Lúkɑ́shi 23
23
Yɛ́su mbi Ŋɡɔ́mnɑɑ Pilɑ́tu
(Mɑtʉ̈ɔ 27.2, 11-14; Mɑ́lɛ́kúshi 15.1-5; Jɑ̂ŋ 18.28-38)
1Gɑŋ-cúꞋlɛ cú pɔ́Ꞌɔ, ńdɔ sɛ́ pɛtsʉʉ, ńdɔk Yɛ́su ŋ́ɡʉ nɛ́ mbi-Pilɑ́tu. 2Ńzɛ nɛfɛn wɛ́ ŋɡɔ: «Pɛk jʉ́ɔ ŋu wɔ pɔ́ ńjúk ŋ́kɑ́t tsɛt ŋɡɔŋ wɛk ḿbʉ́ʉpɛ tú-lɑ́Ꞌ, ńtɔꞋ wɔ́p nɛmɑꞋ ntsup-ntʉ̈ɔꞋ, ŋ́ɡɑ́ mbɔ̌ kɑ́sɑ-Pɑlɔ́mɑ. A pɛn ḿbɔ́ ńcú ŋɡɔ ɑ Nzɑ́Ꞌŋkʉ ẅí Sɛ́ kɑ kɑꞋnɛ mbɔ̌ pɛk, ńdɔk ńcú ŋɡɔ ɑ fɔɔ.» 3Pilɑ́tu píkŋɛ Yɛ́su ŋɡɔ: «Ɔ fɔɔ-Pɑyúdɑ pɔ?» Yɛ́su tsɔ́Ꞌ mbɔ̌ wɛ́ ŋɡɔ: «Ɔ cú pɔ́Ꞌɔ.» 4Pilɑ́tu cú mbɔ̌ Pɛtɑ́tndɑ́-pɑnɔ́ŋpɔꞋ mbɑ mbɔ̌ lɑ́Ꞌ ŋɡɔ: «Mɔ sɛ́ ḿbɔɔ ńjʉ́ɔ yúu mi ŋu wɔ fɑɑnɛ́nɛ tɛ ḿbɔ́ pɛ́ cú ŋɡɔ ɑ vu ntsɑŋ pɔ́.» 5Lɑ́ pɔ́p tsúŋ ńnʉʉ nʉʉnɛ, ńcú ŋɡɔ: «A sɛ́ mbɔ́ ŋ́kɑ́t ɛ́swɛtɛ pʉɔ ŋɡɔ pɔ́p tʉʉ tú. A kɑ zɛ Ŋɡɑlilɛɛ, ŋ́kúu Jẅidɛ̂, ɛ́ pʉ́ɔ lɑɑ ɑ lɔknɛ ńtɔ́ tɔ́nɛ tɛ ŋ́kúu zɑ́Ꞌnɛ lɑɑnɛ.» 6Pilɑ́tu zúꞋ pɔ́Ꞌɔ, ḿbíkŋɛ ŋɡɔ: «A ŋu-ŋɡɑlílɛɛ pɔ?»
7Pɔ́p cú ŋɡɔ ɔ́ɔŋ. A túu Yɛ́su ŋ́ɡɑ́ mbɔ̌ fɔɔ Ɛlɔ̂dɛ, mbíꞋŋɡɔ jʉ́ kɑ pɔ́nɛ ɛ́sɑ́Ꞌ yîyɑ́ pɑk-ŋɡɔŋ, ŋ́ɡɔ ḿbɔ́, mbɔ ɑ kɑ tɔ́ tɛ ḿbɔ́ Yɛlúsɑlɛm nǔu mîmɑ́ mɛlɛ́Ꞌ. 8Ɛlɔ̂dɛ jʉ́ɔ Yɛ́su, ḿbuu ńtsɑ́ɑtɛ tɛꞋ, mbíꞋŋɡɔ ɑ kɑ pɔ́ ńtswɛ́ ńzúꞋ pɛ́ pɛ́ɛtɛ mɛnu nǔu wɛ́ tɛꞋ, ɑ pɔ́ ńtsɑ́ɑ nɛjʉ́ɔ wɛ́. A jʉ́ɔ wɛ́ pɔ́Ꞌɔ, ŋ́kwɑŋɛ ŋɡɔ, líkcɔ́ Yɛ́su ɡɛ yɛcɔ́ n dɑɑ kɑ́ jʉ́ɔ nu, ɑ jʉ́ɔ. 9Ḿbíkŋɛ wɛ́ nɛ́ mɛnu tɛ ɛ́ zɑ́ɑ tɛꞋ, ɑ kɛ́ ḿbɔɔ yɛcɔ́ tsɔ́Ꞌ. 10Pɛtɑ́tndɑ́-pɑnɔ́ŋpɔꞋ pɔ́p pɑkyɛ́Ꞌtɛ nɛpʉ́ʉ-Mɔ̌sɛ̂ɛ pɔ́ zúꞋu, ḿbuu ḿbɔ́ ńzɑ́p mɛnu tú Yɛ́su tɛꞋ. 11Ɛlɔ̂dɛ pɔ́p pɛmɑ́kɑ́ɑ pɛ́ zɔɔtɛ Yɛ́su, ŋ́ɡwɛ wɛ́ tɛ ńtíi ndẅí-nɛfɔɔ ɛ́sɔ nǔu wɛ́, ńtúu ŋɡɔ, pɛ́ pɛn ńdɔk wɛ́ ḿbɛn ŋ́ɡɑ́ mbɔ̌ Pilɑ́tu. 12Ɛ́ kɑ ɡɔ́ ḿbɔ́ Pilɑ́tu pɔ́p Ɛlɔ̂dɛ pɔ́ nɛ́ mbuu, tɛ ɛ́fú lɛ́Ꞌ ɛ̂yɑ́ pɔ́p tsʉ́Ꞌ pɛsúu.
Pɛ́ ɡɑ́ Yɛ́su ŋɡɔ pɛ́ ɡʉ ńjẅí wɛ́
(Mɑtʉ̈ɔ 27.15-26; Mɑ́lɛ́kúshi 15.6-15; Jɑ̂ŋ 18.39-40; 19.4-16)
13Pɛ́ lɔk wɛ́ ŋ́kúu zúꞋu, Pilɑ́tu fúŋ pɑnɔ́ŋpɔꞋ pɛɡwɛ́, mbɑ pɑsɑ́Ꞌ lɑ́Ꞌ, 14ńcú mbɔ̌ pɔ́p ŋɡɔ: «Pʉʉ lɑ́Ꞌ ŋ́ɡɔ ńdɔk ŋu wɔ ńtɔ́ mbi mɔ, ńcú ŋɡɔ ɑ sɛ́ ḿbʉ́ʉpɛ tú-lɑ́Ꞌ. Ŋ ŋɑk wɛ́ pɔ mbi pʉʉ. Ŋ ɡʉ nǔu mɛnu mi pʉʉ lɑ́Ꞌnɛ ńcú nǔu wɛ, ŋ kɑ́ jʉ́ɔ yɛcɔ́ mɛfɑɑnɛ pɔ́. 15Tɛ mbɑ fɔɔ Ɛlɔ̂dɛ kɑ́ jʉ́ɔ mɛfɑɑnɛ nǔu wɛ́ pɔ́, lɑ́ ɑ pɛn wɛ́ ŋ́ɡɑ́ mbɔ̌ mɔ. N dɔk ńcú ŋɡɔ ŋu wɔ kɑ́ fɑɑnɛ yɛcɔ́ nu pɔ́, tɛ ḿbɔ́ pɛ́ jẅí wɛ́ jẅínɛ pɔ́.»
16Ɛ́ pɔ́Ꞌɔ lɑ́, ŋ ɡɛ tsʉ́Ꞌ ńcú pɛ́ tswɑ́ wɛ́ tswɑ́nɛ, ŋ́ɡɔ́ɔ ńnɑ́ wɛ́ ɑ ɡʉ.
17[Ɛ́ kɑ pɔ́ ŋkɑ́ ndínɑ-Pɑ́skɑ, Pilɑ́tu ɡẅɛɛ nɛcẅɛɛtɛ tɑ́Ꞌ ŋɡɑŋtsɑ́ŋ ŋ́ɡɑ́ mbɔ̌ lɑ́Ꞌ.]#23.17 [Ɛ́ kɑ pɔ́ ŋkɑ́ ndínɑ-Pɑ́skɑ, Pilɑ́tu ɡẅɛɛ nɛcẅɛɛtɛ tɑ́Ꞌ ŋɡɑŋtsɑ́ŋ ŋ́ɡɑ́ mbɔ̌ lɑ́Ꞌ.] Yúu mi pɛ́ ŋwɑꞋnɛ nǔu cú-Ŋɡɔmbɑ̌ɑ lɑɑnɛ kɑ́ pɔ́ tsɛt pɛluŋmbi mɛlwɛn ŋwɑꞋnɛ pɔ́. 18Lɑ́, lɑ́Ꞌ zɛ nɛzɔtnɛ tsʉʉ ḿbɔ́ ɛ́sẅíŋɛ ŋɡɔ: «Gɛ pɛ́ jẅí ŋu wɔ, ɔ nɑ́ Bɑnɑbɑs mbɔ̌ pɛk.» 19Bɑnɑbɑs ɛ̂wɑ́ ḿbɔ́ tsɑ́ŋ ntɛ́ vɑꞋ yi ɑ kɑ mɑꞋnɛ tʉ́sɔŋ, ḿbɛn ntɛ́ pɑꞋ ɑ kɑ jẅínɛ ŋu. 20Pilɑ́tu pɔ́ ńdɔ́ɔ nɛnɑ́ Yɛ́su nɑ́nɛ, lɑ́ ɛ́ lɛɛ pɔ́Ꞌɔ, ɑ pɛn ńcú nu mbɔ̌ lɑ́Ꞌ cúnɛ. 21Lɑ́ lɑ́Ꞌ tsʉʉ kɛ ḿbɔ́ ŋ́kẅiꞋ ḿbíkŋɛ pɔ sẅiŋɛ ńcú ŋɡɔ: «Kẅii wɛ́ nǔu tʉ́ mbɑ́ŋtɛ pɑ́ŋtɛ́nɛ, kɛ ŋ́kẅii wɛ́ pɔ nǔu tʉ́ mbɑ́ŋtɛ pɑ́ŋtɛ́nɛ.» 22Pilɑ́tu cú nu nǔu mbɑ́ɑtɛ yɛtɑ́t ŋɡɔ: «Nu kɛpɔŋ ɑ ɡɛnɛ pɑꞋnɛ ḿbɔ́ kʉ̈ɔ́? Ŋ kɑ́ jʉ́ɔ yɛcɔ́ nu yi ɑ fɑɑnɛ́nɛ tɛ ḿbɔ́ pɛ́ jẅí wɛ́ jẅínɛ pɔ́. Mɔ ńcú pɛ́ lɔk ŋɡwɑɑ ńtswɑ́ɑ wɛ́, n nɑ́ wɛ́ ɑ ɡʉ.» 23Lɑ́Ꞌ kɛ ńdɔk pɔ ŋɡi tɛnnɛ, ńnʉʉ nʉʉnɛ ŋɡɔ pɛ́ kẅii wɛ́ nǔu tʉ́ mbɑ́ŋtɛ pɑ́ŋtɛ́nɛ, tɛ ɛ́ tsɑ Pilɑ́tu. 24A ńzɑ́Ꞌ ntsɑŋ pɑꞋ lɑ́Ꞌ sɛ́ ŋ́kɔŋ. 25Ńnɑ́ ŋu ẅí pɔ́p kɑ pɔ́ ḿbíkŋɛ. Ŋu ẅí ɑ kɑ kúunɛ tsɑ́ŋ ntɛ́ vɑꞋ mbɑ nɛjẅí ŋu, ḿbɛn ŋ́kúu nǔu Yɛ́su, ńtsʉ́Ꞌ ŋ́ɡɑ́ wɛ́ mbɔ̌ pɔ́p ŋɡɔ pɔ́p lɔk wɛ́ ŋ́ɡʉ ŋ́ɡɛ yúu mi pɔ́p ḿbɔ́ ŋ́kɔŋ nɛɡɛ.
Pɛ́ lɔk Yɛ́su ŋ́ɡʉ nɛɡɛ pɛ́ jẅí wɛ́
(Mɑtʉ̈ɔ 27.32-44; Mɑ́lɛ́kúshi 15.21-32; Jɑ̂ŋ 19.17-22)
26Pɛ́ lɔk Yɛ́su ńcʉ́ɔ sɛ̂ndúŋ, ńnɛn tɛ ḿbuutɛ wɛcɔ́ ŋu-silɛɛnɛ, ẅí pɛ́ kɑ pɔ́ ɛ́fúŋ wɛ́ nɛ́ Símɔ̂ŋ, ɑ pɔ́ ɛ́fú ŋkɑ́Ꞌ. Pɑlʉ̈ɔꞋntsɔ ɡẅɛɛ wɛ́, ńdɔk tʉʉ ŋ́ɡɑ́ tʉ́ Mbɑŋtɛ pɑ́ŋtɛ́nɛ-Yɛ́su ŋɡɔ ɑ tíi ńdɔk ńcʉ́ɔ nzʉʉ pɔ́p.
27Lɑ́Ꞌ ḿbɔ́ nzʉʉ tɛ ńzɑ́ɑ, pɑŋɡɛ́ pɔ́ tsɛtsɛt pɔ́p ŋ́kíi ńtʉŋ ŋɡʉ̈ɔ́Ꞌ-Yɛ́su. 28Yɛ́su nɛn tɛ ɛ́shɔtnɛ, ńdíŋɛ wɔ́p ńcú ŋɡɔ: «Nzẅíi-Yɛlúsɑlɛm, kɔɔ pʉʉ lɑɑ wɑ́ɑ, pʉʉ lɑɑ pɔ yʉ́ʉ tú mbɑ yi mbɔ́ŋkʉ̈ɔ́ pʉ́ʉ.» 29Pʉʉ jí ŋɡɔ mɛlɛ́Ꞌ lɑ́Ꞌ sɛ́ ńtɔ́, yi pɛ́ ɡʉ ńcú ŋɡɔ: «Pɛpɔ́ttú pɛŋkɛ́n pɑŋɡɛ́, pɑꞋ pɔ́p ŋ́kɑɑ zɛɛ ḿbí pɔ́, mbɔ pɔ́p ŋ́kɑɑ mɔ́ mɔ́ɔ nɔ́ŋ. 30Ɛ́ ɡʉ ńdɑ́Ꞌ ḿbɔ́ pɔ́nɛ tɛ pʉɔ cú mbɔ̌ mɛmbɑ́t ŋɡɔ: “Pʉʉ kɔkŋɛ ɛ́fyɛ́t wɛk.” Ńcú mbɔ̌ nɛŋkɔ́Ꞌ ŋɡɔ: “Pʉʉ cúŋ ḿbɔɔ wɛ́k.” 31Ńtsɑ́ɑ nɛpfú pɔ́Ꞌɔ, mbíꞋŋɡɔ pɛ́ lɑɑ ŋ́ɡɛ pɑꞋnɛ nǔu tʉ́ fɛ́, mbɔ pɛ́ ɡʉ ńtɔ́ ŋ́kúu nǔu tʉ́ zúunɛ ŋ́ɡɛ ŋɡɔ ku?»
32Pɛ́ kɑ ɡɔ́ ńdɔk Yɛ́su ŋ́ɡʉ, ḿbɑ́ɑtɛ pɛtsɔ́ŋ pɛ́pɑ́ nǔu wɛ, pɑꞋ pɛ́ ɡʉ ńtɛmtɛ ńjẅí wɔ́p pɛpɔ́p. 33Ŋ́ɡʉ tɛ ŋ́kúu nǔu yɛcɔ́ zʉꞋ yi pɛ́ kɑ pɔ́ ɛ́fúŋ ŋɡɔ kɑ́ɑtú, ŋ́kẅii Yɛ́su nǔu tʉ́ mbɑ́ŋtɛ pɑ́ŋtɛ́nɛ, ḿbɛn ŋ́kẅii mbɑ pɛtsɔ́ŋ pɑ́ pɛ́pɑ́, nǔu mɔ́p mɛtʉ́ Mbɑŋtɛ pɑ́ŋtɛ́nɛ. Tɑ́Ꞌ pɔ́ nǔu ɡúŋ-pɔ́-Yɛ́su yi tʉʉ, wɛcɔ́ pɔ́ nǔu ɡúŋ-pɔ́ ŋkẅɛpmɛ. 34Yɛ́su cú ŋɡɔ: «Tɑ̌ɑ mɔ, likŋɛ mɛfɑɑnɛ mɔ́p, mbíꞋŋɡɔ pɔ́p kɑ́ pɔ́ ńjí yúu mi pɔ́p ɡɛnɛ pɔ́.» Pɑlʉ̈ɔꞋntsɔ pinɛ pɔ́p ḿbɔ́nɛ zúꞋu mɑꞋ ńtíitɛ tɛ ńdɔk ŋ́ɡɑp mɛndẅí mɛ́. 35Lɑ́Ꞌ kɑ tʉ́ʉ ḿbɔ́ ńdíŋɛ pɑꞋ pɛ́ kẅiinɛ Yɛ́su. Pɑsɑ́Ꞌ lɑ́Ꞌ pɔ́ ńzɔɔtɛ Yɛ́su ńcú ŋɡɔ: «A kɑ cẅɛ́ɛ pɛcɔ́ pʉɔ ntsu-nɛvú, ɑ pɛn ńcẅɛ́ɛ kwɑꞋ yɛ́ tú, pɑꞋ ɑ lɑɑ ńcú tɛ ɛ́sẅíi nu ŋɡɔ ɑ Nzɑ́Ꞌŋkʉ ẅí Sɛ́ kɑ tsɔ́Ꞌnɛ.» 36Pɑlʉ̈ɔ́Ꞌntsɔ kɑ pɔ́ ḿbɛn ńtuŋɛ wɛ́ ɡúu, ŋ́kẅɛ́Ꞌlɛ mbʉʉ yɔp ńtɔ́ nɛjɔ́ŋ yɛ́, ŋ́ɡɑ́ cícɔ́k mɛluꞋ mbɔ̌ wɛ́. 37Ḿbɔ́ ńcú ŋɡɔ: «Ɔ lɑɑ ḿbɔ́ kwɑꞋ fɔɔ-Pɑyúdɑ, ɔ cẅɛ́ɛ tú yú mbɔ̌ nɛvú.» 38Pɛ́ kɑ ŋwɑꞋnɛ ntɔŋ-nɛvú wɛ́ ŋ́kẅii tú yɛ́.
39Wɛcɔ́ tɑ́Ꞌ nǔu pɛtsɔ́ŋ pinɛ pɛ́ kɑ kẅiinɛ wɔ́p pɛ́ Yɛ́su nǔu mɛtʉ́ Mbɑŋtɛ pɑ́ŋtɛ́nɛ pɔ́ ńzɔɔtɛ wɛ́ ŋɡɔ: «Pɛ́ cú ŋɡɔ ɔ Nzɑ́Ꞌŋkʉ-puꞋ pʉ́ɔ? Cẅɛ́ɛ tú yú mbɔ̌ nɛvú, ńcẅɛ́ɛ yɛk lɑ́.» 40Wɛcɔ́ zúꞋ pɔ́Ꞌɔ, ŋ́kɑkŋɛ wɛ́ ŋɡɔ: «Pɛ́ tɛmtɛ ŋ́kẅii wɛkŋɛ pɛ́ ŋu wɑ́lɑ́ nǔu tʉ́ mbɑ́ŋtɛ pɑ́ŋtɛ́nɛ, ɔ jʉ́ɔ pɔ́Ꞌɔ, ɔ kɑ́ pɔ́k Sɛ́ pɔ́. Ɛ́ ɡʉ nǔu pûu, mbɔ pɛ́ kẅii wûu, ɛ́ pɔ́ kwɑꞋ nɛ́nẅín. 41Pûu pfú mɛnu mûu. Lɑ́ ŋ́ɡʉ nǔu wɛ́, mbɔ ɑ kɑ́ fɑɑnɛ yɛcɔ́ pɔ́.» 42A kɑkŋɛ wɛ́ pɔ́Ꞌɔ, ḿbɛn ḿbúꞋ mbɔ́ mbɔ̌ Yɛ́su ŋɡɔ: «Yɛ́su, ɔ lɑɑ ńdɑ́Ꞌ ńtɔ́ nǔu nɛfɔɔ nú, ɔ pɑ́ɑ nɛlikŋɛ wɑ́ɑ.» 43Yɛ́su tsɔ́Ꞌ ŋɡɔ: «Ɛ sẅíi wú, ɛ́ kwɑꞋ nɛ́nẅín, ŋɡɔ kwɑꞋ lɔ́Ꞌnɛ puu ɡʉnɛ ḿbɔ́ tsɛt zʉꞋ mbɔ́tnɛ-Sɛ́.»
44Mbɔ́t nɛm ɡɛ ŋ́kuꞋ, mɔ́nɛm pɛ́, túꞋ puu sʉ́ʉ tsɛt ŋɡɔŋ tsʉʉ tɛ ŋ́kúu nǔu nɛm yɛ́tɑ́t mbɔ́t njí. 45Ndẅí yi pɛ́ kɑ lɔknɛ ɛ́sɑ́ɑ ndɑ́-nɛnɔŋpɔꞋ, sɑnɛ tsɛtsɛt, ɛ́fú tʉ́ ŋ́kúu sɛ́. 46Yɛ́su nɑ́ŋ nǔu tʉ́ mbɑ́ŋtɛ pɑ́ŋtɛ́nɛ, tɛ ŋ́kíi nɛ́ ŋɡi tɛnnɛ, ńcú ŋɡɔ: «Tɑ̌ɑ mɔ, ŋ ɡɑ́ zẅikŋɛ yɑ́ɑ nǔu mbɔ́ mú. Ńcú pɔ́Ꞌɔ, ŋ́ɡɔ́ɔ ŋ́kɛ́ ńcʉ́ɔ.» 47Tɑ́tndɑ́-pɑlʉ̈ɔ́Ꞌntsɔ-Pɑlɔ́mɑ zúꞋu kɑ jʉ́ɔ mbɑ kʉ̈ɔ́ lɑ́ yi ɛ́ lɛɛnɛ, tɛ yi mbʉ̈ɔt pɔ́ nɛcú ŋɡɔ: «Ŋu wɔ ŋ́kɑɑ fɑɑnɛ.» Sẅiŋɛ yɛ́ ɛ̂yɑ́ ɡɑ́ mɛkuꞋ mbɔ̌ Sɛ́. 48Pʉɔ tsʉʉ pí pɔ́p kɑ nɑ́ɑtɛ́nɛ ńjʉ́ɔ mɔ mɛnu, kɑ tsʉꞋ nɛpɛn nzʉʉ, mbɑ wɔ̌ lɑ́ zẅík ŋɡɔ́ɔ. 49Ŋɡɔŋ pɛsúu-Yɛ́su, tɛ mbɑ pɑŋɡɛ́ pinɛ pɔ́p kɑ fúnɛ Ŋɡɑlilɛɛ cʉ́ɔ nzʉʉ yɛ, kɑ tʉ́ʉ pɔ tɛ nzʉʉ lɑ ńjʉ́ɔ mɔ mɛnu.
Yɔsɛ̂p níꞋ pfú-Yɛ́su tsɛt nɛshi
(Mɑtʉ̈ɔ 27.57-61; Mɑ́lɛ́kúshi 15.42-47; Jɑ̂ŋ 19.38-42)
50-51Wɛcɔ́ ŋu m̄bɔ́ ɡú Yɛlúsɑlɛm, pɛ́ fúŋ wɛ́ ŋɡɔ Yɔsɛ̂p, mbɔ pɛ́ kɑ pí wɛ́ tsɛt yɛcɔ́ tʉ́sɔŋ-Pɑyúdɑ yi pɛ́ fúŋnɛ ŋɡɔ Alimɑtɛ̂ɛ, ḿbɔ́ ŋu sʉ́Ꞌnɛ, ŋ́kúꞋlɛ nɛpʉ́ʉ-Sɛ́ tɛꞋ, ḿbɛn ńtswɛ́ ḿbɔ́ ńzẅíꞋlɛ ŋkɑ́ yi Sɛ́ ɡʉ ɛ́sɑ́Ꞌ mbí. A m̄bɔ́ mbɑ tsɛtsɛt cúꞋlɛ-pɛkɛ́m-ŋɡɔŋ pinɛ pɔ́p kɑ pɔ́nɛ ɛ́sɑ́Ꞌ lɑ́Ꞌ. Lɑ́, ɑ ŋ́kɑɑ pɛ́m nu yi pɛcɔ́ pɛlʉ́m kɑ zɑ́pnɛ ḿbɛn ŋ́ɡɛ nǔu Yɛ́su pɔ́. 52Yɔsɛ̂p ɛ̂wɑ́ ɡʉ ńjʉ́ɔ Pilɑ́tu, ńdɔ́ɔ pfú-Yɛ́su mbɔ̌ wɛ́, ɑ pɛ́m. 53A ɡʉ, ɛ́fú nǔu tʉ́ mbɑ́ŋtɛ pɑ́ŋtɛ́nɛ ŋ́kɔk wɛ́, ńdɔk pɔ́-ndẅí ŋ́kɑ́tɛ wɛ́, ŋ́ɡʉ ńníꞋ tsɛt nɛshi ni pɛ́ kɑ sʉ́Ꞌnɛ ńzɛmɛ zɛmɛnɛ, nǔu ŋɡɔꞋ ɡwɛ́, lɑ́ ḿbɛn ḿbɛ́t kɛ́ níꞋ wɛcɔ́ ŋu tsɛtú. 54A kɑ pɔ́ ńníꞋ pɔ́Ꞌɔ mbɔ́tnjí Fɛlɑ́dɛ̂ɛ, pɔ́p pɔ́ niitɛ mbʉʉ pɑꞋ lɛ́Ꞌnji yɔ́p sɛ́ ŋ́ɡʉ ńzɛ. 55Pɑŋɡɛ́ pinɛ pɔ́p Yɛ́su ḿbɔ́nɛ ńnɛn tɛ ɛ́fú Ŋɡɑlilɛɛ, kɑ cʉ́ɔ nzʉʉ Yɔsɛ̂p tɛ ŋ́kúu nɛshi, ńjʉ́ɔ pɑꞋ ɑ nɔŋnɛ pfú-Yɛ́su pɔ́Ꞌɔ, 56ŋ́ɡɔ́ɔ ŋ́kɛ́ ḿbɛn tʉ́sɔŋ, niitɛ lɑmɛ́ndɑɑ sʉ́Ꞌnɛ, mbɑ mɛcɔ́ mɛɡwɛ́t nɛlɔk ńzɔ́Ꞌ pfú-Yɛ́su. Lɛ́Ꞌ nji zɛ, pɔ́p pɔ́tnɛ ńjẅiitɛ pɑꞋ nɛpʉ́ʉ kɑ pɔ́ ḿbíkŋɛ.
Айни замон обунашуда:
Lúkɑ́shi 23: JGO
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
CABTAL, 2017