Lk 20

Ke'xwe'chi'i rix xwankil li Jesus

(Mt 21,23-27; Mk 11,27-33)

1Sa' jun li kutan, naq li Jesus yo chi xtzolb'aleb' li tenamit sa' rochoch li Yos ut yo chi xyeeb'al li Chaab'il Esilal, ke'wulak li xb'eenileb' aj tij, eb' laj tz'iib' rochb'eeneb' li cheekel winq, 2ut ke'xye re:

—Ye qe k'aru aawankil naq nakab'aanu a'in, malaj ani xk'ehok aawe li wankilal a'in?

3Kixsumeheb' ut kixye:

—Inpatz'aq ajwi' eere laa'in. Yehomaq we: 4li xkub'iha' laj Jwan, ma re li choxa malaj reheb' li winq?

5Eb' a'an ke'ok chi xk'oxlankil sa' xch'ooleb': “Wi tqaye naq re li choxa, tixye: «K'a' put naq ink'a' xepaab'?». 6Ab'an wi tqaye naq reheb' li winq, chixjunil li tenamit toohe'xteni chi pek, xb'aan naq ch'olch'o chiruheb' naq laj Jwan a'an propeet”. 7Jo'kan naq ke'xsume naq ink'a' neke'xnaw b'ar ta xchalk chaq. 8Toja' naq li Jesus kixye reheb':

—Jo'kan ajwi' laa'in ink'a' ninye eere k'aru linwankil naq ninb'aanu a'in.

Li jaljookil ru aatin chirixeb' laj k'anjel aj kamsineleb'

(Mt 21,33-46; Mk 12,1-12)

9Ut ki'ok chi xyeeb'al reheb' li tenamit li jaljookil ru aatin a'in: “Jun li winq kiraw jun siir x'uub', kixk'e chi to' reheb' aj k'alom ut najt kimaa'aniho'k. 10Naq kixtaw xq'ehil, kixtaqla jun li xmoos rik'ineb' laj k'alom, re naq te'xk'e re ru li rawimq li tento taatz'aq. A'ut eb' laj k'alom ke'xteni li moosej ut ke'xsutq'isi chi maak'a' ke'xk'e re. 11Kixtaqla wi' chik jun li xmoos: ke'xteni ajwi' a'an, ke'xtz'eqtaana ut ke'xsutq'isi chi maak'a' ke'xk'e re. 12Kixtaqla jun chik li xmoos sa' rox sut; ut eb' a'an ke'xtiq'i ajwi' a'an ut ke'risi aran.

13“Toja' naq laj eechal re li awimq kixye sa' xch'ool: «K'aru tinb'aanu anaqwan? Tintaqla li walal raaro inb'aan; mare te'roxloq'i a'an», chan sa' xch'ool. 14Ab'an eb' laj k'alom naq ke'ril, ke'ok chi xyeeb'al chirib'ileb' rib': «A'an a'in li taa'eechaninq re li ch'och'. Qakamsiiq re naq laa'o chik too'eechaninq re». 15Ke'risi sa' li awimq ut ke'xkamsi.

“K'aru nekeye laa'ex? K'aru tixb'aanu laj eechal re li awimq rik'ineb' a'an? 16Taak'ulunq, tixsacheb' laj k'alom ut tixk'e li xch'och' reheb' jalan chik”.

Naq ke'rab'i a'in, ke'xye:

—Ink'a' taxaq chik'ulmanq a'an.

17A'ut li Jesus kixka'yaheb' ut kixye:

—K'aru xyaalal a'in li tz'iib'anb'il sa' Santil Hu:

«Li pek li ke'xtz'eqtaana eb' laj kab'lanel,

a'an li kikanaak cho'q xnimal ru pek sa' li kab'l»#20,17 Sal 118,22.?

18Chixjunil li taat'ane'q sa' xb'een li pek a'an, taakok'puk'iiq; ut li ani sa' aj b'een taat'ane'q li pek a'an, taaputz'iiq.#20,18 Is 8,14-15; Dn 2,34.44.

19Sa' ajwi' li honal a'an eb' laj tz'iib' ut eb' li xb'eenil aj tij ke'xsik' chan raj ru naq te'xchap li Jesus, xb'aan naq ke'xtaw ru naq cho'q reheb' kixye li jaljookil ru aatin a'in; ab'anan ke'xiwak chiruheb' li tenamit.

Li toj cho'q re li awab'ej

(Mt 22,15-22; Mk 12,13-17)

20Ke'ok chi xk'eeb'al reetal k'aru tixb'aanu li Jesus, ut ke'xtaqlaheb' aj k'ehol eetal rik'in. Ke'xye reheb' naq tiikeb' xch'ool naq te'xb'aanu rib'eb' re xchapb'al li Jesus sa' aatin, ut chi jo'kan te'ruuq xq'axtesinkil sa' ruq' ut rub'el xwankil li ruuchil li awab'ej. 21Ut ke'xpatz' re:

—At Tzolonel, naqanaw naq sa' xyaalal nakat-aatinak ut nakatzoleb' li tenamit, ut moko sik'so ta ru li nakawaatina, nakak'ut b'an li xb'e li Yos sa' xyaalal. 22Ma us xk'eeb'al li toj re li awab'ej, malaj ut ink'a'?

23Ab'anan li Jesus ak naxnaw li xb'alaq'eb' li xch'ool; jo'kan naq kixye reheb':

24—K'utomaq chiwu junaq tumin. Ani aj jalam u a'in ut ani aj tz'iib'ahom wank chiru?

Ke'chaq'ok:

—Re li awab'ej, chankeb'.

25Ut a'an kixye reheb':

—Q'ajsihomaq b'i' re li awab'ej li k'aru re li awab'ej, ut re li Yos li k'aru re li Yos.

26Ut ink'a' ke'ruuk xchapb'al yal ta sa' junaq aatin chiruheb' li tenamit, ke'sachk b'an xch'ool rik'in li kisumenk wi', ut ch'anch'o ke'kanaak.

Chirix li xwaklijikeb' chi yo'yo li kamenaq

(Mt 22,23-33; Mk 12,18-27)

27Wankeb' aj Saduseey ke'jilok chi xk'atq li Jesus (eb' a'an neke'xye naq ink'a' te'wakliiq chi yo'yo eb' li kamenaq), ut ke'xpatz' re:

28—At Tzolonel, laj Moisés kixtz'iib'a qachaq'rab'inkil: «Wi junaq asb'ej sumsu taakamq chi maak'a' ralal xk'ajol, chik'ame'q wi' chik li ixq xb'aan li riitz'in re naq chiwanq ralal xk'ajol li asb'ej».#20,28 Dt 25,5-10; Gn 38,8. 29Ke'wank wuqub' chi winq riitz'ineb' rib'. Li xb'een kik'amok ut kikamk chi maak'a' ralal xk'ajol. 30Kik'ame'k li ixq xb'aan li xkab' ut li rox; 31ut jo'kan ke'xk'ul chi xwuqichaleb': ke'kamk chi ink'a' ke'xkanab' ralal xk'ajol. 32Sa' roso'jik kikamk ajwi' li ixq. 33Us b'i', sa' xwaklijikeb' chi yo'yo eb' li kamenaq, anihaq tz'aqal aj ixaqil li ixq a'an? Xb'aan naq chi xwuqichaleb' ke'ixaqilink re.

34Kixye li Jesus reheb':

—Eb' li ralal xk'ajol li ruuchich'och' a'in neke'k'amok ut neke'k'ame'k. 35A'ut eb' li xk'ulub'aqeb' tz'aqonk sa' li ruuchich'och' jun chik ut sa' li xwaklijikeb' chi yo'yo li kamenaq ink'a' chik te'sumlaaq. 36Ink'a' chik ajwi' truuq te'kamq xb'aan naq jo'aqeb' chik li ánjel ut a'anaqeb' ralal xk'ajol li Yos, sa' xk'ab'a' naq xe'wakliik wi' chik chi yo'yo. 37Ut chirix li xwaklijikeb' chi yo'yo li kamenaq, laj Moisés ajwi' kiyehok xyaalal rik'in li kik'ulmank sa' li k'ix, naq kixye naq li Qaawa' a'an li xYos laj Abrahán, li xYos laj Isahak ut li xYos laj Jakob.#20,37-38 Ex 3,2-6. 38Maawa' xYos li kamenaqeb', xYos b'an li yo'yookeb', xb'aan naq cho'q re a'an yo'yookeb' chixjunil!

39Toja' naq wankeb' aj tz'iib' ke'xye re:

—At Tzolonel, us li xaye.

40Ut ink'a' chik ke'kawuuk xch'ool chi patz'ok re.

Li Kriist a'an ralal ut xQaawa' laj David

(Mt 22,41-45; Mk 12,35-37)

41Ab'an li Jesus kixye reheb':

—K'a'ut naq eb' li tenamit neke'xye naq li Kriist a'an ralal laj David? 42A' ajwi' laj David nayehok sa' xHuheb' li Saalm:

«Kixye li Qaawa' re linQaawa':

K'ojlan sa' linnim uq'

43toj reetal tink'e rub'el laawoq

eb' li xik' neke'ilok aawe».#20,42-43 Sal 110,1.

44Wi laj David naxye Qaawa' re, chan put ru naq ralalaq?

Li Jesus kixq'useb' laj tz'iib'

(Mt 23,6-7; Mk 12,38-40; Lk 11,37-54)

45Naq chixjunileb' li tenamit yookeb' chi rab'inkil, kixye li Jesus reheb' li xtzolom:

46—Chekolaq eerib' chiruheb' laj tz'iib': neke'raj b'eek chi ninq xb'aseb' li raq', neke'xrahi naq te'k'ehe'q xsahilaleb' xch'ool sa'eb' li k'ayiil, jo'kan ajwi' wank sa' li xb'een na'ajej sa'eb' li ch'utleb'aal kab'l ut wank chi xjolomil li meex naq neke'wa'ak; 47neke'xchoy xsa' li xjunkab'aleb' li xmalka'an, ut najt roq li tijok neke'xb'aanu yal re xk'utb'aleb' rib'. Eb' a'an q'axal ra taaraqmanq wi' aatin sa' xb'eeneb'.

ప్రస్తుతం ఎంపిక చేయబడింది:

Lk 20: QQC

హైలైట్

షేర్ చేయి

కాపీ