Ichanohichuru 3
3
Nerautaa leinjiin bacosane
1Nuna macohi choae teejia enotone jana jetaote, nii ita taojiaauruha Jorioocurune jaan loreri Teenforo asae cuure Fedoro, Joaan, naaonjoainuri cuu Cana Coaunera bajaauruhane coina. Jelai rijiu enoto tiaajianaain jetaote, ita taojiaaure satiin Cana Coaunera bajaauruhane coina. 2Nii jana jetaote, nii Teenforo bacuujuaniha ne leinjiin bacosaneein nejanoha caje coaauneein nenaa cacha. Cojoanoonetojoeein jetaote, nii Teenforo acuujua Caohachajeineein acaauruacha curuhateihu amaain teeure, coriqui bajaa ecu enonacaauru cajene coina. 3-4Nii jana jetaote, enooruha coina iniijina cuuruha Fedoro aina Joaane jana jetaote, acaauru caje coriqui bajae nii bacosa. Nitohaneein coriqui bajaa acaauru caje, nii bacosane jaun jetaote, coarajeein jetao:
5-6“Aonaaunra”, naa nii bacosa rai Fedorone jana:
“Chaelai teeuruhane coina jecha aite”, naain acaauru coarajihane jana jetaote:
“Nihei nohane canacaanu rai coriqui. Nena quiicha sirii tereeuni icheicha. Nasarete cocoaicha Jesocurisito coreniha, nimichuhin nichaauraain amuute coaracaara”, 7naain nii bacosa biji raotono nichajai que mucuhin michuha Fedorone jana jetaote, nii rijieeoritiin caohachanainejeein nerautae nii bacosa tijia aina rai tajichocuru. 8Nii jaun jetaote, nimichuhin nichaauraain, nii ita taojiaauruha Jorioocurune jaan loreri Teenforo asae enoha cue jeluhate jeluhatiin Cana Coaunera coroajeeun. 9-10Nitohaneein nimichuhin nichaauraain amuhin, Cana Coaunera coroaecane coaraain jetaote, satiin cojoelatiin coasichure situuruhane naineein Teenforo acuujua Caohachajeineein acaauruacha curuhateihu lauhequiin coriqui bajaera nihane coitucuhin.
Teenforo chajeneein nenaa loreri Salomoonneein acaauruacha curuhateihu neein ereerejiha Fedorone
11Nitohaneein jetaote, Fedoro aina Joaan caje coriaae nalunaa jerene nii bacosa nihane caje nerautanaa cacha. Nii jana jetaote, Teenforo chajeneein nenaa loreri Salomoonneein curuajaain nenaa asaae neeuruhane jaun, soroneein ruhanihajaaintiin cuhin cojoelatiin coarajeeure satiin nii cuu nenacaauru cachaauru. 12Nii jaun jetaote, acaauru rai:
“Chanuna canacaanu cojoaelatohichete Isaraele cocoaichacuru. Coatiha canacaanuhacha nejeein nihane nerautarihei caa cachata. Niheichu jataain leeochaauru amurijiriin, Cana Coaunera ere tonoraeraneein nihacaanune jaun niheinta”, nae Fedoro. 13Niritiin jetaote:
“Nii cana inoaensihuru Abaraaun, Isaca, Jacobo, naaonjoainuri coaunera- Cana Coaunerate, jataain nelateein nihane coina, cocoainaain rai letono Jesoso letoaelu. Acate, nii cocoainanacaihuri rai teeichene jana, jianena jeriha coberenadoro Filatone saijieein, caohateein jianena jereneeichelu. 14Nitohaneein caohachanejesina ichara nihanatiinte, jianena jeriha Filatone jana, caohateein neeichelu. Coinanaa, nechu aansai sonajaaineein nenaa jianeratequichelu. 15Nitohaneeinte, nii ichaonaa tera sohin joaerateeichene jana, ichatelu Cana Coaunera. Canacaanune, nii ichatiha Cana Coaunerane coaaraneein nihacaanu. 16Nii Jesoso corenihate nerautae caa cacha inaraacha coitucuhicha. Jesosohacha corenihate, caoachanainejeein nerautae caa cacha inara notaracaaera”, naain jetao:
17“Acanihane coitucuheneeichene jaun, sohin joaerateeichelu inara curuanaacuru aina jiniiquine coitucuhanu raotojoeeincha canejeraauru. 18Nitohaneein situhin nihanetene. Inae nere bera inoaensihuru que, ‘Naaonjoaainte cairichaaeriin inae nirijieein cuaajeein sohin jaoha cuurureeincha’, naain nere bera inoaensihuru que beratihalu inoaenlu Cana Coaunerane jaunte, Cana Coaunera ere nainaane coina, nitohaneein nii inoaenlu inara coroatajaneraanu que niicha letoanaa jereilu Mesihasi teeichelura. 19Aihane jaun, chatohaneein baaso ichaain neeichene, suujuelanaala jitariin beein, jianeein Cana Coaunera ere tonoraain neeuchete caseteco coaraquichene rai neeichene caje inara ichotemiin Cana Coaunera. 20Chaaen techu nitohaneein neeichene, nii inoaenlu inara coroatajaneraanu que niicha letoanaa jereilu Mesihasi- Jesoso letohareein nacoauneeincha. 21Nete jaiti itolere rucuheca Cana Coaunerane reentiaain, dedeeu niha cureein nere bera inoaensihuru que, inoaenlu beratiha Cana Coaunerane tocohaneeincha. 22Nii quete, cana inoaensihuru rai:
‘Caa nere beraneein caletohane rijijieeinte, inara caje nacoauneein rai nere bera letohareein Cana Coaunerara. Itolere que tonaane, nere tonoraain neeuchera. 23Nere tonorana jeriheichurute, caohachanainejeein nitajiha cuurureeincha’, naain belu cana inoaensihuru rai Moisesa.
24Caritiinte aitoroaeetoorelu Cana Coaunera ere bera inoaensi Samoeri caje coaauneein satiin nere bera inoaensihuru, catohaneein turuhane quera. 25Nii jaun inarate, nii nere bera inoaensihuru que beratihalu Cana Coaunerane rijijieein, nii naitoonjoa sirichaneein neeichera. Chaaen techu, inoaenlu cana foeratera inoaensi Abaraaun rai:
‘Satiin caa chauratane que nenacaaurune, caohachaain teratiha cureeunni ii nefoerateeuru coreniha’, naelu Cana Coaunera, cana foeratera inoaensi Abaraaun rai. 26Niritohane jaunte, oo caje nii Calaohi ichateein, jauriaanejeein inara rene letoaelu Cana Coaunera, nii coaraain neeichene, baaso ichaaechajeein neeichene jianeein neeichene, inara coroatajaneein nihane coinara”, nae jetao Fedoro, nii cuu nenacaauru cachaauru rai.
ప్రస్తుతం ఎంపిక చేయబడింది:
Ichanohichuru 3: URA
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2005, 2024, Wycliffe Bible Translators, Inc.
