Lukas 3

Palabra di Jon Batista

(Mat 3.1-12; Mar 1.1-8; Jon 1.6-8,19-36)

1Na anu kinzi di renansa di Rei Tiberiu, Ponsiu Pilatus seduba gubernadur di Judeia; Erodis na mandaba na Galileia; si ermon Filip na mandaba na reẑion di Itureia ku Trakonitis; Lisânias na mandaba na Abileni; 2Anás ku#Mat 26.3; Jon 11.49; 18.13; At 4.6 Kaifás seduba ŝefis di saserdoti. Na ki tempu palabra di Deus bin pa Jon, fiju di Zakarias, ocal#Kap 1.80 na lala. 3I kumsa na yanda-yanda pa tudu ki tera na roda di riu Jordon, i na kontaba palabra di Deus, i na fala jinti: “Bo ripindi di bo pekadu, bo batisa; Deus ta purda bo pekadu.” 4I kontisi suma ki sta skritu na libru di palabra di anunsiadur Isaias#Is 40.3-5 ku fala:

“Algin na grita na lala:

‘Bo kumpu kamiñu pa Siñor;

bo ndirital strada.

5Tudu kobon na incisidu;

tudu monti, garandi ku pikininu, na justandadu;

strada ku jingi na filantadu;

kamiñus mau na niveladu;

6jinti di tudu mundu#Is 52.10 na oja salbason di Deus.’ ”

7Multidon di jinti ta bai pa Jon batisa elis. I ta falaba elis: “Jorson di kobra! Kin ku nsina bos pa kuri di kastigu ku na bin? 8Bo mostra na bo manera di yanda kuma na bardadi bo ripindi. Ka bo kumsa na fala na bo sintidu kuma Abraon#Jon 8.33 i bo pape, pabia N na fala bos kuma, te de pedra propi, Deus pudi lantanda fijus pa Abraon. 9Mancadu pudu ja na rais di pos. Tudu po#Mat 7.19 ku ka da bon fruta, i na kortadu, i botadu na fugu.”

10Pobu puntal: “Nta ke ku no dibi#At 2.37 di fasi?” 11I ruspundi i fala elis: “Kin ku tene dus kamisa, pa i rapati#Kap 11.41; 2 Kor 8.14; Tia 2.15-16; 1 Jon 3.17 ku kil ku ka tene nin un son. Kil ku tene kusa di kume, pa i fasi mesmu.”

12Kobraduris di mpustu#Kap 5.29; 18.13-14; 19.8; Mat 21.32 bai tambi pa e batisadu; e puntal: “Mestre, ke ku no dibi di fasi?” 13I ruspundi elis: “Ka bo kobra mas di ki kil ku bo mandadu.”

14Utru soldadus tambi puntal: “Anos, ke ku no dibi di fasi?” I fala elis: “Ka bo trata ningin mal; ka bo tursi ningin mon pa tomal#Sir 19.11; Fil 4.11; 1 Tim 6.6-9; Eb 13.5 kualker kusa; bo kontenti ku kil ku bo na ngaña.”

15Pobu staba diskunfiadu; kada kin na punta na si sintidu si kontra Jon i Mesias. 16Jon ruspundi i fala elis tudu: “Na bardadi ami N na batisa bos ku yagu, ma i na bin kil ki mas mi puder, ku N ka mersi dismanca si korda di sapatu. El i na batisa bos ku Spiritu Santu#At 1.5 ku fugu. 17I tene kabas na si mon pa buanta paja na arus na kau di masa. I na rukuji arus na si bemba, ma i na kema paja na fugu ku nunka ka ta paga.”

18Ku manga di utru konsiju Jon kontaba pobu Bon Noba, 19ma i raprindi Rei Erodis#Mat 14.3-4 pabia kila kasa Erodias, minjer di si ermon Filip, tambi ku tudu kusa mau ki fasi. 20Erodis buri inda utru mal: i manda fica Jon na kalabus.

Batismu di Jesus

(Mat 3.13-17; Mar 1.9-11; Jon 1.32-34)

21Oca ku tudu jinti batisadu, Jesus batisadu tambi. Oca i na ora, seu yabri, 22Spiritu Santu ria riba del na forma di kurpu di pumba. Un algin papia na seu, i fala: “Abo i ña Fiju ku N kiri ciu. N ten garandi kontentamentu na bo.”

Jorson di Jesus

(Kum 5; 11.10-32; Mat 1.1-17)

23Oca ku Jesus kumsa si tarbaju, i teneba kuas trinta#Num 4.3,23,35 anu. I kunsidu suma fiju di José; José i fiju di Eli, 24fiju di Matat, fiju di Levi, fiju di Melki, fiju di Janai, fiju di José, 25fiju di Matatias, fiju di Amos, fiju di Naun, fiju di Esli, fiju di Nagai, 26fiju di Maat, fiju di Matatias, fiju di Semei, fiju di Josek, fiju di Jodá, 27fiju di Joanan, fiju di Resa, fiju di Zorobabel, fiju di Salatiel, fiju di Neri, 28fiju di Melki, fiju di Adi, fiju di Kosan, fiju di Elmodan, fiju di Er, 29fiju di Josué, fiju di Eliezer, fiju di Jorin, fiju di Matat, fiju di Levi, 30fiju di Simeon, fiju di Judá, fiju di José, fiju di Jonan, fiju di Eliakin, 31fiju di Meleá, fiju di Mená, fiju di Matatá, fiju di Natan,#1 Kron 3.5 fiju di Davi, 32fiju di Jesé, fiju di Obed, fiju di Boaz, fiju di Salmon, fiju di Naason, 33fiju di Aminadab, fiju di Admin, fiju di Arni, fiju di Ezron, fiju di Perez, fiju di Judá, 34fiju di Jakó, fiju di Isak, fiju di Abraon, fiju di Tara,#3.34 Tara o Tera fiju di Naor, 35fiju di Serug, fiju di Ragaú,#3.35 Ragaú o Reu fiju di Falek,#3.35 Falek o Peleg fiju di Eber, fiju di Salá, 36fiju di Kainan, fiju di Arfasad, fiju di Sen, fiju di Noe, fiju di Lamek, 37fiju di Metuselá, fiju di Enok,#Eb 11.5; Jud 14 fiju di Jared, fiju di Maleleel, fiju di Kainan, 38fiju di Enos, fiju di Set, fiju di Adon,#Kum 1.27; 2.7 fiju di Deus.

ప్రస్తుతం ఎంపిక చేయబడింది:

Lukas 3: povB

హైలైట్

షేర్ చేయి

కాపీ