Jɑ̂ŋ 1
1
Yɛ́su Sẅiŋɛ-kyɛꞋ ḿbɛn ḿbɔ́ sẅiŋɛ-luk
1Píimbí kɑ ɡɔ́ ńzɛ, sẅiŋɛ pɔ́ pɔ ɡú, yîyɑ́ sẅiŋɛ pɔ́p Sɛ́ m̄bɔ́nɛ ɡú. Ɛ́ pɛn ḿbɔ́ pɔ Sɛ́. 2Pɔ́p Sɛ́ ḿbɔ́nɛ tɛ ɛ́fú pɔ nzɛnɛ. 3Kʉ̈ɔ́ lɑ́ ɡɔ́ ḿbɔ́ ɡú, ńdɛɛ pɔ nǔu wɛ́. Yɛcɔ́ yúu pɔɔ pɔ́ ɡú kɛ́ pɔ́ yi ɛ́ lɛɛ pɔ nǔu wɛ́ pɔ́. 4Luk kɑ pɔ́ nǔu wɛ́, luk ɛ̂yɑ́ pɔ́ kyɛꞌ yí ɛ́ kyɛꞋnɛ pʉɔmɛsɔŋ. 5Kyɛꞌ pɔ́ ŋ́kyɛꞋ nzɛ́nzʉ́ʉ, nzɛ́nzʉ́ʉ kɛ́ mbɔɔ kúpmɛ#1.5 kɛ́ mbɔɔ kúpmɛ mbɔ pɛ́ pɛn ɛ́fúŋ ŋɡɔ ɑ ŋkɑɑ kúkŋɛ, kɛ pɔ ŋɡɔ ŋ́kɛ́ mbɔɔ zúꞋ pɔ́..
6Sɛ́ ɡɛ ńtúu wɛcɔ́ ŋu, lík yɛ́ pɔ́ ŋɡɔ Jɑ̂ŋ. 7A tɔ́ ḿbɔ́ jʉ́njʉ́ɔ, nɛsẅíi yúu mi ɑ jínɛ ntɛ́ kyɛꞌ ɛ̂yɑ́, nɛpɔ́ yi mbɑ wɔ̌ lɑ́ ɡʉ ńzúꞋ sẅiŋɛ-Jɑ̂ŋ, ńzɑ́p tʉ́m yɛ́ nǔu kyɛꞌ ɛ̂yɑ́. 8Jʉ́ ŋkɑɑnɛ lɔk kyɛꞌ ńtɔ́ pɔ́, ɑ kɑ tɔ́ yɛ́ pɔ nɛsẅíi pʉɔ nɛ́ nu nǔu kyɛꞌ. 9Sẅiŋɛ ɛ̂yɑ́ kɑ pɔ́ kwɑꞋ kyɛꞌ yí ɛ́ tɔ́nɛ ndǔmbí nɛkyɛ́Ꞌ pʉɔtsʉʉ.
10Jʉ́ sẅiŋɛ m̄bɔ́ ndǔmbí, lɑ́ pʉɔmɛsɔŋ kɛ́ mbɔɔ wɛ́ jí. Lɑ mbɔ Sɛ́ kɑ lɔk pɔ sẅiŋɛ ɛ̂yɑ́ lɑ ḿbuꞋ ŋɡɔŋ. 11Ɛ́ kɑ tɔ́ kwɑꞋ ŋɡɔŋ pɔ́p, pʉɔ-ŋɡɔŋ wɔ́p pɔɔ wɛ́ kúkŋɛ. 12Lɑ́, pʉɔ tsʉʉ pí pɔ́p ńzɑ́pnɛ tʉ́m nǔu wɛ́, ɑ lɔk wɔ́p ŋ́ɡɛ pʉɔ-Sɛ́. 13Nɛpɔ́ pʉɔ-Sɛ́, pɔɔ pɔ́ nǔu nɛkɔŋ wɛ ŋumɛsɔŋ pɔ́. Nɛpɔ́ pʉɔ-Sɛ́, Sɛ́ kɔŋnɛ yîyɑ́ ntɛ́ nɛpí.
14Sẅiŋɛ kɑ tsʉ́Ꞌ ŋumɛsɔŋ, ńtɔ́ ńtswɛ́ tsɛtsɛt pɛkŋɛ, pɛkŋɛ jʉ́ɔ nɛɡúꞋ wɛ, ɛ́ pɔ́ nɛɡúꞋ Mɔ́ɔ wɛ́mɔ́Ꞌ ẅi ɑ fúnɛ mbɔ̌ Tɑ̌ɑ, ŋ́ɡẅɛɛ pɔŋ tʉ́m, ńnyɛt pɔ nu nɛ́nẅín.
15Jɑ̂ŋ ɡɛ ńcú yúu mi ɑ jínɛ nǔu ŋu ɛ̂wɑ́, ńdɔk ŋɡi tɛnnɛ ŋɡɔ: «Yɑ́ ŋu ẅí ŋ kɑ pɔ́ ɛ́sẅíi wʉ́ʉ lɑ́, pɑ́Ꞌ ŋ kɑ pɔ́ ńcú ŋɡɔ: Ŋu nzʉʉ mɔ ḿbɔ́ ńtɔ́, ɑ lɛɛ wɑ́ɑ, mbíꞋŋɡɔ pɛ́ kɑ ɡɔ́ ḿbí wɑ́ɑ, ɑ pɔ́ pɔ ɡú.» 16Ŋɡɑŋ kɑ kɛ́ ńtɔ́, ńdɔk pɑ́Ꞌ ɑ ɡẅɛɛnɛ pɔŋ tʉ́m, ŋ́ɡɑ́ fuꞋ níinɛ yɛkŋɛ pɛtsʉʉ tɛꞋ, ńcʉ ɛ́shɔtnɛ ńcʉ, mbíꞋŋɡɔ ɑ ɡẅɛɛ ŋkɔŋɛ tɛꞋ. 17Sɛ́ kɑ lɛɛ nǔu Mɔ̌sɛ̂ɛ, ŋ́ɡɑ́ nɛpʉ́ʉ, nu nɛ́nẅín pɔ́p fuꞋ níinɛ yɛkŋɛ pɛn ńdɛɛ pɔ nǔu Yɛ́su Kɛlístɔ. 18Wɛcɔ́ ŋu ŋkɑɑ Sɛ́ jʉ́ɔ, lɑ́ ndɑꞋ Mɔ́ɔ wɛ́mɔ́Ꞌ ẅi ɑ sɛ́ ḿbɔ́ nɛjɔ́ŋ Tɑ̌ɑ, kɑ ɡɛnɛ pɛ́ jí wɛ́.
Jɑ̂ŋ sɛ́ ńcẅi Ŋkʉʉ ẅí ɑ ɡẅɛɛnɛ
19Jɑ̂ŋ ɡɛ ńcú nu ntɛ́ Yɛ́su. Ɛ́ pɔ́ yɛcɔ́ ŋkɑ́, pɑsɑ́Ꞌlɑ́Ꞌ-pɑyúdɑ pínɛ pɔ́p Yɛlúsɑlɛm túu pɑnɔŋpɔꞋ pɔ́p pʉɔ nǔu njẅɛt-Lɛ́vi, ŋɡɔ pɔ́p ɡʉ ḿbíkŋɛ Jɑ̂ŋ ŋɡɔ: «A pɔ́ wɔ̌?» 20Jɑ̂ŋ sɑ́ɑnɛ sɑ́ɑnɛ́nɛ ńcú mbɔ̌ pʉɔtsʉʉ kɛ́ mʉꞋlɛ ŋɡɔ: «Ŋ kɑ́ pɔ́ Nzɑ́Ꞌŋkʉ ẅí Sɛ́ kɑ kɑꞋnɛ pɔ́.» 21Pɔ́p píkŋɛ wɛ́ ŋɡɔ tɛ ɔ pɔ́ wɔ̌? Ɔ pɔ́ Ɛlíyɑ kɛkʉ̈ɔ́? Jɑ̂ŋ cú ŋɡɔ ŋɡɑ́ŋ. Pɔ́p cú ŋɡɔ, ɔ pɔ́ ŋɡɛ́mndʉ̈ɔ́Ꞌ-Sɛ́ ẅi pɛ́ sɛ́ ńzẅíꞋlɛ lɑ́ kɛkʉ̈ɔ́? Jɑ̂ŋ cú ŋɡɔ ŋɡɑŋ.
22Pɔ́p ɡɔ́ɔ ŋ́kɛ́ ńcú mbɔ̌ wɛ́ ŋɡɔ: «Sẅíi wɛ́k nɛ́ ŋu ẅí ɔ jʉ́, ńjí ŋɡɔ pɛk ɡʉ ŋ́ɡẅɛɛ nu yí pɛk ɡʉ ńtɔ́ ɛ́sẅíi pʉɔ pínɛ pɔ́p lɑ́Ꞌnɛ ńtúu wɛ́k.» KwɑꞋ ɡu nɛ́ tú yú, ɔ kwɑŋɛ ŋɡɔ ɔ wɔ̌? 23Jɑ̂ŋ lɔk sẅiŋɛ yí ŋɡɛ́mndʉ̈ɔ́Ꞌ-Sɛ́ Ɛsɑ̌yɑ kɑ cúnɛ ńtsɔ́Ꞌ ŋɡɔ: «Mɔ ŋu ẅí ɑ kɔ̂ŋtɛt, ḿbɔ́ ɛ́sɑ́Ꞌ ńcú ŋɡɔ: pʉʉ sɑŋtɛ sɛ̂ndúŋ-Tsɑpʉɔ ɛ́ tʉ́ʉ ndʉ́ŋndʉŋ.» 24Pʉɔ pínɛ pɛ́ kɑ túunɛ wɔ́p mbɔ̌ Jɑ̂ŋ lɑ́, m̄bɔ́ pɑfɑlísɑy. 25Pɔ́p pɛn ḿbíkŋɛ Jɑ̂ŋ ŋɡɔ: «Lɑ́ ɔ kɑ́ pɔ́ Nzɑ́Ꞌŋkʉ pɔ́, ŋ́kɛ́ mbɔɔ Ɛlíyɑ pɔ́? Ŋ́kɛ́ mbɔɔ ŋɡɛ́mndʉ̈ɔ́Ꞌ-Sɛ́ ẅi pɛ́ sɛ́ ńzẅíꞋlɛ pɔ́, tɛ mɛlɑ́Ꞌ kʉ̈ɔ́ ɔ nuꞋ pʉɔ ŋki?» 26Jɑ̂ŋ tsɔ́Ꞌ mbɔ̌ pɔ́p ŋɡɔ ɛ́ ɡʉ nǔu mɔ, mbɔ n nuꞋ pʉɔ pɔ ndɑꞋ tsɛt ŋki. Wɛcɔ́ ŋu kɛ́ ḿbɔ́ tsɛtsɛt pʉʉ, pʉʉ pɛ́t kɛ́ jí wɛ́. 27Yɛ́ nu ɡʉ ḿbɑ́ɑtɛ yɑ́ɑ, n zɛ ḿbɔɔ kuꞋ nɛŋɔ́Ꞌnɛ sɛ́ ŋ́kíɛꞋ ŋkʉ-mɛtɑp mɛ́ pɔ́. 28Pɛ́ kɑ pɔ́ ḿbíkŋɛ Jɑ̂ŋ nɛ mɔnɛ mɛnu pɑꞋnɛ Mbɛtɑni, nǔu yɛcɔ́ njʉ́n-ŋki-Juudɛŋ zʉꞋ yí ɑ kɑ pɔ́ ńnuꞋ pʉɔ ŋki zúꞋu.
Yɛ́su mɔ́ɔ-njinjɔ-Sɛ́
29Njí ɡɛ ŋ́kiɛ, Jɑ̂ŋ jʉ́ɔ Yɛ́su pɔ́ ńtɔ́, ɑ cú ŋɡɔ: «Yɔ Mɔ́ɔ-Njinjɔ ẅí Sɛ́ lɔknɛ ɛ́fɛꞋ ndɔɔ-mɛnu mí pʉɔ kɑ ɡɛnɛ.» 30A jʉ́ ẅi ŋ kɑ pɔ́ ɛ́sẅíi wʉ́ʉ lɑ́, pɑ́Ꞌ ŋ kɑ pɔ́ ńcú ŋɡɔ: «Ŋu ɑ nzʉʉ mɔ ḿbɔ́ ńtɔ́, ɑ lɛɛ wɑ́ɑ, mbíꞋŋɡɔ pɛ́ kɑ ɡɔ́ ḿbí wɑ́ɑ, ɑ pɔ́ pɔ ɡú. 31KwɑꞋ mɔ ŋkɑɑ pɔ́ ńjí ŋu ẅí ɑ ɡʉ ŋ́ɡɛ ḿbɔ́ jʉ́ pɔ́. Lɑ́ ŋ kɑ tɔ́ yɑ́ɑ, ḿbɔ́ ńnuꞋ pʉɔ ŋki nɛlɔk ŋ́ɡɛ pɑíslɑyɛ̂l jí wɛ́.»
32Jɑ̂ŋ pɛn ńcú yɛcɔ́ nu yí ɑ jínɛ nǔu Yɛ́su, ŋɡɔ: «Ŋ kɑ jʉ́ɔ zẅikŋɛ-Sɛ́ fú tʉ́nɛ́pú ńcúŋ ńnɑ́ŋ nǔu wɛ́, ḿbɔ́ pɑ́Ꞌ Puutɛ lɑ́. 33KwɑꞋ mɔ ŋ kɑ zɛɛ m̄bɔɔ ḿbɔ́ ńjí wɛ́ pɔ́, lɑ́ Sɛ́ ẅi ɑ kɑ túunɛ wɑ́ɑ ŋɡɔ ŋ ɡʉ ńnuꞋ pʉɔ ŋki, jʉ́ ńcúnɛ mbɔ̌ mɔ ŋɡɔ: Ɔ ɡʉ ŋ́ɡɛ ńjʉ́ɔ zẅikŋɛ-lɛ́ɛnɛ́nɛ tɔ́ ńnɑ́ŋ nǔu ŋu. A jʉ́ ẅi ɑ ɡʉ ŋ́ɡɑ́ pʉɔ mbɔ̌ zẅikŋɛ lɛ́ɛnɛ́nɛ.» 34N jʉ́ɔ, lɑ́ mɔ sɛ́ ɛ́sɑ́Ꞌ ɛ́sẅíi pʉɔ ŋɡɔ jʉ́ pɔ́nɛ mɔ́ɔ-Sɛ́.
Pɛluŋmbi ɡɑŋku-Yɛ́su
35Njí ɡɛ ŋ́kiɛ, Jɑ̂ŋ pɔ́p pɛcɔ́ ɡɑŋku pɛ́ pɛ́pɑ́ pɛ́t ḿbɔ́ pɔ zʉꞋ yí ɑ ḿbɔ́nɛ zúꞋu. 36A mɑꞋ lík, ńjʉ́ɔ Yɛ́su pɑ́Ꞌ ɑ sɛ́ ńdɛɛ, ńcú ŋɡɔ: «Yɔ Mɔ́ɔ-Njinjɔ-Sɛ́.» 37Gɑŋku-Jɑ̂ŋ pɛ́pɑ́ zúꞋ yɔ sẅiŋɛ, ńcʉ́ɔ nzʉʉ Yɛ́su. 38Yɛ́su shɔtnɛ, ńjʉ́ɔ pɑ́Ꞌ pɔ́p nzʉʉ yɛ́, ḿbíkŋɛ wɔ́p ŋɡɔ: «Pʉʉ lɔɔ kʉ̈ɔ́?» Pɔ́p pʉ̈ɔt mbɔ̌ wɛ́ ŋɡɔ: «Lɑbi (ńdɔk ŋɡɔ cícɑ), ɔ tswɛ́ ɡɔ́?» 39Yɛ́su cú ŋɡɔ: «Pʉʉ tɔ́, pʉʉ ɡʉ ńjʉ́ɔ.» Pɔ́p ɡɔ́ɔ ŋ́kɛ́ ŋ́ɡʉ ńjʉ́ɔ zʉꞋ yí ɑ tswɛ́nɛ zúꞋu. Ɛ́ ɡɔ́ ḿbɔ́, ḿbɔ́ nǔu nɛm yɛ́nɛ́kwɑ mbɔ́tnjí, pɔ́p pɛ́pɔ́p nɑ́ŋ tɛ yîyɑ́ lɛ́Ꞌlɑ́Ꞌ mɛ.
40Ɛ́ kɑ ɡʉ nǔu pʉɔ pɛ́pɑ́ pínɛ pɔ́p kɑ zúꞋnɛ sẅiŋɛ-Jɑ̂ŋ, ńcʉ́ɔ nzʉʉ Yɛ́su lɑ́, lík wɛcɔ́ tɑ́Ꞌ ŋu kɑ pɔ́ ŋɡɔ Ndɛlɛ́yɑ, ɑ pɔ́ mɔ́ɔmɑ́-Símɔŋ Pyɛ̂. 41Ndɛlɛ́yɑ ɛ̂wɑ́ ɡʉ ḿbiitɛ ɛ́sẅíi mɔ́ɔmɑ́ wɛ Símɔ̂ŋ, ńcú mbɔ̌ wɛ́ ŋɡɔ: «Pɛk jʉ́ɔ Nzɑ́Ꞌŋkʉ, ẅi Sɛ́ kɑ kɑꞋnɛ ɑ pɔ́ Kɛlístɔ.» 42Ńdɔk Símɔ̂ŋ, ŋ́ɡʉ nɛjɔ́ŋ Yɛ́su, Yɛ́su tsuŋ ńdíŋɛ Símɔ̂ŋ tɛ ńcú mbɔ̌ wɛ́ ŋɡɔ: «Ɔ Símɔ̂ŋ mɔ́ɔ-Jɑ̂ŋ. Pɛ́ ɡʉ ŋ́ɡɛ ɛ́fúŋ wú ŋɡɔ Kɛfɑs», ɛ́ lɔk ḿbɔ́ ńcú ŋɡɔ Pyɛ̂#1.42 Kɛfɑs nǔu sẅíŋɛ-pɑyúdɑ lɔk ḿbɔ́ ŋɡɔꞋ. Pyɛ̂ nǔu sẅiŋɛ-ŋɡɛlɛ́k lɔk ḿbɛn ńcú yɛ́ ŋɡɔ ŋɡɔꞋ..
43Njí ɡɛ ŋ́kiɛ, Yɛ́su zɑ́p ŋɡɔ ɑ ɡʉ ŋ́ɡʉ tsɛt pɑk-ŋɡɔŋ-Ŋɡɑlilɛɛ, ḿbɔ́ ŋ́ɡʉ, ḿbuutɛ Filîp, ńcú mbɔ̌ wɛ́ ŋɡɔ cʉ́ɔ nzʉʉ mɔ. 44Filîp ɛ̂wɑ́ kɑ pɔ́ ŋu-Mbɛtsɑyídɑ, tʉ́sɔŋ pɛ́ Ndɛlɛ́yɑ pɔ́p Pyɛ̂. 45Filîp ɡʉ ńjʉ́ɔ Nɑtɑnɑyɛ̂l, ńcú mbɔ̌ wɛ́ ŋɡɔ: «Pɛk jʉ́ɔ ŋu ẅí pɛ́ kɑ ŋwɑꞋnɛ́nɛ nu nǔu wɛ́ tsɛt ŋwɑꞋnɛ-nɛpʉ́ʉ-Mɔ̌sɛ̂ɛ, mbɑ tsɛt mɛŋwɑꞋnɛ-pɛŋɡɛ́mndʉ̈ɔ́Ꞌ-Sɛ́ lɑ́. Pɛk jʉ́ɔ wɛ́, ɑ pɔ́ Yɛ́su, mɔ́ɔ-Yɔsɛ̂p, mɔ́ɔ-Nɑ̌zɑlɛt.» 46Nɑtɑnɑyɛ̂l cú mbɔ̌ wɛ́ ŋɡɔ: «Tɛ pɛ́ kɑ zɛɛ mɔ ńjʉ́ɔ yúu sʉ́Ꞌnɛ fú Nɑ̌ɑzɑlɛt?» Filîp tsɔ́Ꞌ mbɔ̌ wɛ́ ŋɡɔ: «Tɔ́, ɔ ɡʉ ńjʉ́ɔ.» 47Yɛ́su jʉ́ɔ pɑ́Ꞌ Nɑtɑnɑyɛ̂l sɛ́ ńtɔ́, ńcú nu nǔu wɛ́ ŋɡɔ: «Yɔ kwɑꞋ mɔ́ɔ-Íslɑyɛ̂l ẅí nu ŋkʉŋkʉ kɑ́ pɔ́ nǔu wɛ́ pɔ́.» 48Nɑtɑnɑyɛ̂l píkŋɛ Yɛ́su ŋɡɔ: «Ɔ jí wɑ́ɑ ɡɔ́?» Yɛ́su pʉ̈ɔt mbɔ̌ wɛ́ ŋɡɔ: «Filîp lɑ́Ꞌ ŋ́ɡɔ ɛ́fúŋ wú pɑ́Ꞌɑ m bɔ́ ńjʉ́ɔ wú jʉ́ɔnɛ. Ɔ lɑ́Ꞌ ńnɑ́ŋ nɛtsɛ́n-tʉ́-ŋɡɛ̌m.» 49Nɑtɑnɑyɛ̂l tsɔ́Ꞌ ŋɡɔ: «Lɑbi, ɔ mɔ́ɔ-Sɛ́, ɔ fɔɔ-pɑíslɑyɛ̂l.» 50Yɛ́su pʉ̈ɔt mbɔ̌ wɛ́ ŋɡɔ: «Ɔ pɛ́m ŋkɔ̂ɔnɛ, mbíꞋŋɡɔ n cú ŋɡɔ n dɑ́Ꞌ ńjʉ́ɔ pɑ́Ꞌ ɔ nɑ́ŋnɛ nɛtsɛ́n ŋɡɛ̌m. Ɔ ɡʉ ḿbɛn ńjʉ́ɔ mɛnu mí ɛ́ ɡúꞋnɛ ńdɛɛ mîmɑ́.» 51Yɛ́su pɛn ŋ́kẅiꞋ ńcú ŋɡɔ: «Lɑ́ ɛ sẅíi wʉ́ʉ, kwɑꞋ nɛ́nẅín, pʉʉ ɡʉ ŋ́ɡɛ ńjʉ́ɔ ntsu-tʉ́nɛ́pú tsɔ́Ꞌnɛ ńtʉ́ʉ, pɛcʉ̈ɔ́Ꞌ-Sɛ́ pɔ́ ɛ́fú zúꞋu, ńcúŋ ńtɔ́ nǔu Mɔ́ɔ-Ŋu ḿbɛn ŋ́kɔ́Ꞌ nɛ́ tʉ́nɛ́pú.»
Айни замон обунашуда:
Jɑ̂ŋ 1: JGO
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
CABTAL, 2017