Ñwaè' Maêk 11
11
1Wowèe a ka' bà' àtʉtʉ rla' Jɛ̀rusalɛ̀m, a ba à rla' Bɛtɛfɛ̀ ker ba à rla' Bɛtanì, ce mi m ba àgee rtùu Olèf. Jisòs à tuu ŋgǎa yɛ'ni yì buu a baa, 2a laa nè wowèe enɛ̂, “Dù nè nje rla' enje wěe cùu na. Wèe be dù niŋ tɛ wèe ku yɛ muu jàaki' ce ŋwɛ̀ à m be cu mbo ka' àmbò a cʉʉ. Wee yɛ, wèe fyɛɛ vʉ àgho. 3Ŋwɛ̀ à ka' bipshi enɛ wèe ce fyɛ̀ɛ njokɛ lɛ, wèe suŋ ye enɛ, Tata ce tà' gèe yuu àgho, ka' kʉsi.” 4Wowèe a du a yɛ muu jàaki' àmbò a cʉʉ njep ncʉ̀ʉndʉ̀', àwǎa nduunjì. A ka' ce fyɛ̀ɛ muu jàaki' ca, 5bèe ce a m tɛɛte àfo a bipshì nè wowèe enɛ̂, “Wèe ce fyɛ̀ɛ muu jàaki' anà njokɛ?” 6Wowèe a suŋ bèe anà yuu ce Jisòs à m làa, bèe anà a ma'shì, wowèe a du àgho.
7A ka' bà' àgho, a co'ni bcɛ̀' a laashi mbendù mo, Jisòs à ko' a cu mbo. 8Bèe magòr a laashì bcɛ̀' njep nduunjì, wèe mo' a saŋsì yap ba mmba' ce mkɛ'ŋkɛ' ce a m fàashi. 9Bèe ce a m ce dù kùntombì ker ba bèe ce a m ce vʉ̀ embe yě njì a ce yòp mbekì enɛ̂, “Rlùŋ li vʉ̀! Nyʉ̀ ghoni ŋwɛ̀ ce e vʉ̀ à rlii Tatâ. 10Nyʉ̀ ghoni kʉʉ yìsèe ta Dɛvìd ce yi ce vʉ̀ na! Sèe ku'si Nyʉ̀ embe bùu!”
11Jisòs à niŋ à rla' Jɛ̀rusalɛ̀m, a du mbe Ndàp Nyʉ̀, a fyɛ' buu wɛɛwɛ, a ka' yɛ enɛ nyʉ̀ ce coo, a nati a yì bèe ce ncòp-baa-à-rrʉ̀ʉ wèe, a du à rla' Bɛtanì.
12Tʉ̀' à ka' raa, wowèe a natǐ à rla' Bɛtanì, a ka' ce dù, njè à ce yaŋ Jisòs. 13E ka' yɛ ce fik àmbò yi tɛɛ à njìsàp, a tʉr ku' bfù sê, e du a fyɛ' enɛ yi yʉ lɛ. A ka' bà', a yɛ yuu mbo caa efa bfù cà'cà' ka', njobè' nfè' fik e ke yʉ à m ghɛɛ ka'. 14Jisòs à laa nè ce fik anà enɛ̂, “À be kèr yʉ mbàŋ tɛ ŋwɛ̀ bo ye ka'.” Ŋgǎa yɛ'ni yì buu a yu' àmbò e làa wa'a.
15Wowèe a du a ba' à rla' Jɛ̀rusalɛ̀m, Jisòs à ka' niŋ mbe Ndàp Nyʉ̀, a yɛ bèe mo' àmbò a ce fyèni buu, wèe mo' a ce yuu. E m jùu wowèe e mbo. E m bùte btɛbùr ese bèe ce a m ce kupse mbàa, ker ba mnta' ese bèe ce a m ce fyèni bbèŋ. 16E m byemi enɛ ŋwɛ̀ ker byɛ' yuu to'ni àgho à mambe Ndap Nyʉ̀ ka'. 17E m yɛ'ni bèe a laa enɛ̂, “Mbò a saŋ mbe Ŋwǎ' Nyʉ̀ enɛ, ‘A be too yà ndap enɛ ndap rloo nè bto' wɛɛwɛ’ a? Ka' yi yu wa'a, wèe à gee yà ndap à kʉtì ba mbʉ̀' byɛ̀ɛ.” 18Běe bgòrgòr efa ŋgǎa taŋshi taŋshì ba ŋgǎa ryɛ'ni mncir a ka' yu' yuu ce Jisòs à m gèe na, a ce ròo nduunjì à ryʉ ye, a ker wɛp njobè' bèe wɛɛwɛ a m tʉr rgha'nì àmbò li ryɛ'nì. 19Nyʉ̀ à ka' coo, Jisòs wèe a fʉʉ à mʉ̀ rla' anà.
20Wowèe a ka' ce càa à mʉ ŋgàptʉ' a yɛ ce fik cà àmbò yi ku yopri nè mŋgàŋ-ŋwɛ̀. 21Pità à kuushì yuu ce yi mʉ ba, a laa nè Jisòs enɛ̂, “Rabài, yɛ ce ce wɛ̀ mʉ cɛp nà àmbò yi yuushi.” 22Jisòs à beesì nè wowèe enɛ̂, “Byemi nè Nyʉ̀. 23M ce suŋ wèe nè mini-ŋwɛ̀ mɛnɛ ŋwɛ̀ ce e ka' byemi nè Nyʉ̀, ke' ce tarni ka', e ka' laa nè rtùu ca enɛ̂, ‘Rtùu câ, co'ti embo nà, du gwe njep rdip rgòr’, banɛ yi be kù ba wa'a. 24Yi ka' ba wa'a, mɛ̌ suŋ wèe mɛnɛ buu wɛɛwɛ ce wèe ka' bipshi nè Nyʉ̀ à rloo, byemi weenɛ wèe à koni, banɛ Nyʉ̀ be fa nè wèe. 25Wèe à ka' ce gèe rloo, tʉr ŋwɛ̀ mò' à ntee bebep, wèe foosì ye tɛ yè Ta embe bùu bo fòosi wèe yè buu bbebep foŋ. 26[Wèe ka' tɛ fòosi bèe ce a gèe buu bbebep nè wèe ka', banɛ yè Ta embe bùu be fòosi wèe yè buu bbebep foŋ ka'.”]
27Jisòs a ŋgǎa yɛ'ni yì buu wèe a m ker kʉti à rla' Jɛ̀rusalɛ̀m. E ka' ce jɛ̀shi mbe Ndàp Nyʉ̀, běe bgòrgòr efa mʉ̀ ŋgǎa taŋshi taŋshì ba ŋgàa ryɛ'ni mncir ker ba bleebèe a vʉ a yɛ ye, 28a bipshi nè ye enɛ̂, “Ŋger ce à ce gèe buu ca àgho li lò efɛ? Ŋwɛ̀ ce e fa wɛ̀ ŋger ca à fa nda?” 29Jisòs à beesì a laa nè wowèe enɛ̂, “M be bipshi yuu mo'sir nè wèe. Wèe à ka' beesî, banɛ m suŋ wèe ŋwɛ̀ ce e fa mɛ̀ ŋger à rgèe buu ca. 30Ŋger ce Jǒn à m tʉr à rbàptir bèe nà yi m lò ba ese Nyʉ̀ kɛ̀ ese bèe? Bèesi à nè mɛ̀.” 31Wowèe a du mcʉ̀, a seesi enɛ̂, “Sèe à ka' laa seenɛ yi ŋger anà yi m lò ese Nyʉ̀, banɛ e be bipshi nè sèe enɛ̂, ‘Wèe à m ka' ba byemi yuu ce e m làa ka' njokɛ?’ 32Wà' sèe be làa seenɛ yi m lò ba ese bèe a?” Wowèe a m wɛp bèe njobè' ŋwɛ̀ nsìp à m byemi enɛ Jǒn à m ba ŋwɛ̀ ncep ntuu Nyʉ̀ ghup. 33Wowèe a kʉtì a laa nè Jisòs enɛ̂, “Wèr yi ka'.” Jisòs à laa nè wowèe enɛ̂, “Banɛ mɛ mɛ̀ foŋ be suŋ wèe ŋwɛ̀ ce e m fa mɛ̀ ŋger à rgèe buu ca ka'.”
Айни замон обунашуда:
Ñwaè' Maêk 11: LNT
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Limbum New Testament © Bible Society of Cameroon, 2003.