Luˉka‸ li‸ 12

Heˍ puiˉ ve teˇ ceuˬ hta‸ jaw kʼai-o

1Oˇ htaˇ, teˇ gʼaˇ leh teˇ gʼaˇ naˆ da‸ htaˇ hkʼa gaˬ chaw awˬ hinˉ awˬ meunˍ hpawnˬ la ve teˇ yanˇ, awˉ lawˉ yawˇ ve awˬ la‸ gʼawˇ teˇ hpaˍ hta‸ yawˇ kʼoˆ piˇ ve, Hpaˍriˍsehˇ ve diˇ hta‸ shaˍ ti‸ te leh jaw kʼai-o. Diˇ teh‸ kʼoˆ ve lehˬ, heˍ puiˉ ve teˇ ceuˬ hta‸ kʼoˆ gaˇ ve yoˬ. 2Hkʼa beh taˍ ve awˬ ceuˬ hkʼa peu-eˬ maˇ hpeu‸ tawˆ la tuˬ ve teˇ ceuˬ ka‸ maˇ cawˬ. Hkʼa faˉ taˍ ve awˬ ceuˬ hkʼa peu-eˬ htawˇ, maˇ shiˍ la tuˬ ve teˇ ceuˬ ka‸ maˇ cawˬ. 3Naˆ ho‸ kuiˬ awˬ hkʼaw lo nawˬ hui hkʼa kʼoˆ ve teˇ hpaˍ awˬ gʼeuˆ ba kuiˬ lo shu gʼa kaˇ tuˬ yoˬ. Bawehˇ awˬ hkʼaw lo nawˬ hui a yehˉ yehˉ hkʼa yaw ve teˇ hpaˍ yehˬ awˬ hkʼoˆ lo shu kʼaw‸ kuˬ maˍ piˇ tuˬ yoˬ.

A shu hta‸ kawˆ cawˇ ve awˬ lawn

4Ngaˬ ve awˬ chawˇ teˇ hpaˍ-oˬ, ngaˬ nawˬ hui hta‸ kʼoˆ laˇ ve, awˬ to hta‸ tiˇ pehˍ gʼa leh, awˬ hkʼaw‸ nawˉ te‸ chiˉ kʼaw‸ te maˇ gʼa ve chaw teˇ hpaˍ hta‸ taˇ kawˆ. 5Ya‸ hkʼaˇ, nawˬ hui a shu hta‸ gʼa kawˆ tuˬ ve ngaˬ nawˬ hui hta‸ hto laˇ shaˍ. Awˬ to hta‸ tiˇ pehˍ peuˬ hkʼaw‸ nawˉ moˬ naˆ ho‸ awˬ hkʼaw lo baˬ keu tuˬ kanˇ paˆ cawˬ shehˍ hpaˇ hta‸ kawˆ-oˆ. Ngaˬ nawˬ hui hta‸ awˬ tehˬ awˬ na kʼoˆ laˇ ve, yawˇ hta‸ kawˆ-oˆ.

6Jaˍ meuˇ ngaˇ hkeh hta‸ peh‸ shanˍ nyiˇ peh‸ hawˇ ve maˇ heˆ laˇ. Jaˍ meuˇ oˇ ve teˇ hpaˍ awˬ hkʼaw lo, teˇ hkeh hta‸ ka‸ Gʼuiˬsha maˇ leunˇ. 7Nawˬ hui ve uˉ hkeh mvuh hkʼa peu-eˬ hta‸ htawˇ gʼaw nyi taˍ peuˬ. Hkʼe te leh, taˇ kawˆ. Jaˍ meuˇ maˇ jaˇ ve a‸ kehˉ nawˬ hui awˬ hpfuhˇ hkʼaˆ jaˇ ve yoˬ.

Chaw yaˇ mehˆ gʼuˇ suhˍ Yeˍsuˆ hta‸ hkanˍ yuˬ ve

8Ngaˬ nawˬ hui hta‸ kʼoˆ laˇ ve, hkʼaˬ ve chaw teˇ gʼaˇ maˇ kʼoˆ, chaw yaˇ mehˆ gʼuˇ suhˍ ngaˬ hta‸ hkanˍ yuˬ ve kʼo, Gʼuiˬsha ve mvuhˇ naw ma tcuh yaˇ teˇ hpaˍ mehˆ gʼuˇ suhˍ chaw yaˇ ve Yaˇ hpu htawˇ yawˇ hta‸ hkanˍ yuˬ tuˬ yoˬ. 9Chaw yaˇ mehˆ gʼuˇ suhˍ ngaˬ hta‸ chiˇ baˬ ve chaw lehˬ, Gʼuiˬsha ve mvuhˇ naw ma tcuh yaˇ teˇ hpaˍ mehˆ gʼuˇ suhˍ chaw yaˇ ve Yaˇ hpu htawˇ yawˇ hta‸ chiˇ baˬ tuˬ yoˬ.

10Chaw yaˇ ve Yaˇ hpu hta‸ yaw ya‸ ve chaw hkʼaˬ ve teˇ gʼaˇ maˇ kʼoˆ, yawˇ ve venˇbaˆ hta‸ hpehˇ piˇ tuˬ yoˬ. Ya‸ hkʼaˇ, da‸ ve kehˬ ve Awˬ ha hpu hta‸ maˇ shawˍ maˇ caˆ kʼoˆ ve chaw teˇ hpaˍ ve venˇbaˆ hta‸ hpehˇ piˇ tuˬ maˇ heˆ.

11Shu nawˬ hui hta‸ bon yehˬ awˬ hkʼaw lo maˇ kʼoˆ, jawˇmawˇ teˇ hpaˍ leh kanˇ paˆ uiˍ shehˍ hpaˇ teˇ hpaˍ mehˆ gʼuˇ suhˍ maˇ kʼoˆ, yuˬ kʼai ve teˇ yanˇ, nawˬ hui hkʼaˬ hkʼe gʼa yaw hkʼaw‸ tuˬ, hkʼaˬ hkʼe gʼa kʼoˆ tuˬ taˇ dawˇ hkiˉ. 12Awˬ lawn kʼo, awˬ yanˇ oˇ ve awˬ hkʼaw lo nawˬ hui hkʼaˬ hkʼe gʼa kʼoˆ tuˬ, da‸ ve kehˬ ve Awˬ ha hpu nawˬ hui hta‸ maˍ laˇ tuˬ yoˬ teh‸ kʼoˆ piˇ ve yoˬ.

Paw sha ve chaw luˬ paˍ awˬ lawn tawˇ pa haˉ te maˍ ve

13Oˇ htaˇ, chaw awˬ moˍ lonˉ awˬ hkʼaw lo chaw teˇ gʼaˇ kʼoˆ ve, Saˍ la‸-oˬ, ngaˬ awˬ viˉ paˍ ngaˬ hta‸ awˬ shinˉ pehˬ laˇ tuˬ yawˇ hta‸ a ciˉ kʼoˆ piˇ-oˆ teh‸ Yeˍsuˆ hta‸ kʼoˆ piˇ ve yoˬ.

14Ya‸ hkʼaˇ Yeˍsuˆ kʼaw‸ kʼoˆ ve, Awˬ chawˇ-oˬ, nawˬ huiˉ maˬ awˬ hkʼoˆ hta‸ suhˉ jehˬ shehˍ hpaˇ leh awˬ shinˉ pehˬ shehˍ hpaˇ te tuˬ, a shu ngaˬ hta‸ teh taˍ laˇ ve le teh‸ yawˇ hta‸ kʼoˆ piˇ ve yoˬ. 15Yawˇ yawˇ hui hta‸ kʼoˆ piˇ ve, Shu mawˇ shu jeˬ hta‸ sheˉ lai ve nyi ma a ciˉ ka‸ taˇ cawˬ piˇ. Awˬ lawn kʼo, mawˇ jeˬ maˇ maˇ cawˬ ve pa taw chaw yaˇ a sha‸ gʼa te‸ ve maˇ heˆ teh‸ kʼoˆ ve yoˬ.

16Oˇ htaˇ, yawˇ yawˇ hui hta‸ tawˇ pa haˉ te maˍ piˇ leh kʼoˆ ve, Paw sha paˍ teˇ gʼaˇ yawˇ ve miˬguiˬ da‸ leh, awˬ shiˍ gʼa maˇ jaˇ ve yoˬ. 17Paw sha paˍ oˇ ve yawˇ ve nyi ma hkʼaw chi hkʼe dawˇ ve, Ngaˬ hkʼaˬ hkʼe gʼa te tuˬ le. Ngaˬ ve awˬ shiˍ awˬ nu teˇ hpaˍ hta‸ keu taˍ kuiˬ maˇ kʼaw‸ cawˬ. 18Peuˬ leh yawˇ dawˇ ve, Ngaˬ chi hkʼe te tuˬ yoˬ. Ngaˬ ve caˬ ciˇ yehˬ teˇ hpaˍ hta‸ hpaˆ baˬ leh, leuˉ leh uiˍ ve teˇ hpaˍ hta‸ kʼaw‸ te tuˬ yoˬ. Oˇ ve teˇ hpaˍ awˬ hkʼaw lo ngaˬ ve caˬ shiˍ leh mawˇ jeˬ hkʼa peu-eˬ hta‸ keu taˍ tuˬ yoˬ. 19Oˇ htaˇ ngaˬ ve nyi ma hta‸ chi hkʼe kʼoˆ piˇ tuˬ yoˬ. Nyi ma-oˬ, nawˬ lehˬ laiˉ hkʼaw‸ awˬ pon mawˇ jeˬ teˇ hpaˍ hkʼa deh‸ shaw hpoˆ taˍ peuˬ. Gʼaˇ jehˇ-oˆ. Hkʼa deh‸ caˇ chehˇ dawˬ chehˇ leh ha lehˬ chehˇ-oˆ teh‸ kʼoˆ tuˬ yoˬ. 20Ya‸ hkʼaˇ Gʼuiˬsha kʼoˆ ve, Chaw luˬ paˍ-oˬ, ya‸ puiˉ ka‸ nawˬ ve co ha hta‸ yuˬ hkʼaw‸ tuˬ yoˬ. Hkʼe te leh, nawˬ shaw hpoˆ taˍ ve mawˇ teˇ hpaˍ a shu ve mawˇ hpeh‸ tuˬ le teh‸ yawˇ hta‸ kʼoˆ piˇ ve yoˬ.

21A shu yawˇ awˬ to awˬ pon mawˇ jeˬ hta‸ shaw hpoˆ leh, Gʼuiˬsha hpawˇ lo haˍ gʼawˇ ve chaw lehˬ, oˇ ve hkʼa shuˍ shuˍ hpeh‸ ve yoˬ teh‸, yawˇ hui hta‸ kʼoˆ piˇ ve yoˬ.

Dawˇ haˍ dawˇ hkiˉ ve awˬ lawn

22Peuˬ leh, yawˇ ve awˬ la‸ gʼawˇ hui hta‸ kʼoˆ piˇ ve, Hkʼe te leh, ngaˬ nawˬ hui hta‸ kʼoˆ laˇ ve, hkʼaˬ hkʼe te gʼa caˇ gʼa dawˬ tuˬ, nawˬ hui a sha‸ te‸ ve awˬ pon taˇ dawˇ hkiˉ. Hkʼaˬ hkʼe te gʼa veu‸ gʼa deh tuˬ, nawˬ hui awˬ to awˬ pon ka‸ taˇ dawˇ hkiˉ. 23A sha‸ te‸ ve teˇ ceuˬ lehˬ, caˇ tuˬ a‸ kehˉ awˬ hpfuhˇ hkʼaˆ leh, awˬ to htawˇ veu‸ kʼaˇ a‸ kehˉ awˬ hpfuhˇ hkʼaˆ ve yoˬ. 24Aˉ naˆ kʼaˍ teˇ hpaˍ hta‸ dawˇ nyi-o. Yawˇ hui lehˬ, caˬ maˇ ti, maˇ gʼeu‸. Caˬ ciˇ yehˬ maˇ kʼoˆ, mawˇ jeˬ shaw hpoˆ kuiˬ yehˬ maˇ kʼoˆ, maˇ cawˬ. Ya‸ hkʼaˇ, Gʼuiˬsha yawˇ hui hta‸ caˍ piˇ taw piˇ ve yoˬ. Nawˬ hui lehˬ, ngaˆ oˇ ve teˇ hpaˍ a‸ kehˉ awˬ hpfuhˇ hkʼaˬ ma hkʼaˆ ve le. 25Nawˬ hui awˬ hkʼaw lo hkʼaˬ ve chaw teˇ gʼaˇ maˇ kʼoˆ, dawˇ hkiˉ ve pa taw a shu yawˇ ve a sha‸ teˇ jaˆ kʼaw‸ zuhˬ la tuˬ, a shu te gʼa le. 26Hkʼe te leh, i jaˇ ve awˬ ceuˬ hta‸ ceh ka‸ nawˬ hui te maˇ gʼa ve kʼo, awˬ kaˍ awˬ nu awˬ ceuˬ teˇ hpaˍ hta‸ aˬ hto‸ ma te nawˬ hui dawˇ hkiˉ ve le. 27Shiˍ ya‸ veˆ hkʼaˬ hkʼe te uiˍ la ve hta‸ dawˇ nyi-o. Awˬ cehˬ oˇ ve teˇ hpaˍ lehˬ, kanˉ maˇ te, hkeh ka‸ maˇ gʼawˬ. Ya‸ hkʼaˇ, awˬ me‸ awˬ hponˇ uiˍ ve jawˇmawˇ Sawˉla‸monˍ lehˬ, awˬ cehˬ oˇ ve teˇ hpaˍ awˬ hkʼaw lo teˇ cehˬ hkʼe taw ka‸ maˇ gʼa veu‸ maˇ gʼa deh jaw teh‸ ngaˬ nawˬ hui hta‸ kʼoˆ laˇ ve yoˬ. 28Hkʼa deh‸ maˇ yonˍ ve chaw teˇ hpaˍ-oˬ, ya‸ nyi te‸ chehˇ leh shawˉ pawˍ aˬ miˍ hkʼaw baˬ keu tuˬ ve mvuh‸ cehˬ hta‸ Gʼuiˬsha chi hkʼe feuˉ piˇ deh piˇ ve kʼo, oˇ ve a‸ kehˉ leuˉ leh nawˬ hui hta‸ feuˉ laˇ deh laˇ tuˬ maˇ heˆ laˇ.

29Nawˬ hui hkʼaˬ hkʼe te gʼa caˇ gʼa dawˬ tuˬ taˇ ca. Dawˇ hkiˉ ve nyi ma ka‸ taˇ cawˬ piˇ. 30Awˬ lawn kʼo, miˬguiˬ chaw ceuˬ hkʼa peu-eˬ lehˬ, awˬ ceuˬ chi teˇ hpaˍ hta‸ ca chehˇ ve yoˬ. Awˬ ceuˬ chi teˇ hpaˍ nawˬ hui loˍ ve hta‸ nawˬ hui ve Awˬ pa shiˍ taˍ ve yoˬ. 31Nawˬ hui lehˬ yawˇ ve mvuhˇmiˬ hta‸ ca-o. Awˬ ceuˬ chi teˇ hpaˍ htawˇ yawˇ nawˬ hui hta‸ htehˍ laˇ tuˬ yoˬ.

Mvuhˇ naw ma hkʼoˆ lo mawˇ jeˬ shaw hpoˆ taˍ loˬ

32I ve yawˬ teˇ moˍ-oˬ, taˇ kawˆ. Nawˬ hui ve Awˬ pa lehˬ, nawˬ hui hta‸ mvuhˇmiˬ oˇ ve pe‸ laˇ tuˬ nyi ma cawˇ ve yoˬ. 33Nawˬ hui ve mawˇ jeˬ hta‸ hawˇ baˬ leh, shu hta‸ ha kʼaˉ leh tanˇ piˇ-oˆ. Maˇ piˍ puiˉ ve hpu guˉ pi teˇ hpaˍ hta‸ nawˬ hui awˬ pon te-o. Chaw hkʼawˇ hkʼawˇ yuˬ maˇ gʼa ve, pfuhˇ maˇ caˇ puiˉ ve, mvuhˇ naw ma hkʼoˆ lo maˇ peuˬ maˇ leh puiˉ ve mawˇ jeˬ hta‸ shaw hpoˆ taˍ-o‸. 34Awˬ lawn kʼo, nawˬ hui ve mawˇ jeˬ shaw hpoˆ taˍ ve teˇ kaˬ lo nawˬ hui ve nyi ma htawˇ oˇ kaˬ lo cawˬ tuˬ yoˬ.

Hkʼa deh‸ shaw chehˇ ve awˬ ceˬ teˇ hpaˍ

35Nawˬ hui ve caw‸ cehˍ nyi hta‸ haˍ pi caˆ tsuh‸ leh, kawˆ faiˇ teˇ hpaˍ hta‸ tuˉ taˍ-o‸. 36A shu yawˇ ve awˬ shehˍ hpaˇ hkehˉ caˇ kuiˬ lo kʼai kʼaw‸ la leh, yehˬ miˉ hta‸ htawˆ ve teˇ yanˇ, yawˇ hta‸ teˇ cawˬ haˉ hpaw piˇ tuˬ law chehˇ ve chaw teˇ hpaˍ hkʼa shuˍ shuˍ nawˬ hui htawˇ oˇ hkʼe te chehˇ-oˆ. 37Awˬ shehˍ hpaˇ kʼaw‸ gaˬ la ve teˇ yanˇ, shaw chehˇ ve awˬ ceˬ teˇ hpaˍ lehˬ, awˬ bon uiˍ ve yoˬ. Ngaˬ nawˬ hui hta‸ awˬ tehˬ awˬ na kʼoˆ laˇ ve, awˬ shehˍ hpaˇ lehˬ yawˇ haˍ pi tsuh‸ leh, awˬ ceˬ teˇ hpaˍ hta‸ hpui lawˇ paˇ lo mui tcuh sheˬ leh, yawˇ awˬ to yawˇ hui hta‸ te caˍ te taw piˇ tuˬ yoˬ. 38Shehˍ kʼaw hkui maˇ gaˬ sheˍ htaˇ leh naˍ, maˇ heˆ kʼo shehˍ kʼaw hkui ponˬ peuˬ hkʼaw‸ nawˉ leh naˍ, awˬ shehˍ hpaˇ kʼaw‸ gaˬ la leh, awˬ ceˬ teˇ hpaˍ chi hkʼe shaw chehˇ ve hta‸ gʼa mawˬ ve kʼo, yawˇ hui awˬ bon uiˍ ve yoˬ. 39Yehˬ shehˍ hpaˇ lehˬ, chaw hkʼawˇ laˬ tuˬ ve awˬ yanˇ hta‸ shiˍ taˍ ve hkʼe kʼo, yawˇ ve yehˬ awˬ hkʼaw lo chaw hkʼawˇ maˇ gʼa lo‸ la tuˬ yawˇ hkʼa deh‸ shaw taˍ tuˬ yoˬ teh‸ nawˬ hui shiˍ-o‸. 40Nawˬ hui htawˇ hkʼa deh‸ hehnˇ taˍ-o‸. Awˬ lawn kʼo, nawˬ hui maˇ dawˇ maˇ gaˇ ve awˬ yanˇ awˬ hkʼaw lo chaw yaˇ ve Yaˇ hpu kʼaw‸ ya‸ la tuˬ yoˬ teh‸, Yeˍsuˆ yawˇ hui hta‸ kʼoˆ piˇ ve yoˬ.

Maˇ gu maˇ hehnˇ taˍ ve awˬ ceˬ

41Oˇ htaˇ Peˍtruˆ kʼoˆ ve, Jawˇmawˇ-oˬ, tawˇ pa haˉ chi ngaˬ hui hta‸ ceh tiˉ kʼoˆ laˇ ve laˇ, maˇ heˆ kʼo chaw hkʼa peu-eˬ hta‸ kʼoˆ piˇ ve laˇ teh‸ na nyi ve yoˬ.

42Jawˇmawˇ Yeˍsuˆ kʼaw‸ kʼoˆ ve, Ka ti‸ yeˬ leh cuˇ yiˍ cawˬ ve mawˇ ha‸ shaˉ shehˍ hpaˇ teˇ gʼaˇ lehˬ, a shu le. Awˬ shehˍ hpaˇ ve awˬ ceˬ teˇ hpaˍ hta‸ awˬ yanˇ cawˇ lehˍ caˇ tuˬ dawˬ tuˬ pehˬ piˇ tuˬ, yawˇ ve awˬ shehˍ hpaˇ lehˬ yawˇ hta‸ awˬ hoˉ teh taˍ tuˬ yoˬ maˇ heˆ laˇ. 43Yawˇ ve awˬ shehˍ hpaˇ kʼaw‸ gaˬ la htaˇ, awˬ ceˬ teˇ gʼaˇ chi hkʼe te chehˇ ve hta‸ yawˇ gʼa mawˬ ve kʼo, awˬ ceˬ oˇ ve lehˬ awˬ bon uiˍ ve yoˬ. 44Ngaˬ nawˬ hui hta‸ awˬ tehˬ awˬ na kʼoˆ laˇ ve, awˬ shehˍ hpaˇ lehˬ, yawˇ ve mawˇ jeˬ hkʼa peu-eˬ awˬ hkʼoˆ awˬ ceˬ oˇ ve hta‸ awˬ hoˉ te tcuh tuˬ yoˬ. 45Ya‸ hkʼaˇ awˬ ceˬ oˇ ve lehˬ, Ngaˬ ve awˬ jawˇmawˇ haˆ haˆ maˇ kʼaw‸ la taˬ teh‸ yawˇ ve nyi ma hkʼaw dawˇ leh, awˬ ceˬ paˍ awˬ ceˬ ma teˇ hpaˍ hta‸ dawˆ leh, caˇ chehˇ dawˬ chehˇ leh tzuhˬ dawˬ bvuhˆ ve kʼo, 46awˬ ceˬ oˇ ve maˇ dawˇ maˇ gaˇ ve awˬ nyi, maˇ shiˍ ve awˬ yanˇ awˬ hkʼaw lo yawˇ ve awˬ shehˍ hpaˇ kʼaw‸ gaˬ la leh, yawˇ hta‸ hehnˇ chaweh ciˍ yanˍ leh, ka ti‸ maˇ yeˬ ve chaw teˇ hpaˍ geh chehˇ piˇ lawˬ tuˬ yoˬ.

47A shu yawˇ ve awˬ shehˍ hpaˇ ve a loˍ hta‸ shiˍ taˍ ve ka‸, maˇ gu maˇ hehnˇ taˍ leh, awˬ shehˍ hpaˇ ve a loˍ hta‸ maˇ te ve awˬ ceˬ teˇ gʼaˇ lehˬ, laiˉ hkʼe jaw‸ ve hta‸ gʼa hkanˍ tuˬ yoˬ. 48Maˇ shiˍ ve awˬ hkʼaw lo, jaw‸ keunˍ jaw‸ cawˇ ve teˇ ceuˬ hta‸ te ya‸ ve awˬ ceˬ teˇ gʼaˇ lehˬ, a ciˉ ceh tiˉ jaw‸ ve hta‸ gʼa hkanˍ tuˬ yoˬ. Maˇ chaweh gʼa ve chaw teˇ gʼaˇ le le lehˬ, maˇ chaweh gʼa kʼaw‸ shaiˍ tuˬ yoˬ. Maˇ chaweh a‸ piˇ taˍ ve hta‸ gʼa ha‸ yuˬ taˍ ve chaw teˇ gʼaˇ geh leuˉ leh kʼaw‸ lawˬ hkʼaw‸ tuˬ yoˬ.

Yeˍsuˆ hta‸ pa taw shu hpaˆ da‸ tuˬ ve awˬ lawn

49Miˬguiˬ hkʼoˆ lo aˬ miˍ baˬ keu tuˬ ngaˬ laˬ ve yoˬ. Aˬ miˍ oˇ ve chi beu‸ ka‸ to‸ chehˇ tuˬ ve hta‸ ngaˬ heuˆ gaˇ ve yoˬ. 50Ya‸ hkʼaˇ, ngaˬ gʼa hkanˍ tuˬ ve baˆtiˆsaˬ teˇ maˬ cawˬ ve yoˬ. Oˇ ve hta‸ ngaˬ maˇ hkanˍ sheˍ ve ceh ceh, nyiˉ tiˍ taˍ ve hta‸ ngaˬ hkʼaˬ ma gʼa hkanˍ ve le. 51Miˬguiˬ hkʼoˆ lo shu cawˇ da‸ hui da‸ tuˬ awˬ pon ngaˬ laˬ ve teh‸ nawˬ hui dawˇ ve laˇ. Oˇ hkʼe te tuˬ awˬ pon ngaˬ laˬ ve maˇ heˆ. Shu hpaˆ da‸ guiˇ da‸ tuˬ awˬ pon laˬ ve yoˬ teh‸, ngaˬ nawˬ hui hta‸ kʼoˆ laˇ ve yoˬ. 52Awˬ lawn kʼo, chi beu‸ hta‸ tanˬ leh, yehˬ teˇ yehˬ tiˉ awˬ hkʼaw lo chehˇ ve chaw ngaˇ gʼaˇ lehˬ, hpaˆ da‸ leh nyiˇ gʼaˇ teˇ moˍ, shehˆ gʼaˇ teˇ moˍ hpeh‸ kʼai tuˬ yoˬ. 53Awˬ pa leh awˬ yaˇ paˍ, awˬ e leh awˬ yaˇ miˇ awˬ pi leh awˬ hkuiˇ ma, teˇ gʼaˇ leh teˇ gʼaˇ hpaˆ da‸ kʼai tuˬ yoˬ teh‸ kʼoˆ ve yoˬ.

Awˬ yanˇ hta‸ fuiˍ da‸ pehˬ da‸ ve

54Chaw awˬ moˍ lonˉ hta‸ htawˇ yawˇ kʼoˆ piˇ ve, Mvuhˇ nyi kʼehˬ hpawˇ lo moˬ tawˆ la ve hta‸ nawˬ hui gʼa mawˬ ve teˇ yanˇ, Mvuhˇ yeˬ laˬ tuˬ yoˬ teh‸, teˇ cawˬ haˉ nawˬ hui kʼoˆ ve yoˬ. Kʼoˆ ve hkʼa shuˍ shuˍ hpeh‸ la ve yoˬ. 55Awˬ hawˉ hpawˇ ve mvuhˇ haw meuˆ laˬ ve hta‸ nawˬ hui gʼa mawˬ ve teˇ yanˇ, Haw jaˇ chiˆ jaˇ tuˬ yoˬ teh‸ nawˬ hui kʼoˆ ve yoˬ. Kʼoˆ ve hkʼa shuˍ shuˍ hpeh‸ la ve yoˬ. 56Heˍ puiˉ ve chaw teˇ hpaˍ-oˬ, miˬguiˬ leh mvuhˇ naw ma hta‸ nyi leh fuiˍ da‸ pehˬ da‸ tuˬ nawˬ hui shiˍ ve yoˬ. Ya‸ hkʼaˇ, chi beu‸ ve awˬ yanˇ hta‸ aˬ hto‸ ma te nawˬ hui fuiˍ da‸ pehˬ da‸ maˇ gʼa ve le.

Nawˬ hta‸ tawˇ te ve chaw hta‸ cawˇ da‸ tuˬ te-o

57Aˬ hto‸ ma te nawˬ hui hkʼaˇ nawˬ hui hteˇ ve cawˇ ve teˇ ceuˬ hta‸ fuiˍ da‸ pehˬ da‸ maˇ gʼa ve le. 58Nawˬ hta‸ tawˇ te ve chaw geh teˇ geh jawˇ mawˇ geh kʼai chehˇ ve teˇ yanˇ, ya‸ kʼaw kʼaˉ lo kʼai chehˇ htaˇ, yawˇ hta‸ cawˇ da‸ tuˬ gʼaˇ hte‸ te-o. Hkʼe maˇ heˆ kʼo, yawˇ lehˬ suhˉ jehˬ shehˍ hpaˇ geh nawˬ hta‸ gʼawˬ kʼai leh, suhˉ jehˬ shehˍ hpaˇ htawˇ htawnˍ awˬ hoˉ ve la‸ sheh awˬ hkʼaw lo nawˬ hta‸ chiˇ a‸ piˇ tuˬ yoˬ. Htawnˍ awˬ hoˉ lehˬ, nawˬ hta‸ htawnˍ hkʼaw keu laˇ tuˬ yoˬ. 59Ngaˬ nawˬ hta‸ kʼoˆ laˇ ve, peh‸ shanˍ awˬ leh teˇ peh‸ hkʼa gaˬ maˇ shaiˍ peuˬ ve ceh ceh, htawnˍ hkʼaw lo nawˬ maˇ gʼa tawˆ kʼai taˬ teh‸ Yeˍsuˆ kʼoˆ ve yoˬ.

ప్రస్తుతం ఎంపిక చేయబడింది:

Luˉka‸ li‸ 12: LHBE

హైలైట్

షేర్ చేయి

కాపీ