Luˉka‸ li‸ 18

Mehˇchawˇma leh suhˉ jehˬ shehˍ hpaˇ awˬ lawn tawˇ pa haˉ te maˍ ve

1Yawˇ hui nyi ma maˇ luˬ leh hkʼaˬ htaˆ ka‸ bon gʼa lawˬ tuˬ, yawˇ yawˇ hui hta‸ tawˇ pa haˉ te maˍ piˇ leh kʼoˆ ve, 2Venˇ teˇ venˇ awˬ hkʼaw lo suhˉ jehˬ shehˍ hpaˇ teˇ gʼaˇ cawˬ ve yoˬ. Yawˇ lehˬ Gʼuiˬsha hta‸ ka‸ maˇ kawˆ, chaw yaˇ hta ka‸ maˇ yawˆ maˇ yan ve chaw hpeh‸ ve yoˬ. 3Venˇ oˇ ve awˬ hkʼaw lo mehˇchawˇma teˇ gʼaˇ cawˬ ve yoˬ. Yawˇ lehˬ suhˉ jehˬ shehˍ hpaˇ oˇ ve teˇ gʼaˇ geh teˇ hkui teˇ hkui kʼai leh, Ngaˬ ve canˇ paˍ ngaˬ hta‸ ya‸ laˇ ve hta‸ hteˇ ve cawˇ ve awˬ hkʼaw lo ngaˬ awˬ pon a ciˉ te laˇ-oˆ teh‸, kʼoˆ piˇ tcuhˉ taˍ ve yoˬ. 4Teˇ tcuhˉ teˇ yanˇ awˬ hkʼaw lo suhˉ jehˬ shehˍ hpaˇ oˇ ve te‸ chiˉ maˇ te piˇ. Ya‸ hkʼaˇ, awˬ hkʼaw‸ nawˉ yawˇ nyi ma hkʼaw dawˇ ve, Ngaˬ lehˬ Gʼuiˬsha hta‸ ka‸ maˇ kawˆ, chaw yaˇ hta‸ ka‸ maˇ yawˆ maˇ yan ve chaw hpeh‸ ve htawˇ, 5mehˇchawˇma chi ngaˬ hta‸ sho‸ sha‸ laˇ ve pa taw, hteˇ ve cawˇ ve awˬ hkʼaw lo ngaˬ yawˇ awˬ pon te piˇ tuˬ yoˬ. Hkʼe maˇ heˆ kʼo, yawˇ hkʼaˬ htaˆ ka‸ laˬ leh, hpeh‸ haˍ hkanˍ haˍ jaˇ htaˇ hkʼa gaˬ te laˇ tuˬ yoˬ teh‸ dawˇ ve yoˬ.

6Jawˇmawˇ Yeˍsuˆ kʼaw‸ kʼoˆ ve, Maˇ hteˇ maˇ cawˇ ve suhˉ jehˬ shehˍ hpaˇ lehˬ, yawˇ ve nyi ma hkʼaw dawˇ ve hta‸ dawˇ nyi-o. 7Gʼuiˬsha leuˆ yuˬ taˍ ve chaw teˇ hpaˍ lehˬ, tanˇ hkuinˇ tanˇ vanˇ yawˇ hta‸ lawˬ hkawˉ ve kʼo, Gʼuiˬsha lehˬ hteˇ ve cawˇ ve awˬ hkʼaw lo yawˇ hui awˬ pon maˇ te piˇ tuˬ leh laˇ. Yawˇ maw chaweh law chehˇ tuˬ leh laˇ. 8Ngaˬ nawˬ hui hta‸ kʼoˆ laˇ ve, hteˇ ve cawˇ ve teˇ ceuˬ yawˇ yawˇ hui awˬ pon haˆ haˆ te piˇ tuˬ yoˬ. Ya‸ hkʼaˇ, chaw yaˇ ve Yaˇ hpu kʼaw‸ gaˬ la ve teˇ yanˇ, miˬ guiˬ hkʼoˆ lo yonˍ ve teˇ ceuˬ cawˬ chehˇ ve hta‸ gʼa mawˬ tuˬ laˇ teh‸ kʼoˆ piˇ ve yoˬ.

Hpaˍriˍsehˇ leh awˬ hkawnˍ shaw paˍ awˬ lawn

9A shu yawˇ awˬ to hta‸ hteˇ ve cawˇ ve teh‸ shawˍ taˍ leh, shu hta‸ te‸ chiˉ maˇ shawˍ ve chaw teˇ hpaˍ hpaˍ hta‸ yawˇ tawˇ pa haˉ chi maˍ piˇ leh kʼoˆ ve, 10Chaw nyiˇ gʼaˇ bon lawˬ tuˬ, bon yehˬ lonˉ lo taˆ-e ve yoˬ. Teˇ gʼaˇ Hpaˍriˍsehˇ hpeh‸ leh, teˇ gʼaˇ awˬ hkawnˍ shaw paˍ hpeh‸ ve yoˬ.

11Hpaˍriˍsehˇ teˇ gʼaˇ huˉ taˍ leh, Gʼuiˬ sha-oˬ, ngaˬ lehˬ awˬ kaˍ awˬ nu chaw hta‸ maˇ shuˍ ve pa taw, nawˬ ve awˬ bon hta‸ chiˇ mvuh ve yoˬ. Yawˇ hui lehˬ, hiˉ yuˬ lu yuˬ ve chaw, maˇ hteˇ maˇ cawˇ ve chaw, haˉ chawˇ haˉ paˆ te ve chaw hpeh‸ ve yoˬ. Chi hkʼoˆ, ngaˬ lehˬ awˬ hkawnˍ shaw paˍ chi teˇ gʼaˇ hta‸ ka‸ maˇ shuˍ ve pa taw htawˇ nawˬ hta‸ chiˇ mvuh ve yoˬ. 12Teˇ shinˉ awˬ hkʼaw lo nyiˇ nyi ngaˬ caˇ tuˬ ce ve yoˬ. Ngaˬ gʼa ve hkʼa peu-eˬ awˬ hkʼaw lo teˇ chi pun teˇ pun tanˇ ve yoˬ teh‸, yawˇ awˬ to hta‸ yawˇ kʼoˆ leh bon lawˬ ve yoˬ.

13Ya‸ hkʼaˇ, awˬ hkawnˍ shaw paˍ teˇ gʼaˇ lehˬ, vuiˇ kuiˬ lo huˉ taˍ leh, mvuhˇ naw ma lo chiˇ nyi maˇ hpeh‸. Dawˇ haˍ jaˇ ve awˬ hkʼaw lo yawˇ ve nyi ma pui hta‸ hta leh, Gʼuiˬsha-oˬ, ngaˬ venˇbaˆ uiˍ jaˇ ve hta‸ a ciˉ ha kʼaˉ laˇ-oˆ teh‸ lawˬ hkawˉ ve yoˬ. 14Hkʼe te leh ngaˬ nawˬ hui hta‸ kʼoˆ laˇ ve, awˬ hkawnˍ shaw paˍ lehˬ, hteˇ ve cawˇ ve chaw hpeh‸ la leh, yawˇ ve yehˬ lo kʼo‸-e ve yoˬ. Hpaˍriˍsehˇ lehˬ, hteˇ ve cawˇ ve chaw maˇ hpeh‸ la. Awˬ lawn kʼo, a shu yawˇ awˬ to hta‸ taˍ uiˍ ve chaw teˇ gʼaˇ le le lehˬ, taˍ i ve hta‸ gʼa hkanˍ tuˬ yoˬ. A shu yawˇ awˬ to hta‸ taˍ i ve chaw lehˬ, taˍ uiˍ ve hta‸ gʼa hkanˍ tuˬ yoˬ.

Yaˇ ehˉ teˇ hpaˍ hta‸ Yeˍsuˆ bon na‸ piˇ ve

15Oˇ htaˇ, yaˇ ehˉ teˇ hpaˍ hta‸ Yeˍsuˆ htawˇ piˇ tuˬ, yaˇ ehˉ teˇ hpaˍ hta‸ shu yawˇ geh shiˍ laˬ ve yoˬ. Awˬ la‸ gʼawˇ teˇ hpaˍ oˇ ve hta‸ gʼa mawˬ htaˇ, shiˍ laˬ ve chaw teˇ hpaˍ hta‸ deˇ ve yoˬ. 16Ya‸ hkʼaˇ Yeˍsuˆ lehˬ, yaˇ ehˉ teˇ hpaˍ hta‸ kuˬ leh kʼoˆ ve, Yaˇ ehˉ teˇ hpaˍ hta‸ ngaˬ geh laˬ piˇ-oˆ. Yawˇ hui hta‸ taˇ tawˍ taˍ. Awˬ lawn kʼo, Gʼuiˬsha ve mvuhˇmiˬ lehˬ, chaw oˇ hkʼe ve mvuhˇmiˬ hpeh‸ ve yoˬ. 17Ngaˬ nawˬ hui hta‸ awˬ tehˬ awˬ na kʼoˆ laˇ ve, yaˇ ehˉ hkʼa shuˍ shuˍ Gʼuiˬsha ve mvuhˇmiˬ hta‸ maˇ ha‸ yuˬ ve chaw hkʼaˬ ve teˇ gʼaˇ maˇ kʼoˆ, yawˇ ve mvuhˇmiˬ awˬ hkʼaw lo maˇ gʼa lo‸-e taˬ teh‸ kʼoˆ ve yoˬ.

Hkunˉ te ve paw sha ve chaw haˉ paˍ

18Jawˇmawˇ teˇ gʼaˇ yawˇ hta‸ na nyi ve, Da‸ ve Saˍ la‸-oˬ, co ti‸ ha ti‸ gʼa tuˬ ngaˬ hkʼaˬ hkʼe gʼa te tuˬ le teh‸ kʼoˆ ve yoˬ.

19Yeˍsuˆ kʼaw‸ kʼoˆ ve, Aˬ hto‸ ma pa taw nawˬ ngaˬ hta‸ da‸ ve teh‸ kʼoˆ ve le. Gʼuiˬ sha maˇ heˆ kʼo, da‸ ve teˇ gʼaˇ ka‸ maˇ cawˬ. 20Awˬliˇtawˇhkawˇ teˇ hpaˍ hta‸ nawˬ shiˍ ve yoˬ. Haˉ chawˇ haˉ paˆ taˇ te, chaw hta‸ taˇ tiˇ pehˍ, shu ve mawˇ hta‸ taˇ hkʼawˇ, shu hta‸ maˇ heˆ heˆ ve shaˉ hkiˆ taˇ hkanˍ, nawˬ ve awˬ pa awˬ e hta‸ yawˆ yawˆ yan yan te-o teh‸ yawˇ hta‸ kʼoˆ piˇ ve yoˬ. #Taw 20:12-16

21Chaw oˇ ve lehˬ, Ngaˬ yaˇ nehˬ hpeh‸ htaˇ ka‸ chi hkʼa peu-eˬ hta‸ ngaˬ na yuˬ leh te peuˬ teh‸ kʼaw‸ kʼoˆ ve yoˬ.

22Yeˍsuˆ tawˇ oˇ ve hta‸ gʼa kaˇ ve teˇ yanˇ, Nawˬ teˇ ceuˬ loˍ sheˍ ve yoˬ. Nawˬ hkʼa cawˬ ve mawˇ jeˬ hta‸ hawˇ baˬ leh, haˍ yaˇ gʼawˇ yaˇ teˇ hpaˍ hta‸ pehˬ piˇ-oˆ. Mvuhˇ naw ma hkʼoˆ lo awˬ hpfuhˇ hkʼaˆ ve mawˇ nawˬ cawˬ taˍ tuˬ yoˬ. Peuˬ leh, nawˬ kʼaw‸ laˬ leh ngaˬ hkʼaˇ suh laˬ-o‸ teh‸, yawˇ hta‸ kʼoˆ piˇ ve yoˬ. 23Chaw oˇ ve lehˬ, tawˇ hkawˇ chi hta‸ gʼa kaˇ htaˇ, yawˇ dawˇ haˍ jaˇ ve yoˬ. Awˬ lawn kʼo, yawˇ paw sha jaˇ ve chaw teˇ gʼaˇ hpeh‸ ve yoˬ.

24Yeˍsuˆ oˇ ve hta‸ gʼa mawˬ htaˇ yawˇ kʼoˆ ve, Paw sha ve chaw hui lehˬ, Gʼuiˬsha ve mvuhˇmiˬ awˬ hkʼaw lo lo‸-e tuˬ hkʼaˬ ma haˍ jaˇ ve le. 25Kaˍ laˍ oˆ teˇ hkeh gʼo‸ naˍ hkʼawˇ awˬ hkʼaw lo‸-e tuˬ ve lehˬ, paw sha ve chaw teˇ gʼaˇ Gʼuiˬsha ve mvuhˇmiˬ awˬ hkʼaw lo lo‸-e tuˬ ve a‸ kehˉ sha ve yoˬ teh‸ kʼoˆ piˇ ve yoˬ.

26Gʼa kaˇ ve chaw hui lehˬ, Hkʼe te kʼo, htaiˍ hkʼaw‸ ve hta‸ a shu gʼa hpeh‸ tuˬ le teh‸ kʼoˆ ve yoˬ.

27Yawˇ kʼaw‸ kʼoˆ ve, Chaw yaˇ te maˇ gʼa ve teˇ hpaˍ hta‸ Gʼuiˬsha te gʼa ve yoˬ teh‸ kʼoˆ piˇ ve yoˬ.

28Oˇ htaˇ Peˍtruˆ kʼoˆ ve, Ngaˬ hui lehˬ hkʼa peu-eˬ hta‸ baˬ taˉ leh nawˬ awˬ hkʼaˇ suh laˬ peuˬ teh‸ kʼoˆ piˇ ve yoˬ.

29Yeˍsuˆ kʼaw‸ kʼoˆ ve, Ngaˬ nawˬ hui hta‸ awˬ tehˬ awˬ na kʼoˆ laˇ ve, Gʼuiˬsha ve mvuhˇmiˬ awˬ pon, a shu yawˇ ve yehˬ, a shu yawˇ ve awˬ miˇ ma, a shu yawˇ ve awˬ viˉ awˬ nyi, a shu yawˇ ve awˬ pa awˬ e leh, a shu yawˇ ve awˬ yaˇ awˬ duˬ teˇ hpaˍ hta‸ baˬ taˉ ve chaw hkʼaˬ ve teˇ gʼaˇ maˇ kʼoˆ, 30chi teˇ ca‸ na‸ awˬ hkʼaw lo oˇ ve a‸ kehˉ leuˉ leh gʼa tuˬ ve awˬ hkʼoˆ ka‸, awˬ hkʼaw‸ nawˉ teˇ ca‸ na‸ awˬ hkʼaw lo co ti‸ ha ti‸ hta‸ htawˇ gʼa tuˬ yoˬ teh‸ kʼoˆ ve yoˬ.

Yeˍsuˆ yawˇ gʼa suh tuˬ ve awˬ lawn teˇ pawˆ kʼaw‸ hto piˇ ve

31Oˇ htaˇ Yeˍsuˆ lehˬ, tcuh yaˇ teˇ chi nyiˇ gʼaˇ hta‸ kuˬ leh kʼoˆ piˇ ve, Ngaˬ hui Yeˍruˆsaˍlehnˍ venˇ lo kʼai chehˇ ve yoˬ. Chaw yaˇ ve Yaˇ hpu awˬ lawn Gʼuiˬsha ve tcuh kaˍ paˍ hui hkʼa bvuh‸ taˍ ve hkʼa peu-eˬ gʼa biˇ la tuˬ yoˬ. 32Awˬ lawn kʼo, buiˇshaˆaˉnaˆ chaw hui ve la‸ hkʼaw lo yawˇ hta‸ chiˇ a‸ piˇ leh, kʼoˆ guiˇ gʼuiˬ guiˇ ve, maˇ shawˍ maˇ caˆ te ve leh, ciˉ gʼuiˇ hpe‸ pfuhˍ ve hta‸ yawˇ gʼa hkanˍ tuˬ yoˬ. 33Yawˇ hui yawˇ hta‸ jaw‸ peuˬ hkʼaw‸ nawˉ, tiˇ pehˍ tuˬ yoˬ. Peuˬ leh shehˆ nyi teˇ nyi gaˬ kʼo, yawˇ kʼaw‸ te‸ tu la tuˬ yoˬ teh‸, yawˇ hui hta‸ kʼoˆ piˇ ve yoˬ.

34Ya‸ hkʼaˇ, awˬ lawn chi teˇ hpaˍ hta‸ yawˇ hui a ciˉ ka‸ maˇ shiˍ. Yawˇ hui hta‸ kʼoˆ piˇ ve tawˇ hkawˇ chi teˇ hpaˍ lehˬ, yawˇ hui mehˆ gʼuˇ suhˍ faˉ taˍ ve hkʼe hpeh‸ leh, yawˇ kʼoˆ ve hta‸ yawˇ hui na maˇ gʼa.

Yeˍriˆhkoˇ venˇ awˬ paˇ lo mehˆ cuˉ paˍ hta‸ gu na-e piˇ ve

35Yawˇ lehˬ Yeˍriˆhkoˇ venˇ awˬ paˇ lo gaˬ la ve teˇ yanˇ, mehˆ cuˉ paˍ teˇ gʼaˇ ya‸ kʼaw paˇ lo mui leh lawˬ caˇ chehˇ ve yoˬ. 36Mehˆ cuˉ paˍ oˇ ve lehˬ, chaw awˬ moˍ lonˉ kʼai kʼai laˬ laˬ te chehˇ ve hta‸ gʼa kaˇ htaˇ, Chi aˬ hto‸ ma te ve le teh‸ yawˇ na nyi ve yoˬ.

37Naˍzaˍrehˆ chaw Yeˍsuˆ laˬ chehˇ ve yoˬ teh‸, yawˇ hui yawˇ hta‸ kʼoˆ piˇ ve yoˬ.

38Oˇ htaˇ yawˇ kʼoˆ ve, Daˍviˆ ve Yaˇ hpu Yeˍsuˆ-oˬ, ngaˬ hta‸ ha kʼaˉ laˇ-oˆ teh‸ kuˬ ve yoˬ.

39Awˬ gʼuˇ suhˍ kʼai chehˇ ve chaw teˇ hpaˍ lehˬ, Ta‸ iˉ chehˇ-oˆ teh‸ yawˇ hta‸ deˇ piˇ ve htawˇ yawˇ lehˬ, Daˍviˆ ve Yaˇ hpu-oˬ, ngaˬ hta‸ ha kʼaˉ laˇ-oˆ teh‸, leuˉ leh gʼaˇ hte‸ kʼaw‸ kuˬ ve yoˬ.

40Yeˍsuˆ huˉ taˍ leh, Yawˇ hta‸ ngaˬ geh shiˍ veu laˇ-oˆ teh‸ kʼoˆ piˇ ve yoˬ. Mehˆ cuˉ paˍ yawˇ awˬ paˇ lo gaˬ la ve teˇ yanˇ Yeˍsuˆ kʼoˆ ve, 41Nawˬ awˬ pon ngaˬ hta‸ aˬ hto‸ ma te tcuh laˇ gaˇ ve le teh‸ na nyi htaˇ,

Jawˇmawˇ-oˬ, ngaˬ mehˆ mawˬ la tuˬ nawˬ hta‸ te tcuh laˇ gaˇ ve yoˬ teh‸ yawˇ kʼoˆ piˇ ve yoˬ.

42Yeˍsuˆ kʼaw‸ kʼoˆ ve, Mehˆ mawˬ la piˇ-oˆ. Nawˬ yonˍ ve teˇ ceuˬ lehˬ, nawˬ hta‸ na-e la piˇ peuˬ teh‸, yawˇ hta‸ kʼoˆ piˇ ve yoˬ.

43Chaw oˇ ve lehˬ, teˇ cawˬ haˉ mehˆ mawˬ la leh, Gʼuiˬsha hta‸ chiˇ uiˬ chiˇ mvuh leh Yeˍsuˆ hkʼaˇ suh kʼai ve yoˬ. Chaw hkʼa peu-eˬ oˇ ve hta‸ gʼa mawˬ ve teˇ yanˇ Gʼuiˬsha ve bon hta‸ chiˇ mvuh ve yoˬ.

ప్రస్తుతం ఎంపిక చేయబడింది:

Luˉka‸ li‸ 18: LHBE

హైలైట్

షేర్ చేయి

కాపీ