Lúkɑ́shi 24
24
Yɛ́su zẅíimɛ nǔu nɛvú
(Mɑtʉ̈ɔ 28.1-9; Mɑ́lɛ́kúshi 16.1-8; Jɑ̂ŋ 20.1-10)
1Nduŋmbi lɛ́Ꞌ, nǔu ŋɡɑplɑ́Ꞌ ɡɛ ḿbɔ́, pɑŋɡɛ́ ɛ̂pɑ́ mʉ́ʉ mbɑꞋmbɑꞋɑ́, ńdɔk lɑmɛ́ndɑɑ yi pɔ́p kɑ niitɛ́nɛ ŋ́ɡʉ nɛ́ zʉꞋ-nɛshi. 2Ŋ́ɡʉ tɛ ŋ́kúu zúꞋu, ńjʉ́ɔ, mbɔ pɛ́ kɑ fú ntsu-nɛshi, ńtsʉ́ʉ mɑ́mɑ́ ŋɡɔꞋ yí ɛ́ ḿbɔ́nɛ zúꞋu. 3Pɔ́p jɛ́Ꞌ ŋ́kúu tsɛtú, ŋ́kɛ́ ḿbɔɔ pfú-Tsɑpʉɔ Yɛ́su jʉ́ɔ. 4Pɔ́p kɑ tʉ́ʉ ńdíŋɛ zʉꞋ ɛ́ pɔ́ ŋ́kʉꞋnɛ wɔ́p, pɔ́p ɡɔ́ɔ ńjʉ́ɔ pʉɔ pɛ́pɑ́ cẅɛt, ḿmɑꞋ mɛndẅí ɛ́ fúk tɛ ŋwɑŋɛ. 5Pɔ́p pɔ́k tɛ ńtsʉ́Ꞌ ńdíŋɛ pɔ sɛ́, lɑ́ pʉɔ ɛ̂pɑ́ píkŋɛ wɔ́p ŋɡɔ: «Pʉʉ tɔ́ tsɛtsɛt pɛpfú sɛ́, ńdɔ́ɔ ŋu ẅí ɑ ntʉʉ mɛlɑ́Ꞌkʉ̈ɔ́? 6A kɑ́ pɛ́t zɑ́Ꞌnɛ pɔ́, ɑ zẅíimɛ nǔu nɛvú. Pʉʉ zɛɛ ŋ́kẅíitɛ nu yi ɑ kɑ pɔ́ ńcú mbɔ̌ pʉʉ ŋkɑ́ yi pʉʉ pɛ́pɔ́p kɑ pɛ́tnɛ Ŋɡɑlilɛɛ. 7A kɑ cú ŋɡɔ: Ɛ́ sɛ́ ḿbíkŋɛ ŋɡɔ pɛ́ fɛn Mɔ́ɔ-Ŋu mbɔ̌ pʉɔ kɛpɔŋ, pɔ́p kẅii wɛ́ nǔu tʉ́ mbɑ́ŋtɛ pɑ́ŋtɛ́nɛ, ɑ zẅíimɛ nǔu nɛvú nǔu mbɑ́ɑtɛ lɛ́Ꞌ pɛ́tɑ́t.»
8Pɔ́p zúꞋ pɔ́Ꞌɔ, ŋ́ɡɔ́ɔ ŋ́kɛ́ ŋ́kẅíitɛ ŋɡɔ, ɛ́ mɛnu mi Yɛ́su kɑ zɛɛ ɛ́sẅíi wɔ́p, 9ɛ́fú zúꞋu, ŋ́ɡʉ ḿbɛ́ɛtɛ mɛnu tsʉʉ mi ɛ́ lɛɛnɛ, ɛ́sẅíi ɡɑŋku pɛ́ ntsɔ̌pmɔꞋ nɛ́ nɛɡɛ́m mbɑ mbɔ̌ pɛcɔ́ pʉɔ nǔu ku yɔ́p. 10Pɑŋɡɛ́ ɛ̂pɑ́ ḿbɔ́ Mɑlíyɑ ẅi ɑ ḿbɔ́ ńnɑ́ŋ Mɑkdɑlɑ, ŋ́ɡɛ Jɑ̂ɑnɛ, mbɑ Mɑlíyɑ mɑ́ pɛ́ Jɑ̂k, pɔ́p pɛcɔ́ pɑŋɡɛ́. Pɔ́p pɛ́ɛtɛ mɛnu ɛ̂mɑ́ ɛ́sẅíi ɡɑŋntúu-Yɛ́su. 11Pɔ́p zúꞋ ɛ́ pɔ́ pɔ pɑꞋ njʉɔ lɑ́, pɔ́p pɔɔ pɛ́m. 12Lɑ́, Pyɛ̂ lɔ sɛ́, ŋ́kʉɔ tɛ ŋ́kúu zʉꞋ-nɛshi, ŋ́ŋɔ́Ꞌnɛ sɛ́, ńjʉ́ɔ pɔ ndɑꞋ yúu-ndẅí yi pɛ́ kɑ lɔknɛ ŋ́kɑ́tɛ pfú-Yɛ́su, ɛ́ nɔɔ nǔu yɛcɔ́ ɡúŋ. Ŋ́ɡɔ ḿbɛn, ɛ́ nɛn ŋ́kʉꞋnɛ wɛ́, ɑ pɔɔ ḿbɔ́ ńjí yúu mi ɛ́ lɛɛnɛ pɔ́.
Yɛ́su cẅɛt mbi ɡɑŋku pɛ́ pɛ́pɑ́, sɛ̂ndúŋ-Ɛmɑẅis
13Ɛ́ kɑ pɛn ḿbɔ́ pɔ lɛ́Ꞌ ɛ̂yɑ́, pɛcɔ́ pʉɔ pɛ́pɑ́, nǔu ku-Yɛ́su lɔ sɛ́ Yɛlúsɑlɛm, ḿbɔ́ ŋ́ɡʉ nɛ́ yɛcɔ́ lɑ́Ꞌ yi pɛ́ fúŋnɛ ŋɡɔ Ɛmɑwûs. Nɛɡʉ tɛ ŋ́kúu zúꞋu pɔ nɛnɛn hɑ́wɑ yɛ́pɑ́. 14Ńnɛn ḿbɔ́ sẅiŋɛ nǔu mɛnu tsʉʉ mi ɛ́ kɑ lɛɛnɛ. 15Ŋkɑ́ pɔ́p kɑ pɔ́ sẅiŋɛ, ḿbɔ́ ńzɔŋɛ lɑ́, Yɛ́su ɡɔ́ɔ ńtɔ́ yɛ́ ŋ́kẅɛ́ɛtɛ wɔ́p sɛ̂ndúŋ, pɔ́p pɛpɔ́p pɔ́ ńnɛn. 16Lɑ́, yɛcɔ́ yúu tɑɑtɛ, pɔ́p pɔɔ wɛ́ lii. 17Yɛ́su píkŋɛ wɔ́p ŋɡɔ: «Pʉʉ nɛn ńzɔŋ pɔ kʉ̈ɔ́ pɛꞋnɛ?» Pɔ́p zúꞋ ńtʉ́ʉ, ḿmɑꞋ mɛjʉ́ŋ, ɛ́sɑ́ŋɛ tú. 18Wɛcɔ́ tɑ́Ꞌ nǔu pɔ́p, lík yɛ́ pɔ́ ŋɡɔ Kɛlɛ́ɔpɑs píkŋɛ wɛ́ ŋɡɔ: «Pʉɔ tsʉʉ Yɛlúsɑlɛm jí yúu mi ɛ́ kɑ ɡɛnɛ Yɛlúsɑlɛm nǔu mɛlɛ́Ꞌ mɔ, tɛ ɛ́ tsʉ́Ꞌ pɔ ndɑꞋ ɡu kɛkʉ̈ɔ́?»
19A píkŋɛ wɔ́p ŋɡɔ: «Kʉ̈ɔ́ ŋ́ɡɛnɛ?» Pɔ́p cú ŋɡɔ, pɛk lɑ́Ꞌ ḿbɔ́ ḿmɑɑ pɔ mɛnu mi ɛ́ kɑ ɡɛnɛ Yɛ́su ŋu-Nɑ̌ɑzɑlɛt. A ḿbɔ́ kwɑꞋ ŋɡɛ́mndʉ̈ɔ́Ꞌ-Sɛ́ wɛ ɡwɛ́, nǔu mɛfɑꞋ-mɛ́, mbɑ nǔu sẅiŋɛ yɛ́ mbi Sɛ́ mbɑ mbi pʉɔmɛsɔŋ. 20PɑꞋ Pɛtɑ́tndɑ́-pɑnɔ́ŋpɔꞋ pɔ́p pɑsɑ́Ꞌ lɑ́Ꞌ pɛk kɑ cɑklɛ wɛ́ mbɔ̌ Pilɑ́tu ŋɡɔ pɛ́ ɡʉ ŋ́ŋɑk wɛ́, ńjẅí wɛ́. Pɛ́ kɑ ɡɔ́ɔ ŋ́kɛ́ ŋ́kẅii wɛ́ nǔu tʉ́ Mbɑŋtɛ pɑ́ŋtɛ́nɛ. 21Lɑ́ mbɔ pɛk m̄bɔ́ ŋ́kwɑŋɛ ŋɡɔ jʉ́ ɡɛnɛ ńdɑ́Ꞌ ńzɑ́Ꞌ ŋkʉ-ŋɡʉ̈ɔ́Ꞌ, lɔ́ŋ-Islɑɛ̂l. Mɔ mɛnu ɡɛ, ɛ́ ŋkɔ̂ɔnɛ ḿbɔ́ lɛ́Ꞌlɑ́Ꞌ yɛ́tɑ́t. 22Ɛ́ kɑ́ pɔ́ ndɑꞋ pɔ́Ꞌɔ pɔ́, pɛcɔ́ pɑŋɡɛ́ tsɛtsɛt pɛk lɑ́Ꞌ ŋ́kʉꞋnɛ wɛk. Pɔ́p lɑ́Ꞌ ḿmʉ́ʉ ŋkɔ́Ꞌnjí lɔ́Ꞌnɛ, ŋ́ɡʉ zʉꞋ yi pɛ́ kɑ lẅɛꞋnɛ wɛ́ zúꞋu, 23ḿbɔɔ pfú yɛ́ jʉ́ɔ, ḿbɛn nzʉʉ ɛ́sẅíi wɛk ŋɡɔ pɔ́p kúu zúꞋu, Pɛcʉ̈ɔ́Ꞌ-Sɛ́ cẅɛt mbi pɔ́p, ńcú ŋɡɔ Yɛ́su pɔ́ ntʉʉ! 24Pɛcɔ́ pʉɔ pɛk lɑ́Ꞌ ńzúꞋ pɔ́Ꞌɔ, ńdɔ sɛ́, ḿbɛn ŋ́ɡʉ yɔ́p nɛshi, ńjʉ́ɔ ɛ́ pɔ́ pɔ ndʉ́ŋndʉŋ pɑꞋ pɑŋɡɛ́ ɛ̂pɑ́ lɑ́Ꞌnɛ ɛ́sẅíi wɔ́p, lɑ́ pɔ́p kɛ́ ḿbɔɔ Yɛ́su jʉ́ɔ.
25Yɛ́su ɡɔ́ɔ ŋ́kɛ́ ńcú mbɔ̌ pɔ́p ŋɡɔ: «Pʉɔ kɛ́ jínu. Pʉʉ kɑ́ pɔ́ ɛ́fɛ́Ꞌnɛ ḿbɛ́m mɛnu tsʉʉ mi pɛŋɡɛ́mndʉ̈ɔ́Ꞌ-Sɛ́ kɑ ŋwɑꞋnɛnɛ pɔ́.» 26Pʉʉ kɑ́ jí ŋɡɔ, ɛ́ kɑ pɔ́ ḿbíkŋɛ ŋɡɔ Nzɑ́Ꞌŋkʉ piitɛ ńjʉ́ɔ ŋɡʉ̈ɔ́Ꞌ lɑ́ ŋ́kúu tsɛt nɛɡúꞋ wɛ pɔ́ kɛ? 27Ńcú pɔ́Ꞌɔ, ńzɛ nɛkyɛ́Ꞌtɛ mɛnu tsʉʉ mi ɛ́ tsɛt ŋwɑꞋnɛ-Sɛ́ ḿbɔ́ ńdíŋɛ wɛ́, ɛ́sẅíi wɔ́p, ńzɛ nǔu mɛŋwɑꞋnɛ-Mɔ̌sɛ̂ɛ, ḿbɑ́ɑtɛ ŋ́kúu tsɛt mɛ́ pɛŋɡɛ́mndʉ̈ɔ́Ꞌ-Sɛ́. 28Pɔ́p pɛ́ pɔ́p ɡʉ tɛ ḿbɔ́ ŋ́kúu lɑ́Ꞌ yi pɔ́p pɛ́pɑ́ kɑ pɔ́ ŋ́ɡʉ zúꞋu. Pɔ́p jʉ́ɔ ɑ lɔɔ pɔ pɑꞋ ɑ ḿbɛn ńnɛn tɛ ŋɡɑ sɑk. 29Lɑ́ pɔ́p ɡẅɛɛ wɛ́, ŋɡɔ pɔ́p pɛpɔ́p lɛ́, mbíꞋŋɡɔ túꞌ tsʉ́Ꞌ ɛ́sʉ́ʉ sʉ́ʉnɛ, zɑꞋ lɛɛ mɔ́. A pɛ́m pɔ́p pɛpɔ́p kúu ndɑ́ yi pɔ́p kɑ pɔ́ ŋ́ɡʉ nɛ zúꞋu. 30Ŋkɑ́ nɛjʉ́ yúu ɡɛ ŋ́kuꞋ, pɔ́p nɑ́ŋ sɛ́, ɑ pɛ́ɛ mbɛlɛ̂ɛt, ŋ́ɡɑ́ pɑ́Ꞌlɑ́ mbɔ̌ Sɛ́, ḿbʉ̈ɔ́Ꞌtɛ ŋ́ɡɑ́ mbɔ̌ pɔ́p. 31Pɔ́Ꞌ mík mɔ́p ɡɔ́ɔ ŋ́kɛ́ ńdɛ́ɛnɛ pɔ́p lii wɛ́, ɑ ɡɔ́ɔ ḿbɛ́. 32Pɔ́p shɔtnɛ ńcú tsɛtsɛt pɔ́p ŋɡɔ: «Yɔ lɔk ḿbɔ́ yúu mi ɛ́ lɑ́Ꞌnɛ ŋ́ɡɛ lɑ́ sẅiŋɛ yɛ́ kúutɛ wǔu ŋkɑ́ yi pɛkŋɛ lɑ́Ꞌnɛ ḿbɔ́ sɛ̂ndúŋ ɑ pɔ́ ŋ́kyɛ́Ꞌtɛ nu-Sɛ́ ɛ́sẅíi wǔu lɑ́!» 33Pɔ́p lɔ sɛ́ pɔ ŋkɑ́ ɛ̂yɑ́, ńcʉ́ɔ sɛ̂ndúŋ, ḿbɛn ḿbɛn Yɛlúsɑlɛm, ŋ́kẅɛ́ɛtɛ ɡɑŋku-Yɛ́su ntsɔ̌pmɔꞋ nɛ́ nɛɡɛ́m, mbɔ pɔ́p pɛcɔ́ pʉɔ-Yɛ́su cúꞋlɛ. 34Ŋ́kẅɛ́ɛtɛ wɔ́p pɔ́Ꞌɔ, pɔ́p sẅíi wɔ́p ŋɡɔ: «Ɛ́ nɛ́nẅín ŋɡɔ Ndɛ zẅíimɛ nǔu nɛvú, Símɔ̂ŋ lɑ́Ꞌnɛ ńjʉ́ɔ wɛ́.» 35Pɔ́p pɛn ḿbɛ́ɛtɛ yɔ́p yúu mi pɔ́p lɑ́Ꞌnɛ ńtɔ́ sɛ̂ndúŋ ńjʉ́ɔ, ŋɡɔ pɔ́p lɑ́Ꞌ ŋ́ɡɔ́ ńdii wɛ́, mbɔ ɑ pɛ́ɛ mbɛlɛ̂ɛt tɛ ḿbɔ́ ŋ́ɡɑp.
Yɛ́su cẅɛt mbi ɡɑŋku pɛ́
(Jɑ̂ŋ 20.19-23)
36Pɔ́p pɛ́t ɛ́sẅíŋɛ sẅiŋɛnɛ, Yɛ́su ɡɔ́ɔ ńcẅɛt ńtʉ́ʉ tsɛtsɛt pɔ́p, ńcɛꞋlɛ wɔ́p ŋɡɔ: «Mbɔ́tnɛ pɔ́ nɛ́ pʉʉ!» 37Lɛ́m yɔ́p sɑ́ɑnɛ. Pɔ́p pɔ́k, ńzɛ ḿbɔ́ ŋ́kwɑŋɛ pɔ ŋɡɔ ɛ́ jíjʉ́ŋ-ŋu. 38Lɑ́ Yɛ́su cú mbɔ̌ pɔ́p ŋɡɔ: «Lɛ́m yʉ́ʉ sɛ́ ńtsɔ́Ꞌɔnɛ tsɔ́Ꞌnɛ́nɛ mɛlɑ́Ꞌkʉ̈ɔ́? Pʉʉ mʉꞋlɛ mʉꞋlɛ́nɛ mɛlɑ́Ꞌkʉ̈ɔ́? 39Pʉʉ líŋɛ mbɔ́ mɑ́ɑ nɛ mɛku mɑ́ɑ lɑ́ ńjʉ́ɔ, ɑ kwɑꞋ mɔ. Pʉʉ mɔɔtɛ wɑ́ɑ lɑ́ ńzúꞋ, jíjʉ́ŋ-ŋu kɑ́ ɡẅɛɛ mbɑp-mbʉʉ pɔ́, ŋ́kɛ́ ḿbɔɔ mɛtsẅí ɡẅɛɛ, pʉʉ kɛ ńjʉ́ɔ pɑꞋ, m bɛn ŋ́ɡẅɛɛ mbɑp-mbʉʉ nɛ mɛtsẅí.» 40A ɡɔ́ ńcú ḿbɔ́ ńnyɛt wɔ́p nɛ́ mbɔ́ mɛ́ pɔ́p mɛku mɛ́. 41Pɔ́p pɔ́ ńtsɑ́ɑtɛ tɛꞋ lɑ́ ɛ́ pɛ́t ŋ́kʉꞋnɛ wɔ́p kʉꞋnɛ́nɛ, pɔ́p cú ŋɡɔ kɛ ɛ́ nu ɔ́ɔ? Yɛ́su píkŋɛ wɔ́p ŋɡɔ: «Pʉʉ ɡẅɛɛ yúu kwɛ́tnɛ zɑ́Ꞌnɛ?» 42Pɔ́p lɔ́ɔ kɛ́m-shú yi tɔɔnɛ ŋ́ɡɑ́ mbɔ̌ wɛ́. 43A cẅɛ́ɛ, ńtʉ́ʉ pɔ mbi pɔ́p ŋ́kwɛ́t.
44A kɑ kwɛ́t tɛ ḿmɛk, ńcú mbɔ̌ pɔ́p ŋɡɔ: «Pʉʉ jʉ́ɔ yúu mi ŋ kɑ pɔ́ ɛ́sẅíi wʉ́ʉ, ŋkɑ́ yi pɛkŋɛ kɑ pɛ́tnɛ ńjúk. Ŋ kɑ sẅíi wʉ́ʉ ŋɡɔ ɛ́ sɛ́ ḿbíkŋɛ ŋɡɔ yɛ́t kʉ̈ɔ́ lɑ́ yi pɛ́ kɑ ŋwɑꞋnɛnɛ nǔu mɔ lɑ́ puutɛ. Mɛnu ɛ̂mɑ́ tsʉʉ tsʉʉ mi ɛ́ tsɛt ŋwɑꞋnɛ-Mɔ̌sɛ̂ɛ, mbɑ tsɛt yi pɛŋɡɛ́mndʉ̈ɔ́Ꞌ-Sɛ́ pɔ́p yi mɛzɔpŋki.» 45Ŋ́ɡɔ́ɔ ŋ́kɛ́ ńtsɔ́Ꞌ jínu yɔ́p, ŋ́ɡɛ pɔ́p zúꞋ mɛnu mi ɛ́ tsɛt ŋwɑꞋnɛ-Sɛ́. 46Ńcú ŋɡɔ: «Ɛ́ tsɛt ŋwɑꞋnɛ-Sɛ́ ḿbɔ́ ŋɡɔ: Nzɑ́Ꞌŋkʉ ɡẅɛɛ nɛ lɑ́Ꞌ ńjʉ́ɔ ŋɡʉ̈ɔ́Ꞌ, ḿpfú, lɑ́ Sɛ́ pɛn ńzẅíi wɛ́ nǔu nɛvú nǔu mbɑ́ɑtɛ lɛ́Ꞌ pɛ́tɑ́t. 47Ɛ́ sɛ́ ḿbíkŋɛ ŋɡɔ pɛ́ lɑ́Ꞌ ńdɔk lík yɑ́ɑ, ńcú nu-Sɛ́ mbɔ̌ lɑ́Ꞌ ŋɡɔ mbɑ wɔ̌ lɑ́ kúpmɛ mɑt wɛ, Sɛ́ likŋɛ mɛnu kɛpɔŋ mɛ́. Pɔ́Ꞌɔ, ɛ́ kɛ ńzɛ Yɛlúsɑlɛm.» 48Pʉʉ ɡʉnɛ ŋ́kɛ́ ḿbɔ́ pɑjʉ́ ńjʉ́ɔ, nɛlɔk mɛnu ɛ̂mɑ́ ɛ́sɑt lɑ́Ꞌ. 49Pʉʉ jí ŋɡɔ ŋ ɡɛ ńtɔ́ ńtúu yúu mi Tɑ̌ɑ mɔ kɑ kɑꞋnɛ nɛɡɑ́ mbɔ̌ pʉʉ. Pʉʉ kɛ ńzẅíꞋlɛ pɔ tʉ́sɔŋ tɛ ŋ́kúu ŋkɑ́ yi mɛtʉʉ-Sɛ́ ɡʉ ɛ́fú tʉ́nɛ́pú ńcúŋ ŋ́kúu nǔu pʉʉ.
Yɛ́su kɔ́Ꞌ nɛ tʉ́nɛ́pú
50Yɛ́su cú pɔ́Ꞌɔ, ńdɔk wɔ́p ńcẅɛt, ŋ́ɡʉ tɛ ńtsʉ́Ꞌ nɛkúu Mbɛtɑni, ŋ́kɑꞋ mbɔ́ ŋ́ɡɑ́ tʉ́, ńníꞋ mbɔ́tnɛ nǔu pɔ́p. 51A pɔ́ ńníꞋ mbɔ́tnɛ nǔu pɔ́p pɔ́Ꞌɔ, ḿbɔ́ ŋ́kɔ́Ꞌ ŋ́ɡʉ nɛ́ tʉ́nɛ́pú. 52Pɔ́p tsʉ́Ꞌ ńtʉ́ʉ zúꞋu ḿbɔ́ ŋ́ɡúꞋlɛ wɛ́, tɛ ɛ́ kuꞋ, pɔ́p lɔk tsɑ́ɑtɛ ḿbɛn nzʉʉ nɛ́ Yɛlúsɑlɛm. 53Ŋ́ɡʉ tɛ ŋ́kúu zúꞋu, ŋ́kɛ́ ńtsʉ́Ꞌ ńnɑ́ŋ pɔ tsɛt ndɑ́-nɛnɔŋpɔꞋ ŋkɑ́ tsʉʉ, ŋ́ɡúꞋlɛ Sɛ́.
Айни замон обунашуда:
Lúkɑ́shi 24: JGO
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
CABTAL, 2017