Lk 21

Li xmayej li xmalka'an

(Mk 12,41-44)

1Naq kixtaqsi li rilob'aal li Jesus, kiril wiib' oxib' li b'ihom yookeb' chi k'ehok tumin sa' li xkaaxil li mayej. 2Kiril ajwi' jun li xmalka'an neb'a' yo chi xk'eeb'al aran wiib' chi kok' tumin, 3ut kixye:

—Relik chi yaal ninye eere naq li xmalka'an a'in neb'a' naab'al xk'e chiru chixjunileb'. 4Xb'aan naq chixjunileb' xe'xk'e cho'q xmayej li na'ela'ank chiruheb'; ut a'in sa' li xneb'a'il xk'e jo'ch'inal jo'nimal li wank chiru.

Roso'jik li rochoch li Yos

(Mt 24,1-3; Mk 13,1-4)

5Wan yookeb' chi seeraq'ik chirix li rochoch li Yos naq sahob'resinb'il ru rik'in ch'inqi usil pek ut mayej. Kixye li Jesus: 6“Chixjunil a'in li yookex chi xka'yankil, taawulaq xkutankil naq ink'a' taakanaaq pek chi xb'een pek chi ink'a' ta taajuk'manq”.

7Toja' naq ke'xpatz' re:

—At Tzolonel, jo'q'e taak'ulmanq a'in ut k'aru li eetalil taawanq naq taachalq chixjunil a'in?

Xtiklajik li rahilal chalk re sa' xb'een Jerusalén

(Mt 24,4-14; Mk 13,5-13)

8Kichaq'ok li Jesus ut kixye reheb': “Chek'ehaq reetal, meek'e eerib' chi b'alaq'iik. Xb'aan naq naab'aleb' te'chalq ut te'roksi link'ab'a': «Laa'inin», cha'qeb'; jo'kan ajwi': «Li xq'ehil ak nach' wank», cha'qeb'. Mexxik chirixeb'. 9Naq teerab'ihatq resil li yalok ut mululij ib', mexxiwak: tento taak'ulmanq a'in xb'enwa; ab'an toj maji'aq li roso'jik”.

10Kixye ajwi' reheb': “Te'waklije'q chi xkamsinkil rib'eb' li tenamit rik'in jalan chik tenamit, ut li awab'ej rik'in jalan chik awab'ej. 11Talaje'wanq ninqi hiik ut, sa' naab'al chi na'ajej, taawanje'q we'ej ut yajel; xiwajelaq rilb'al li taak'ulmanq, ut sa' li choxa te'wanje'q xninqaleb' eetalil.

12“Ab'anan rub'elaj chixjunil a'in texchape'q ut texrahob'tesiiq; texq'axtesiiq sa'eb' li ch'utleb'aal kab'l ut eb' li tz'alam; texk'ame'q chiruheb' li awab'ej ut eb' li ninqeb' xwankil sa' ink'ab'a'. 13Talajeek'ul a'in re xch'olob'ankil li yaal. 14K'ehomaq b'i' sa' eech'ool: meek'oxla chi rub'elaj chanru teekol eerib', 15xb'aan naq laa'in tink'e eeraatin ut xnimal ru eena'leb' li ink'a' te'ruuq xwech'b'al rix chi moko xsumenkil chixjunileb' li xik' neke'ilok eere.

16“Texq'axtesiiq xb'aan leena' eeyuwa', xb'aaneb' leeras eeriitz'in, leerech'alal ut leeramiiw, ut sa' eeyanq wan te'kamsiiq; 17ut xik' ilb'ilaqex xb'aaneb' chixjunil sa' ink'ab'a'. 18Ab'anan chi moko junaq ta rismal leejolom taasachq. 19Rik'in xkawub' eech'ool teekol leeyu'am.

Li xnimal xrahilal Jerusalén ut li xk'ulunik li K'ajolb'ej

(Mt 24,15-35; Mk 13,14-31)

20“Naq teeril li tenamit Jerusalén sutsuuq xb'aaneb' laj puub', chenawaq naq nach' chik wank li xnimal xsachik. 21Toja' naq li wanqeb' Judea eleliqeb' ut che'xikaq toj chiru tzuul; li wanqeb' sa' xyi li tenamit, che'elq aran ut li wanqeb' sa' k'aleb'aal me'ok chik sa' li tenamit, 22xb'aan naq a'anaq xkutankil li q'ajkamunk ut taatz'aqloq ru chixjunil li tz'iib'anb'il chaq.#21,22 A' li tz'iib'anb'il chaq xb'aan li propeet Daniel (cf. Dn 9,26).

23“Ra chaalel sa' xb'eeneb' li yaj aj ixq ut li yooqeb' chi tu'resink sa'eb' li kutan a'an, xb'aan naq taawanq xnimal rahilal sa' xb'een li ruuchich'och', yooq li josq'il sa' xb'een li tenamit a'in. 24Te'kamsiiq rik'in q'esnal ch'iich', te'k'ame'q chi preexil sa'atqeb' li tenamit, ut Jerusalén taayeq'imanq xb'aaneb' li maawa'eb' aj Judiiy toj reetal taatz'aqloq ru li xq'ehil eb' a'an.#21,24 Li xq'ehileb' li maawa'eb' aj Judiiy naraj naxye: chixjunileb' li kutan, chixjunileb' li chihab' naq eb' li maawa'eb' aj Judiiy te'kanaaq cho'q reeqaj eb' laj Israel sa' li paab'ank. Ab'anan naqanaw naq, sa' roso'jik, eb' laj Israel te'xtaw wi' chik xna'ajeb' chi paab'ank: Ro 11,11-32 (cf. Lk 13,35).

25“Taawanq eetalil chiru li saq'e, chiru li po ut chiruheb' li chahim; ut te'yot'e'q ut te'sachq xch'ool li tenamit sa' ruuchich'och' xb'aan li xyaab' li xkaw oq li palaw; 26te'kamje'q li winq xb'aaneb' xxiw naq yooqeb' chi xyo'oninkil li k'a' re ru taachalq sa' xb'een li ruuchich'och', xb'aan naq li xwankilal li choxa taachiq'chiq'iiq sa' xna'aj. 27Toja' naq te'ril li K'ajolb'ej yooq chaq chi k'ulunk sa' choql rik'in xnimal xwankil ut xloq'al. 28Naq taatiklaaq chixjunil a'in, kawub'resihomaq eech'ool ut chetaqsihaq leejolom, xb'aan naq ak xnach'ok chaq leekolb'al”.

29Kixye ajwi' jun li jaljookil ru aatin reheb': “Chek'ehaq reetal li xche'el li iig ut chixjunileb' li che'. 30Naq nekeril naq yookeb' chi tuxmek, aran nekenaw naq li saq'ehil ak xnach'ok chaq. 31Jo'kan ajwi' laa'ex, naq teeril naq talajk'ulmanq a'in, chenawaq naq li xnimajwal awab'ejihom li Yos ak nach' wan chaq.

32“Relik chi yaal ninye eere naq ink'a' taanume'q li tenamit a'in chi toj maji'aq talajk'ulmanq chixjunil. 33Li choxa ut li ruuchich'och' te'oso'q, a'ut li waatin ink'a' taanume'q.

Yo'oon wanqex

(Mt 24,36-44; Mk 13,32-33)

34“Chek'ehaq reetal, mi'aalo'k eech'ool xb'aan li tz'i'b'eetalil na'leb', xb'aan li kalaak ut chi xk'oxlankil rix leeyu'am. Mare anchal taachalq sa' eeb'een li kutan a'an chi maak'a'aq sa' eech'ool, 35kama' jun li kanleb'. Xb'aan naq taachalq sa' xb'eeneb' chixjunil li wanqeb' junsut junrub'el choxa. 36Chexyo'leq b'i'; rajlal chextijoq re naq kawaqex chi xkolb'al eerib' chiru chixjunil a'in li talajk'ulmanq ut xaqxooqex chiru li K'ajolb'ej”.

37Li Jesus naxtzoleb' sa' rochoch li Yos chi kutan, ut chi q'eq naxik chi hilank chiru ke sa' xb'een li tzuul Olivos xk'ab'a'; 38ut chixjunil li tenamit toj hik'ho neke'xik rik'in sa' rochoch li Yos re rab'inkil.

ప్రస్తుతం ఎంపిక చేయబడింది:

Lk 21: QQC

హైలైట్

షేర్ చేయి

కాపీ