Mataio 10
10
Ko nā Hoko e toka Hefululua
(Maleko 3.13-19; Luka 6.12-16)
1Kua fakapotopoto mai e Iehu ona hoko e toka hefululua, oi tuku atu ai e ia ki a te ki lātou te pule ke tuli ai ki fafo nā agaga kino, ma ke fakamālōlō ai ia tagata uma kua maua i nā tauale kehekehe. 2Ko nā igoa iēnei o nā apohitolo e toka hefululua: muamua, ko Himona (ko tētahi ona igoa ko Petelu) ma tona uho ko Anitelea; ko Iakopo ma Ioane nā ataliki o Hepetaio; 3ko Filipo ma Patolomaio; ko Toma ma Mataio te aolāfoga; ko Iakopo te ataliki o Alefaio, ma Tātāio; 4ko Himona te Lotonuku, ma Iuta te Ihikaliota, tē na ia fakalata ia Iehu.
Ko te Gāluega mo te toka Hefululua
(Maleko 6.7-13; Luka 9.1-6)
5Kua uga atu e Iehu nā tamāloa iēnei e hefululua ma nā fakatonuga e vēnei: “Ko koutou e hē olo ki he fenua o tagata nukukehe pe he kakai o Hāmālia. 6Kae olo ki tagata o Ihalaelu kua vē ni māmoe e gagalo. 7#Luk 10.4-12Olo oi tālaki atu, ‘Ko te Mālō o te lagi kua tafapili mai!’ 8Fakamālōlō nā tauale, toe fakatutū nā tino kua oti, fakamamā ki lātou e maua i nā tauale kino o te kili, ma tuli ki fafo nā tēmoni. Kua maua e koutou te pule e hēai he totogi, ke vēnā foki oi tuku atu e koutou ki iētahi tino, e hēai he totogi. 9Nahe koutou kavea ni tupe aulo, ni tupe hiliva pe ni tupe apamemea i outou taga; 10#1 Kol 9.14; 1 Tim 5.18nahe kavea he ato mo te malaga, pe he kofutino fakaleoleo, pe ni hēvae, pe he tokotoko. Ko nā tino faigāluega e tatau ke fōki ki ei nā mea ke ola ai.
11“Ma ko ho he kakai pe he nuku e tau atu koutou ki ei, olo oi hakili he tino e fiafia ke ia talia koutou, oi nonofo ai ma ia i tona fale ke pa ki te taimi e olo kehe ai koutou ma te koga tēnā. 12Kāfai koutou e ulu ki loto o he fale, oi fakatālofa vē, ‘Ke ia te koutou te fīlēmū.’ 13Kāfai e talia koutou e nā tino o te fale, ke tūmau pea te fīlēmū o te Atua ia te ki lātou; kae kāfai koutou e hē ki lātou talia, oi toe fakafoki mai te koutou fakamanuiaga na fai. 14#Gāl 13.51Kāfai foki he fale pe he nuku ka hē talia ai koutou pe fia fakalogo atu, olo kehe ma kinā, ma lūlū kehe te pefu mai outou vae. 15#Ken 19.24-28; Mat 11.24E takutino atu e au ki a te koutou, kāfai e pa ki te Aho Fakamahino, ka hili atu te alofa o te Atua ki tagata o Hotoma ma Komolo i lo ki nā tino o te kakai tēnā!
Nā Fakahāuāga ka maua ai ki Lātou
(Maleko 13.9-13; Luka 21.12-17)
16 #
Luk 10.3
“Kikila! Ko koutou e uga atu e au e vē lava ni māmoe ki te mea e i ei ai nā luko. Ko koutou la e tatau ke popoto e vē ko nā gata ma agamalū e vē ko nā lupe. 17#Mlk 13.9-11; Luk 12.11-12; 21.12-15Koutou ke mataala, auā e i ei nā tino ka ki lātou pukea koutou ma kave ki te fakamahinoga, ma ka ki lātou kinia koutou i loto o nā hūnako. 18Ona ko au ka kave ai koutou ki te fakamahinoga i mua o nā kōvana ma nā tupu, ke fakailoa atu ai te Tala Lelei ki a te ki lātou ma tagata nukukehe. 19Kāfai koutou e kave e ki lātou ki te fakamahinoga, koutou nahe popole pe ka vēhea ake hautou tala e fai ki ei, ma pe fakakupu vēhea foki; ka pa ki te taimi tēnā, ka fōki atu lava ki a te koutou nā kupu ke tautatala ai koutou. 20Auā e hē ko koutou te ka tautatala, ka ko te Agaga o te koutou Tamana e tautala, kui atu ia te koutou.
21 #
Mlk 13.12; Luk 21.16 “Ka tuku atu e te uho tona uho ke tāmate, ka vēnā foki oi fai e tamana ki a lātou fānau. Ka fakahaga tau ia fānau ki o lātou mātua ma tuku atu e ki lātou ke tāmate, 22#Mat 24.9, 13; Mlk 13.13; Luk 21.17ma ka inohia koutou e tagata uma ona ko au. Ka ko te tino e onohai pea lava ke pa ki te ikuga, ka fakaolagia. 23Kāfai koutou e hāuāgia i he kakai, hōhola ki hētahi kakai. Auā e takutino atu e au ki a te koutou, e pa atu ki te taimi e hau ai te Ataliki o te Tagata, ko hēki hoko lava tautou gāluega i nā kakai uma o Ihalaelu.
24 #
Luk 6.40; Ioa 13.16; 15.20 “E hēai he tamaiti akoga e hili atu i lo tona faiakoga; e hēai he pologa e hili atu i lo tona matai. 25#Mat 9.34; 12.24; Mlk 3.22; Luk 11.15Ko te mea ia e tatau ai i te tamaiti akoga ke fiafia oi kavea ia ke vē ko tona faiakoga, ma te pologa ke vē ko tona matai. Kāfai te ulu o te kāiga e fakaigoa ki a Pelehepulo, ka hē hili atu nei la te kino o nā igoa ka fakaigoa ai nā tino o te kāiga!
Ko te Tino e Tatau ke Mātataku Ai
(Luka 12.2-7)
26 #
Mlk 4.22; Luk 8.17 “Koutou la nahe mātataku i tagata; auā e hēai he mea e tatao ke galo ka hē toe kitea, pe mumuni ka hē toe iloa. 27Ko nā mea e lea atu ai au ki a te koutou i te pōuli, e tatau ke tautatala ai koutou i te ao teatea, ma ko nā mea e lagona muhumuhu e koutou, e tatau ke vākai i loto o te malae.#10.27 i loto o te malae: pe mai luga o tuākaukau o nā fale. 28Ma ia koutou nahe mātataku i nā tino e tāmate e ki lātou te tino o te tagata, kae hē ki lātou mafaia oi tāmate te agaga; kae mātataku i te Atua e ia mafaia oi fakaumatia te tino fakatahi ma te agaga i te afi o kēna. 29E hē lua nei ni tamā manulele e mafai ke fakatau atu i he pene e fokotahi? Kae e hēai he tamā manulele e pakū tauanoa ki te kelekele, kāfai e hē loto ki ei te koutou Tamana i te lagi. 30Kae e pa foki lava kinā laulu i outou ulu, kua uma te faitau. 31Koutou la nahe mātataku; e hili lele atu te tāua o koutou i te Atua i lo nā tamā manulele e lahi.
Ko te Talia pe ko te Teteke o Keliho
(Luka 12.8-9)
32“Auā ko nā tino e folafola e ki lātou i mua o tagata ko ki lātou e āku, ka vēnā foki oi fai e au i mua o toku Tamana i te lagi. 33#2 Tim 2.12Kae ko ai lava ia tetekea au i mua o tagata, ka vēnā foki oi teteke e au i mua o toku Tamana i te lagi.
E Hē ko te Fīlēmū kae ko he Pelu
(Luka 12.51-53; 14.26-27)
34“Koutou nā vēakē ko au kua hau ke kaumai te fīlēmū ki te lalolagi. Hēai, ko au e hēki hau ke kaumai te fīlēmū, kae ko he pelu. 35Ko au kua hau ke fakahagatau ai te ataliki ki tona tamana, te afafine ki tona mātua, te fafine āvaga ki loto o te kāiga, ki tona fai mātua; 36#Mik 7.6ko nā fili e hili te kino o he tino, ko nā tino lava o tona kāiga.
37“Ko ai lava te hili tona alofa ki tona tamana pe ko tona mātua i lo au, e hē aogā ia ke kavea ma oku hoko; ko ai lava te hili tona alofa ki tona ataliki pe ko tona afafine i lo au, e hē aogā ia ke kavea ma oku hoko. 38#Mat 16.24; Mlk 8.34; Luk 9.23Ko te tino e hē ia amoa tona hātaulo ma mulimuli mai ki a te au, e hē aogā ia mo au. 39#Mat 16.25; Mlk 8.35; Luk 9.24; 17.33; Ioa 12.25Ko te tino e mānumanu ki tona ola, ka hē ia mauagia; kae ko te tino e māumau tona ola ona ko au, ka maua e ia.
Ko nā Taui
(Maleko 9.41)
40 #
Mlk 9.37; Luk 9.48; 10.16; Ioa 13.20 “Ko ai lava e ia talia koutou, kua ia talia foki au, ma ko ai lava e ia talia au kua ia talia foki tē na ia uga maia au. 41Ko ai lava e ia talia he pelofeta ona ko he pelofeta e a te Atua, ka maua fakatahi to lā taui. Ko ai lava e ia talia he tino āmiotonu ona ko he tino āmiotonu, ka maua fakatahi to lā taui. 42Ko ai lava e ia tuku atua, e tuha lava pe he ipu vai malūlū, ki hētahi o oku hoko iēnei e hili te fakatauva ona ko he hoko e ōku, e takutino atu e au ki a te koutou, ka maua lava e ia tona taui.”
ప్రస్తుతం ఎంపిక చేయబడింది:
Mataio 10: TNT
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Tokelauan New Testament © Bible Society New Zealand, 2009.
