URA TIN AYRA 33
33
Yakob ŋgaf u Ezaw
1Yakob gol irim ha na ni wi Ezaw tuɗ ay u suuna um kis kis fiɗi. Nam ɓorow ii gorra ki fok gi Lea u Rasel u boyogi suu sun masi suu mbana. 2Nam cuk boyogi suu sun suu mbana ha fok u goryosiya, hin gi Lea ha u goryoɗu, Rasel u Yosef daɓ ha dagan may. 3Nam tamba kal ha fokosiya. Nam hin tok a tew eg wayamma ni goɓ kaŋga yamma kiɗisiya. 4Ezaw liŋ ay ŋgafamu, mboɗom hurum gi deɓ tasi u tiina. 5Ezaw gol irim na ni wi boyogina u kemba, nam joɓom ana, «Suu uŋ asina ni suurage?» Yakob hoŋom dira ana, «Ni kemba Lona ɦasi ay maŋ saaŋ ma sundana.» 6Boyogi suu sun suu mbana ɦuɗ tasi ay goɓ kaŋga u goryosiya. 7Lea u goryoɗ goɓ kaŋga may. Ŋgoo dagan Yosef u Rasel ɦuɗ tasi ay goɓ kaŋga may.
8Ezaw joɓom ana, «Tlesuu aŋ sunusi ha zeɗ zeɗ an ŋgafasi ha wanna ni amege?» Yakob hoŋom dira ana, «Ni kay a fi jivira fok sa ŋgol manna.» 9Ezaw dam ana, «Mansina ka kon cocoo wayanna, hin maŋ suu wanna ni maŋu.» 10Yakob hoŋom dira ana, «Ҥawaa an ceneŋŋi ceniya, lini an fi jivira fokoŋ wa ni vi tlesuu an ɦaŋsinana. Kay ndaɗta an goloŋ iriŋŋi ko sana wi ni vok Lona na. Kay aŋ van u furira. 11Vi tlesuu an ɦaŋsina wanna, kay Lona lan ay jivi cocoo, va ma kaɗakan kaɗi. Nam tlam um coco ana nam vi tlena, Ezaw hin vasi may.»
12Ezaw di ana, «Mini tay tuɗuya, an tuɗ ha fokoŋu.» 13Yakob hoŋom dira ana, «Sa ŋgol manna aŋ wi ana kemba ni maŋiya, dogoni timigiina u mbutli mansina gorra usi goriyo, lini ɦeɓesi a tuɗusi hu buu ma dewna ni yoori mansina miɗ ki halaŋ. 14Sa ŋgol manna tuɗ ha fok saam ma sunda, an may ni tuɗ ha kay cerem ma lam lam u yoorina u gorkemba fokonu, ta ta tew vi sa ŋgol manna hu Seir.» 15Ezaw di ana, «An hiniŋ jimi suu man suu ka egeŋ ɦiw.» Yakob hoŋom dira ana, «Kay mege? An halni ko an fi jivira ni fok sa ŋgol manna doy hol.»
16Hu buu namma gawni Ezaw hoŋ ay hu voɗ mamba Seirra gaw. 17Yakob tuɗ hu Sukot, hu li namma nam min zina kamu, min mbutluɓma kay yoori mamma may. Kay ndaɗta asi yi sem li namma ana, Sukot.
Yakob cuk ziim vok Sekem
18Hu li ma Yakob hoŋ ay hu Padan-Aram mba tew ki Sekem hu mbassa Kanaanda u furira, nam cuk ziim vok ɦoŋzi ma ŋgolna na. 19Nam gus lina ko goryoŋ Hamor ma bu Sekemma u sili kis. Nam min mbutluɓ mamma hu wa.#Jos. 24.31; Jaŋ 4.5 20Nam min givin ma togolla maŋ Lona, yam sem ana, Lona ni Lo ma vi suu Israelna.
Айни замон обунашуда:
URA TIN AYRA 33: BMS
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Bible Moussey © Bible Society of Chad, 2002.