URA TIN AYRA 32
32
1Laban col kolo maɗii feɗet gi deɓ goryom suu tamagina u goryosiya paɗ vunum ki kasi, gi tam hoŋ vo hu li ma nam ay huna.
Yakob min tam a ŋgaf u Ezaw
2Yakob gi tam hu voɗ mamba a tuɗta may ni suu sunda huulona ŋgaf u namu. 3Yakob wasi na ni di ana, «Ni kaŋŋa vi Lona.» Nam tin sem li namma ana, Mahanaim.
4Yakob cuk suu sunda ha fokom eg wayamma Ezaw hu mbassa Seirra ni kay ndaŋgara Edomba. 5Nam gaɗasi dasi ana, «Boy ma agi tuɗ dam maŋ sa ŋgol manna, Ezawna, ni, saaŋ ma sunda, Yakob, njaɗ ana, an ka ki vi Labanni day day, cemi lay an ka ni varamu. 6An fi mbutlina, korra, timigiina, suu sunda njufiina u boyogina. An gi sunda ha egeŋ aŋ sa ŋgol manna daŋ yaŋ ha ki fok a aŋ tuɗ van jivi na vige?» 7Suu sunda hoŋ ay eg Yakob dam ana, «Ami tew ay eg wayaŋŋa Ezaw wa, nam ka ŋgafaŋ ay u suuna um kis kis fiɗi.» 8Yakob mbuɗ ndaa cocoo, nam ɓorow ii suu ay umma ki mba', timigiina, mbutlina, jamballa, ni nam ɓorowosisina ki usi may. 9Nam di ana, «Lini Ezaw mba ci suu ki wa dew ni, suu hiŋŋa hin suɗ tasiya.»
10Yakob cen Lona ana, «Lona vi bun ŋgolo Abraham, Lona vi bun Isaak, Yawe ma dan ana hoŋ hu mbas maŋga hu li ma aŋ vuɗ ay huna, an hin li u aŋu va ka laŋgi. 11An ka ndaki kay jivira u ɗegee maŋga aŋ laɗ kay saaŋ ma sundaraɗi, kay an calaɗ yo lum ma Yurdanna ay ki ni u tokolo manda ɦawaa, cecemi an ɓorow ii suu mansina ki kaŋŋa mba'. 12An ceneŋu, suɗun ki ko wayanna Ezaw, an lam ndaaram kay a nam mba cami ki u boyogina u kemba halaŋgi. 13Kay aŋ di ana aŋ hin li u anu, va ka lanɗi, an hin zuluŋ njafaŋ ko ŋgetlna fun lummana na sa ka ndak a ndumumbi.»#Ura 22.17 14Yakob buu ni hu li namma gaw.
Nam yow u yoori mamsina nde nde ɦasi maŋ wayamma Ezaw. 15Ҥugunina kis kis mba', ŋgekgina dok-mba' timigiina kis kis mba', galagina dok-mba' may. 16Dogoni jamballa dok-hindi u gorra usiya, dogoni mbutlina dok-fiɗi, bologi mbutlina doogo may. Dogoni korra dok-mba', njufiina doogo may. 17Nam ɦasi maŋ suu sun mamsina ɓorowosi irisi ki zeɗ zeɗ hin dasi ana asi tuɗusi ha fokomu, «Hinigi dukugi ki nde nde.» 18Nam gaɗ ma ha fok jewna ana, «Lini wayanna Ezaw ŋgafaŋu, joɓoŋ wa ana aŋŋi vi gege aŋ tuɗ arage, yoori suu fokoŋŋa ni vi gege? 19Aŋ hoŋ dira ana, ni vi saaŋ ma sunda Yakob, sunusi ay ni maŋ sa ŋgol manna Ezaw. Nam tamba ka tuɗ ay umi dagan may.» 20Nam gaɗ sa ma ha kay cerem a mbara u ma hindina u suu ha kay ceresina ni na may ana, «Agi ŋgaf u sa ŋgol manna Ezaw wani agi li ko ndaɗta na. 21Dagi ana, saaŋ ma sunda Yakob ka tuɗ ay ŋgoromi dagan.» Yakob di ana, «An heɓem hurum ha ki fok u tlesuu an sunumsina ha wanna. Daganda an hin mba wam irim u tanda. Nam li hin van jivi kalage.» 22Tlesuu asina tuɗ ha ki fokom may, nam buu ka hu liim ma nam ka huna tu may.
Yakob njogoɗ u Lona hu Penuwel
23Hu njeŋge ndaɗta ni, Yakob col kolo yow boyogom suu mbana, u boyogi suu sunusi suu mbana, u goryom suu doogo yam dewna may, asi taɓa vun voo lumma Yabokŋa. 24Nam taɓa suuna ha ki jew taɓani, hin mba taɓa tlegeyem ha ki may.
25Yakob hin kay tam dew. Sana mba njogoɗ u nam ta ta tew ŋgarapii lin hal a fo kira.#Oze 12.3-4 26Sana wi ana nam ka vi Yakob kaŋgaɗi ni nam cam kay goŋom na ni goŋom weles ki gaw. 27Nam dam ana, «Hininu an tuɗa kay lina ka fo kiyo.» Yakob dam ana, «An ka hiniŋ tuɗ bay aŋ paɗ vunuŋ ka ki kanɗi.»
28Nam joɓ Yakob ana, «Seŋ ana mege?» Nam hoŋom dira ana, «Sen ana Yakob.»
29Nam dam ana, «Sa ka yaŋ ana Yakob oloɗi, seŋ mbuɗ ki ni ana Israel, kay aŋ njogoɗ u Lona, duk suu warna ni aŋ su ki kasi wa.»#Ura 35.10 30Yakob hin joɓom ana, «Aŋ taŋga seŋŋi ana me mayge? Takan seŋ aya.» Nam hoŋom dira ana, «Aŋ joɓon senni kay mege?» Nam paɗ vunum ki kam hu li namma.#Suu 13.17-18 31Yakob tin sem li namma ana, Penuwel, kay nam di ana, «An wi Lona u irinu, iiri manda suɗ ki wa.»
32Hu li ma nam jok hu Penuwel ni faɗta day ki kolo may, Yakob tuɗ ki dalira ko goŋomu. 33Kay ndaɗta suuIsraelna ta ta cemi ka kom nde ma hu goŋanaɗi, kay Lona ci Yakob kay goŋom namma jaam sariyam mbuɗum ki dalira.
Айни замон обунашуда:
URA TIN AYRA 32: BMS
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Bible Moussey © Bible Society of Chad, 2002.