Genesis 35
35
Tayta Diosmi Bet-elćhu Jacobta allinpä licaycun
1Ñatac Jacob puñuyaptinmi Tayta Dios nin: “Bet-el malcaćhu yaćhanayquipä wayra liy. Chayćhümi mayurniqui Esaupi ayiyaptiqui licalishuśhayqui Tayta Diospä juc uycuna patacta lulaycunqui” nil.#Gen 28.11-17.
2Chaymi Jacob lluy aylluncunacta, paywan yaćhä nunacunäta ayalcamul nin: “Uywapäcuśhayqui taytachayquicunacta lluy wicapapäcuy, jinalcul chuyanchaculcul müdanayquita cambiaculcay. 3Bet-elmanmi lishun. Chayćhümi juc uycuna patacta ishpiycachisha llaquicuynïćhüpis puliynïćhüpis uyaliycamal yanapaycamäní Tayta Diospä” nin.
4Niptinmi Jacobman lluy taytachancunacta, linlincunaćhu arïtincunactapis apapämula. Jinaptinmi Shiquempa sircascanćhu encina lantap siquinman Jacob pampäla. 5Chaypi yalüläliptin muyülïnin malcacunaca Jacobta manaña aticaćhananpämi Tayta Dios jatun manchacuyta uycüla.
6Chaymi Jacob lluy nunancunawan “acchi” nipäcuśhanman ćhälälin; chaypa jucnin śhutinmi Bet-el nisha cala. Chay Canaan lädućhümari cala. 7Chayćhümi juc uycuna patacta lulaycula. Chaytam “Bet-elpa Diosnin” nïwan śhutichäla mayurninpïta ayiyaptin Tayta Dios chayćhu licalïshanpïta.
8Chaypïta Rebecap uywaynin Debora wañucuptinmi Bet-elpa sircanćhu cä encina lantap siquinman pampälälila. Chaymi “waꞌacuna jaćha” nïta Jacob śhutichäla.
9Chay Padan-arampi Jacob cutiyaptinmi Tayta Dios yapa licalilcul allin caycunanpä niycula:
10“Ampa śhutiqui Jacobmi;
ñatac cananpi puntaman manañam Jacobchu śhutiqui canꞌa,
sinuꞌa Israelñam” nil.#Gen 32.28.
11Chaynu śhutichalculmi nin:
“Sumä munayniyu Tayta Diosmi yaꞌa cá.
Achca-achcaman milapäcuy.
Amcunapïćha jatućha nasyuncunapis,
malcacunapis, malcap mandacünincunapis yalupäcunꞌa.
12Abrahamman, Isaacman limalicuśhá allpactam
anman uycuśhayqui, milayniquicunamanpis uycuśhämi” nil.#Gen 17.4-8.
13Chaynu nilculmi Jacob caśhancäpi Tayta Dios licula. 14Chayćhu limaśhan-laycum Jacob jatun lumicta śhaycaycachil bïnuctawan asayticta jićhaywan uycula japächaycuyninwan. 15Tayta Dioswan limaśhan sityuctam Bet-el nïta śhutichäla.#Gen 28.18-19.
Raquelmi wañucun
16Chay Bet-elpïta pasapäculmi Efrata malcaman ñaćhapaycuyalcälaña. Chayćhümi Raquelta quillan chaläluptin sumä ñacacuyan.
17Chaynu alli-allicta ñacacuyaptinmi ishyachïca: “Ama manchacuychu, caypis walaśhmi canꞌa” nin.
18Chaynu ultimunćhüña cayalmi: “Benoni#35.18 Benoni ninanꞌa hebreo limayćhu “llaquicuyćhu chulí” ninanmi. nisham śhutin canꞌa” nila. Papäninñatacmi Benjaminwan śhutichäla.
19Chayćhu Raquel wañucuptinmi Efrataman lina caminüman pampaycuśha cala. Efrata śhutiwantacmi Belenta lisipäcula. 20Chay Raquel pampacuśhanćhümi Jacob lumicta śhaycachila. Chay canancamam cayan.
21Chaypïta Israel pasaculmi Migdal-edarpa wic läduscanćhu chucllancunacta śhalcachila. 22Chayćhu Israel yaćhapäcuptinmi chulin Ruben märaśhtan Bilhawan tincuculcul puñüña. Chayta Israel yaćhäluptinmi śhunꞌunpis sumä-sumä timpucuyäla.
Jacobpa chulincuna
1Cro 2.1-2
Má, Jacobpa ćhunca ishcayniyümi chulincuna cala.
23Walmin Leaćhümi: wamä chulin Ruben, jinaman Simeon, Levi, Juda, Isacar, Zabulon cala.
24Raquelćhüñatacmi Josewan Benjamin cala.
25Raquelpa uywaynin Bilhaćhüñatacmi Danwan Neftali.
26Leap uywaynin Zilpaćhüñatacmi Gadwan Aser. Caycunam Padan-aramćhu näsi Jacobpa chulincuna capäcula.
Isaacmi wañucun
27Chaypïtam papänin Isaac yaćhaśhan Hebronpa sircascanćhu Mamre malcaman Jacob ćhäla. Chay Hebronćhümi Abrahampis Isaacpis yaćhapäcula.#Gen 13.18. 28Ñatac Isaac paćhac pusä ćhunca (180) watanćhu allin callpayu cayalmi wañucula. 29Chaynu yaśhaña cayal wañucuptinmi chulin Esauwan Jacob pampapäcula awquilluncuna caśhancäman.
ప్రస్తుతం ఎంపిక చేయబడింది:
Genesis 35: QVW
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2022, AMWAN (Old Testament text)
© 2006, Wycliffe Bible Translators, Inc. (New Testament text)
Print copy NT 2006, Liga Bíblica del Perú
