ, lɑ́ ḿbɔɔ zúꞋ.»
Kɔŋ Sɛ́, mbɑ mɔ́ɔmɑ́ wu
25Wɛcɔ́ ŋkyɛ́Ꞌtɛ nɛpʉ́ʉ-Mɔ̌sɛ̂ɛ zúꞋ sẅiŋɛ-Yɛ́su tɛ ńdɔ sɛ́, ŋ́kwɑꞋlɛ wɛ́, ḿbíkŋɛ wɛ́ ŋɡɔ: «Cícɑ, ɛ́ píkŋɛ ŋɡɔ ŋ ɡɛ yɑ́ɑ ŋ́ɡɔ ku lɑ́ ŋ́ɡẅɛɛ luk kɛ́mɛ?» 26Yɛ́su zúꞋ pɔ́Ꞌɔ, ńcú mbɔ̌ wɛ́ ŋɡɔ: «Ɔ fúŋ yú ŋwɑꞋnɛ-Sɛ́ ńzúꞋ pɔ ŋɡɔ ku?» 27A pʉ̈ɔt ŋɡɔ: «Ɛ fúŋ ńzúꞋ ŋɡɔ: Kɔŋ Tsɑpʉɔ Sɛ́ wu nɛ́ ŋɡɔŋ tʉ́m yú tsʉʉ, ńtík pɔ wɛ́ mbi nǔu yú kʉ̈ɔ́ lɑ́, ḿbɛn ńdɔk mɛtʉʉ mú tsʉʉ ɛ́fɑꞋ mbɔ̌ wɛ́, ńzɑ́p kwɑŋɛ yú ndɑꞋ nǔu wɛ́, ḿbɛn ŋ́kɔŋ mɔ́ɔmɑ́ wu ŋumɛsɔŋ pɑ́Ꞌ túmbʉʉ yú lɑ́». 28Yɛ́su cú mbɔ̌ wɛ́ ŋɡɔ: «Ɔ pʉ̈ɔt sʉ́Ꞌnɛ, ɡɛ pɔ́Ꞌɔ, pʉʉ Sɛ́ lɑ́Ꞌnɛ ńtsʉ́Ꞌ ńnɑ́ŋ.»
29Ŋu ɛ̂wɑ́ pɔ́ ńzɔŋ tú yɛ́, ńcú ŋɡɔ: «Ɛ́ pʉ́ɔ lɑ́ tɛ ḿbɔŋ, lɑ́ mɔ́ɔmɑ́ mɔ ŋumɛsɔŋ pɑ́Ꞌɑ ḿbɔ́ wɔ̌?» 30Yɛ́su lɔk sɑknɛkɛt ḿbʉ̈ɔt ŋɡɔ: «Wɛcɔ́ ŋu kɑ lɑ́Ꞌ ɛ́fú Yɛlúsɑlɛm, ḿbɔ́ ńcúŋ nɛ́ Yɛ́líkɔ́, pɛtsɔ́ŋ ɡẅɛɛ wɛ́ sɛ̂ndúŋ, ńcẅɛ́ɛ yúu pɛ́, ɛ́sɔt mɛndẅí nǔu wɛ́, ńtswɑ́ɑ wɛ́ ḿbʉ̈ɔ́Ꞌtɛ tɛ ɑ tsʉꞋ ŋ́ɡʉ pɔ nɛpfú pɔ́p mɛꞋ wɛ́ ŋ́kʉɔ.»
31«Wɛcɔ́ nɔŋpɔꞋ wɛ Yúdɑ ɡɛ ḿbɔ́ ńdɛɛ zúꞋu, ńjʉ́ɔ ŋu ɛ̂wɑ́ nɔɔ sɛ́, ɑ lʉ́ɔꞋ, ńdɔk yɛcɔ́ ɡúŋ-ndúŋ, ńdɔk ńdɛɛ. 32Ɛ́ pɛn ŋɡɔ ńdɑ́ɑtɛ, wɛcɔ́ ŋu nǔu njẅɛt-Lɛ́vi, ẅi pɔ́p fɑꞋnɛ ndɑ́-nɛnɔŋpɔꞋ, tɔ́ yɛ́ tɛ ŋ́kúu zúꞋu, ńjʉ́ɔ ŋu ɛ̂wɑ́ nɔɔ, ɑ pɛn ŋ́ɡɛ yɛ́ pɔ pɔ́Ꞌɔ, ńdíꞋ, ńdɔk yɛcɔ́ ɡúŋ-ndúŋ, ńdɔk ńdɛɛ. 33Lɑ́, wɛcɔ́ ŋu-Sɑmɑlîi pɔ́ ŋ́ɡʉ nɛ́ nɛnɛn, ŋ́ɡʉ tɛ ŋ́kúu zúꞋu, ńjʉ́ɔ wɛ́, mɛjʉ́ŋ mɛ́ kɔ́ wɛ́. 34A tɔ́ nɛjɔ́ŋ wɛ́, ńdɔk mɛluꞋ suk mɛfʉ́ŋ mɛ́, ńdɔk mɛɡwɛ́t ńcʉ̈ɔꞋ, ńdɔk yúu ndẅí ŋ́kút, tɛ ŋkɑ́ kuꞋ ɑ ńtíi wɛ́ ndǔ nɑɑ ẅí ɑ ɡɔ ńtɔ́, ńnɑ́ŋ ndǔ, ńdɔk wɛ́ ŋ́ɡʉ tɛ ŋ́kúu ndɑ́ yi pɛɡʉʉ píinɛ, lɑ́ ńdɛ́ zúꞋu, ńdɛ́ lɑ́Ꞌ ńdíŋɛ wɛ́. 35Njí ɡɛ ŋ́kiɛ, ɑ jʉ́ɔ ŋɡɑŋndɑ́, ńdɔɔ ŋkɑ́p pɑk pɛ́pɑ́, ŋ́ɡɑ́ mbɔ̌ wɛ́, ńcú ŋɡɔ: Kɔ ŋkɑ́p yɔ, ńtsʉ́Ꞌ ḿbɔ́ ńdɔk ńzɔŋ ŋu wɔ. Ɛ́ lɑɑ ńtsʉ́Ꞌ ŋ́kʉ̈ɔ́k tɛ ɔ kẅiꞋ pɔ lɑ́ɑ lɑ́, mbɔ mɔ ŋ́ɡɛ tsʉꞋ nɛpɛn nzʉʉ, tsɔ́Ꞌ, ŋ́ɡɑ́ mbɔ̌ ɡu.»
36Yɛ́su cú pɔ́Ꞌɔ, ḿbɛn ḿbíkŋɛ ŋkyɛ́Ꞌtɛ nɛpʉʉ-Sɛ́ ɛ̂wɑ́ ŋɡɔ: «Ɔ kwɑŋɛ yú ŋɡɔ ɛ́ ɡʉ nǔu pʉɔ pɔnɛ pɛtɑ́t, pɑ́Ꞌɑ wɔ̌ pɔ́nɛ nǔu, ḿbɔ́ pɑꞋ mɔ́ɔmɑ́ ŋu ẅí pɛtsɔ́ŋ kɑ ɡẅɛɛnɛ wɛ́ lɑɑ?» 37A cú ŋɡɔ: «Ŋ kwɑŋɛ ŋɡɔ ɑ ŋu ẅi ɑ kɑ tsɑ́ɑnɛ mɛjʉ́ŋ mɛ́, ńzɔŋ wɛ́.» Yɛ́su cú mbɔ̌ wɛ́ ŋɡɔ: «Gʉ, kwɑꞋ ɡu yú nɑ́ŋ ŋ́ɡɛ yú pɔ́Ꞌɔ.»
Mɑ́ɑtɑ pɔ́p Mɑlíyɑ kúkŋɛ Yɛ́su ndɑ́ pɔ́p
38Yɛ́su pɔ́p ɡɑŋku pɛ́ ɡɛ ńcʉ́ɔ sɛ̂ndúŋ ḿbɔ́ ŋ́ɡʉ, ŋ́kúu tsɛt yɛcɔ́ lɑ́Ꞌ. Wɛcɔ́ mɑŋɡɛ́ ẅi pɛ́ fúŋnɛ wɛ́ ŋɡɔ Mɑ́ɑtɑ kúkŋɛ wɛ́ ndɑ́ yɛ. 39Mɑ́ɑtɑ kɑ ɡẅɛɛ mɔ́ɔmɑ́ wɛ wɛ mɑŋɡɛ́, lík yɛ́ pɔ́ ŋɡɔ Mɑlíyɑ. Yɛ́su tɔ́ tɛ ńnɑ́ŋ sɛ́, Mɑlíyɑ tɔ́ ńnɑ́ŋ nɛjɔ́ŋ yɛ́, ḿbɔ́ ńzúꞋ sẅiŋɛ yɛ́. 40Mɑ́ɑtɑ pɔ́ ḿbúꞋ mbʉʉ yɛ nɛniitɛ yúujʉ́, ńnɑ́ŋ tɛ ńtɔ́ nɛjɔ́ŋ Yɛ́su ńcú mbɔ̌ wɛ́ ŋɡɔ: «Tsɑpʉɔ, tɛ ɔ jʉ́ɔ yú ŋɡɔ ɛ́ pɔ́ŋ pɑꞋ Mɑlíyɑ lɑ́Ꞌnɛ ŋ́ɡʉ ńnɑ́ŋ zɑ́Ꞌɑ, ŋ́ɡɔ́ɔ ńnɑ́ fɑꞋ mbɔ̌ mɔ zɛ́nɛ mɔ? Cú ŋɡɔ ɑ tɔ́ ńcẅɛ́lɛ́ wɑ́ɑ lɑ́!» 41Yɛ́su cú ŋɡɔ: «Mɑ́ɑtɑ, Mɑ́ɑtɑ, ɔ púꞋ mbʉʉ yu, ḿbɔ́ ńjʉ́ɔ ŋɡʉ̈ɔ́Ꞌ nǔu mɛyúu tɛ ńzɑ́ɑ. 42Lɑ́ tɑ́Ꞌ yúu ɡú, ḿbɔ́ yɛ́ tʉʉ ndɛn, Mɑlíyɑ kɑŋ yîyɑ́, ḿbɔ́ ŋu pɔɔ fú mbɔ̌ wɛ́ ńcẅɛɛtɛ pɔ́.»
Айни замон обунашуда:
Lúkɑ́shi 10: JGO
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
CABTAL, 2017