Luka Enjil 7
7
Bag. 7.
1Tenna werechi malegi gebilana ulgir undurossinn agabir Kafrinahumir torossum. 2Imilgi akiyelna hadam wer odisum. Diarrogon busum. Tenna tirti in hadamgi desen adolsum. 3Ter wide Yesu awsinigi gijred tekki abidi Yahudichina samligi ishinirsum tekki beddedtargi, tenna hadamgi gengir an. 4Tir wide Yesunai bidargi tekki kolirgi wetirsan: „Ter istahalen tekki ingi awtirarki. 5Mine ter anna gebilagi adolin. Wide ter teran jamagi argi goidecchirel.“ 6Yesu tirgodon bujusum. Wide kag abidi awtanmendangon, imilgi akiyel tenna tiwrichirton werigi tekk abidi ishinirsum, tekki wetirw an: „Wo tir, marismen. Mine ai istahalemnim er anna kar tongi. 7Ini jiradilo ai anna kidir ennai takomnim. Elekengon were habitoddekki wekin, anna hadam bigenanin. 8Mine aigon teran zol, gudra werna togor daburin. Ama askari weri anna in togor daran. Wekki: i Juw’ ankirin, ajun. Wide owitti wekki wetirkirin: ‚Tar’ an, atan. Wide anna nugudti: ‚Ingi aw’ ankirin, aawin.“ 9Yesu ingi gijred tenna wereged ajibe wesum, jemag abidi lefte tebos: „Ai irgi wetidirrin, ai elgon elkomnim iman inikottekki, wala Israello.“ 10Ishinbuli kar lefte targi elsan hadam odelgi genanossingi.
11Ugros talebullo Naïnna medinegir bijusum, tekkodongon tenna hiranirton digrichi weri wide jema digri wekkon. 12Naïnna babkodon awtaningad diel wekki, kagrangon, abidisum. Tekkon tinennai habitod esum. Engon azabay esum. Zoli digrichi werigon eshein idirton tekkodon dasan. 13Yesu tekki urwos tendogor tenn a jagadan wetirsum: „Oimen!“ 14Ter wide talin torgi karabki kumingad, kageli tebossan. Yesu wide dielgi wetirsum: „Ai ekki awetirrin, wo ogij jahal, imbel an!“ 15Diel wide imbel tegos bainidti ugudisum. Yesu wide tinengi kiye tirossum. 16Sarke wer wide malegi arediringad artigi mejide wesan: „Anna barer nebi dul wer imbolossum. Wide arti tenna gebilagi jilossum.“ 17In habarkon Yahudiye malegi eyegrossum wide nejachi tenna hawalendo dareli malegi.
18Hanagi tenna hirani in awtakkel malegi wetirsan. 19Wide Hana tenna hiranirton owigi uwedtargi Yesug abidi ishin wetidirsum: „Wetirwe: Er bital terre? Wala owitti wekki ururun?“ 20Ogj owingari Yesunai targi wetirsan: „Hana akidiril argi ishinirsum, ekki isigw an: Er bital terre, wala owitti wekki erjeru an?“ 21Man wattin turgon Yesu odili digrichi werigi tinna oderton gengirirsum, jagadebuli werigon wide newertichi milichiged degbuligon. Wide dugri digrichi werigongi misigi kussidirsum. 22Yesu widegir wide tirgi wetidirsum: „Jurgi Hanagi wetirwe ir nalsungi: Dugri anallangi, fogorachi atalerangi, baraskonigon atahirtakkirangi, tergindibuligon agijirrangi, wide dieligon aïmbellangi, wide hajebuligon abeshirtakkirangi. 23Wide barkebun aiged uretakkimenil.“
24Hanana ishinbuli nogsann aharro Yesu ugudi jemagi Hanana gisagi awetirsum: „Mingi halar nalw an bel jukosure? Agen sha, turug aguykidin, wekka? 25Min wekki elon bel ju analsure? Zol kadechi norochi werigi unduredal wekka? Ahan zoli kadechi norochigi degedali wide ayar norogi aïbuli orina kachir agran. 26Min wekki elon bel jurgi analsure? Nebi wekka? Eyo, irgi wetidirrin, nebi werdogor genum. 27In ter teran tenna gisar bajtakkikorel: ‚Ahan ai enna owolged bishindin anna malaikagi, enna darubki aller an.’ 28Mine ai irgi wetidirrin, ecchirton uskitakkibulin barer Hanan dogor dul wer damnum. In malegodon artina mulkina edi kinatod tendogor dulum. 29Zoli male tekki gijirsan mekisn idir junbokon. Widegon artigi beriros Hanana kidirarked kidirtakkisan. 30Ama Farisichigon sherian idigon arti awerisingi tinnewertichirton jagnos tekked kidirtakikkomnan.“
31„Niged in jilna zoligi shebbiherin? Wide min wekki ashebiheran? 32Toni sugir agili werigi ashebiheran, ittiwrigi uweka aweligi: ‚Irgi kisirki jomtidirrungad banarki monsun. Irgi torutidirrungad arwijarki monsun.’ 33Mine Hana akidiril tasum kalgi kalmen, hamurkon nimen. Wide iri awerun: ‚Newerti miliged degbun an.’ 34Zolna todton tasum, kalli an wide niri an. Widegon iri awerun: ‚Ahan kalegi aazlemenil, wide hamurna niarroton azalemenil, wide mekisn idigon zenbikonigonna ashiranbulgi. 35Wide hegma berirtakkossum tenn affichi malerton.“
36Farisichirton wer tekki ashar azmejjusum. Yesu wide tenna kar to jurgi tegossum. 37Nejarton en us wer tekki mandom an gijred bata iris desen dugu digrikol wekki injedirgi tasum. 38Yesun agabked targi tenn osichin dogor ungos oyingon agsum. Tenn osichigi armossiged shugki wide tenna urna sirked asowigrirsum, widegon adogirsum. Bata kagsingon kus, tenna osichin dogor bogsum. 39Farisi tekki nalos tenn ergir awesum: „In id on nebi ekokin, ter in en tekki akumilgi ni ter engi biyirsum, en us engi.“ 40Yesu iyiros tekki wetirsum: „Siman, wekki ekki wetirarki awerisrin.“ Siman widegirtirsum: „We, wo tir.“ 41„Id wer ogj owin dogor dugu wekki kosum. Tiddeton werdogor dinar imil dicchi kosum. Wide owittin dogor dinar hamsingi kosum. 42Tinnaigon idti tin kobran dameningad, ter tirgi wakosirsum. We: Edi saï man ogj owirton tekki tenna tiwrin dogor digrigir bidolin?“ 43Siman tekki widegirtirsum: „Ann ergir ter edi digrigi waketirsunna tirti.“ Yesu wetirsum: „Er alegi wena!“ 44Terin agabir eng abidi lefte Simangi wetirsum: „Er in engi analna? Ai enna kar tosim. Won er essi sud wekki owolgirdenkomnum osichin jiradilo. Ama ter ann osichigi tenn armossiged ewirsum. Wide tenn urna sirked komsirsum. 45Dogar wekki er aigi dogkomnum. Ama ter tosindo welesekomnum ann osichina dogarroton. 46Zet wekked er anna urki komiskomnum. Ama ter ann osichigi irisked komsirsum. 47Ini jiradilo ai ekki wetirrin, tenna zenbi digri tekki waketakkossirsan, minerg ankomnum, ter digrigir dolingad. Gelilgi gafretirranna tirtigon gelilgir adolin.“ 48Wide engi wetirsum: „Enna zenbichi ekki gafrebutirran.“ 49Tekkodon kaler ageli tinnewertir ugudi wesan: „Ni terre in eleken zenbichigi agafrel?“ 50Engi wide ter wetirsum: „Enna iman ekki osossum. Enn afyadir biju!“
Айни замон обунашуда:
Luka Enjil 7: XNZ1912
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Published by the British and Foreign Bible Society in 1912.