Jɑ̂ŋ 2
2
Yɛ́su shʉɔt ŋki ńdɔk ŋ́ɡɛ mɛluꞋ
1Ɛ́ lɛɛ lɛ́Ꞌ pɛ́tɑ́t, yɛcɔ́ lɑ́ɑndɑ́ pɔ́ tʉ́sɔŋ-Kɑ́nɑ, tsɛt pɑk-ŋɡɔŋ-Ŋɡɑlilɛɛ, mɑ́ pɛ́ Yɛ́su pɔ́ zúꞋu. 2Pɛ́ pɛn ɛ́fúŋ Yɛ́su ɡúu pɔ́p ɡɑŋku pɛ́, zʉꞋ-lɑ́ɑndɑ́ ɛ̂yɑ́. 3MɛluꞋ ɡɛ ḿmɛ, mɑ́ pɛ́ Yɛ́su cú mbɔ̌ wɛ́ ŋɡɔ: «Pʉɔ kɑ́ pɛn ŋ́ɡẅɛɛ mɛluꞋ mi pɔ́p ɡʉ ńnɔ́ pɔ́.» 4Yɛ́su pʉ̈ɔt mbɔ̌ wɛ́ ŋɡɔ: «Mɑ́ɑmɑɑ, ɔ cẅɛ́ɛ kʉ̈ɔ́ mbɔ̌ mɔ? Yɑ́ɑ ŋkɑ́ pɛ́t kɛ́ kuꞋ.» 5Pɔ́Ꞌɔ lɑ́, mɑ́ wɛ ɡʉ ńcú mbɔ̌ pɑli pʉɔ ŋɡɔ ɑ lɑɑ ńcú ŋɡɔ: «Pʉʉ ɡɛ pɔ kʉ̈ɔ́ lɑ́ pʉʉ ɡɛ.»
6Mɛcɔ́ mɛkʉŋ-ŋɡɔꞋ pɔ́ zúꞋu mɛ́nɛ́ntúkú. Mi Pɑyúdɑ túꞋnɛ ŋki tsɛtú ńdɔk ḿbʉʉtɛ mbʉʉ yɔp lɑ ŋ́ɡúꞋlɛ Sɛ́. Pɑ́Ꞌ nɛpʉ́ʉ-lɑ́Ꞌ nɔ́p kɑ pɔ́ ḿbíkŋɛ. Ɛ́ kɑ pɔ́ tɛ mbɔ pɛ́ níꞋ ŋki mbɑ lɛ́tɑ ŋkʉ tsɛt tɑ́Ꞌ. 7Yɛ́su cú mbɔ̌ pɑli pʉɔ ŋɡɔ: «Pʉʉ níꞋ ŋki tsɛt mɛkʉŋ mɑ́ tɛ ɛ́ lúu.» Pɔ́p níꞋ ŋki tsɛtú tɛ ɛ́ lúu. 8Yɛ́su ɡɔ́ɔ ŋ́kɛ́ ńcú mbɔ̌ pɔ́p ŋɡɔ: «Pʉʉ shɔ́k wɛcɔ́ ŋkɔ̂ɔnɛ, ŋ́ɡʉ ŋ́ɡɑ́ mbɔ̌ ŋu ẅí ɑ ntɑŋ-ndínɑ.» Pɔ́p shɔ́k ŋ́ɡʉ ŋ́ɡɑ́ mbɔ̌ wɛ́. 9A zẅíꞋ ŋki ẅí ɛ́ shʉɔtnɛ́nɛ ńtsʉ́Ꞌ mɛluꞋ, ḿbɔɔ pɔ́ ńjí zʉꞋ yí mîmɑ́ mɛluꞋ fúnɛ zúꞋu pɔ́, lɑ́ pɑli pʉɔ pínɛ pɔ́p lɑ́Ꞌnɛ ńtúꞋ ŋki pɔ́ ńjí. Ŋu ẅí ɑ ntɑŋ-ndínɑ, fúŋ ŋu ẅí pɛ́ ɡɛnɛ lɑ́ɑndɑ́ yɛ́, 10ńcú mbɔ̌ wɛ́ ŋɡɔ: «Pɛ́ lɔ ḿbiitɛ ŋ́ɡɑ́ pɔ mɛluꞋ sʉ́Ꞌnɛ, tɛ pɛ́ nɔ́ tɛꞋ, lɑ́ pɛ́ ɡɑ́ mi ɛ́ nɑꞋ ḿmɛɛ mɛɛnɛ. Lɑ́ ŋ́ɡʉ nǔu ɡu, mbɔ yɔ yú ŋkɑ́ yi ɔ ɡɑ́nɛ mɛluꞋ sʉ́Ꞌnɛ mbɔ̌ pʉɔ?»
11Yɔ pɑ́Ꞌ Yɛ́su kɑ zɛnɛ nɛɡɛ mɛnu mɑ̌ɑmɑɑnɛ. Ɛ́ kɑ pɔ́ Kɑ́nɑ, tsɛt pɑk-ŋɡɔŋ-Ŋɡɑlilɛɛ, Yɛ́su lɔk pɔ́Ꞌɔ, ńdɛꞋlɛ nɛɡúꞋ wɛ. Gɑŋku pɛ́ zɑ́p tʉ́m nǔu wɛ́.
12Yɔ nu lɛɛ, Yɛ́su pɔ́p mɑ́ wɛ, pɔ́p pɔ́ɔpɛ́mɑ́ pɛ́, ŋ́ɡɛ ɡɑŋku pɛ́, ɡʉ nɛ́ tʉ́sɔŋ-Kɑpɛɛnɑwúm, ŋ́kúu zúꞋu, ńnɑ́ŋ pɔ mɛcɔ́ mɛlɛ́Ꞌ.
Yɛ́su zuŋ pɑfɛn yúu ndɑ́-nɔŋpɔꞋ
13Ndínɑ-Pɑ́skɑ-pɑyúdɑ kɑ pɔ́ ḿbɑ́ɑtɛ, Yɛ́su ɡɔ́ɔ ŋ́kɛ́ ḿbʉʉ nɛ́ Yɛlúsɑlɛm, 14ŋ́kúu tɛtɑ́ɑ-ndɑ́-nɔŋpɔꞋ, ńjʉ́ɔ pʉɔ pɔ́ tsɛtú ḿbɔ́ ɛ́fɛn pɛfɔŋ, pɛcɔ́ pɔ́ ɛ́fɛn mɛnjinjɔ, pɛcɔ́ pɔ́ ɛ́fɛn pɛpuutɛ, mbɑ pɑkúp ŋkɑ́p nɑ́ŋtɛ sɛ́. 15Pɔ́Ꞌɔ lɑ́, Yɛ́su ɡɔ́ɔ ŋ́kɛ́ ńdɔk mɛŋkʉ ńniitɛ ŋɡwɑɑ, ɛ́fú tsɛt tɛtɑ́ɑ-ndɑ́-nɔŋpɔꞋ, ńzuŋ pʉɔ ɛ̂pɑ́ pɔ́p mɛnjinjɔ mɔ́p, pɔ́p pɛfɔŋ, ńtsʉ́ʉ mɛŋkɔꞋ mɔ́p ḿmɛꞋ, ŋkɑ́p pʉɔtnɛ sɛ́, 16ńcú mbɔ̌ pɑfɛn pɛpuutɛ ŋɡɔ: «Pʉʉ lɔk yúu mɑ́ ɛ́fú zɑꞋnɛ ŋ́ɡʉ! Pʉʉ pɑ́ɑ nɛlɔk zʉꞋ-Tɑ̌ɑ mɔ ŋ́ɡɛ zʉꞋ-mɛtɑ́ɑ.» 17Gɑŋku-Yɛ́su ɡɔ́ɔ ŋ́kɛ́ ŋ́kẅíitɛ zʉꞋ-ŋwɑꞋnɛ-ndɛn kɑɑ yi ɛ́ cúnɛ ŋɡɔ: «Mɔ, ŋ kɔŋ zʉꞋ yú kɔŋnɛ tɛ ŋ ɡʉ ńdɑ́Ꞌ ḿpfú pɔ nǔu.»
18Pɑsɑ́Ꞌlɑ́Ꞌ-pɑyúdɑ ɡɔ́ɔ ŋ́kɛ́ ńcú mbɔ̌ Yɛ́su ŋɡɔ: «Gɛ ndɑɑkɑ́jʉ́ɔ nu mbi pɛk ńdɔk ńnyɛt wɛ́k ŋɡɔ pɛ́ kɑ ɡɑ́ wú nɛ́ mɛtʉʉ nɛɡɛ yúu mi ɔ ɡɛnɛ lɑɑ.» 19Yɛ́su tsɔ́Ꞌ mbɔ̌ pɔ́p ŋɡɔ: «Pʉʉ kɛm ndɑ́-nɔŋpɔꞋ yɔ, n dɔk lɛ́Ꞌ pɛtɑ́t, ḿbʉꞋ ńtík tíknɛ.» 20Pɔ́p cú mbɔ̌ wɛ́ ŋɡɔ: «Pɛ́ kɑ lɔk ŋɡuꞋ ntsɔ̌pɛ́nɛ́ntúkú nɛ́ mɛɡɛ́mɛ́nɛ́kwɑ, ŋ́kút ndɑ́-nɔŋpɔꞋ yɔ, ŋ́ɡʉ nǔu ɡu, ɔ cú ŋɡɔ mbɔ́ ɔ lɔk lɛ́Ꞌ pɛtɑ́t ḿbʉꞋ ńtík ɔɔ?» 21Lɑ́, Yɛ́su cú pɑ́Ꞌɑ, ndɑ́-nɔŋpɔꞋ yi ɑ kẅíinɛ pɔ́ pɔ túmbʉʉ yɛ. 22Ɛ́ yɛ́tɛ́ lɑ́ ɑ kɑ zẅíimɛ nǔu nɛvú, ɡɑŋku pɛ́ kẅíitɛ ŋɡɔ ɑ kɑ cú yɔ nu, ŋ́ɡɔ́ɔ ŋ́kɛ́ ḿbɛ́m, ḿbɛn ḿbɛ́m yi ŋwɑꞋnɛ-ndɛn kɑɑ kɑ cúnɛ nǔu wɛ́.
23Yɛ́su pɛ́t ḿbɔ́ pɔ Yɛlúsɑlɛm, pɛ́ pɔ́ ńjʉ́ ndínɑ-pɑ́skɑ-pɑyúdɑ, lɑ́Ꞌ jʉ́ɔ mɛnu mɑ̌ɑmɑɑnɛ mi ɑ ɡɛnɛ, pʉɔ tɛ ńzɑ́ɑ zɑ́p tʉ́m nǔu wɛ́. 24Lɑ́ Yɛ́su pɔɔ mɛꞋ mbʉʉ yɛ mbɔ̌ pɔ́p pɔ́, mbíꞋŋɡɔ ɑ sɛ́ ńjí pɑ́Ꞌ pɔ́p pɔ́nɛ pɛtsʉʉ. 25A ŋkɑɑ pɔ́ ńtsɑ́ɑ ŋɡɔ pɛ́ kyɛ́Ꞌtɛ kyɛ́Ꞌtɛ́nɛ ɛ́sẅíi wɛ́ pɔ́. KwɑꞋ jʉ́ ḿbɔ́ ńjí yúu mi ɛ́ tsɛt tʉ́m-ŋumɛsɔŋ.
Айни замон обунашуда:
Jɑ̂ŋ 2: JGO
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
CABTAL, 2017