Luke 5

Jesu edana badiyiwa be kutanga

(Matewu 4:18-22; Mako 1:16-20)

1 # Matewu 13:1, 2; Mako 3:9, 10; 4:1 Limwe zhuba kukati Jesu ali mile pa gungwa gwe Genezareta, mbunga we bathu ukankubunganila kuhwilila dama le Ndzimu. 2Jesu kabona migoro mibili ili pa gungwa, ngono babhati be hwobe bakabe babhuda muili besuka njanga dzabo. 3Kangina mu mmwe we migoro iyeyo wakabe uli wa Simoni, ngono kankumbila kuti ausedzedze mu vula kudwa mu phili. Ipapo kagala pasi kadiya mbunga we bathu ali mu n'goro iwoyo.

4Kati apedza kulebeleka, kadwa Simoni kati, “Sedzelani tjapakati kwe vula pakangina, ngono mulonge njanga dzenyu mu vula mubhate hwobe.”

5 # Johani 21:3 Simoni kadabila eti, “She, talalila shinga kwazo busiku gose, koga akuna tjatakabhata. Koga se muijalo, ndowolonga njanga mu vula.” 6#Johani 21:6Bakati bayita sa ikoko bakabhata hwobe njinji, njanga dzikatangisa kupaluka. 7Ndizo bakadana bakwinya babo bamu n'goro mmwe, kuti bazhe bababhatshe. Bakazha, ngono bakazhadza migoro yose, migoro ikatangisa kunyungila. 8Kukati Simoni Pita ebona ikoku, kawila pasi pa zwidwi zwa Jesu, kati, “She milikani pandili, ngobe imi ndi ntjinyi!”

9Iye ne baakabe anabo, bakatjenamila bunji gwe hwobe dzabakabhata, 10kose na Jakubo na Johani bakololo ba Zebhedi, bakwinya ba Simoni. Ipapo Jesu kati kuna Simoni, “Usitje. Kudwa ngwenu kuyenda mbeli, unowobhata bathu.”

11Ndiko bakakwebela migoro yabo mu phili, bakasiya kose, bakantobela.

Jesu epodza nlume unogwala mapele

(Matewu 8:1-4; Mako 1:40-45)

12Kukati Jesu atji mu mmwe we mizi mikulu, kukazha mmwe nlume wakabe egwala mapele. Kati ebona Jesu kawa pasi nge buso gugwe kankumbila, kati, “She, ha muda, munganditjenapadza.”

13Jesu katambunudza luboko gugwe, kambhata, kati “Ndoda. Tjenapala!” Tjinyolotjo mapele kabhuda munli. 14#Zwipo 14:1-32Jesu kan'dwa kati, “Kushete waunobudza. Koga yenda unozwilakidza ku mpirisiti ngono uduse tjibhayilo tjakalebgwa ndi Mushe tjeku tjenapala tjili tjilakidzo ku bathu kuti wapodziwa.”

15Thawu ngekwa Jesu dzikaandamila mbeli, ndizo mibunga mikulu ye bathu ikakubungana kuwonteedza ne kupodziwa njigwele dzabo. 16Koga Jesu kayenda ku shango kusina bathu kanotembezela.

Jesu unopodza nthu wakalobgwa nge gulukadzi

(Matewu 9:1-8; Mako 2:1-12)

17Zhuba limwe mu mazhuba iyawo Jesu kati atjadiya, Bafarasi ne badiyi be nlayo bakabe bazha bedwa mu mizi yose ye Galili ne ye Judiya ne ku Jerusalema, bakabe bali gele ipapo. Simba la She lakabe linaye kupodza bagwele. 18Bamwe balume bakazha bakasenga nlume nge thobo wakalobgwa nge gulukadzi, bakagwisa kunlonga mu ng'umba, kumbiga mbeli kwa Jesu. 19Bakati bashaya zila ye kuyita ikoku ngekwe mbunga we bathu, bakatatha pezhugwi kwe denga, ngono bakazhula denga bakan'delusila pasi pakati kwe mbunga, mbeli kwa Jesu ali mu thobo iye. 20Jesu kati ebona kugalamoyo kwabo kati, “Lumewe, zwibi zwizo zwazwiibhatigwa.”

21Bafarasi ne badiyi be nlayo bakatangisa kukumbula tjekwabo, bezwibhuzwa beti, “Ndiani iwoyu unotuka Ndzimu? Ndiani ungazwiibhatigwa zwibi ha usi Ndzimu woga kene?”

22Jesu kaziba tjabakabe bekumbula, ngono kabhuzwa eti, “Ini mukumbula zwithu izwezwi mu mimoyo yenyu kene? 23Ndikupi kulelu, kuti, ‘Zwibi zwizo zwazwiibhatigwa,’ kene kuti, ‘Milika uyende?’ 24Koga, kuti ndizo muzibe kuti Nkololo we Nthu una simba mu shango le kuzwiibhatigwa zwibi, kati ku nlume wakalobgwa nge gulukadzi, ‘Ndokudwa nditi, milika, tola thobo iyo uyende kanyi.’ ”

25Tjinyolotjo kamilika mbeli kwabo, katola tjaabe ali lele mutjili kayenda kanyi, ekudza Ndzimu. 26Bose bakakaabala, ngono bakakudza Ndzimu. Bakazhala kutja, beti, “Nasi tabona zwinotjenamisa.”

Jesu unodana Levi

(Matewu 9:9-13; Mako 2:13-17)

27Shule kwa ikoku Jesu kayenda, ngono kabona nkhethisi unodang'wa Levi ali gele pa bugalo gugwe gwe nkhethisi. Jesu kati kunli “Unditobele.” 28Levi kamilika, kasiya tjimwe ne tjimwe ngono kantobela.

29Ipapo Levi kathamila Jesu nzano nkulu we zojiwa ku ng'umba iye ne mbunga nkulu we bakhethisi ne bamwe bathu kaja naye. 30#Luke 15:1, 2Koga Bafarasi ne badiyi babo be nlayo bakang'ong'ola ku badiyiwa babe bebhuzwa beti, “Ini muja mung'wa ne bakhethisi ne batjinyi*!”

31Jesu kabadabila, kati, “Ate banomuka zubuyanana banoshaka ng'anga, koga bagwele ndibo banoshaka ng'anga. 32Andizozha kuwodana balulwami, koga ndakawodana batjinyi, kushandukila matjinyo abo.”

Jesu ebhuzwiwa ngekwe kuzwinyima* zojiwa

(Matewu 9:14-17; Mako 2:18-22)

33Bakati kunli, “Badiyiwa ba Johani banozwinyima zojiwa betembezela, kose ne badiyiwa be Bafarasi, koga babo banoja beng'wa.”

34Jesu kashandula kati, “Apa mungayita kuti bakokiwa be nkwasha bazwinyime zojiwa atji nabo kene? 35Koga misi inowozha nkwasha kwaanowodusiwa mubali. Mu misi iyeyo banowozwinyima zojiwa.”

36Kababudza tjifaniso etji, “Akuna ungatjeka tjibata tjitshwa mujila dzwa ekotjithumila mu tjiambalo tjikulukugwi. Ha ethama eijalo, unowobe apalula jila dzwa, ngono tjibata tje jila dzwa ha tjitowodumana ne jila gulukugwi. 37Na iko akuna unodila nkumbi ntshwa mu makukhwa makulukugwi. Ha ethama eijalo, nkumbi ntshwa unowobila ukaphutula makukhwa, ngono nkumbi ukatebuka ne makukhwa kabe atjinyika. 38Nkumbi ntshwa wakafanilo digwa mu makukhwa matshwa. 39Kakale akuna ungati shule kwe kung'wa nkumbi nkulukugwi kashaka ntshwa, ngobe unowoti, ‘Nkulukugwi unozipa.’ ”

ప్రస్తుతం ఎంపిక చేయబడింది:

Luke 5: KBTP

హైలైట్

షేర్ చేయి

కాపీ