Ichanohichuru 2
2
Fauha uha Cana Coaunera Suujuane
1Jorioocuru beseta Feentecosetesi janonaa bana nihane jaun jetaote, satiin le laurijieein ita taojiaain neeure, Cana Coaunera bajaauruhane coina Jesocurisito esenetaerauru.
2Nii jana jetaote, cuu le lorerijieein satiin codohacooruhane jana, luhecotariin tonijiaain cujuana rijitiin fauha uhe Cana Coaunera Suujue dede caje. 3Nitohaneein tonijiaain fauhin jetaote, nii satiin ecu nenacaauru suujueniha neeoritiin, acaauru bichohe nainetiin, usi lanaro tocohaneein lanalanaaonanae. 4Nii aina jetaote, nejelau nejelaauru, lauri laurichuru caje uhin cuu turunacaauru cachaauru rai, acaauru ere cuhane ereeure satiin Jesocurisito esenetaerauru, erelanaaca Cana Coaunera Suujuane rijijieein.
5Nii bana jetaote, cuu nii Jerosaleeun turuhin neeure lauri atane sacutaainchuru caje unacaauru Cana Coaunera aitoonjoa rijijieein ichaonacaauru Jorioocuru, ecu Feentecosetesi beseta bitoaauruhane coina. 6Nitohaneein inae acaauru ichoaae fauha Cana Coaunera Suujuane jana jetaote, tonijiaain ereeuruha Jesoso esenetaeraaurune jana jetaote, satiin codoonetoore nii lauri caje unacaauru cachaauru, acaauru ereeuru cuhane aitocuruhane aonaain. Nitohaneein jetaote, suujua inaaoritelanaala 7cojoaelatonajaain:
“Calileea cocoaichacuru nihanatiin, 8inasiina cana ere cuhane aitocure aonacaachene coina. 9Caute nihacache itolere sacutaain caje uhinichaachene,
Partia batane caje unacaauru,
Media batane caje unacaauru,
Elam batane caje unacaauru,
Jodea batane caje unacaauru,
Capadosia batane caje unacaauru,
Poonto batane caje unacaauru,
chaaen Asia batane caje unacaauru,
10Firijia batane caje unacaauru,
Paanfilia batane caje unacaauru,
chaaen Egipto batane caje unacaauru,
tajiha Sirene bujua nenaa Libia batane caje unacaauru.
Chaaen techu, cau neeure cana aina Romanocuru netonai.
11Acaauru tabaaurune Jorionecure.
Jana leochaaurute, Jorionecurenihane saijieein Joriooneein nerotocure.
Chaaen techu cau neeure cana aina Cureta batane caje unacaauru,
chaaen Arabia batane caje unacaauru, naaonjoainuri.
Nitohaneein araai laurii caje uhacachene saijieeinte, satiin lauri caje uhin nichaachene ereeuru cuhane Cana Coaunera coroaecuruhane jana aonajihancache”, naain jetao satiin cojoelatoore.
12Nitohaneein cojoelatiin jetaote: “Chatohanihane”, naain ita caje bajaae bajaecure satiin.
13Jana acaauru tabaauru jetaote: “Chaquena ereeure caa ajenacaauru”, naain acaauru batocure.
Cachaauru raite ere Fedoro.
14Nii jaun jetaote, lechoonca leinjiin aina ecu nenacaauru afosotooru aina nichaauraain jetao tonijiaain:
“Aonacuche satiin Jorioocuru. Satiin cau Jerosaleeun neiniquichene raina aitoreeunni coitucuhichene coina. 15Coatiha aitocohichene jana, aansijieeinijin ajeeuruhi caa cachaauruta. Inasiina jaiti janoneniha natiin ajeeurure. Ena nuna macojiu teejia enoto natiin, cha caaunna ajeeurure. 16Nete catohanihane coina, inoaenlu inae aitiin bihalu Cana Coaunera Ere bera inoaensi Joherine rijijieein:
17‘Inara rai quiicha tei janonaa
besautelalaje raina,
satiin chauratane que nenacaauru choae
canu suujue letohareeunnicha.
Nii banate,
quiicha chana jerei coaraain
beebejiha cuurureein canu coreniha,
inara nefoerateeurura.
Enamanaacuru niha natiinte,
acaauru que quiicha coaaratei
coaracurureeincha.
Biinaacuru nihanatiinte,
quiicha coaaratei
coaraa cuurureein acaauru sinihura.
18Nitohaneein inae cutihane banane,
saain canu cachaauru,
enecuru, quichaauru,
naaonjoainuri choae
canu suujue letoareeunni
canu ere beebejeeuruhane coinara.
19Chaenne, naain dedeeu
jataain cojoaelanaacojoai
coaaratiha cureeunnicha.
Jerichanejeeinachu,
chauratane que coaaratiha cureeunnicha.
Nii banate ecooca cureein
ichana, usi tabai,
suruaa neeonjoain,
naaonjoainuri chauratane sacutaaincha.
20Nii banate conoenereein enotora.
Jana atenete,
ichana tocoanai jana niha cureeincha.
Nitohanihate cureein
inae ichuun nejeeonriha
turu rai niha inara Curuaanaane janara.
Nii cojoanonaa banate,
coasinacaain elunareeincha.
Nerinaain nii caje nichotei cachata.
21Nete, cairichaaojoaain coaraa
Cana Curuaanaane coina
bajae bajajeein ichaonacaauru,
satiin nii caje nichotiha cuurureeincha’,
naain nere bera inoaensi Joheri que beratihalu Cana Coaunerane rijijieeinte, inae caa aihane jana coaraquichera.
22Aihana jaun, caohachaain rautaain aitocoaaunne aonacuchena, caa que erete aonaquichera Isaraele cocoaichacuru. Satiin coarajeeichene notaracaaete, itolere ichaain inara notaarate Nasarete cocoaicha Jesoso que Cana Coaunera rai letononeein nihane coitucuhichene coina niquicha. 23Nete, inae inoaenlu nitohaneein teeichene coina, niicha jerei rijijieein ichaa Cana Coaunerane jaun, inara rai tiha nii terane jana, amaain teeiche nechu aansai cachaauru raine jaun, coroso que teein sohin jaaorelu. 24Nete onaa caje ichatelu Cana Coaunera, onaa caje coulucohin, amuritonaa nainesiniha onaane jaun. 25Inoaenlu jaiti caa chauratane que turueniha Jesocurisitone janate, aitorichaain Jesosone rijitojoeein:
‘Itolere janonaa banate,
cacorataanereein Cana Curuaanaara.
Aihana jaun,
nerinaain chatohaneein canu terata.
26Nii jaaunte,
raotojoeein rachoojoeein ne canu suujuara.
Chaaen nechu,
chaque casilanaala raotojoeein ichaaon,
27curu cuhane nitajiha canu jaberocone nainatejelanaala,
niheichu
setuha canu jaberocone nainatejenereeinine jaunra.
28Iite canu que,
onaa caje ichananaja coaarateeicha.
Nii jaunna,
raotojoeein rachoojoeein nereeunni’,
nerichaain Jesoso, Cana Coaunera raine rijitojoeeinte belu curuaanaa inoaensi Rabiri que beratiha Cana Coaunerana jaun.
29Jesocurisito coreniha canejeraauru, jerecuchene esinae rauhijiriin inara rai aitete aonaquiche. Nii coitucuhichene rijijieeinte, ohalu cana foeratera Rabirine jana, conautecuruhane jaun cau ne rai natanebana. 30Nete, esinae rauhijiriin rai nere bera inoaensi niha Rabirine jaun, rai nichoala cana curuaanaa Reey neein tihane coina, rai bihalu Cana Coaunerane jaun, coaara rijijieein coitucuelu curuaanaa inoaensi Rabiri:
‘Ii ichoala ichoalacuru calaohite, Jorioocuru curuaanaa Reey niha cureeincha’, naain que coitucueratiha Cana Coaunerane jaun.
31Nii jaunte, inoaenlu jaiti turueniha Cana Coaunera letono Mesihasine jana, nota que coaara rijitojoeein:
‘Naaonjoaainte, turuha ureeincha. Nihei nitajerinaain rai jaberecota. Niheichu ecu seturinaainta. Oo cajete ichanareein Mesihasicha’, naain caohacha nainejeein jitariin coitucuhane jaun, Jesoso coaara rijitojoeein belu curuaanaa inoaensi Rabiri.
32Nii jaunna esinae rauhijiriin bihalune rijijieein, canaacaanu netonai, canaacaanu nota que ichanaa Jesosone coaracaanu, ichatiha Cana Coaunerana jaun. 33Nitohaneein ichateeinte, nacoauneein dedeeu rae Cana Coaunera, rai raotono nichajai que, aina jiniiquiin nihane coina. Chaaen techu, nitohaneein dedeeu raain, nii rai niicha tenaa jerei rai Suujue te. Niite, caa inara notaracae canaacaanu nainetiin chaluhane jaun, satiin coaraain aonaquiche. Aihana jaun, inae laen coitucuhiche raotojoeein. 34-35Coatiha Cana Coaunera ere bera curuaanaa inoaensi Rabiri, dedeeu iniha cuhilu. Cana Coaunera Calaohi Jesosote iniha cuelu. Nii jaunte,
‘ “Iite satiin Curuaanaa neeicha.
Cau caraaotono nichajai que carohan nelauriaau,
ii que nejeratenacaauru amuritohine coina
ichacaaunne reentiaaincha”,
naa Cana Curuaanaa rai Cana Coaunerara’,
naain Jesoso belu Rabiri, beratiha que Cana Coaunerane jaun.
36Aihana jaun, satiin Jorionequichene raina caa beeun raotojoeein coitucuhichene coina. Nii coroso que teein inaraacha focooin inaraacha atinai Jesosote, satiin Curuaanaa Mesihasineein te Cana Coaunera”, naa Fedorone jaun jetaote, 37que suujua rerohecaain, jataain inaderaain:
“Jesocurisito coreniha canejeraauru, cha charihacaanuta”, naain bajaauruhane jana jetaote:
38“Cana Coaunera notaracae baaso ichaain, osa que nesaruhin neosateein, naaonjoaain neeichene jianeein, Cana Curuaanaa Jesocurisito coreniha nebaotisaerateeuche satiinte, inara osa caje inara mitaain, inara rai Suujue teeine Cana Coaunerara. 39Catohaneein tihane coinate, inoaenlu beratelu Cana Coaunera. Niite nenacaaen inara caohachanu neein ne, satiin inara calaohichuru aina, satiin coriaae nenacaauru raine maajeein. Satiin niicha cotihacuri raite, rai Suujue tiha cureein Cana Curuaanaa Cana Coaunerara”, 40naain acaauru suujuatiha, nii cachaauru- baasoneein ichaonacaauru caje mituuruhane coina, Fedorone jaun jetaote, 41nii niicha beebejei esenetaain tonoraeraauru jetaote, baotisaain cojounacatenohineein, Jesoso esenetaeraneein neeure, nii bananeein nichata oaraancai cachaauru.
42Nii jaun jetaote, satiin rauhijiriin ichaaore, relanajaauruha nii afosotoorune rijijieein, ita suujua rijitojoeein jiniiquiin ita coroatajaneein, ita taojiaain ita aina Cana Coaunera bajaain, ita aina jiniiquiin lenoneein naaonjoaaunre.
Raotojoeeinte ichaaore Jesocurisito esenetaerauru.
43Nii jaun jetaote, satiin cojoelatoore, itolere ichaain cachaauru notaaratiha afosotooru que Cana Coaunerana jaun. 44Satiin nii esenetaerauru jetaote, ita suujua rijitojoeein neein, ita rai chaaelai sirichuruhane ita sihure ita acatiha tacaain. 45Chaelai acaauruacha sirii que necoreteeuruhane nenainetiinnete, ita aina nii core coriqui teein ita rai leruhin raaure, raotojoeein latecuruhane rijiinanaain. 46Cojoanoonetojoeein jetaote ita taojiaaure, ita taojiaauruhana jaan coloheri Teenforo asae. Rai lorerichuru asaae nihanatiin jetaote, ita taojiaain, ita rai lenone chaluhin lenonecure jiniiquiin, raotojoeein rachoojoeein 47Cana Coaunera coroajeein. Chaaen jetao techu, caohachaain neeuruhane coaracure satiin ecu nenacaauru cachaauru.
Cojoanoonetojoeeinte, niicha ichoteratecuri tiha acaauru aina, Cana Coaunerane jaun nejeeontejeein sacuure.
ప్రస్తుతం ఎంపిక చేయబడింది:
Ichanohichuru 2: URA
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2005, 2024, Wycliffe Bible Translators, Inc.
