MOTHI 13
13
Chili Kirip Athenghlan
(Mrk. 4:1-9,13-20; Luk. 8:4-8,11-15)
1La-arni mat-matsi Jisu hem para olesi, langpe akung iningo. 2Lalong rat ako-ong anang dung chingrumo, lasi anang tilong along arlusi lalong iningo, aro ahuwit rat hel langpe akung arjap phrongsi dolo. 3Aro anang ako-ong athenghlan pensi analiyok pulo,“Chili kirip arleng ihut kirip yok olesi damo. 4Aro anang kirip amun angkhan amu duwar akung jang damo aro wohel wangsi chodetno. 5Aro angkhan amu ke arlong along jang damo aro lalong lungle kang-ar apotsi arong wang dapmo. 6Manta arni solo parake kudulo aro angkur kidam un-eh apotsi arong hel kreng hapmo. 7Aro angkhan amu ingsu aju jang damo, la-amun ingsu arong wangsi, labang helyok jol detno. 8Angkhan amu ke a-or alungle athak jang damo aro athe wango, angkhan ke aphoro yok, angkhan ke angkol kithom, angkhan ke thom-kep yokta letno. 9Inghosi anodo ma, anang pa-onenang.”
Athenghlan Aron
(Mrk. 4:10-12; Luk. 8:9-10)
10Lapara ke anang adun hel wangsi anangyok arjulo, “Nang pot anat analingo athenghlansi than man?” 11Aro anang analiyok pulo, “Ethakpe-alongri long kabutisit alam achohel pathek yok nali pido; manta lamehel analiyok ke pipelang. 12Piyok pu tene inghosi ako-ong do, anang yoksi piye, la-amun anang ongchotne; manta inghosi kangwe, anang potsi do, bangso ta anang para pondet bo. 13Piyok pu tene anali thek yongta thek phlenphle, arju yongta arju phlenphle, aro abhu ta hlonghle; la-apot analingot ne athenghlansi thando. 14Anali long Jisoya turki po kithan alam khanangsi chokpeno. Anang kithan, “Nali khanangsi arjuye manta jatsi abhu hlonghle ye aro nali khanangsi theknge manta jatsi atot hlonghle ye. 15Piyok pu tene labang arleng hel angthin ingtang ongo, aro anali ano hel arthat ongo aro anali amek hel solokngo lale tene anali amek hel thekngo hoi, anali ano hel arjulo hoi, anali angthin hel long abhu hlongo hoi, aro anali ne dungyok wang phakngo hoi, aro analiyok pamelo hoi.” 16Manta nali mek helsi bor-e do, piyok pu tene anali thekman aro anali ano hel ke karju aphan. 17Ne naliyok khanangsi thando, nali potsi thekdo, bangpo amokha turkihel aro dhorom kangthir arleng hel kilange yok kang-hong yongta thek hlonghle yongot, aro nali potsi arju hlongdo, bangpo karju ye kanghong yongta, arju hlonghle yongot.
Chili Kirip Acho Alam
18“La-apot nali labang kirip arleng athenghlan acho alampo onenot. 19Konam inghone bak Arnam-alongri alam arju manta abhu hlonghle, la-amun kangho ajiuli wangsi, anang angthin long kirip tangso, kharpon detman; labang duwar akung kijangdam sok amu mat matno. 20Arlong athak kijangdam asok lam achopoke labadilo, arleng hel Arnam alam arjusi, aneng arong pensi chideng penpanman. 21Manta anang angthin angkur kangwe apot anang bekso arni yoksi do man; lapara ke Arnam alamthe anat duk-hap lale honjat kiwang penpan Arnam alampo tikangman. 22Ingsu aju kijangdam asok ke ladilo, arleng hel Arnam alamthe oneman manta pirthepe long kicho-kijun kachiron aro nohok aneng kipi chotsi lamthe berklakman; la-amun anang akijol chiplangman. 23Lungle a-or athak kijangdam asok amu hel ke ladilo, anang Arnam alamthe arjusi abhu hlongman; anang khanang athe wang man, aro angkhan ke phoro isi, angkhan ke angkol kithom, angkhan ke thom-kep yokta let chotsi athe wangman.”
Uri Abap Athenghlan Alam
24Jisu kamprek athenghlan anali ngot thano, “Ethakpe-alongri ke arleng ihut anang bithar long amu akime kirip badi pachingbar un. 25Manta arleng hel amek kijangklip amun anang hutur wangsi anang sok aju bap amu rip-putsi dam hrolo. 26Lasi konam arong hel dingo aro phri si athe kiwang yok ke uri abap athe helta chiklango. 27Aro aturuhel wangsi ahemphu poyok pulo, “Hemphu, nang bithar long amu akime kiripre ma? Tene pot badi labang uri athe hel wango?” 28Anang analiyok pulo, “Labangke hutur ihutsi tikilo. Turuhel anangyok pulo, tene nang hali padamsi lamehel phusi kapangrum yok thane ma? 29Manta anang pulo, kalek, piyok pu tene uri abap kiphu amun gom asok ta phudun ponge. 30Kirot kirim weleng ayok ke gom asokpen uri abap hinita pathesonang aro kirot kirim aporsi kirot abangyok thanne uri abap hel pangrum aro kapasek ayok pangsem, manta gom asok poke rak long thal dam.”
Jamu Amu Athenghlan Alam
(Mrk. 4:30-32; Luk. 13:18-19)
31Anang kamprek athenghlan anali ngot pulo, “Ethakpe-alongri ke arleng ihut jamu amu en-ne anang bithar long kirip dam badi. 32Ahuwit amu helyok labang si kibek chot amu, manta konam labangpo theye, bangpo kijirtum arongyok thechot man, aro thengpe arong chiplang man, lasi angsong kangjar wohel ta wangsi aroten long atar chipatarman, labadi arongpe chiplangman.”
Thengkur Athenghlan Alam
(Luk. 13:20-21)
33Jisu analiyok aro isi athenghlan pisi thano, “Jipe athengkur ihut arloso pe ensi, hothom him aduk asitem long ajaldung kangdetde lengke dip klaksi bilo, bangpo badi ethakpe-alongri.”
Athenghlan hel Ki-en Ponjong Alam
34Jisu ahuwit lamehel rat helyok parhlansi thano. Anang parhlan penpe lengke analiyok lam thanthe yong ngo. 35Turki po pot kipu labangpo chok peno, “Ne parhlan pensi ne angho ingko ye, pirthepe kahurji para pot kachibuti hel done, pachiklan bo.”
Uri Abap Athenghlan Acho Alam
36Laparake Jisu rat hel yok tikango aro hem arloyok damo. Aro anang adun hel wangsi anangyok pulo, “Bithar long kido uri abap hel athenghlan alam haliyok thandak ngot. 37Anang thano, “Akime amu kirip poke Arleng Aso lo. 38Bithar ke pirthepe lo, amu akime poke longri asohel aro uri abap helke akangho asohel. 39Aro hutur hel ke ingho rip mo lake si-ik, kirot kirim ke kijut aporpolo aro kirot kirim abangke Arnam tharlonhelo. 40Uri abap hel kapangrum aro mepen kapasek labangpoke kijut aporpo lo. 41Arleng Aso anang tharlon helyok tole aro analiyok anang longri long kido ahuwit papi aro kangho katiki abangyok pangrume. 42Aro analiyok kikar jong me-aten long tiye. Lalong arleng hel suru-jo ye aro anali aso chingkretne. 43Lapara dhorom kangthir abangke anali Apa alongri long arni badisi patha-angsi doye. Inghosi ano doma anang pa-one nang.
Kabuti Puru Athenghlan
44“Ethakpe-alongri ke bithar asitem long butisi kibi apuru badi; bangpo inghone bak arleng po thek hlongsi, butisi biman; la-aphel anengrong pen damsi, anang ahuwit kidohel chijor detsi, labang bitharpo namo.” 45“Aro ethakpe-alongri ke kimechot ser kabisar ihut kijor-kihrep badi. 46Anang isi adorchot ser thek hlongsi damo, anang ahuwit kidohel chijor detsi, bangpo namo.” 47“Aro ethakpe-alongri ke langpe long kiwar aro ajatjat ok hel kapangrum ipak lan badi. 48Konam lanpo plengo, arleng hel bamyok wansi, lalong iningsi, aro akime ok helke bu along thalsi, akangho helke tidetno. 49Ladisi owepo kijut aporta chiplange; ethakpe atharlon hel wangsi dhorom kangthir abang asitem para kangho helyok papreksi, 50anali yok kikar jong ame longsi tiye; la-amun arleng hel surujo ye aro anali aso-chingkre ye.” 51“Nali lamehel abhu hlongdo ma?” Anali anangyok pulo, “Oik,” 52aro anang analiyok pulo, “Lasi kanong kapaklang abangten inghosi ethakpe-alongri aphan chirwalo, anangke hem hemphu ihut anang apuru long para aban aro akimi olene kiwan badi.” 53Jisu labang athenghlan po pa-orsi anang athempo tikangsi damo.
Jisu yok Najaret Abang Kachidengde
(Mrk. 9:7-9; Mrk. 6:14-29)
54Aro anang abithang alongri wangsi, lahel kachirdom ahemlong kapaklang hel asombhik hlongo, aro pulo, “Labang arlengpo labang agiyan aro lamehel ajakong daklong para hlongo?” 55Anangke hem kakundarpo aso kalek ma? Anang aipe amen Mary kipu pe kalaek ma? Aro amuso hel amen Jems po, Jusep po, Simon po aro Judas po kalek ma? 56Aro angjir pe hel ahuwit ili pen holek dode yong ma? Tene labang ahuwit daklong parate hlongo?” 57Aro anali anangyok ado pahlongo. Manta Jisu analiyok pulo, “Abithang alongri aro abithang ahem aparke jotmehel turki ihut aman wepho dode.” 58Aro anali kikrolkre anat anang lalong ako-ong asombhik asal tiki ke paklangkle yongo.
ప్రస్తుతం ఎంపిక చేయబడింది:
MOTHI 13: AMRI-BSI
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Amri Karbi N.T. - AKIMI ANGTON N.T.
Copyright © 2017 by The Bible Society of India
Used by permission. All rights reserved worldwide.
