Matayo 27

Yecu i nyim Pilato

(Nen daŋ Marako 15.1; Luka 23.1-2; Lakana 18.28-32)

1Ka piny oru, olamdog adoŋo kede odoŋe me Ojudaya oporo kop karacel me neko Yecu; 2ote tweye, tere, ote miye baŋ Pilato aloc.

To a Juda

(Nen daŋ Tic 1.18-19)

3 # Tic 1.18-19 Juda ame rik oketo erupe i kome, ka oneno ni doŋ oŋolo kop oloo Yecu, oŋut oko, odwoko ciliŋ pyeradek ca baŋ olamdog adoŋo kede odoŋe, 4kun kobo ni, “An abalo pi keto erupe i kom remo a mom i bal.” Ento gin te dokke iye ni, “Mannono kopwa bo? Koppi giri.” 5En te bolo lim piny i ot Obaŋa, te wot deye oko. 6Olamdog adoŋo te tero lim-mu kun okobo ni, “Pe myero oket i akina lim me ot Obaŋa, pien owino kede remo.” 7Cite gin oporo kop karacel, ote wilo kede poto acwegulli, te bedo me yiko wele. 8Pi mano ote lwoŋo poto-nu ni, Poto me Remo, anaka tin. 9#Jek. 11.12-13Kittono kop a yam adwarpiny Jeremia okobo ocobere kakare, ni, “Rik gin otero ciliŋ pyeradek, i wel a dano ame jo mogo i akina ikwae Icrael oŋolo wellere, 10ote miyo poto acwe-gulli, acalo Rwot ocika.”

Pilato openyo Yecu

(Nen daŋ Marako 15.2-5; Luka 23.3-5; Lakana 18.33-38)

11Yecu ocuŋ i nyim aloc, aloc te penye ni, “Yin Abaka Ojudaya?” Yecu te kobo ni, “Yin ikobo giri.” 12Ento ka olamdog adoŋo kede odoŋe odote kede kop apol, en mom odok i kopporo. 13Pilato te penye ni, “Yin mom iwinyo kop apol ame odoti kede-ni, ce?” 14Ento kop ducu ame okelo en mom odok i moro acelloro; man omio aloc owuro meicel.

Oŋolli Yecu kop me to

(Nen daŋ Marako 15.6-15; Luka 23.13-25; Lakana 18.39–19.16)

15I kare me ecuban aloc yam goŋnyi lwak abuccoro acel ame gin omito. 16I kare-nono onwoŋo gin tye kede abucoro a ŋeye, a nyiŋe Baraba. 17A doŋ gin ocokere karacel, Pilato te penyogi ni, “Imito ni agonnyiwu ŋa, Baraba, onyo Yecu ame olwoŋo Kricito?” 18Pien en oŋeo ni gin omie baŋe ni nyeko.

19Ame en doŋobedo i wi kom me ŋolo kop, dako mere ocwao kwena baŋe ni, “Kur itim ginnoro i kom dano-nu ame kite atira, pien tin i waŋ lek aneno can adwoŋ meicel pire.”

20Ento olamdog adoŋo kede odoŋe te cupo lwak oko me gin kwa ka Baraba, omi nek Yecu oko. 21Aloc te dok penyogi ni, “I kom jo-ni aryo-ni imito wunu ni gonnyiwu ŋa?” Gin te dok iye ni, “Baraba.” 22Pilato dok openyogi ni, “Kara Yecu ame olwoŋo Kricito abino timo nadi?” Gin ducu ote gamo ni, “Myero gure i kom yataria.” 23En te kobo ni, “Kara piŋo? Gin aŋo arac ame otimo?” Ento gin omedde i redo ni, “Myero gure i kom yataria!” 24#Lodo 21.6-9Pilato ka oneno ni mom doŋatwerre, woo amedde ka ameda, te kwanyo pii, logo kede ciŋe i nyim lwak kun kobo ni, “Bal me remo a dano man mom i koma gira; kop mewu giwu.” 25Jo luŋ te gamo ni, “Remo mere bed i wiwa kede i wi ikwaewa.” 26Eka te doŋgonnyigi Baraba, te pwodo Yecu kede del, te miye me agura i kom yataria.

Cirikale oŋalo Yecu

(Nen daŋ Marako 15.16-20; Lakana 19.2-3)

27Cirikale aloc otero Yecu i Praitorion, eka ote coko eryoŋet megi ducu i nyime. 28Gin te gonyo boŋo mere oko i kome, ote ruke kede jor arema. 29Ote kado alukana me okuto, rwako i wie, ote keto ogada i ciŋe tuŋ cem. Orumo congi i nyime, oŋale kun okobo ni, “Oreme ba, Abaka Ojudaya!” 30Opato lao i kome, okwanyo ogada, ote jwato i wie. 31A doŋgin otyeko ŋale, ote doŋgonyo jor i kome oko, ote ruke kede boŋŋi mere ikome, ote tere me wot gure i kom yataria.

Oguro Yecu i kom yataria

(Nen daŋ Marako 15.21-32; Luka 23.26-43; Lakana 19.17-26)

32Ame onwoŋo gin adonyo oko, orwatte kede dano moro me Kurene nyiŋe Cimon, ote diye me ye yataria a Yecu. 33Ame gin otuno i kabedo a nyiŋe Golgota, ame te koppere ni, kabedo me Cogo Wic, 34#Jab. 69.21ote miye kono ame orubo kede epio ni mati; ka obilo, mom oye mato.

35 # Jab. 22.18 A doŋotyeko gure i kom yataria, ote poko boŋŋi me re oko i akinagi kun obolo iye kwir; 36gin te bedo piny kuno kure. 37Kop ame opide pire oguro malo i wie; ocoo ni, “Man Yecu, Abaka Ojudaya.” 38Ogure karacel kede oyakkogo aryo, dano acel i laŋete tuŋ cem, acel tun cam.

39 # Jab. 22.7; 109.25 Jo a nwaŋ abeo akato oyete kun oyeŋo wigi, 40#Mat. 26.61; Lak. 2.19ame okobo ni, “Yin ame iketo ot Obaŋa ite gero i nino adek, larre keni koŋ. Ka yin i Wot Obaŋa, yitto piny, iya i kom yat oko!” 41Anaka olamdog adoŋo kede opwonycik kede odoŋe daŋ oŋale amannono kun okobo ni, 42“Yam laro jo ocele, mom twero larre kene. En Abaka Icrael do; koŋ yitto piny, ya i kom yataria amanni, cite obino ye en. 43#Jab. 22.8En geno Obaŋa, koŋ larre amanni, ka en mito; pien yam okobo ni, ‘An a Wot Obaŋa.’ ” 44Anaka oyak ame oguro karacel kede daŋ acoc amannono.

Yecu oto

(Nen daŋ Marako 15.33-41; Luka 23.44-49; Lakana 19.28-30)

45Cakere i caa abicel piny te doko col i wi lobo luŋ, tuno anaka caa aboŋwen. 46#Jab. 22.1I akina me caa aboŋwen Yecu oredo kede dwon aloŋo ni, “Eli, Eli, lama cabaktani?” ame te koppere ni, “Obaŋana, Obaŋana, iweka piŋo?” 47Jo mogo ame ocuŋ kuno, ka gin owinyo, ote kobo ni, “Lo-ni alwoŋo Elia.” 48#Jab. 69.21Cucuttono dano acel i akinagi oriŋo, te kwanyo abwaŋarot, te luto i kono awac, orwako i wi tir, te miye ni jwi. 49Jo okene okobo ni, “Weku koŋ onen ka Elia abino me larre.” 50Yecu te dok redo i dwon aloŋo, te doŋ jalo kwo mere oko.

51 # Yaa 26.31-33 Nen, boŋo icika me ot Obaŋa te yec oko i dul aryo, ocakere i malo, odwogo kede naka piny. Piny oyeŋere, lela-gu obarre oko; 52dog lyele daŋ te yabere oko, kom jo acil apol a yam oto te cer oko. 53Gin odonyo oko i lyelegi; ame Yecu doŋ ocer, gin te wot i boma acil, jo apol onenogi. 54Adwoŋ me cirikale karacel kede jo a rik tye kede kun okuro Yecu, ka oneno piny oyeŋere kede gin ducu ame otimere, lworo omakogi atek, ote kobo ni, “Ateni, man kara onwoŋo atin Obaŋa!”

55 # Luk. 8.2-3 Onwoŋo daŋ tye monnogo apol kuno ame obedo ka neno i teŋe; gin yam onwoŋo lubo Yecu cakere i Galilaya kun okonye. 56I akinagi onwoŋo tye Maliam me Magdala. Maliam tota a Yakobo kede Yucepu, kede toto otino a Jebedayo.

Oyiko kom Yecu i lyel

(Nen daŋ Marako 15.42-47; Luka 23.50-56; Lakana 19.38-42)

57Otyeno te bino dano moro ame alonyo, me Arimataya, nyiŋe Yucepu; en ikome daŋ onwoŋo alub Yecu. 58En owoto baŋ Pilato, okwao kom Yecu. Pilato te ciko ni mie. 59Yucepu otero kome, te boye kede cuka camanini acil, 60te pyele i lyellere ikome a pwod nyen ame oboro abora i lela, oloro kidi adwoŋ, ogacakino i doge, te wot oko. 61Maliam me Magdala kede Maliam ocele-nu onwoŋo tye kuno, obedo gigi piny i nyim lyel.

Okur ame oguro lyel

62Odiko mere, ame en nino a lubo ceŋ me Yikere, olamdog adoŋo kede Oparicayo te cokere karacel baŋ Pilato, 63#Mat. 16.21; 17.23; 20.19; Mar. 8.31; 9.31; 10.33-34; Luk. 9.22; 18.31-33ote kobbe ni, “Adwoŋ, doŋ opo ni dano ame agoba ca, ame rik pwod kwo okobo ni, ‘A doŋ nino adek okato abino cer oko.’ 64Pi mannono, cik me gwok lyel ituno i nino me adekkere, me jo a lube kur bin dyewor ote bino kwalo oko, eka ote kobbi jo ni, ‘En doŋ ocer oko i akina jo oto’; mano mio bwol man me agikki bino doŋ bedo arac akato me agege.” 65Pilato te kobbigi ni, “Wun itye wunu kede okur; wotu, igwoke acalo itwero wunu.” 66Gin ote wot cego lyel aber a kun omwono anen iye i kom kidi, ote keto iye okur me gwoko.

ప్రస్తుతం ఎంపిక చేయబడింది:

Matayo 27: La79

హైలైట్

షేర్ చేయి

కాపీ