Lucas 1
1
ANTRADA
1Assi cumo muitas pessonas yá quejírun screbir la stória de ls feitos que se passórun antre nós, 2tal i qual cumo mos fúrun cuntados puls que, zde l ampeço, ls bírun culs sous uolhos i fúrun menistros de la palabra, 3tamien you, apuis de haber studado cun atento todo l que se passou zde l ampeço, resolbi screbir-te todo pula orde an que se passou, eilustre Teófilo, 4para que beias la fortaleza de l ansino que recebiste.
L’ANFÁNCIA DE JASUS
Anúncio de l nacimiento de Juan Batista
5Al tiempo de Harodes, rei de la Judeia, houbo un saçardote chamado Zacarias, de la classe de Abias. La sue tie chamaba-se Sabel i era decendiente de Aaron. 6Dambos a dous éran justos delantre de Dius, oubedecendo a todos ls mandamentos i ordes de l Senhor. 7Nun tenien filhos, puis Sabel nun podie tener filhos i dambos a dous tenien ũa eidade abançada.
8Un die, an que Zacarias staba nas sues funciones de saçardote delantre de Dius, puis era la beç de la sue classe, 9tocou-le a el, cunsante las suortes de questume antre ls saçardotes, a antrar ne l Santuairo de l Senhor para queimar l ansénsio. 10A la hora de l ansénsio, todo l pobo staba fuora a rezar. 11Ende, apareciu-le un anjo de l Senhor, de pies, a la dreita de l altar de l ansénsio. 12Assi que l biu, Zacarias quedou alboriçado i amedrancado. 13Mas l anjo dixo-le: «Nun tengas miedo, Zacarias, porque l tou pedido fui atendido i la tue mulhier, Sabel, parirá un filho i bás-le a poner l nome de Juan. 14Quedarás mui cuntento i feliç i muita giente quedará tamien cuntenta cul sou nacimiento, 15puis el será grande delantre de l Senhor. Nun buberá nien bino nien qualquiera outra buída alcólica i, zde andrento la barriga de la mai, andará cheno de l Sprito Santo, 16traiendo outra beç al Senhor, sou Dius, muitos filhos d’Eisrael. 17Caminará delantre deilhes, cul sprito i l poder d’Eilias, para cumbertir ls coraçones de ls pais als filhos i als que nun ténen fé a la sabedorie de ls justos, purparando pa l Senhor un pobo bien çpuosto.»
18Zacarias dixo-le al anjo: «Cumo se puoden dar essas cousas, se you yá sou bielho i la mie tie antrada an eidade?» 19L anjo respundiu-le: «You sou Grabiel, que stou siempre delantre de Dius i fui mandado para que te falara i dira esta buona notícia. 20Yá que nun acraditeste nas mies palabras, que se cumpriran a sou tiempo, bás a quedar tato, sien poder falar, até al die an que todas estas cousas se passáren.»
21L pobo asperaba a Zacarias, yá mui admirado por el tardar tanto andentro de l Santuairo. 22Quando saliu nun le podie falar i eilhes antendírun que el habie tubido ũa bison ne l Santuairo. Fazie-le sinales, mas cuntinaba mudo.
23A la fin de ls sous dies de serbício, Zacarias tornou pa sue casa. 24Passados estes dies, la sue tie Sabel quedou preinha i andubo cinco meses a scundé-se, dezindo: 25«Mirai l que l Senhor me fizo, ne ls dies an que quijo tirar-me de ser l çprézio de las pessonas.»
Anúncio de l nacimiento de Jasus
26Al sesto més, l anjo Grabiel fui ambiado por Dius a ũa cidade de la Galileia chamada Nazaré, 27a ũa birge que le chamában Marie i que era moça dun home chamado Jesé, de la casa de Dabide. 28Apuis d’antrar an casa deilha, dixo-le l anjo: «Abe, á chena de grácia, l Senhor stá cuntigo, bendita sós antre las mulhieres.» 29Al oubir estas palabras, eilha quedou pensatible i preguntaba-se a eilha mesma l quei quererie dezir aquel saludo. 30L anjo dixo-le: «Nun tengas miedo, Marie, puis acheste grácia delantre de Dius. 31Bás a quedar preinha i a parir un filho i bás-le a poner l nome de Jasus. 32El será grande i bai-se a chamar Filho de l Altíssemo i l Senhor Dius dará-le l trono de sou pai Dabide, 33reinará eiternamente na casa de Jacó i l sou reinado nun tenerá fin.»
34Marie dixo-le al anjo: «Cumo se ban a passar essas cousas se you nun bibo cun ningun home?» 35L anjo respundiu-le: «L Sprito Santo benirá subre ti i la fuorça de l Altíssemo bai-te a acubrir cula sue selombra. Ye por essa rezon que l santo que bai a nacer de ti será chamado Filho de Dius. 36Tamien la tue parienta Sabel, anque seia bielha i todos dezíran que nun podie tener filhos, cuncebiu un filho i yá bai ne l sesto més, 37puis para Dius nada ye ampossible.»
38Marie dixo-le, anton, al anjo: «Eiqui stá la scraba de l Senhor, faga-se an mi cunsante la tue palabra.» I l anjo fui-se d’an pie deilha.
Marie besita a Sabel
39Por aqueilhes dies, Marie metiu-se pul camino de ls montes i fui mui delgeira a ũa cidade de Judá. 40Antrou an casa de Zacarias i saludou Sabel. 41Assi que Sabel oubiu l saludo de Marie, l nino saltou de cuntento na sue barriga i eilha quedou chena de l Sprito Santo 42dezindo an alta boç: «Bendita sós tu antre las mulhieres i bendito ye l fruito de l tou bientre. 43D’adonde me ben la honra de ser bejitada pula mai de l miu Senhor? 44Assi que oubi l tou saludo, l nino saltou de cuntento andrento de mi. 45Feliç seia aqueilha que acraditou que se passaran las cousas que le fúrun dezidas pul Senhor.»
46Anton, dixo-le Marie:
«La mie alma canta la grandeza de l Senhor
47i l miu sprito inche-se de cuntentamiento an Dius, miu Salbador,
48porque mirou pa l’houmilde cundiçon desta sue criada.
Deiqui palantre, to las giraçones me chamaran bienabinturada,
49porque l todo poderoso fizo an mi grandes cousas.
L sou nome ye santo
50i la sue mezericórdia chega a todos ls que lo témen,
de giraçon an giraçon.
51El fizo cousas balientes cul sou braço:
dou cabo de ls que tenien l coraçon cheno de sobérbia;
52botou abaixo de l trono als poderosos
i dou-le fuorça als houmildes;
53anchiu de cousas buonas als que tenien fame
i mandou ambora als ricos sien nada;
54amparou a Eisrael, sou criado,
lhembrando-se de la sue mezericórdia,
55tal cumo le habie dezido als nuossos pais,
a Abraan i als sous decendientes, para siempre.»
Nacimiento de Juan Batista
56Marie quedou arrimado a trés meses cun Sabel i apuis tornou para sue casa.
57Acabado l tiempo de Sabel, eilha tubo un filho. 58Ls sous bezinos i parientes, quando soubírun que l Senhor habie amostrado an Sabel la sue mezericórdia, quedórun mui cuntentos cun eilha.
59Als uito dies de l nacimiento, fúrun a circuncidar l nino i querien-le chamar Zacarias, cumo l pai, 60mas la mai lhougo dixo: «Nó, bai-se a chamar Juan.» 61Dezírun-le, anton: «Mas nun hai naide na tue família cun esse nome!» 62Apuis, por sinales, preguntórun-le al pai que nome le querie poner. 63El pediu ũa trabica i screbiu: «L nome del ye Juan.» I todos quedórun mui admirados.
64Ende, abriu-se-le la boca i sultou-se-le la lhéngua, ampeçando a falar i lhoubando l Senhor. 65Al ber essas cousas, ls bezinos deilhes quedórun amedrancados i todas essas cousas se spalhórun por todos ls montes de la Judeia. 66Ls que oubien la notícia preguntában-se a eilhes mesmos: «Quien eirá a ser este rapazico?», puis la mano de l Senhor staba cun el.
67Antoce, Zacarias, l pai del, quedou cheno de l Sprito Santo i porfetizou dezindo:
68«Bendito seia l Senhor, Dius d’Eisrael,
porque bejitou i lhibartou l sou pobo,
69alhebantou ũa fuorça de salbaçon na casa de Dabide, sou criado,
70cunsante habie dezido, antigamente,
pula boca de ls sous santos porfetas,
71el salbou-mos de ls nuossos einemigos
i de la mano de ls que mos querien mal,
72para fazer mezericórdia culs nuossos pais
i lhembrar-se de la sue santa aliança
73i de la jura que le fizo a Abraan, nuosso pai,
74para mos premitir que, sien miedo
i lhibres de las manos de ls nuossos einemigos, l sírbamos
75an santidade i justícia delantre del,
por todos ls nuossos dies.
76I tu, nino, serás chamado porfeta de l Altíssemo,
porque eirás alantre de l Senhor a purparar ls sous caminos,
77dando-le a coincer al sou pobo la salbaçon
para perdon de ls sous pecados,
78grácias al coraçon mezericordioso de l nuosso Dius,
por bias de quien mos bejitará la lhuç de l alto
79para alhumbrar ls que bíben ne l scuro i na selombra de la muorte,
para guiar nuossos passos ne l camino de la paç.»
80L nino iba crecendo i quedando fuorte ne l sou sprito i bibiu ne l zerto até al die an que se apresentou a Eisrael.
Айни замон обунашуда:
Lucas 1: EM14
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Evangelhos em Mirandês © Sociedade Bíblica, 2014.