MOTHI 14
14
Johon Baptist po Kithi Alam
(Luk. 9:7-9; Mrk. 6:14-29)
1Labang apor Herod rechopo Jisu katiki kachitha-ang arjusi; 2anang murkiya helyok pulo, “Labang ke Johon Baptist po anang kithi para bur phakngo la apotsi anang long lamehel asal katiki un apharan hel hlongo.” 3Herod po Johon po yok nepmo aro anangyok koksi akrol long thalo. Anang labang asal amuso Philip po apiso Herodiyas pe anatsi katiki. 4Piyok pu tene Johon po anangyok pulo, “Labang ke nang anangyok ki-en nange kanong kalek.” 5Herod po anangyok kamari aneng kido manta anang arleng helyok pherelo, piyok pu tene anali anang yok turki ihut pusi kikrol. 6Manta konam Herod po kiplang adin kamainot arni wang hlengo, Herodiyas pe asope donhel ango kano aro Herod poyok aneng pangsamo. 7Lasi anang seme-tangsi anang pot hange kipiyok ching-akngo. 8Anang aipe kithan wen badisi anang pulo, “John Baptist aphupo senge ipak long nepi.” 9La-amun rechopo aneng doholo, manta anang donhel ango seme-kitang apot, aro anangpen cho-junlong kangning hel aphan ta, anang kipiyok thano. 10Anang tolo aro akrol long Johon po aphu pathu hletno. 11Aro anang aphupo senge ipak long wano aro so-arlope yok pilo aro anangke anang aipe yok wang pilo. 12La aphel anang adun hel wango, aro anang abangpo pono, labang pepmo aro anali damsi Jisu yok thano.
Hajar Phongo Abangyok Jisu Kapacho
(Mrk. 6:30-44; Luk. 9:10-17; Jhn. 6:1-14)
13Jisu bangpo mar arjusi, lalong para chitereksi, nisotjot athemyok tilong pen prek do damo. Manta rat hel bangpo arjusi, rongpe hel para langpe akung-kung Jisu aphel phel duno. 14Anang lang akungyok kidam apor rat ako-ong thekngo aro anang kajinso wango aro anali yok kisohel pamelo, 15konam anithulo, adun hel anang dungyok wangsi pulo, “Holek ilong nisotjot athem aro minonke arnita chelo, rat helyok rong hel aga tolnot aro abithang an pachinam dam minang.” 16Jisu pulo, “Analiyok padam hlongek, nali analiyok pene bak kapacho yok pinot.” 17Anali anangyok pulo, “Holek hali long him plang phongo aro ok jon- ni detsi do.” 18Aro anang pulo, “Lamehel holek hane dungyok wanot.” 19Aro anang rat hel yok bap aju pangning yok thano, laparake anang him plang phongo aro ok jon-ni ensi ethakpe aga lango aro bor-eh hangsi ingbengo aro adun helyok him hel pilo, aro adun helke labang pomar rat helyok thakngo. 20Aro anali ahuwit ta cholo aro aneng ingsamo. Aro anali kicho agol hel pangrumsi pachik kere hini plengsopsi hlongo. 21Aro inghosi cholo lahel oso aro arloso kido yongta hajar phongobak apenso kido.
Jisu Lang Athak Kidam
(Mrk. 6:45-52; Jhn. 6:15-21)
22Lapara ke anang rat hel pen kachikak apor adun helyok tilong athak parlulo aro anang ango ango kamprek aga padamo. 23Aro anang rat hel pen kachikak aphel anang abithang kapingkit aphan inglong yok damo. Konam anithu lo lalong ahudetsi dolo. 24Manta tilong hel lungle para holo witsi kido, labang apor lang adul wang tongo lapen tomon ango aga para anali yok wang japmo. 25Aro adap prang baji-phili apor anang langpe athak keng-kam chijorsi anali dungyok wango. 26Manta konam adun hel anangyok lang athak akeng-kam chijorsi kiwang thekngo, anali phere detsi pulo, “Labang ke samonpo” aro anali pheresi hangsolo. 27Manta analiyok anang photsi thansi pulo, “Aha chipado, lake hanesi, phereyek.” 28Aro Pitor po anangyok pulo, “Hemphu, lake nang tene, lang athak nang dungyok pawang tolyok thanot. 29Anang pulo, “Wangot” lasi Pitor po tilong para suno aro lang athak keng-kam chijoro, aro Jisu akengthun damo. 30Manta tomon akithe kijap theksi, pheresi, lang inglum rang-rango apot, anang hang-wongsi pulo, “Hemphu niralnot.” 31La-amun Jisu anang ari dengsi, anangyok ot pen pansi pulo, “Nang beksosi kikrolpo, piyok nangthin ihik-bihik dolo?” 32Aro anali konam tilong athak arlulo aro tomon ta hamo. 33Aro tilong long kido abang anangyok chirdomsi pulo, “Khanangsi nang Arnam Aso.”
Genesarat Long Kiso Arlengyok Kapame
(Mrk. 6:53-56)
34Anali langpe arpatsi Genesarat alongri yok wango. 35Aro lalong kido arleng hel anang yok chinisi anali ahuwit ta labang ahol dungyok tolo aro ahuwit ta kiso arleng hel anang dungyok wango. 36Aro anali anangpe apreso detsi ki-ot chet hlongyok, labadi anangyok chingduk ngo; aro konbak arleng otno anali, labang ahuwit ta medet no.
ప్రస్తుతం ఎంపిక చేయబడింది:
MOTHI 14: AMRI-BSI
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Amri Karbi N.T. - AKIMI ANGTON N.T.
Copyright © 2017 by The Bible Society of India
Used by permission. All rights reserved worldwide.
