Matayo 26

Oporo kop me neko Yecu

(Nen daŋ Marako 14.1-2; Luka 22.1-2; Lakana 11.45-53)

1Ame Yecu doŋ otyeko kobo kop magu luŋ, en te kobbi jo mere a lube ni, 2#Yaa 12.1-27“Wun iŋeo wunu ni odoŋ nino aryo me te bedo ecuban me Kato, eka ote bino miyo Wot a dano me gure i kom yataria.”

3I kare-nu olamdog adoŋo kede odoŋe me Ojudaya ocokere karacel i dyekal alamdog adwoŋ ame nyiŋe Kayapa, 4ote poro kop karacel me mako Yecu kede ryeko me ote neke. 5Ento gin te kobo ni, “Pe i kare me ecuban, mio lwak bino tugere.”

Owiro Yecu kede moo i Betania

(Nen daŋ Marako 14.3-9; Lakana 12.1-8)

6Ame Yecu tye i Betania tuŋ a Cimon adobo, 7#Luk. 7.37-38dako moro obino baŋe kun tye kede adomo moo a ŋwece kur ame wellere dwoŋ, oonyo i wie kun en tye i dog cam. 8Ka jo a lube oneno, yigi owaŋ, ote kobo ni, “Man obalo nono piŋo? 9Pien kono ocato moo man, kono okelo lim abup me amia baŋ ocan.” 10Ka Yecu oŋeo, okobbigi ni, “Kara icano wunu dan-ni piŋo? En otio tic aber i koma. 11#Lodo 15.11Ocan itye wunu kedgi nino luŋ, ento an mom abino bedo kedwu nino luŋ. 12Moo man en oonyo i koma me eyik kede koma me ayika. 13Ateni akobbiwu ni, i wi podo luŋ kan ame obino tito iye amut aber-ri, obino kobo iye gin a dako-ni otio, me poyo en.”

Juda oporo kop kede olamdog adoŋo pi miyo Yecu baŋgi

(Nen daŋ Marako 14.10-11; Luka 22.3-6)

14I kare-nono dano acel i akina jo apar wie aryo, nyiŋe Juda me Keriot, owoto baŋ olamdog adoŋo, 15#Jek. 11.12te penyogi ni, “Ibino miya wunu ŋo, ka an abino miye baŋwu?” Gin te cule kede ciliŋ me kare naca pyeradek. 16Cakere i kare-naca en te yenyo kare aber me miyo Yecu baŋgi.

Yecu oyikere me camo Kato

(Nen daŋ Marako 14.12-21; Luka 22.7-14, 21-23; Lakana 13.21-30)

17I nino me agege me camo Ogati a Tobi Mom iye, jo a lubo Yecu obino baŋe te penye ni, “Imito ni owot oyik tuŋ kwene me icam iye cam me Kato?” 18En te gamo ni, “Wot wunu i Jerucalem baŋ ŋadi ite kobbe wunu ni, ‘Apwony okobo ni, karena doŋ ceggi. Abino camo Kato baŋi, karacel kede jo a luba.’ ” 19Jo a lube te timo acalo Yecu ocikogi, ote yubo cam me Kato.

20Ame piny doŋ oyuto, en obedo piny i dog cem karacel kede jo a lube apar wie aryo. 21A doŋ gin tye ka cam, Yecu te kobo ni, “Ateni akobbiwu ni, ŋat acel i akinawu bino keto erupe i koma.” 22Gin te conne meicel, eka ote ero penye acel acel ni, “Apwony, an ce?” 23#Jab. 41.9En te gamo ni, “Dano ame ogweo wan kede i tabo acel, en a bino keto erupe i koma. 24Wot a dano awot acalo yam ocoo i kome; ento dano ame aketo erupe i kom Wot a dano-nu, kite ame ebino neno can kede! Onwoŋo kono obedo ber, dano-nono kono rik pe onywalo.” 25Juda ame oketo erupe i kome te penye ni, “Rabbi, an ce?” En te dok iye ni, “Yin ikobo giri.”

Acakki me Cam a Rwotwa

(Nen daŋ Marako 14.22-26; Luka 22.15-20; 1 Korinto 11.23-25)

26Ame gin pwod acamo cem, Yecu omako ogati; ka doŋ okwao iye winyo, onyinyilo, omio baŋ jo a lube kun kobo ni, “Gam icam wunu, man en koma.” 27Otiŋo ikopo; ka doŋ opwoo, omiogi kun kobo ni, “Wun ducu mat wunu man; 28#Yaa 24.8; Jer. 31.31-34pien man en remona me cikere, ame oony pi jo apol me gonyo bal. 29Atittiwu ni, cakere amanni, mom dok abino mato pig olok, ituno i nino ca ka ate bino mato anyennere karacel kedwu i loc a Pappa.” 30A doŋ gin otyeko wer, ote wot oko i wi kidi me Jeituni.

Yecu otito ni Petero bino kwere

(Nen daŋ Marako 14.27-31; Luka 22.31-34; Lakana 13.36-38)

31 # Jek. 13.7 Yecu te kobbigi ni, “Dyewor a tin wun ducu ibino wunu kwanyo genwu i koma oko; pien nwaŋ ocoo ni, ‘Abino neko akwat, rommi te ket ata.’ 32#Mat. 28.16Ento ka doŋ ocera, abino telliwu yo me wot i Galilaya.” 33Petero te kobbe ni, “Kadi bed jo ducu bino kwanyo gengi oko i komi, cite an mom abino kwanyo.” 34Yecu te kobbe ni, “Ateni akobbi ni, tin, i dyewor man, a twon gweno pe ru okok, yin ibino kwera tyen adek.” 35Petero te kobbe ni, “Kadi bed to, mom abino kweri.” Jo a lube ducu te kobo kite-nono.

Yecu okwao Obaŋa i poto Gececemane

(Nen daŋ Marako 14.32-42; Luka 22.39-46)

36A doŋ Yecu owoto kedgi i kabedo ame olwoŋo Gececemane, en te ciko jo a lube ni, “Bedu kan koŋ, pwod awot kwayo Obaŋa kano.” 37En te tero Petero kede itino a Jebedayo aryo, eka te ero conne oko kede kumo adwoŋ. 38Te kobbigi ni, “Waŋcuny atek amito neka oko. Bed wunu kan, ikiu piny karacel keda.” 39Te wot i nyim anok, oryebere piny, te kwayo ni, “Pappa, ka twerre, wek ikopo man kat oko i baŋa: cite kur bed acalo an amito, ento acalo yin imito.” 40Te dwogo baŋ jo mere a lube, onwoŋogi doŋonino oko, te kobbi Petero ni, “Kara mom itwero wunu kiyo piny keda pi caa acelloro? 41Kiu piny, kwa wunu Obaŋa, me kur idony wunu i abita a Catan. Cuny mito ta, ento kom nyap.” 42Tedok wot tyen me aryo, te kwayo Obaŋa kun kobo ni, “Pappa, ka ikopo man mom twero kato ame pe ru amato, wek gin ame imito timere.” 43Te dok dwogo, onwoŋo doŋ gin onino oko, pien onwoŋo nino onuro waŋgi. 44Te dok wekogi, owoto okwao Obaŋa tyen me adek, kun kobo kite kop acellaca. 45Ka otum, en te dwogo baŋ jo mere a lube, te penyogi ni, “Pwod inino wunu? Pwod iweo wunu bo? Nen, ca doŋ ceggi, Wot a dano otye a miye iciŋ obalo. 46Ya wunu malo, owotu. Nen dano ame oketo erupe i koma doŋ ceggi.”

Omio Yecu baŋ okworrere, omake

(Nen daŋ Marako 14.43-50; Luka 22.47-53; Lakana 18.3-12)

47A pwod etye ekop, nen, Juda te pello, en dano acel i akina jo apar wie aryo-ca. En obino kede lwak jo apol ame oya ibaŋ olamdog adoŋo kede odoŋe me Ojudaya, kun gin tye kede pale me romo kede abiriŋ. 48Dano ame oketo erupe i kome nwaŋ omiogi anyut, kun kobo ni, “Dano ame abino moto kun anoto leme, nwoŋo en ennono ikome; make wunu.” 49Te onyakino baŋ Yecu, te mote ni, “Rabbi, itye?” Onoto leme. 50Yecu te gamo ni, “Awotta, i bino piŋo?” Eka gin te bino poto i kom Yecu, ote make oko. 51Nen, dano moro acel ame tye baŋ Yecu oryeo ciŋe, owoto pala romo mere, te toŋo i yit opii alamdog adwoŋ, ŋolo oko. 52Yecu te kobbe ni, “Dwok pala batti i akuro mere; pien jo ducu amako pala me romo obino tyekogi i pala me romo. 53Onyo itamo ni mom atwero kwayo Pappa me mia omalaika ame kato eryoŋet apar wie aryo oko, i caa man? 54Kara coc a yam ocoo bino cobere kakare niŋo, ni myero bed amannono?” 55#Luk. 19.47; 21.37I kare-nono Yecu te kobbi lwak ni, “Ibino wunu i koma kede pale me romo kede abiriŋ, bala ibino wunu mako ayak? Nino luŋ nwaŋ abedo kedwu i ot Obaŋa kun apwonyo, mom imaka wunu. 56Ento mano ducu otimere wek coc a yam ocoo cobere kakare.” I kare-nu jo a lube ducu oriŋo, ote weke oko.

Yecu i nyim okiko

(Nen daŋ Marako 14.53-65; Luka 22.54-55, 63-71; Lakana 18.13-14, 19-24)

57Jo ame omako Yecu otere baŋ Kayapa, alamdog adwoŋ, kan ame opwony-cik kede odoŋe ocokere iye karacel. 58Petero obedo lubo yore me icecen ituno naka i dyekal alamdog adwoŋ. Odonyo iye te bedo piny karacel kede otic me enen kit a bino gik kede.

59Olamdog adoŋo kede okiko ducu te yenyo caden me kel kop goba i kom Yecu me oneke, 60naka mom onwoŋo, kadi bed caden apol okelo kop me goba. Me agikki mere jo aryo te bino, 61#Lak. 2.19kun okobo ni, “Dano man okobo ni, ‘Atwero ke to ot Obaŋa, eka ate dok gero i nino adek.’ ” 62Alamdog adwoŋ te putte malo, te penye ni, “Mom idok iye kopporo? Man kop aŋo ame odoti kede-ni?” 63Ento Yecu te liŋ gire aliŋa. Alamdog adwoŋ te dok kobbe ni, “Amito ikwoŋ i nyiŋ Obaŋa akwo, itittiwa ka yin i Kricito, Wot Obaŋa.”

64 # Dan. 7.13 Yecu te gamo ni, “Yin ikobo; ento akobbiwu ni cakere amanni ibino neno wunu Wot a dano ame obedo piny i kabedo me kwogo i laŋet Won Twer tuŋ cem, kun bino kede pol me polo.”

65 # Olev. 24.16 Alamdog adwoŋ te yeco boŋŋi mere kene kene kun kobo ni, “Oyeto Obaŋa; kara pwod omito wunu caden me no? Doŋ iwinyo wunu kite a en oyeto kede Obaŋa. 66Itamo wunu nino iye?” Gin te dokke iye ni, “Ballere romo to.”

67 # Ica. 50.6 Gin ote pato lao i waŋe, ote doŋe: jo mogo obape kun okobo ni, 68“Yin i Kricito, yin adwarpiny do, tucciwa! Kara ŋa ojwati?”

Petero okwero Yecu

(Nen daŋ Marako 14.66-72; Luka 22.56-62; Lakana 18.15-18, 25-27)

69Petero onwoŋo tye oko, obedo piny i dyekal. Aŋeca moro te bino baŋe, te kobo ni, “Yin daŋ woki itye wun kede Yecu me Galilaya.” 70Ento en okwero i nyimgi ducu kun kobo ni, “An mom aniaŋ gin ikobo.” 71En te kato i dog paco, aŋeca ocele te nene te kobbi jo a tye kuno ni, “Dano man woki tye gin i Yecu me Najaret.”

72En dok te kwero oko kun kwoŋo akwoŋa, akobo ni, “An gira mom aŋeo dano-naca.” 73Kare te kato anok, jo ame ocuŋ kuno te bino baŋe kun okobbe ni, “Ateni yin daŋ dano acel i akinagi, pien kite me koppi nyuti.” 74En te dok kwoŋ kun lamere kene akobo ni, “An gira mom aŋeo dano-naca.” Cucuttono twon gweno te mwoco koko.

75Petero te po i kop a rik Yecu okobbe, ni, “Ame pe ru twon gweno okok, ibino kwera tyen adek.” Okato oko, okok kun cunye waŋ meicel.

ప్రస్తుతం ఎంపిక చేయబడింది:

Matayo 26: La79

హైలైట్

షేర్ చేయి

కాపీ