Luke 4

Satani unolika Jesu

(Matewu 4:1-11; Mako 1:12-13)

1Jesu kati ali zhele Meya yakayengemala, kashanduka edwa ku Jorodani Meya ikantungamilila ku tjilambanyika, 2kwaakalikwa ndi Satani mazhuba ali makumi manna. Aazotongoja tjimwe mu mazhuba iyawo, ndizo kubupelo gwawo wakabe ne zhala kwazo.

3Satani kati kunli, “Ha uli Nkololo we Ndzimu, idwa bgwe ileli libe tjiwunga!”

4 # Matama 8:3 Jesu kashandula kati, “Kwakakwagwa kuyi, ‘Nthu aatotjila nge tjiwunga tjoga.’ ”

5Satani katatha naye pakatathila, tjinyolotjo kanlakidza mituthu yose shango. 6Ngono Satani kati kunli “Ndowokupa fumwa yayo ne simba eleli lose, ngobe zwakapiwa imi, ngono ndopa wandada. 7Ndizo ha undinamata kose ikoku kowobe kuko.”

8 # Matama 6:13 Jesu kashandula kati, “Kwakakwagwa kuyi, ‘Namata She Ndzimu uwo, ushingile iwo woga.’ ”

9Satani kan'yisa ku Jerusalema, kaswika kammisa pa tjilungwane tje Ng'umba ye Ndzimu. Ngono kati, “Ha uli Nkololo we Ndzimu, uzwiposele pasi; 10#Njimbo 91:11, 12ngobe kwakakwagwa kuyi, ‘Unowodwa batumwa bawo be kudzimu nge kuko, kuti bakulise nge njele.’ 11Kakale kukayi, ‘Banowokugama nge maboko abo, kuti usilobe gumbo lilo mu bgwe.’ ” 12#Matama 6:16Jesu kanshandula kati, “Kwakakwagwa kuyi, ‘Usilike She Ndzimu uwo.’ ”

13Kukati Satani apedza kunlika, kansiya kwe tjibaka.

Jesu unotangisa nshingo uwe mu Galili

(Matewu 4:12-17; Mako 1:14-15)

14Jesu kabgwilila ku Galili ali mu simba le Meya, ngono tjilumbi nge kukwe tjikaandama mu shango iyeyo yose. 15Kadiya mu ng'umba dzabo dze mitembezelo, ndizo bose bakankudza.

Jesu unolambiwa ku Nazareta

(Matewu 13:53-58; Mako 6:1-6)

16Ngono Jesu kayenda ku Nazareta, iko kwaakalegwako, kukati nge zhuba le Ndzimu lekunyaluluka le Sabata kayenda ku ng'umba ye mitembezelo se wolobela kukwe. Kamilika kubala. 17Wakapiwa lukwalo gwe nlebesambeli Isaya. Kati eguzhula kawana pakakwagwa kuyi,

18 # Isaya 61:1, 2 “Meya ya She imundili,

ngobe iye wakandishalula kuti ndisumikile ndebo mbuya ku bashayi.

Wandituma kuleba sununguko ku basungwa,

nenge kuti mapofu apofunuke,

nenge kusunungula bakatshambilidziwa

19kubika gole She labanowolakidza ndulamo yabo mu bathu.”

20Ipapo kazhalila lukwalo kagubgwiliza ku nshingi, kagala pasi. Ngono mesho wose mu ng'umba ye mitembezelo akabe akalinga kunli, 21ngono katangisa kubadwa eti, “Nasi matama e lukwalo igogu amahwa ashingikala.”

22Bose bakaleba zwakanaka nge kukwe, bakatjenamila matama e ngoni aakaleba. Bakabhuzwana beti, “Apa ate nkololo wa Josefa iwoyu kene?”

23Jesu kati ku bali, “Malebeswa mowondidwa gungulupeswa linoti, ‘Ng'anga, uzwilape.’ Thama mu nzi wa kanyi kwenyu, tjatakahwa kuyi watjithama mu Kapenaume.” 24#Johani 4:44Kadwilila eti, “Ndolebesa tjose ndoti, akuna nlebesambeli unoamutjigwa mu nzi wa kanyi kwabo.

25 # 1 Bomambo 17:1 “Ndolebesa ndoti, kwakabe kuna tjilikadzi njinji mu Iziraela mu misi ya Elija, vula paisakana makole matatu ana mimwedzi ili mitathatu, kukabe bhamba gulu mu shango yose. 26#1 Bomambo 17:8-16Koga Elija aazotumigwa ku tjilikadzi njinji idzedzo, wakatumigwa ku Zarefati mu shango ye Sidoni, ku imwe tjilikadzi. 27#2 Bomambo 5:1-14Kwakabe kuna banji mu Iziraela banogwala mapele akabipa mu misi ya Elisha nlebesambeli, koga akuna ne nng'ompela wakapodziwa, kuzhe kwa Naamani we Siriya.”

28Bathu bose bakabe bali mu ng'umba ye mitembezelo bakati behwa ikoku bakazhala bushongola. 29Bakamilika bakan'dusila kuzhe kwe nzi, bakankwebela kuliteyanjelele gwe dombo, lakabe nzi iwoyo wakabakwa pezhugwi kwalo, kuti bamposele pasi. 30Koga iye wakapalama pakati kwabo kayenda.

Jesu edusa meya mbi

(Mako 1:21-28)

31Ipapo kayenda ku Kapenaume, nzi umu Galili. Mu zhuba le Sabata, kadiya bathu. 32#Matewu 7:28, 29Bakakaabadziwa nge kudiya kukwe, ngobe dama lile lakabe lina simba. 33Mu ng'umba ye mitembezelo kwakabe kuna mmwe nlume akasungwa nge meya mbi. Wakamimilila pezhugwi eti, 34“Apa unoshaka kuti titini kene, Jesu we Nazareta? Wazha kuwotilobesa kene? Ndoziba kuti uani. U iye N'yengemali we Ndzimu.”

35Jesu kantjemela eti, “Nyalala ubhude munli!” Ipapo meya mbi ukalashila nlume iwoyo pasi mbeli kwabo bose, ukabhuda munli usanhwisa zogwadza.

36Bathu bose ibabo bakakaabala bakabhuzwana beti, “Hwudiya kupi ikoku! Nge ndaulo nenge simba unotjemela meya mibi ngono ikabhuda!” 37Ndizo bathu bakaleba nge kukwe kukaandama mu ntuthu wose.

Jesu epodza banji

(Matewu 8:14-17; Mako 1:29-34)

38Jesu kabhuda mu ng'umba ye mitembezelo kayenda ku nzi wa Simoni. Mmezwale ba Simoni bakabe begwala bana luzhazhamo, ndizo Simoni ne bathu baipapo bakakumbila Jesu kuti abhatshe. 39Ndizo kama pa n'gwele katjemela luzhazhamo, ngono gukabhuda mubali. N'gwele kapola, kamilika tjinyolotjo katangisa kupa bathu zojiwa.

40Kukati zhuba lingina, bathu bakabe bana bagwele banogwala njigwele dzakasiyana siyana, bakabazhisa kunli, ndizo kababiga maboko bose, kabapodza. 41Ne meya mibi ikabhuda imimila iti, “Iwe u Nkololo we Ndzimu!”

Koga kaitjemela asingaidumile kulebeleka, ngobe yakabe iziba kuti ndiye Mesiya.

Jesu esumikila mu ng'umba dze mitembezelo

(Mako 1:35-39)

42Kukati zhuba liyedza, Jesu kabhudila ku nyelele kusina bathu. Bathu bakabe benshaka, ndizo bakati beswika paayapo bakagwisa kun'dzibila kuti asiyende ebasiya. 43Koga kabadwa kati, “Ndakafanila kuti ndisumikile ndebo mbuya ye bushe gwe Ndzimu ku mimwe mizibo, ngobe nditjo tjandakatumigwa.”

44Ngono kadwilila esumikila mu ng'umba dze mitembezelo dze Judiya.#4:44 Judiya: Dzimwe hwalo dza ntolo dzina “Galili.”

ప్రస్తుతం ఎంపిక చేయబడింది:

Luke 4: KBTP

హైలైట్

షేర్ చేయి

కాపీ