Matayo 12

Mwëkhari

(Mrk 2:23-28; Luk 6:1-5)

1Itungo rësëë, Yesu naa ukëëre mumëunda a ngano itiku ra mwëkhati#12:1 Mwekhari: Itiku ra utuya në Muungu warëragheeye (sabato). Uvii, asëywi vakwe vëgahumwa njaa, vëgaandya ukenyua malangilanga a ngano, vëgala mpeke yayo. 2Afarisayo nënaa voona asaa, vëgamwëëra Yesu, “Raraava asëywi vako vëutenda intu nërëtinoneye itiku ra mwekhari.” 3Yesu agavasucha, “Wurë, mwinasomaana mwino agatenda Daudi itambëëmwe na ayakwe itungo nënaa vina njaa? 4Mweeso agingëa muHekalu itambëëmwe na ayakwe, vëgala Mëkaate ëyoo Auraghëëri#12:4 Mëkaate ëyoo Auraghëëri: Mëkaate ësëë arë ëuëkwa mwitiku gusoko a akumbëki. Mweeso mba ayakwe vasaa naa vinayanjëywaa ula mikaate ësëë ëgweeso naa akumbëki gutufu. 5Mba, mwinasomaana mu Seria mwino mu itiku ra mwekhari akumbeki vëtiutëndaa mwino inoneye mu Seria mu Hekalu ëgweeso vëtigoonwaa mwino varuvaa? 6Uvii, namwëëra nyenye mwino chuu afaa urëfo në mukuu nanguu ukëra Hekalu. 7Nësa gutufu mwamanyie riana ra nkhani ëyëë: ‘Ngufenja goonëa uvavi ëgweeso ti ikumbëko,’ naamutiuvaramuëya antu nëvinaruvangaa intu. 8Gusoko Mwaamuntu unë Müküü wa mwekhari.”

Muntu në una mukhono në ukure ighandi

(Mrk 3:1-6; Luk 6:6-11)

9Yesu afuma faafo, ageenda musunagogi rawe. 10Naa gwina muntu umwe nënaa una mukhono ukure ighandi. Uvii, antu vëgamuweeya Yesu, “Wurë, inoneye umuforya muntu itiku ra mwekharina?” Vëgamuweeya uvii vëdahe uhanga nyinkwatëëyi a umusitaaka. 11Ëgweeso Yesu agavëëra, “Guhanye umwe wanyu una nkhoo akwe nëagwëëaa gëkhombo, wurë, mutëumëkwata na umëduya faafo itiku ra mwekharina? 12Muntu uu muja nanguu ukëra nkhoo! Uvii, inoneye utenda intu në ija itiku ra mwekhari.” 13Faafo agamwëëra muntu wasuu, “Ghoora mukhono wako.” Agaughoora weesoonoo ugatendeka ufanga mwino uroo ungëja. 14Uvii, Afarisayo vëgadua gunji, vëgisëya mwino vëudaha umuuragha Yesu.

Mutumami në Muungu wamuhwaniye

15Ëgweeso Yesu nënaa wamanya ihanyo rësëë agahegha faafo. Antu vingë vëgamuhonga, agavaforya arue voong'e, 16agavëëra vëtavakhanëe antu sayu yakwe, 17gusoko asaa nënaa wayahanyiye munyagëdaghu Isaya ikhondeke:

18“Raraava, mutumami wanë nënamuhwaaniye,

muyanjwi wanë wasuu në nkhoo anë ëyanjisiwe na mweeso.

Nene nguumwëka Mwahu wanë gunto akwe,

mweeso ugutanantya tutë

nanë gwa Ndugu ingëja.

19Atiutenda wina wikungumi mbesa ukürya mukindo,

mbesa ruri wakwe utiutegheeyeka gëbara.

20Ibuva nërilegheku atiuriunanga,

mbesa utambë nëugutunka yuki atiuwurimya,

faka fanaujie urëtenda iramwëya ra tutë rëbale.

21Ndughu iguhanga ighonje oosonge gwa rina rakwe.”

Yesu na Beelisebuli

(Mrk 3:20-30; Luk 11:14-23)

22Faafo antu vëgamweetea Yesu mufoku umwe nënaa gëmumu gusoko na uhukiwe na gënyonyinyonyi. Yesu agamuforya agadaha urighëtëya na goona kangë. 23Mwirundo woong'e wa antu ugataka ugahanya, “Wurë, uyuu ugudaha utendeka tutë Mwana amwa Daudina?” 24Ëgweeso Afarisayo nënaa vategheeya asaa, vëgahanya, “Muntu uyuu ugujuncha vinyonyinyonyi gwa udaho wamwa Beelisebuli, müküü wa vinyonyinyonyi.” 25Yesu gwaa uyamanya masëgho awe, agavëëra, “utemi gëkaku nëwatemanuka makhakomakhako në ëtiidahite utiudaha uhora matiku, na muji gëkaku mbesa khaya gëkaku nëatemanukie makhakomakhako në ëtiidahite, ëgugwa. 26Nësa Setani ugumujuncha Setani, ugifëngafënga mughonjo. Uvii, utemi wakwe ugëmëka wurëhe? 27Nyee muuhanya atee nene nguvijuncha vinyonyinyonyi gwa udaho wamwa Beelisebuli, wurë anaanyu vëuvijuncha gwa udaho wamwaanyuhe? Gusoko ësëë veeso unë vëjoomuramuëya nyenye. 28Ëgweeso nësa nene nguvijuncha vinyonyinyonyi gwa nguu ya Mwahu wa Muungu, uvii, manyi mwino utemi wa Muungu wadahie ufikaa kunë nyee.

29“Mbesa ugudaha wurë muntu umëfumpa khaya a muntu në wëë nguu na umuhegheya maari akwe nëakëë inamutunga muntu wasuu në wëë nguu tanju? Faafo unë udahite umuhegheya maari akwe. 30Gëkaku muntu nëatiitambëëmwe na nee, ugumpëngampëngaa nee, na gëkaku muntu nëatiuhaangwëyaa itambëëmwe na nee, ugufaghatyaa. 31Gwa uvii, nene ngumukhanëa nyenye, mu ihutye nanë ijumi në anantu varëtendie ëgurekewa, ëgweeso ihutye ra umujuma Mwahu Mweru rëtiurakewa. 32Na muntu woong'e nëugumurighëëtya ivë Mwaamuntu ugurekewa mahutye, ëgweeso wasuu nëunguhanya ukhani në uvë kunë Mwahu Mweru, atiurekewa ihutye rësëë, mbesa mu urëmi uruu mba mu urëmi nëujie.

Mutë na Nkharë yayo

(Luk 6:43-45)

33“Mutë nësa uja nkhari yayo ëgutendeka njija, nësa ubë nkharë yayo ëgutendeka mbë. Mutë ugumanyëka gwa nkhari yayo. 34Nyee ufafo wa nyana. Muudaha wurë urighëtya mantu në maja në chu nyenye mwëavë? Gusoko muntu ugurëghetyaa ufuma na asaa nëijue munkhoo. 35Muntu në muja uguduyaa mantu në maja mu mpamba akwe në njija, na muntu në mubë uguduyaa mantu në mabë mu mpamba akwe në mbë. 36Uvii, namwëëra nyee, Itiku ra iramuëywa antu vëjoorëghëtya gwa mu ukhani nëutinoneye nëvëuwurëghëtyaa. 37Ufuma mu nkhani yako, mba uguyanjëwa mwino wëë muja mba uguramuëywa mwino uhutiye.”

Ufenja ndolyo

(Mrk 8:11-12; Luk 11:29-32)

38Faafo mukhatë a aandëki na Afarisayo vëgamwëëra Yesu, “Musëyi guufenja goona ndolyo ufuma kunë vee.” 39Mweeso agavasucha, “Ufafo në uvë na wa uramatwë ugufenja ndolyo! Utiufewa ndolyo ëgweeso ndolyo ëyoo amwa munyagëdaghu Yona gutufu. 40Mwino naa Yona agëkhaa matiku atatu mumwë nanë utiku mundaa anyangumi, uvii, mwino Mwaamuntu ujegëkhaa mufang'ë matiku atatu mumwë nanë utiku. 41Antu va uNinawë vëjoodwëëra itiku ra uramuëywa, veeso vëjeuwuramuëya ufafo uruu mwino ukweti ihutye. Gusoko Anyaninawë vëgafea mahutye gusoko a utanantyo wamwa Yona, na ngwë afaa urëfo në müküü nanguu ukëra Yona! 42Mukhema Mutemi wa Utaghama ujoodwëëra itungo në ufafo uruu ujooramuëywa, mweeso uguuramuëya mwino chu ukweti ihutye. Gusoko mweeso agatunda muhënjo ufuma kureengë agaja utegheeya nkhani ya mahaa makuu amwa Solomoni, na ngwë afaa urëfo në müküü nanguu ukëra Solomoni.

Usuka gwa gënyonyinyonyi nëgëbë

(Luk 11:24-26)

43“Gënyonyinyonyi gëvë nëgajunchwa ufuma kunë muntu, gëufiimangaafiimangaa mu mbugha gëufenja fana gëutuëya gëkeuhanga. 44Faafo gëgiera: ‘Nuusuka mu mëkhao anë fana naampumie.’ Ëgweeso nëgasuka na umëhanga mëkhao ëtina intu mbanduvë, ëfyaghuwe na gorwa, 45ginjë uvihora vinyonyinyonyi vingëja viimufungatë, nëvibë nanguu ukëra gyeeso, na vyoong'e vijie vyamwingëa muntu wasuu. Muntu wasuu ugutendeka mubë nanguu weemetwe ukëra afoo mwandyo. Ëgutendeka uvii gwa ufafo uruu nëubë.”

Ndughu amwa Yesu

(Mrk 3:31-35; Luk 8:19-21)

46Yesu naa ëkëë ugurëghëtya na mwirundo wa antu, itungo në yiu wakwe nanë vaunaakwe nënaa vëgafika na gëmëka gunji vëufenja urëghëtya na mweeso. 47Uvii, muntu umwe agamwëëra, “Yiu wako nanë vaunaako vëë gunji, vëufenja urëghëtya navëë.” 48Ëgweeso Yesu agamusucha muntu wasuu nënaa wamwëëra uvii, “Yiu wanë u nyanyu na vaunaanë uu vaanyu?” 49Faafo agaghoora mukhono wakwe gunto a asëywi vakwe, agahanya, “Avaa unë yiu wanë na vauna vanë! 50Gusoko gëkaku nëugutendaa nëugufenja Tata wanë në wëë girunde, wasuu unë muunaanë, muhajaanë, na yiu wanë.”

ప్రస్తుతం ఎంపిక చేయబడింది:

Matayo 12: RIMRC

హైలైట్

షేర్ చేయి

కాపీ